Ўзбекистон Республикаси Солиқ кодекси ҳамда Ўзбекистон Республикаси «Давлат солиқ хизмати тўғрисида»ги Қонуни ижроси юзасидан туман ҳудудидаги жисмоний шахслар тасарруфида бўлган мол-мулк, ер солиғи объектлари ва субъектлари, шунингдек якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқларни ҳисоблаш, тегишли имтиёзларни тўғри қўллаш ҳамда белгиланган муддатларда маҳаллий бюджетга тушумлар тушишини таъминлаш мақсадида Ўзбекистон Республикаси «Маҳаллий давлат ҳокимияти тўғрисида»ги Қонунининг 6-моддасига асосан қарор қиламан:

1. 2014 йилда мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқларни ҳисоблаш, тегишли имтиёзларни тўғри қўллашни тўлиқ ва сифатли ўтказиш, уларга тегишли бўлган маълумотларни ваколатли идоралар томонидан туман Давлат солиқ инспекцияларига тўлиқ тақдим этилишини таъминлаш мақсадида 2013 йилнинг 15 декабрдан 2014 йилнинг 10 январига қадар «Солиқ тўловчи жисмоний шахсларни ҳисобга олиш» даври этиб белгилансин.

2. Туман Давлат солиқ инспекцияси бошлиғи А. Турғуновга:

солиқ тўловчиларни ҳисобга олиш даврида туман ҳудудидаги мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, уларга солиқ ҳисоблаш ва солиқ қонунчилигида белгиланган имтиёзларни қўллаш;

барча маҳаллаларда солиқларнинг аҳамияти, айрим тоифадаги жисмоний шахсларга солиқлардан имтиёзлар тўғрисида 2014 йил учун тўланиши керак бўлган солиқларнинг муддатидан олдин тўланиши ҳақида кенг тушунтириш ишларини олиб бориш;

аҳоли ўртасида Ўзбекистон Республикаси солиқ қонунчилиги бўйича амалдаги меъёрий-ҳуқуқий ҳужжатларнинг моҳияти юзасидан қишлоқ (маҳалла) фуқаролар йиғини раиси ва фаоллари иштирокида мунтазам равишда семинар йиғилишлар ўтказиш юклатилсин.

3. Туман ҳудудида фаолият юритаётган қишлоқ фуқаролар йиғини ҳамда маҳалла фуқаролар йиғини раислари, жамоат ташкилотлари, коммунал хўжалик бўлимлари, уй-жой мулкдорлар ширкатлари, корхона ва ташкилотларнинг раҳбарлари жисмоний шахсларни рўйхатга олиш, ҳисобланган солиқларни белгиланган муддатларда маҳаллий бюджетга ундирилиши юзасидан туман Давлат солиқ инспекцияси участка солиқ инспекторларига доимий равишда яқиндан амалий ёрдам бериш вазифаси юклатилсин.

4. «Солиқ тўловчи жисмоний шахсларни ҳисобга олиш» даврини кенг қамровли ва сифатли ўтказилиши юзасидан Ўзбекистон Республикаси Солиқ кодекси, Ўзбекистон Республикаси «Давлат солиқ хизмати тўғрисида»ги Қонунига асосан, давлат солиқ инспекцияси томонидан мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ ҳисобга олиш, солиқ ҳисоблаш ҳамда тегишли имтиёзларни тўғри қўлланилишини таъминлаш мақсадида:

Қўшработ туман Ер ресурслари ва давлат кадастри бўлими бошлиғи Ф. Қўчқаров зиммасига 2013 йил 31 декабрь ҳолатига фуқароларнинг хусусий уйлар ва биноларини инвентаризациясини тугатиш ва жорий ўзгаришларни киритиш ҳамда 1-иловага* мувофиқ, маълумотларни туман ҳудудида барча жисмоний шахсларнинг исми, шарифи, манзилгоҳи, уларнинг эгалигида бўлган ер майдони миқдори, бино-иншоотлар ва улар билан банд бўлган ер майдонлари, гаражлар, дала ҳовлилари, чорбоғлар ва уларнинг охирги қийматлари, жойлашган манзили кўрсатилган маълумотларни;

Қўшработ тумани бош архитектори (бош меъмори) М. Райимов зиммасига 2-иловага* мувофиқ, 2013 йил 31 декабрь ҳолатига фуқароларга туман ҳудудидан туман ҳокими қарорига асосан тадбиркорлик ва якка тартибда уй-жой қурилиши учун ажратилган ер майдонлари тўғрисидаги маълумотларни;

