2013 йилнинг «Обод турмуш йили» деб эълон қилинганлиги муносабати билан мамлакатда халқнинг турмуш даражаси ва сифатини ошириш, фаровонлик, тинчлик ва тотувликни таъминлаш вазифаларини амалга оширишга ресурслар ва имкониятларни сафарбар қилиш, давлат, нодавлат ва жамоат ташкилотларининг кенг жалб этиш бўйича аниқ мақсадга йўналтирилган чора-тадбирлар комплексини амалга ошириш ҳамда Ўзбекистон Республикаси Президентининг 2013 йил 14 февралдаги «Обод турмуш йили Давлат дастури тўғрисида»ги ПҚ-1920-сонли, вилоят ҳокимининг 2013 йил 13 мартдаги қ-49-сон қарорлари ижросини таъминлаш мақсадида қарор қиламан:

1. Навоий вилояти ҳокимининг 2013 йил 13 мартдаги «Обод турмуш йили вилоят дастурини тасдиқлаш тўғрисида»ги қ-49-сон қарори ижро учун қабул қилинсин.

2. «Обод турмуш йили» шаҳар дастури иловага* мувофиқ тасдиқлансин.

3. Қуйидагилар «Обод турмуш йили» шаҳар дастурини амалга оширишнинг асосий устувор йўналишлари этиб белгилансин:

Шаҳарда барқарорлик ва хавфсизликни, фуқаролар тотувлигини, миллатлараро ва конфессиялараро тотувликни янада мустаҳкамлаш, инсон ҳуқуқлари, эркинлиги ва манфаатлари муҳофазасини таъминлаш;

аҳоли фаровонлиги ва реал даромадларнинг изчил ўсишини таъминлаш, иш билан бандликни ошириш, кичик бизнес ва хусусий тадбиркорликни, фермерликни янада ривожлантириш, аҳолини, биринчи навбатда, унинг ижтимоий ночор қатламларини ва кам таъминланган оилаларни давлат томонидан аниқ манзилли муҳофаза қилиш ва уларга ижтимоий ёрдам кўрсатиш тизимини такомиллаштириш;

аҳоли саломатлигини муҳофаза қилиш тизимини такомиллаштириш, соғлиқни сақлаш муассасаларининг моддий-техник базасини мустаҳкамлаш ва ривожлантириш, уларни замонавий ташхис ва даволаш асбоб-ускуналари билан жиҳозлаш, касалликлар профилактикасини кенгайтириш ҳамда уларни даволашнинг илғор тиббий технологиялари ва методларини жорий этиш, пировард натижада — одамларнинг, айниқса болаларнинг ва оналарнинг соғлиғини мустаҳкамлаш;

жисмоний ва маънавий соғлом, уйғун камол топган ўсиб келаётган авлодни, профессионал, замонавий даражада тайёрланган кадрларни тарбиялаш борасида олиб борилаётган ишларнинг самарадорлигини ҳар томонлама ошириш, таълим савиясини янада такомиллаштириш ва сифатини юксалтириш, таълим муассасаларининг моддий-техника базасини мустаҳкамлаш;

халқнинг турмуш даражаси ва сифатини янада ошириш, муносиб уй-жой ва ижтимоий-маиший шароитлар яратиш, янги уй-жойлар қуриш, замонавий йўллар ва муҳандислик-коммуникация инфратузилмаларини ривожлантириш, аҳоли пунктларини тоза ичимлик сув, электр энергияси ва иссиқлик билан кафолатли таъминлаш бўйича аниқ чора-тадбирларни амалга ошириш;

маҳалла институтини ва фуқароларнинг ўзини ўзи бошқариш органлари фаолиятини такомиллаштириш, уларнинг ҳуқуқлари ва ваколатларини кенгайтириш, жойларда иқтисодий ва ижтимоий ривожлантириш, ёш ва эҳтиёжманд оилаларни ижтимоий қўллаб-қувватлаш ва уларга ёрдам беришни яхшилаш, маҳаллалар ва уй-жой мавзеларини ташқи қиёфасини сифат жиҳатидан яхшилаш, ободонлаштириш ва кўкаламзорлаштириш вазифаларини ҳал этишда уларнинг роли ва аҳамиятини ошириш;

