Ўзбекистон Республикасининг «Аҳолини иш билан таъминлаш тўғрисида»ги Қонуни ҳамда Ўзбекистон Республикаси Вазирлар Маҳкамасининг 2008 йил 20 августдаги 186-сон «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисидаги Низомни тасдиқлаш ҳақида»ги қарори ижросини таъминлаш, асосан аҳолини ижтимоий муҳофазага муҳтож ва иш топишда қийналаётган шахсларни ишга жойлаштириш учун 2012 йил туманда аҳолини ижтимоий муҳофаза қилиш ва уларга иш ўринларини банд қилиш мақсадида туман Бандликка кўмаклашиш ва аҳолини ижтимоий муҳофаза қилиш марказининг шу хусусидаги 2012 йил 20 сентябрдаги 253-сонли хатини кўриб чиқиб, Ўзбекистон Республикасининг «Маҳаллий давлат ҳокимияти тўғрисида»ги Қонунининг 6-моддасига асосан қарор қиламан:

1. Ўзбекистон Республикасининг «Аҳолини иш билан таъминлаш тўғрисида»ги Қонунининг 17-моддасига асосан ижтимоий муҳофазага муҳтож ва иш топишда қийналадиган шахсларни ишга жойлаштириш учун Қўшработ туманидаги ташкилот, корхона ва муассасалардаги ходимларнинг рўйхат бўйича ўртача сонидан (иловага* асосан) 3 % ногиронлар учун ва бошқа тоифалар учун 4 % миқдорида, шу жумладан:

ёлғиз ота ва она ҳамда ўн тўрт ёшгача ва ногирон болалари бор кўп болали ота-оналар учун 31 % (130 киши);

таълим муассасаларини тамомлаган ёшлар учун 54 % (230 киши);

муддатли ҳарбий хизматдан бўшатилган шахслар учун 9 % (38 киши);

ижтимоий муҳофазага муҳтож шахсларнинг бошқа тоифалари учун 1,0 % (4 киши);

жазони ўташ муассасаларидан бўшатилган, жазони ўтаётган ёки суд қарорига кўра тиббий характердаги мажбурий чоралар кўрилган шахслар 5 % (21 киши);

ногиронлар учун 3 % (52 киши) миқдорида иш ўринлари захираси белгилансин.

2. Ушбу тоифа шахслар учун иш ўринлари ходимлар томонидан ўзларининг меҳнат мажбуриятларини тўсиқларсиз бажарилишини таъминлайдиган санитария-гигиена нормалари ва меҳнат шароитларига мувофиқ бўлиши керак, шу жумладан:

ёлғиз ота, ёлғиз она ҳамда 14 ёшгача ногирон болалари бор кўп болали ота-оналар учун болаларни тарбиялаш ва меҳнат мажбуриятлари бўйича вазифаларни уйғунлаштириш имконини берадиган, ўзгарувчан иш жадвалига эга бўлган иш ўринлари;

таълим муассасаларини тугатган ёшлар учун — уларнинг касби бўйича тайёргарлигига мувофиқ бўлган иш ўринлари;

муддатли ҳарбий хизматдан бўшатилган шахслар учун уларнинг касби бўйича тайёргарлигига мувофиқ иш ўринлари;

ногирон учун меҳнат шароитлари бўйича аттестациядан ўтказилган ҳамда ходимга иш жараёнларини тўсқинликсиз бажариш имконини (соғлиғининг аҳволи ва меҳнат фаолиятига нисбатан белгиланган зид кўрсаткичлар ҳисобга олинган ҳолда) берадиган иш ўринлари;

жазони ўташ муассасаларидан бўшатилган, жазони ўтаётган ёки суд қарорига кўра тиббий характердаги мажбурий чоралар кўрилган шахслар учун уларнинг касб бўйича тайёргарлиги ҳисобга олинган холдаги иш ўринлари муайян касб-ҳунарга, малакага эга бўлмаган шахслар учун эса махсус малакани талаб қилмайдиган иш ўринлари белгилансин.

3. Иш ўринлари банд қилиб қўйиладиган малакани талаб қилмайдиган ишчи, фаррош, қоровул, таълим муассасаларида таҳлилчи, ўқитувчи, соғлиқни сақлаш тизимида таҳлилчи, ҳамшира, шифокор, бошқа корхоналарда чилангар, ҳайдовчи, пайвандловчи, дурадгор шунингдек бошқа касб ҳамда лавозим эгалари учун иш ўринлари банд қилиниши таъминлансин.

4. Тумандаги барча ташкилот, корхона ва муассасаларнинг раҳбарлари ижтимоий муҳофазага муҳтож ва иш топишда қийналаётган шахслар учун иш жойларининг кўрсатиб ўтилган сони Ўзбекистон Республикаси Вазирлар Маҳкамасининг 2008 йил 20 августдаги 186-сон қарори билан тасдиқланган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисидаги Низом»га мувофиқ белгиланган муддатларда ва тартибда барпо этилишини (ажратилишини ёки банд қилиб қўйилишини) таъминласинлар.

5. Ушбу қарор талабларини бажармаган тумандаги ташкилот, корхона ва муассасалар раҳбарлари (мансабдор шахслари)га кўрсатиб ўтилган «Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисидаги Низом»нинг 15-бандига мувофиқ жаримага тортилади.

6. Ушбу қарорда белгиланган ижтимоий муҳофазага муҳтож ва иш қидиришда қийналаётган шахслар учун иш ўринларини банд қилиб қўйиш сонидан ортиқча иш ўринлари ташкил этилганда, ташкилот учун қуйидаги имтиёзлар белгиланади:

жумладан, ишлаб чиқариш участкалари (цехлар) ташкил этиш учун нотурар жой биноларини биринчи навбатда ажратилади ҳамда ушбу иш жойларини барпо этишга сарфланган маблағларнинг бир қисмини Бандликка кўмаклашиш ва аҳолини ижтимоий муҳофаза қилиш марказлари билан тузилган шартнома асосида Иш билан таъминлашга кўмаклашиш жамғармаси маблағлари ҳисобидан қопланади.

7. Туман Бандликка кўмаклашиш ва аҳолини ижтимоий муҳофаза қилиш маркази (С. Бердиев) бир ҳафта муддатда ушбу қарор иловасида* кўрсатилган ташкилот, корхона ва муассасалар раҳбарлари эътиборига етказсин.

8. Ушбу қарорнинг ижроси устидан назорат қилиш туман ҳокимининг ўринбосари И. Ўролов зиммасига юклатилсин.