Ўзбекистон Республикаси Президентининг 2011 йил 4 октябрдаги «Ишлаб чиқариш ҳажмларини кенгайтириш ва рақобатбардош маҳсулотларнинг янги турларини ишлаб чиқаришни ривожлантириш бўйича биринчи навбатдаги чора-тадбирлар дастури тўғрисида»ги ПҚ-1623-сон қарорига мувофиқ ва ўз хомашё ресурслари базасидан янада самарали фойдаланиш ҳисобига рақобатбардош рух маҳсулотлари ишлаб чиқариш ҳажмларини кенгайтириш мақсадида Вазирлар Маҳкамаси қарор қилади:

1. Умумий капитал қўйилмалари қиймати 25,7 млн. АҚШ доллари эквивалентида, асосий техник-иқтисодий параметрларини ҳисобга олган ҳолда, «Рух заводини реконструкция қилиш» инвестиция лойиҳасининг техник-иқтисодий асослари ва 2014 йилнинг ИВ чорагида ишга туширилиши иловага* мувофиқ тасдиқлансин.

2. «Рух заводини реконструкция қилиш» лойиҳасини молиялаштириш манбалари этиб қуйидагилар белгилансин:

«Олмалиқ КМК» ОАЖнинг 9,3 млн. АҚШ долл. эквивалентидаги ўз маблағлари, шу жумладан, махсус инвестиция ҳисобварақларидаги маблағларни ҳисобга олган ҳолда;

«Ипотека-банк» АТИБ томонидан 7 йил муддатга, шу жумладан 3 йиллик имтиёзли давр билан, йиллик 6,0 фоиз ставка билан 16,4 млн. АҚШ долл. миқдорида ажратиладиган кредит.

3. Белгилансинки:

«Олмалиқ КМК» ОАЖ қарз олувчи ва ижро этувчи орган, лойиҳани амалга ошириш, жалб қилинган кредитдан мақсадли ва самарали фойдаланиш учун масъул орган ҳисобланади;

жалб қилинган кредитни сўндириш ва унга хизмат кўрсатиш билан боғлиқ харажатлар «Олмалиқ КМК» ОАЖнинг ўз маблағлари ҳисобидан, шу жумладан, махсус инвестиция ҳисобварақларидаги маблағлар ҳисобидан амалга оширилади.

4. «Олмалиқ КМК» АЖга лойиҳани амалга ошириш доирасида, истисно тартибда, кўрсатиб ўтилган лойиҳани амалга ошириш доирасида қурилиш-монтаж ишларини ўз кучлари билан бажариш, зарурат юзага келганда- субпудрат ишларига ихтисослаштирилган қурилиш-монтаж ташкилотлари ва республиканинг бошқа ташкилотлари тўғридан-тўғри тузилган шартномалар асосида жалб қилиш ҳуқуқи берилсин.

5. Ўзбекистон Республикаси Давлат архитектура-қурилиш қўмитаси белгиланган тартибда «Рух заводини реконструкция қилиш» лойиҳасининг лойиҳа-смета ҳужжатлари экспертизасидан ўтказилишини таъминласин ва лойиҳани амалга ошириш доирасида қурилиш-монтаж ишларининг сифатли бажарилиши юзасидан давлат архитектура-қурилиш назоратини ўрнатсин.

6. Ўзбекистон Республикаси Ташқи ишлар вазирлиги «Олмалиқ КМК» ОАЖ буюртмалари бўйича кўрсатилган лойиҳани амалга оширишда иштирок этувчи хорижий давлатлар мутахассисларига белгиланган тартибда кириш визаларини, консуллик ва бошқа йиғимлар ундирилмаган ҳолда, расмийлаштирилишини таъминласин.

7. Ўзбекистон Республикаси Ички ишлар вазирлиги «Олмалиқ КМК» ОАЖ буюртмалари бўйича кўрсатилган лойиҳани амалга оширишда иштирок этувчи хорижий давлатлар мутахассисларни белгиланган тартибда вақтинча рўйхатга қўйиш ва унинг амал қилиш муддатини уларнинг вақтинчалик яшаш жойи манзили бўйича узайтирилишини таъминласин.

8. Ўзбекистон Республикаси Меҳнат ва аҳолини ижтимоий муҳофаза қилиш вазирлиги «Олмалиқ КМК» ОАЖ буюртмалари бўйича Ўзбекистон Республикасига малакали хорижий давлатлар мутахассисларини жалб қилиш учун рухсатномалар белгиланган тартибда берилишини (муддатини узайтирилишини) таъминласин, ҳамда кўрсатилган лойиҳани амалга оширишда иштирок этувчи хорижий давлатлар мутахассисларига Ўзбекистон Республикаси ҳудудида меҳнат фаолиятини амалга ошириш ҳуқуқи берилганлиги тўғрисида тасдиқномалар бериш (узайтириш)ни таъминласин.

9. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари Ғ.И. Ибрагимов зиммасига юклатилсин.