Ўзбекистон Республикаси Ҳукумати ва Америка Қўшма Штатлари Ҳукумати, (бундан кейин Томонлар деб аталувчилар),

ҳукумат томонидан энг кам таъсир ва бошқариш бўлган ҳолда бозорда авиакорхоналар ўртасидаги рақобатга асосланган халқаро авиация тизимига кўмаклашишни истаб,

халқаро авиатранспорт ташишларининг имкониятларини кенгайтиришда кўмаклашишни истаб,

авиакорхоналар йўловчи ва юк жўнатувчиларга турли хил хизматларни энг кам нархда таклиф қила олишига имконият яратиш истагида, токи бу нархлар камситилган бўлмаслиги ва устун туришдан фойдаланиш натижаси бўлмаслиги лозим; ва маълум бир авиакорхоналар янги ва рақобат қила олувчи нархларни белгилаши ва уларни жорий этилишини қуллаб-қувватлаш мақсадида,

халқаро ҳаво транспортида ишончлиликнинг ва хавфсизликнинг энг юқори даражасини таъминлаш истагида ва ҳаво кемаларининг хавфсизлигига қарши қаратилган хатти-ҳаракатлар ёки таҳдид қилиш масалаларига ўзларининг энг жиддий муносабатда эканликларини билдириб ва бундай хатарга йўловчилар ёки мулкнинг йўлиқиши ҳаво ташишларини амалга оширишга ноқулайлик туғдиришини ва фуқаро авиациясининг бехатарлигига бўлган йўловчиларнинг ишончи йўқолиши мумкинлигини англаган ҳолда, ва

1944 йил еттинчи декабрда Чикаго шаҳрида имзолаш учун очилган Халқаро фуқаро авиацияси тўғрисидаги Конвенциянинг иштирокчилари бўлган ҳолда,

қуйидагилар тўғрисида аҳдлашиб олдилар:

Агар матнда бошқа мазмун кўзда тутилмаган бўлса, ушбу Битим мақсадларида:

1. «Авиация маъмурлари» атамаси Ўзбекистон Республикасига нисбатан — Фуқаро авиациясининг маъмурларини ва айтиб ўтилган Фуқаро авиациясининг маъмурлари бажарадиган вазифаларни амалга ошириш ваколати берилган шахс ёки ташкилотни ва Америка Қўшма Штатларига нисбатан — Транспорт вазирлигини ёки унинг вазифаларини бажариб турувчи маъмуриятни англатади;

2. «Битим» атамаси ушбу Битимни, унинг иловаларини ва уларга киритилган ҳар қандай тузатишларни англатади.

3. «ҳаво ташишлари» атамаси йўловчиларни, йўловчиларнинг юкини, юкларни ва почтани ҳақ эвазига ёки ёлланиш йўли билан алоҳида ёки биргаликда ҳаво кемаси томонидан амалга ошириладиган умумий ташишни англатади;

4. «Конвенция» атамаси 1944 йил еттинчи декабрда Чикаго шаҳрида имзолаш учун очилган Халқаро фуқаро авиацияси тўғрисидаги Конвенцияни англатади ва ўз ичига қуйидагиларни олади:

a. Конвенциянинг 94(а)-моддасига мувофиқ кучга кирган ва ҳар икки Томон тасдиқлаган ҳар қандай тузатишни, ва

b. ҳар икки Томон учун маълум бир вақт ичида қай даражада кучга эгалигига қараб, Конвенциянинг 90-моддасига мувофиқ киритилган ҳар қандай илова ёки тузатишни;

5. «тайинланган авиакорхона» атамаси ушбу Битимнинг 3-моддасига мувофиқ тайинланган ва ваколатга эга бўлган авиация корхонасини англатади;

6. «тўла ҳақ» атамаси кўрсатиладиган ташиш хизматига сарфланган харажатни ва шу билан бирга қўшимча маъмурий хизматлар учун оқилона белгиланган тўловни англатади;

7. «халқаро ҳаво ташишлари» атамаси биттадан ортиқ давлатнинг ҳаво ҳудуди орқали амалга ошириладиган ҳаво қатновини англатади;

8. «нарх» атамаси йўл ҳақини, йўловчилар (ва уларнинг юклари)ни ва/ёки юкни (почтани истисно этган ҳолда) ташиш учун авиакорхоналар, жумладан уларнинг агентлари томонидан ундириладиган ставка ва тўловларни ва бундай йўл ҳақи, ставка ва тўловларнинг мақбуллигини тартибга солувчи шартларни англатади;

9. «нотижорат мақсадларда тўхташ» атамаси йўловчилар, уларнинг юклари, юк ва/ёки почта олиш ёки тушириш мақсадида бўлмаган қўнишни англатади;

10. «ҳудуд» атамаси Томоннинг суверенитети, юрисдикцияси, ҳимояси ёки васийлиги остида бўлган ер майдонларини ва уларга тегишли ҳудудий сувларни англатади, ва

11. «аэропорт йиғимлари» авиакорхоналар аэропорт, аэронавигация ёки авиация хавфсизлиги мосламалари ёки хизматлари, шунингдек тегишли хизматлар ва мосламалар билан таъминлангани учун улардан ундириладиган тўловларни англатади.