Бюджетдан ташқари пенсия жамғармаси туман бўлими бошлиғи С. Тошназаровга 3-иловага* мувофиқ, 2013 йил 31 декабрь ҳолатига Қўшработ туманида истиқомат қилувчи, нафақа олувчи сифатида рўйхатга олинган барча турдаги нафақаҳўрларнинг тўлиқ маълумотларини;

Қўшработ тумани Мудофаа ишлари бўлими бошлиғи Ё. Муртазаевга 4-иловага* мувофиқ, 2013 йил 31 декабрь ҳолатига Қўшработ тумани ҳудудида яшовчи 1941 —1945 йиллар уруш қатнашчилари ва ногиронлари, Афғонистонда ҳарбий хизматни ўтаган фуқаролар ва бошқа мавжуд маълумотларни;

Қўшработ тумани Давлат санитария-эпидемиология назорати маркази бош врачи М. Исмоилов ва Ветеринария хизмати бошлиғи А. Нарзуллаевга 7-иловага* мувофиқ 2013 йил 31 декабрь ҳолатига туман ҳудудида белгиланган тартибда санитария рухсатномасини олган жисмоний шахслар тўғрисидаги маълумотларни;

«Қўшработ тумангаз» филиали бошлиғи Р. Мамитовга 8-иловага* мувофиқ, 2013 йил 31 декабрь ҳолатига туман ҳудудидаги тадбиркорлик фаолиятини амалга оширувчи жисмоний шахслар билан газ истеъмоли учун тузилган шартномалар тўғрисидаги маълумотларни;

Қўшработ туман Электр таъминоти корхонаси бошлиғи Б. Усановга 9-иловага* мувофиқ, 2013 йил 31 декабрь ҳолатига туман ҳудудида тадбиркорлик фаолиятини амалга оширувчи жисмоний шахслар билан электр истеъмоли учун тузилган шартномалар тўғрисидаги маълумотларни;

Қўшработ туман Ички ишлар бўлими йўл ҳаракати хавфсизлиги бўлими бошлиғи З. Усмоновга 10-иловага* мувофиқ, 2013 йил 31 декабрь ҳолатига туман ҳудудидаги шахсий юк автотранспорт воситалари эгалари тўғрисидаги маълумотларни;

Қўшработ туман Ободонлаштириш бошқармаси бошлиғи И. Холиқулов зиммасига 11-иловага* мувофиқ, 2013 йил 31 декабрь ҳолатига туман ҳудудидаги барча коммунал уйлар, хусусийлаштирилган уйлар, гаражларни ҳисобга олишга доир маълумотларнинг маҳалла фуқаролар йиғинлари кесимида 2014 йилнинг 1 февраль кунига қадар туман Давлат солиқ инспекциясига тақдим этиш вазифаси юклатилсин .

5. Туман Фуқаролик ҳолати далолатномалари ёзиш бўлими 2014 йил 1 февралга қадар 5-иловага* мувофиқ, туман ҳудудида 2012-2013 йилларда вафот этган фуқаролар тўғрисидаги, туман Давлат нотариал идоралари раҳбари эса 6-иловага* мувофиқ 2013 йил давомида жисмоний шахслар томонидан кўчмас мулк ижара шартномаси тасдиқланганлиги ва ижара ҳақи миқдори, шунингдек мерос қилиб олиш ёки ҳадя тарзида фуқароларнинг мулкига ўтаётган мол-мулк қиймати тўғрисидаги маълумотларни ўз вақтида тақдим этиб бориши тавсия этилсин.

6. Қўшработ туман ҳокимлиги «Маҳалла» хайрия жамоат фонди туман бўлими раиси, қишлоқ ва маҳалла фуқаролар йиғини раисларига, «Солиқ тўловчиларни ҳисобга олиш» даври тадбирини ўтказишда фаол қатнашишлари ва жойларда участка Давлат солиқ инспекторлари билан ҳамкорликда 2014 йил учун маҳаллий солиқ тўловчиларни тўлиқ ҳисобга олишни амалга оширилиши тавсия этилсин.

7. Мазкур қарорнинг бажарилишини назорат қилиш туман ҳокимининг иқтисодиёт ва ижтимоий ривожлантириш масалалари бўйича ўринбосари З. Мамадолиев зиммасига юклатилсин.

8. Мазкур қарор расмий эълон қилинган кундан бошлаб кучга киради.