Ўзбекистон Республикаси Президентининг 2006 йил 5 январдаги «Йирик саноат корхоналари билан касаначиликни ривожлантириш асосидаги ишлаб чиқариш ва хизматлар ўртасида кооперацияни кенгайтиришни рағбатлантириш чора-тадбирлари тўғрисида»ги ПФ-3706-сонли Фармонини амалга ошириш мақсадида, Вазирлар Маҳкамасининг 2008 йил 1 июлдаги 146-сонли қарори хамда Ўзбекистон Республикаси Президентининг 2007 йил 6 апрелдаги «Аҳоли бандлигини ошириш, Меҳнат ва аҳолини ижтимоий муҳофаза қилиш органлари фаолиятини такомиллаштириш чора-тадбирлари тўғрисида»ги ПҚ-616-сонли қарорлари ижросини таъминлаш мақсадида туманда айниқса қишлоқ жойлардаги иш билан банд бўлмаган аҳолини уйда маҳсулотлар ишлаб чиқариш, хизматлар кўрсатиш ишларини бажаришга жалб этиш учун иш берувчиларга реал рағбатлар яратиш, касаначиларнинг қонун ҳужжатларида белгиланган ижтимоий ва меҳнат кафолатларини янада яхшилаш мақсадида қарор қиламан:

1. Туманда 2014 йилда касаначилик уй меҳнатини ташкил қилиш дастури 1-иловага* мувофиқ тасдиқлансин.

2. Туманда корхоналар билан уйда маҳсулотлар ишлаб чиқариладиган ва хизматлар кўрсатадиган фуқаролар ўртасида кооперацияни мувофиқлаштириш, қўллаб-қувватлаш ва ривожлантириш бўйича ишчи комиссия тузилсин ва унинг таркиби 2-иловага* мувофиқ тасдиқлансин.

3. Туман ишчи комиссияси (М. Хаитов)га:

янги касаначилик иш ўринларини, шу жумладан касаначиликдан фойдаланиш турларини кенгайтириш ҳисобига ташкил этиш учун мавжуд захираларни аниқлашда ва ишга солишда корхоналарга кўмаклашилсин;

саноат корхоналари ва касаначилик ўртасида кооперацияни ривожлантириш, корхоналар буюртмалари бўйича уйда ишлайдиган фуқароларга асбоб-ускуналар, хом ашё, материаллар, бутловчи буюмлар ва ярим тайёр маҳсулотлар билан таъминлашнинг барқарор шароитларини, шунингдек ишлаб чиқарилган маҳсулотни топшириш ва иш ҳақи тўлаш кафолатларини яратиш бўйича масалалар тезкорлик билан ҳал этилсин;

ҳудудларда жойлашган корхоналарда касаначиликни ривожлантириш бўйича касаначиликни белгиланган дастур параметрлари бажарилиши мониторингини амалга ошириш;

касаначиларга уларнинг ҳуқуқлари, кўрсатиб ўтилган ҳуқуқлар иш берувчи корхоналар томонидан бузилган тақдирда, ҳимоя қилинишини таъминлашда кўмаклашиш;

фуқароларнинг ўзини ўзи бошқариш органлари билан узвий ўзаро ҳамкорликда касаначилик билан шуғулланишни хоҳловчи банд бўлмаган аҳоли сонини ва малакасини аниқлаш, шунингдек аҳолининг кўрсатиб ўтилган тоифаларини кейинчалик ишга жойлаштиришда кўмаклашиш вазифаси топширилсин.

4. 2014 йилда касаначилик уй меҳнатини ташкил қилиш бўйича туман дастурига киритилган корхона раҳбарларига:

дастурда белгиланган режа топшириқларнинг бажарилиши бўйича шахсан жавобгар эканликлари белгилансин;

хар ой якуни билан касаначилик иш ўринларини ташкил қилиш бўйича амалга оширилган ишлар юзасидан, яратилган касаначилик иш ўринлари, ишга қабул қилиш тўғрисидаги буйруқдан нусха, касаначига очилган меҳнат дафтарчаси нусхаси, касаначига тўланган иш ҳақи тўлов варақаси нусхаси, касаначига етказиб берилган хом ашё ва касаначилар томонидан ишлаб чиқарилаётган маҳсулотлар тўғрисидаги маълумотларни туман ишчи комиссия раиси ўринбосари (Қ. Шодмонов) га тақдим қилиш вазифаси топширилсин.

5. Бандликка кўмаклашиш ва аҳолини ижтимоий муҳофаза қилиш маркази директори (Қ. Шодмонов)га:

касаначилик меҳнати билан шуғулланаётган фуқароларга нисбатан меҳнат тўғрисидаги қонунларга риоя қилиниши устидан назоратни таъминлаш;

ушбу қарор ижросини таъминлаш бўйича ҳар ойлик мониторинг ўтказиб борилсин ва мониторинг натижалари тўғрисидаги маълумотларни туман ҳокимлигига топшириб бориш вазифаси юклатилсин.

6. Туман статистика бўлими (С. Тухтамишев)га:

туман ҳокимлигига корхоналарнинг касаначилик меҳнати билан банд бўлган ходимлари сони тўғрисидаги маълумотларни белгиланган муддатларда тақдим этиш;

корхоналар томонидан статистика бўлимига топшириладиган статистик ҳисоботларга яратилган касаначилик иш ўринлари киритилишини назорат қилиш вазифаси топширилсин.

7. Мазкур қарорнинг бажарилишини назорат қилиш туман хокими ўринбосари А. Тошпулатов зиммасига юклатилсин.

8. Мазкур қарор расмий нашрда эълон қилинган кундан эътиборан қонуний кучга киради.