1. Ҳар бир Томон бошқа Томоннинг авиакорхонаси томонидан амалга ошириладиган халқаро ҳаво ташишларини йўлга қўйиш учун бошқа Томонга қуйидаги ҳуқуқларни беради:

a. унинг ҳудудидан қўнмаган ҳолда учиб ўтиш;

b. унинг ҳудудида нотижорат мақсадларда тўхташ; ва

c. ушбу Битимда алоҳида кўрсатилган ҳуқуқлар.

2. Ушбу моддадаги ҳеч нарса бир Томоннинг авиакорхонасига ёки авиакорхоналарига мукофот эвазига бошқа Томоннинг ҳудудидаги бир манзилдан иккинчи бир манзилга ташиш учун йўловчиларни, уларнинг юкини, юкларни ёки почтани олиш ҳуқуқларини беради деб қаралмаслиги лозим.

1. Ҳар бир Томон ушбу Битимга мувофиқ халқаро ҳаво ташишларини амалга ошириш учун истаганча авиакорхоналар тайинлаши мумкин ва бундай тайинлашни бекор қилиш ёки аввалгисининг ўрнига бошқасини тайинлаш ҳуқуқига эга бўлади. Бундай тайинлаш тўғрисидаги хабарномалар бошқа Томонга дипломатик каналлар орқали ёзма равишда юборилиши лозим ва бундай хабарномаларда I Иловада ёки II Иловада, ёки ҳар икковида белгиланган ҳаво ташишларини амалга ошириш учун авиакорхона ваколатга эгалиги тўғрисида маълумот берилиши лозим.

2. Бундай тайинлаш тўғрисидаги хабарномани ва тайинланган авиакорхона номидан парвозлар учун рухсатнома ва техник ваколатнома олиш учун белгиланган тартибга ва усулга мувофиқ ариза олганидан сўнг бошқа Томон энг кам процедураларни қўллаган ҳолда тегишли рухсатнома ва ваколатномаларни беради, башарти:

а. мазкур авиакорхонага устун даражада эгалик қилиш ва унинг фаолияти устидан ҳақиқий назорат ўрнатиш ҳуқуқи авиакорхонани тайинлаган Томонга ёки унинг фуқароларига ёки икковларига қарашли бўлса;

b. тайинланган авиакорхона аризани ёки аризаларни кўриб чиқадиган Томоннинг ҳудудида одатда халқаро ҳаво ташишларига нисбатан қўлланиладиган қонун ва қоидаларига риоя қилиш имкониятига эга бўлса; ва

c. авиакорхонанинг тайинловчиси бўлган Томон 6-моддада (Эҳтиёткорлик чоралари) ва 7-моддада (Авиация хавфсизлиги) кўрсатилган талабларни ўрнатишни ва уларга амал қилишни таъминлаётган бўлса.

1. Ҳар бир Томон бошқа Томон тайинлаган авиакорхонага берилган парвозга доир ваколатномаларни ёки техник рухсатномалардан фойдаланишни бекор қилиши, тўхтатиб қўйиши ёки чеклаши мумкин, агарда:

a. мазкур авиакорхонага устун даражада эгалик қилиш ва амалдаги назорат бошқа Томонга, унинг фуқароларига ёки икковига тегишли бўлмаса;

b. мазкур авиакорхона ушбу Битимнинг 5-моддасида (Қонунларни қўллаш) келтирилган қонун ва қоидаларга риоя қилмаса;

c. бошқа Томон 6-моддада (Эҳтиёткорлик чоралари) кўрсатилган қоидаларни ўрнатишни ва уларга амал қилишни таъминламаётган бўлса.

2. Агар ушбу модданинг 1-b ва l-c кичик бандларига кейинчалик риоя қилмасликнинг олдини олиш учун дарҳол чоралар кўриш зарур бўлмаса, фақат бошқа томон билан маслаҳатлашишлардан сўнг ушбу моддада белгиланган ҳуқуқлардан фойдаланилади.

3. Ушбу модда бир Томон бошқа Томоннинг тайинланган авиакорхонасига ёки авиакорхоналарига берган парвоз учун ваколатлар ва техник рухсатномаларни тўхтатиб қўйиш, бекор қилиш, чеклаш ёки улардан фойдаланишда 7-модданинг (Авиация хавфсизлиги) қоидаларига мувофиқ бажарилиши зарур деб топилган шартларни бажаришни талаб қилиш ҳуқуқларини чекламайди.

1. Бир Томоннинг ҳудудига учиб кириш, у ерда бўлиш ёки у ердан жўнаб кетиш чоғида унинг ҳаво кемасидан фойдаланишни ва навигациясини тартибга солувчи қонун ва қоидаларига бошқа Томоннинг авиакорхоналари амал қиладилар.

