Ўзбекистон Республикаси Президентининг 2006 йил 5 январдаги «Йирик саноат корхоналари билан касаначиликни ривожлантириш асосидаги ишлаб чиқариш ва хизматлар ўртасида кооперацияни кенгайтиришни рағбатлантириш чора-тадбирлари тўғрисида»ги ПФ-3706-сонли Фармонини амалга ошириш мақсадида, Вазирлар Маҳкамасининг 2006 йил 11 январдаги 4-сонли қарори ҳамда Ўзбекистон Республикаси Президентининг 2007 йил 6 апрелдаги «Аҳоли бандлигини ошириш , Меҳнат ва аҳолини ижтимоий муҳофаза қилиш органлари фаолиятини такомиллаштириш чора-тадбирлари тўғрисида»ги ПҚ-616-сонли қарорлари ижросини таъминлаш мақсадида туманда, айниқса қишлоқ жойлардаги иш билан банд бўлмаган аҳолини уйда маҳсулотлар ишлаб чиқариш, хизматлар кўрсатиш ишларини бажаришга жалб этиш учун иш берувчиларга реал рағбатлар яратиш, касаначиларнинг қонун ҳужжатларида белгиланган ижтимоий ва меҳнат кафолатларини янада яхшилаш мақсадида қарор қиламан:

1. Туманда 2014 йилда касаначилик уй меҳнатини ташкил қилиш дастури 1-иловага* мувофиқ тасдиқлансин.

2. Туманда корхоналар билан уйда маҳсулотлар ишлаб чиқариладиган ва хизматлар кўрсатадиган фуқаролар ўртасида кооперацияда мувофиқлаштириш, қўллаб-қувватлаш ва ривожлантириш бўйича ишчи комиссияси тузилсин ва унинг таркиби 2-иловага* мувофиқ тасдиқлансин.

3. Туман ишчи комиссияси раиси (Э. Эрназаров)га:

белгиланган режани бажарилишини қатъий равишда назорат қилиш;

хар ой якуни билан дастур ижроси бўйича ишчи гуруҳи йиғилишларини ўтказиб корхоналар кесимида таҳлил олиб бориш;

касаначиларнинг доимий иш билан таъминланиши билан боғлиқ бўлган муаммоларни;

яъни хом ашё ишлаб чиқариш жиҳозлари билан таъминлашни, ойлик иш ҳақларининг ойма-ой белгиланишини назоратга олиш топширилсин.

4. 2014 йилда касаначилик уй меҳнатини ташкил қилиш бўйича туман дастурига киритилган корхона раҳбарларига:

дастурда белгиланган режа топшириқларнинг бажарилиши бўйича шахсан жавобгар эканликлари уқтирилсин;

хар ой якуни билан касаначилик иш ўринларини ташкил қилиш бўйича амалга оширилган ишлар юзасидан (яратилган касаначилик иш ўринлари, ишга қабул қилиш тўғрисидаги буйруқлардан нусха, касаначига очилган меҳнат дафтарчаси нусхаси, касаначига тўланган иш ҳақи тўлов варақаси нусхаси, касаначига етказиб берилган хом ашё ва касаначилар томонидан ишлаб чиқарилаётган маҳсулотлар тўғрисидаги маълумотларни туман ишчи гуруҳи аъзоси (Ш. Усмонов)га тақдим қилиш вазифаси топширилсин.

5. Бандликка кўмаклашиш ва аҳолини ижтимоий муҳофаза қилиш маркази директори (Ш. Жўраев)га:

касаначилик меҳнати билан шуғулланаётган фуқароларга нисбатан меҳнат тўғрисидаги қонунларга риоя қилиш устидан назоратни таъминлаш;

қарор ижросини таъминлаш бўйича ҳар ойлик мониторинг натижалари 2 нусхада туман ҳокимлигига топширилсин.

6. Туман статистика бўлими (Х. Алимов)га:

туман ҳокимлигига корхонанинг касаначилик меҳнати билан банд бўлган ходимлар сони тўғрисидаги маълумотларни белгиланган муддатларда тақдим этиш;

корхоналар томонидан статистика бўлимига топшириладиган 1-Т меҳнат ҳисоботига яратилган касаначилик иш ўринлари киритилишини назорат қилиш вазифаси топширилсин.

7. Мазкур қарорнинг бажарилишини назорат қилиш туман ҳокимининг иқтисодиёт ва ижтимоий ривожлантириш масалалари бўйича ўринбосари Э. Эрназаров зиммасига юклатилсин.

8. Мазкур қарор расмий нашрда эълон қилинган кундан эътиборан қонуний кучга киради.