оилаларни янада мустаҳкамлаш, аёлларнинг оила ва жамиятдаги роли ва мақомини ошириш, уларнинг ижтимоий фаоллигини кучайтириш, иш билан бандлигини таъминлаш ҳамда аёлларнинг иқтисодиётнинг турли тармоқлари ва соҳаларидаги фаолиятини муносиб рағбатлантириш, уларнинг ўз иқтидорини намоён қилиши ва уй-рўзғордаги ишларини енгиллаштириш учун қулай ижтимоий-маиший шароитлар яратиш чора-тадбирларини амалга ошириш.

4. «Обод турмуш йили» шаҳар дастурини ишлаб чиқиш ва амалга ошириш бўйича шаҳар комиссиясига «Обод турмуш йили» шаҳар дастурининг бажарилишини ташкил этиш ва мониторингини олиб бориш вазифаси юклатилсин.

5. «Обод турмуш йили» шаҳар дастурини ишлаб чиқиш ва амалга ошириш бўйича шаҳар комиссияси (Ш. Ахроров) қуйидагиларни таъминласин:

бир ҳафта муддатда — шаҳар ҳокимлиги ва тегишли ташкилот раҳбарлари бошчилигида шаҳар дастурини амалга ошириш бўйича тегишли комиссиялар тузиш, уларга Дастурда назарда тутилган тадбирларни сўзсиз, тўлиқ кўламда ва ўз вақтида амалга оширилиши юзасидан шахсий масъулиятни юклаш;

икки ҳафта муддатда — шаҳар ҳокимлиги, бошқарма, идоралар, хўжалик бирлашмалари, нодавлат нотижорат ташкилотлар томонидан ҳар бир корхона, ташкилот, муассаса ва аҳоли пункти бўйича «Обод турмуш йили» ҳудудий ҳамда тармоқ дастурларини ишлаб чиқиш ва қабул қилиш;

давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлар даражасида тасдиқланган шаҳар дастурига киритилган йўналишлар ва тадбирларни тўлиқ ва ўз вақтида бажариш ишларини мувофиқлаштириш, уларнинг амалга оширилиши юзасидан тизимли назорат ўрнатиш;

ҳар чорак якунлари бўйича «Обод турмуш йили» шаҳар дастурида назарда тутилган тадбирларнинг бажарилиши тўғрисида шаҳар ҳокимлиги ва вилоят ҳокимлигига ахборот бериб бориш.

6. «Олтин водий» газетаси таҳририяти давлат корхонаси (М. Муқимов), Марказий кон бошқармаси Ахборот коммуникация технологиялари маркази (А. Юзефович):

«Обод турмуш йили» Давлат, вилоят ва шаҳар дастурларининг мақсади ва вазифаларини, уни амалга оширишнинг асосий йўналишлари ва чора-тадбирларини аҳоли ўртасида мунтазам, тизимли ва кенг ёритилишини;

кенг жамоатчиликнинг Дастурнинг бажарилиши тўғрисида доимий хабардор бўлишини, давлат ва хўжалик бошқаруви органларининг, маҳаллий давлат ҳокимияти органларининг, нодавлат нотижорат ташкилотларининг Дастурда назарда тутилган тадбирларни амалга оширишдаги аниқ ҳиссаси ёритилишини таъминласинлар.

7. Шаҳар ҳокимлиги Ташкилий назорат гуруҳи (И. Саидов) мазкур қарорни Халқ депутатлари шаҳар Кенгашининг тасдиғига киритсин.

8. Шаҳар ҳокимининг иқтисодиёт ва ижтимоий масалалари бўйича ўринбосари (Ш. Ахроров)га ушбу қарорни «Олтин водий» газетасида расман эълон қилинишини;

Шаҳар ҳокимлиги иш юритиш бўлинмаси мудири (Ҳ. Нормуҳаммедов)га мазкур қарорни шаҳар ҳокимлигининг веб-сайтида жойлаштирилишини таъминлаш топширилсин.

9. Мазкур қарорнинг бажарилишини назорат қилишни ўз зиммамда қолдираман.