Кўрсатилаётган хизматлар учун тарифларнинг мақбул даражасини сақлаган ҳолда Гулистон, Жиззах ва Қарши шаҳарлари «Сувоқова» корхоналарининг самарали фаолият кўрсатишини таъминлаш, шунингдек «Гулистон, Жиззах ва Қарши шаҳарларининг сув таъминоти тизимини такомиллаштириш» лойиҳасини амалга ошириш учун жалб этилган Осиё тараққиёт банки кредити бўйича мажбуриятларни ўз вақтида бажариш мақсадида Вазирлар Маҳкамаси қарор қилади:

1. Қуйидагилар:

«Гулистон, Жиззах ва Қарши шаҳарларининг сув таъминоти тизимини такомиллаштириш» лойиҳасининг тузатиш киритилган техник-иқтисодий асослаши асосий техник-иқтисодий кўрсаткичлар билан бирга 1*, 1а*, 1б*, 1в-иловаларга* мувофиқ;

Осиё тараққиёт банки кредитини қайтариш, лойиҳа бўйича фоизлар ва воситачилик ҳақларини тўлаш жадваллари 2*, 2а*, 2б*, 2в-иловаларга* мувофиқ;

Гулистон, Жиззах ва Қарши шаҳарлари сув таъминоти корхоналари ишлари самарадорлигини ошириш бўйича комплекс тадбирлар 3-иловага* мувофиқ тасдиқлансин.

2. 2007—2010 йиллар даврида Осиё тараққиёт банкининг жалб этилган кредити бўйича тўлов мажбуриятларини қайтариш Гулистон, Жиззах ва Қарши шаҳарлари «Сувоқова» корхоналарининг маблағлари, Сирдарё, Жиззах ва Қашқадарё вилоятлари маҳаллий бюджетларининг прогноздан ортиқ даромадлари ҳамда харажатларининг тежами ҳисобига амалга оширилганлиги маълумот учун қабул қилинсин.

3. Ўзбекистон Республикаси Молия вазирлиги:

Осиё тараққиёт банкининг жалб этилган кредити бўйича асосий қарзни қайтаришга, воситачилик ҳақлари ва фоизларни тўлашга Гулистон, Жиззах ва Қарши шаҳарлари «Сувоқова» корхоналарининг молиявий ресурсларнинг тасдиқланган манбалари билан таъминланмаган мажбуриятлари ҳажмида, давлат ташқи қарзига хизмат кўрсатиш учун республика бюджетида назарда тутилган маблағлар доирасида 2010 йилда маблағлар ажратилишини таъминласин;

2011 йилдан бошлаб Давлат бюджети параметрларида Осиё тараққиёт банки кредити бўйича асосий қарзни қайтариш, воситачилик ҳақлари ва фоизларни тўлаш учун Гулистон, Жиззах ва Қарши шаҳарлари «Сувоқова» корхоналарининг ушбу мақсад учун йўналтирилаётган ўз маблағларига қўшимча тарзда, Сирдарё, Жиззах ва Қашқадарё вилоятлари ҳокимликларининг асосланган ҳисоб-китоблари бўйича маблағларни назарда тутсин;

Ўзбекистон Республикаси Молия вазирлиги билан «Ўзкоммунхизмат» агентлиги ўртасидаги қайта кредитлаш тўғрисида Битимга тегишли ўзгартиришлар киритсин.

4. «Ўзкоммунхизмат» агентлиги Гулистон, Жиззах ва Қарши шаҳарлари «Сувоқова» корхоналари билан қайта кредитлаш тўғрисидаги битимга тегишли ўзгартиришлар киритсин.

5. Гулистон, Жиззах ва Қарши шаҳарлари сув таъминоти корхоналари ишлари самарадорлигини ошириш бўйича комплекс тадбирларнинг ўз вақтида ва сўзсиз бажарилишини таъминлаш юзасидан шахсий жавобгарлик Сирдарё, Жиззах ва Қашқадарё вилоятлари ҳокимлари зиммасига юклансин.

6. Вазирлар Маҳкамасининг «Осиё тараққиёт банки иштирокида «Гулистон, Жиззах ва Қарши шаҳарлари сув таъминоти тизимини такомиллаштириш» лойиҳасини амалга ошириш чора-тадбирлари тўғрисида» 2002 йил 26 мартдаги 98-сон қарорига қуйидаги ўзгартиришлар киритилсин:

а) 4-банднинг биринчи ва иккинчи хатбоши ҳамда қарорга 1, 1а, 1б, 1в-иловалар ўз кучини йўқотган деб ҳисоблансин;

б) 7-банддаги «2006—2009 йилларга» сўзлари «2006—2010 йилларга» сўзлари билан алмаштирилсин.

7. Ўзбекистон Республикаси Вазирлар Маҳкамасининг 2003 йил 28 августдаги 507-ф-сон фармойиши ўз кучини йўқотган деб ҳисоблансин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.А.Хўжаев зиммасига юклансин.