Ўзбекистон Республикасининг «Йўл ҳаракати хавфсизлиги тўғрисида»ги Қонунининг 13-моддаси, Ўзбекистон Республикаси Вазирлар Маҳкамасининг 2003 йил 31 январдаги «Транспорт воситаларини мажбурий техник кўрикдан ўтказиш тартиби тўғрисидаги низомни тасдиқлаш ҳақида»ги 54-сонли ва вилоят ҳокимининг 2012 йил 6 февралдаги қ-15-сонли қарорлари ижросини таъминлаш мақсадида ҳамда тумандаги халқ хўжалик тармоқлари, ширкат ва фермер хўжаликлар, кичик корхоналар, хусусий фирмалар ва фуқароларга тегишли бўлган барча транспорт воситалари сонини аниқлаш, транспорт воситаларида содир этилаётган ноқонуний хатти-ҳаракатларни олдини олиш, транспорт воситаларини қайси бошқарма ёки идораларга тегишлилиги ҳақидаги маълумотларни йиғиш, атроф муҳит тозалигини сақлаш мақсадида қарор қиламан:

1. Ўзбекистон Республикасининг «Йўл ҳаракати хавфсизлиги тўғрисида»ги Қонунининг 13-моддаси, Ўзбекистон Республикаси Вазирлар Маҳкамасининг 2003 йил 31 январдаги «Транспорт воситаларини мажбурий техник кўрикдан ўтказиш тартиби тўғрисидаги низомни тасдиқлаш ҳақида»ги 54-сонли ва вилоят ҳокимининг 2012 йил 6 февралдаги қ-15-сонли қарорлари раҳбарлик ва ижро учун қабул қилинсин.

2. Туман ҳудудидаги жисмоний ва юридик шахсларга ҳамда тижорат асосида йўловчилар учун фойдаланиладиган енгил автомобиллар, автобуслар ва ўтириладиган жойлар сони 8 та ва ундан ортиқ бўлган (ҳайдовчининг ўриндиғидан ташқари) одамларни мунтазам ташиш учун жиҳозланган юк автомобиллари, йирик габаритли, оғир вазнли ва хавфли юкларни ташувчи махсус транспорт воситалари, уларнинг тиркамаларини техник кўрикдан ўтказиш жадвали 1-иловага мувофиқ, техник кўрикни ўтказиш бўйича туман комиссиясининг таркиби 2-иловага мувофиқ тасдиқлансин.

3. Туман Ички ишлар бўлими Йўл ҳаракати хавфсизлиги гуруҳи (Ю. Тошпўлотов) га:

транспорт воситаларини техник кўрикдан ўтказиш, техника воситаларини суғурталанганлиги тўғрисидаги маълумотномалар тақдим этилгандан сўнг амалга оширилишига алоҳида эътибор қаратиш;

мулкчилик шаклидан қатъи назар, техник кўрикдан ўтган ҳар бир транспорт воситасини техник кўрикдан ўтганлиги тўғрисидаги гувоҳнома билан таъминлаш юклатилсин.

4. Туман ҳокимининг биринчи ўринбосари Ш. Рустамов, ташкилот ва корхоналар раҳбарлари зиммасига:

йиллик давлат кўригини сифатли ва ўз муддатларида ўтказиш учун етарли техник ходимлар билан таъминлаш чораларини кўриш;

техник кўрик жараёнида аҳолига енгиллик яратиш мақсадида туман Йўл ҳаракати хавфсизлиги гуруҳи, суғурта хизмати билан биргаликда техник кўрикни аҳоли тиғиз жойлашган пунктларида ташкил этиш;

шахсий транспорт воситаларининг техник кўриги жадвалларини белгилашда фуқароларга қулайлик яратиш мақсадида дам олиш кунларидан тўлиқ фойдаланишни таъминлаш;

давлат транспорт воситаларини белгиланган жадвал асосида техник кўрикдан ўтказишда тегишли тўловларнинг биринчи навбатда ундирилишини назоратга олиш юклатилсин.

5. Юридик шахсларнинг ҳисобида турган транспорт воситаларининг соз ҳолда бўлишига шахсан раҳбарлар масъул эканликлари белгилаб қўйилсин ва туман ҳокимлиги йиғилишларида туман техник кўрик комиссиясининг техник кўрикнинг ўтказилиши бўйича ахборотлари ҳар чорак якунида тингланиб борилиши белгилаб қўйилсин.

6. Туман Ички ишлар бўлими (Ф. Эргашев)га мазкур қарорнинг ижроси юзасидан 2013 йилнинг 10 ноябрига қадар туман ҳокимлигига якуний ахборот тақдим этиш топширилсин.

7. Туман ҳокимининг 2012 йил 8 февралдаги қ-173-сонли қарори ўз кучини йўқотган деб ҳисоблансин.

8. Ушбу қарорнинг ижросини назорат қилиш туман ҳокимининг биринчи ўринбосари Ш. Рустамов зиммасига юклатилсин.

9. Мазкур қарор расмий нашрда эълон қилинган кундан бошлаб кучга киради.