Давлат ташкилотлари фаолиятини самарали ташкил этиш ва мавжуд давлат кўчмас мулк объектларидан мақсадли фойдаланишни таъминлаш мақсадида Вазирлар Маҳкамаси қарор қилади:

1. Тошкент шаҳрини янги қуриш ва ободонлаштириш режаларига мувофиқ Тошкент шаҳри, Амир Темур шоҳ кўчаси, 13а-уй манзилида жойлашган Ўзбекистон Республикаси Вазирлар Маҳкамаси ҳузуридаги Ижтимоий тадқиқотлар институти биноси, шунингдек, Тошкент шаҳри, Навоий кўчаси, Савдо қаторлари 1-уй манзилида жойлашган Ўзбекистон Республикаси Вазирлар Маҳкамаси ҳузуридаги Давлат дон инспекцияси биноси белгиланган тартибда бузилганлиги маълумот учун қабул қилинсин.

2. Ўзбекистон Республикаси Давлат мулк қўмитаси, Иқтисодиёт вазирлиги ва Тошкент шаҳар ҳокимлигининг Тошкент шаҳар, Марказ-14, 27-уй манзилда жойлашган маъмурий бинонинг (А ва Б блоклар, умумий майдони 3277 кв.м) фойдаланилмаётган қисмларини тасарруф этиш ҳуқуқисиз текинга ўтказиш тўғрисидаги таклифига розилик берилсин:

Ижтимоий тадқиқотлар институтига — А ва Б блокларининг бешинчи қавати, Б блокининг тўртинчи қавати, шунингдек, умумий майдони 1839 кв.м бўлган фойе ва лифтлар;

Давлат дон инспекциясига — А блокининг биринчи қаватининг бир қисми, шунингдек, Б блокининг биринчи, иккинчи, учинчи қаватлари (кенгайтирилган) умумий майдони 1438 кв. м.

3. Ўзбекистон Республикаси Давлат мулки қўмитаси, Тошкент шаҳар ҳокимлиги ва «Ўзбеккўмир» ОАЖ ушбу қарорнинг 2-бандида кўрсатилган бинонинг қисмларини ўтказишни, Ижтимоий тадқиқотлар институти ва Давлат дон инспекцияси эса уларнинг сақланиши ва мақсадли фойдаланишини таъминлаган ҳолда ўз балансига қабул қилсин.

4. Ўзбекистон Республикаси Молия вазирлиги Ижтимоий тадқиқотлар институти ва Давлат дон инспекциясининг асослантирилган ҳисоб-китоблари асосида бинонинг кўчирилган қисмларини таъмирлаш билан боғлиқ харажатларни молиялаштириш учун Ўзбекистон Республикасининг 2012 йилги Давлат бюджети параметрларида белгиланган тартибда маблағлар ажратсин.

5. Вазирлар Маҳкамасининг 2006 йил 21 июлдаги 145-сон қарори билан тасдиқланган Давлат мулки объектларини давлат тасарруфидан чиқариш ва хусусийлаштириш тартиби тўғрисидаги низомнинг 15-банди талаблари «Ўзбеккўмир» ОАЖга истисно тариқасида қўлланилмасин.

6. Вазирлар Маҳкамасининг 2008 йил 26 декабрдаги «Ўзбекистон Республикаси Вазирлар Маҳкамаси ҳузуридаги ижтимоий тадқиқотлар институти фаолиятини ташкил этиш чора-тадбирлари тўғрисида»ги 280-сон қарори 1-бандининг иккинчи хатбошиси чиқариб ташлансин.

7. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари Б.А. Ходжаев зиммасига юклатилсин.