Ўзбекистон Республикасининг «Аҳолини иш билан таъминлаш тўғрисида»ги Қонунининг 17-моддасига ҳамда Ўзбекистон Республикаси Вазирлар Маҳкамасининг 2008 йил 20 августдаги «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисидаги низомни тасдиқлаш ҳақида»ги 186-сонли қарори ҳамда вилоят ҳокимининг 2008 йил 25 августдаги 145-Қ-сонли қарори ижросини таъминлаш мақсадида Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 25-моддаларига асосан қарор қиламан:

1. Хонобод шаҳрида 2013 йил даврида шаҳардаги ижтимоий ҳимояга муҳтож ва иш топишда қийналаётган шахсларни ишга жойлаштириш, улар учун иш ўринларини банд қилиб қўйиш юзасидан иловага* асосан маълумотнома тасдиқлансин.

2. «Аҳолини иш билан таъминлаш тўғрисида»ги Ўзбекистон Республикаси Қонунининг 17-моддасига асосан иловадаги корхоналарда ижтимоий ҳимояга муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш бўйича мавжуд корхона, ташкилот ва муассасаларда ишловчи ходимларининг ўртача сонининг, яъни 5554 нафарини 7,0 фоиз миқдорида белгилансин:

ўн тўрт ёшгача болалари ва ногирон болалари бўлган ёлғиз ота, ёлғиз она ва кўп болали ота-оналар учун 1 фоиз;

таълим муассасаларини тугатган ёшлар учун 2 фоиз;

муддатли ҳарбий хизматдан бўшатилганлар учун 0,5 фоиз;

ногиронлар учун 3 фоиз;

Бандликка кўмаклашиш ва аҳолини ижтимоий муҳофаза қилиш марказида иш қидирувчи сифатида ҳисобда турган пенсия ёшига яқинлашиб қолган шахслар учун 0,1 фоиз;

жазони ўташ муассасаларидан озод қилинган, жазони ўтаётган ёки суд қарорига кўра тиббий характердаги мажбурий чоралар кўрилган шахслар учун 0,2 фоиз;

ижтимоий муҳофазага муҳтож шахсларнинг бошқа тоифалари учун 0,2 фоиз миқдорида иш ўринлари захирасини белгилайди.

3. Шахсларнинг кўрсатиб ўтилган тоифалари учун иш ўринлари ходимлар томонидан ўзларининг меҳнат мажбуриятларини тўсиқларсиз бажаришини таъминлайдиган санитария-гигиена нормалари ва меҳнат шароитларига мувофиқ бўлиш керак, шу жумладан:

ногиронлар учун саломатлиги ва меҳнат фаолиятига нисбатан белгиланган кўрсаткичлар ҳисобга олинган ҳолда меҳнат фаолиятини тўлиқ бажариш имконини берувчи иш жойлари;

касб-ҳунар таълимига эга бўлмаган ёшлар учун, улар умумтаълим муассасаларини тамомлаганларидан кейин бир йил давомида шогирдлик иш жойлари ёки махсус касб-ҳунар тайёргарлигини талаб қилмайдиган иш жойлари;

ўрта махсус ва касб-ҳунар таълими муассасаларини тамомлаган ёшлар, шунингдек Ўзбекистон Республикаси Қуролли Кучларидан, Ички ишлар вазирлиги, Фавқулодда вазиятлар вазирлиги ва Миллий хавфсизлик хизмати қўшинларидан бўшатилган шахслар учун улар ўқув юртларини тамомлаганларидан кейин ёки бўшатилганларидан кейин бир йил давомида уларнинг касб-ҳунар тайёргарлигига мувофиқ келувчи иш жойлари;

ўн тўрт ёшгача болалари ва ногирон болалари бўлган ёлғиз ота, ёлғиз она ва кўп болали ота-оналарга болаларини тарбиялаш ва меҳнат мажбуриятларини бажарилишини бирга қўшиб олиб бориш имконини берувчи ўзгарувчан жадвалли иш жойлари;

жазони ижро этиш муассасаларидан озод қилинган ёки суд қарори билан тиббий йўсиндаги мажбурлов чораларига тортилган шахслар учун махсус малакани талаб қилмайдиган ҳар қандай иш жойлари.

4. Иловада кўрсатилган корхона раҳбарлари ташкилотдаги механик, назоратчи, қоровул, ўт ёқувчи, чилангар, пайвандловчи, тракторчи, фаррош, боғбон, оддий ишчи ва ҳар хил шу каби ижтимоий ҳимояга муҳтож, иш топишда қийналаётган шахсларни шаҳар Бандликка кўмаклашиш ва аҳолини ижтимоий муҳофаза қилиш маркази томонидан ишга жойлаштириш учун йўлланганларга мос келувчи ишчи ўринлари касб ва лавозимларини банд қилиб қўйишлари тавсия қилинсин.

5. Иловада кўрсатилган корхоналарнинг раҳбарлари ижтимоий ҳимояга муҳтож шахслар учун иловага асосан иш жойларини кўрсатиб ўтилган сони бажарилмаган тақдирда Вазирлар Маҳкамасининг 2008 йил 20 августдаги «Ижтимоий ҳимояга муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида»ги низомнинг 15-бандига ва қонунчиликда белгиланган тартибларга асосан жарима белгиланиши ҳақида огоҳлантирилсин.

Ижтимоий ҳимояга муҳтож шахслар учун иш жойларининг энг қам миқдори мазкур қарор билан белгиланганидан ортиқ барпо этилган тақдирда корхона, ташкилот ва муассасалар учун белгиланган тартибда имтиёзлар белгилансин.

6. «Хонобод садоси» газетаси муҳаррири (X. Мўминова)га ушбу қарорни газета саҳифаларида чоп этиш ва кенг оммага етказиш тавсия этилсин.

7. Мазкур қарор расмий нашрда эълон қилинган кундан бошлаб кучга кириши белгилаб қўйилсин.

8. Ушбу қарор қабул қилиниши муносабати билан шаҳар ҳокимининг 2010 йил 14 сентябрдаги 352-Қ-сонли қарори ўз кучини йўқотган деб ҳисоблансин.

9. Мазкур қарорнинг ижросини назорат қилиш шаҳар ҳокимининг ўринбосари Р. Рустамов ва Бандликка кўмаклашиш маркази (Ф. Усмонов) зиммаларига юклатилсин.