2. Бир Томоннинг ўз ҳудудига ҳаво кемасидаги йўловчилар, экипаж ёки юкларнинг киришини ёки у ердан жўнаб кетишини тартибга солувчи қонун ва қоидалари, (шунингдек мамлакатга кириш, божларни тўлаб битиришга, авиация хавфсизлиги, иммиграция, паспорт, божхона ва карантин масалаларига оид бўлган қоидалари ёки почтага нисбатан почта қоидалари) бошқа Томоннинг авиакорхоналарига қарашли йўловчилар, экипаж ёки юкларга нисбатан биринчи Томоннинг ҳудудига кириш, у ерда бўлиш ёки у ердан жўнаб кетиш чоғида қўлланилади.

1. Ҳар бир Томон берган ёки кучга эга деб билган ва муддати тугамаган учишга яроқлилик гувоҳномаларни, малака гувоҳномаларни ва рухсатномаларни бошқа Томон ушбу Битимда кўзда тутилган ҳаво ташишларини амалга ошириш мақсадида тан олади, башарти бу гувоҳномалар ва рухсатномалар берилишига ёки ҳақиқий деб эътироф этилишига асос бўлган талаблар Конвенцияга мувофиқ белгиланган энг кам талаблар даражасига лоақал тенг бўлса. Ҳар бир Томон ўзининг ҳудуди доирасида парвоз қилиш учун унинг фуқароларига бошқа Томон берган ёки ҳақиқий деб топган малака тўғрисидаги гувоҳномаларни ва рухсатномаларни эътироф этмаслик ҳуқуқини сақлаб қолади.

2. Ҳар бир Томон авиация мосламалари, авиаэкипаж, ҳаво кемалари ва тайинланган авиакорхоналарнинг фаолиятига тегишли бошқа Томон ўрнатган хавфсизлик талаблари борасида маслаҳатлашишлар ўтказишни сўраши мумкин. Агарда бундай маслаҳатлашишлар ўтказиш натижасида бир Томон Конвенцияга мувофиқ белгиланган талабларнинг лоақал энг кам даражасига жавоб бера оладиган хавфсизлик қоидаларини ва шу соҳадаги талабларни жорий этишни ва уларга риоя қилишни бошқа Томон керакли даражада таъминлай олмаётганлигини аниқласа, бошқа Томон бундай келишмовчиликлар борасида ва бундай вазиятни хавфсизлик талабларининг энг кам даражасига мувофиқлаштириш учун зарур деб топилган чора-тадбирлар тўғрисида огоҳлантирилади, ва шундан сўнг бошқа Томон тегишли тузатиш ишларини бажариши лозим. Агар бошқа Томон тегишли тузатиш ишларини оқилона белгиланган вақт ичида бажармаса, ҳар бир Томон бошқа Томон тайинлаган авиакорхонага ёки авиакорхоналарга берилган парвозлар учун рухсатномани ёки техник ваколатномани бекор қилиш, тўхтатиб қўйиш ёки чеклаш ҳуқуқини сақлаб қолади.

1. Томонлар халқаро қонунлардан келиб чиқадиган ўз ҳуқуқлари ва мажбуриятларига мувофиқ ғайриқонуний аралашув ҳаракатларидан фуқаро авиациясининг хавфсизлигини таъминлашга доир зиммага оладиган ўзаро мажбуриятлари ушбу Битимнинг ажралмас қисми эканлигини бир-бирларига тасдиқлайдилар. Томонлар халқаро қонунга доир ўз ҳуқуқлари ва мажбуриятларининг умумий йўналишларини чекламаган ҳолда 1963 йил 14 сентябрда Токиода имзоланган Ҳаво кемаларида содир этиладиган жиноятчилик ва бошқа ҳаракатлар Конвенция, 1970 йил 16 декабрда Гаагада имзоланган Ҳаво кемаларини ғайриқонуний равишда эгаллаб олишга қарши кураш тўғрисидаги Конвенция, ҳамда 1971 йил 23 сентябрда Монреалда имзоланган Фуқаро авиацияси хавфсизлигига қарши ноқонуний ҳаракатлар билан кураш ҳақидаги Конвенция ва 1988 йил 24 февралда Монреалда имзоланган Халқаро фуқаро авиациясига хизмат кўрсатадиган аэропортларда ғайриқонуний куч ишлатиш ҳаракатларига қарши кураш тўғрисидаги Баённома қоидаларига мувофиқ ҳаракат қиладилар.

2. Томонлар талабларга кўра фуқаро ҳаво кемасини ғайриқонуний тутқун қилишнинг, ҳамда шундай ҳаво кемасига, ундаги йўловчилар ва экипаж аъзоларига, аэропортлар ва қатновни таъминлаш воситаларига хавф туғдирувчи бошқа ғайриқонуний хатти-ҳаракатларнинг, шунингдек фуқаро авиацияси хавфсизлигига таҳдид қилишнинг ҳар қандай кўринишининг олдини олишда бир-бирларига барча зарурий ёрдамни кўрсатадилар.

3. Томонлар ўзаро муносабатларида авиация хавфсизлиги талабларига мувофиқ ва Фуқаро авиацияси халқаро ташкилоти томонидан ўрнатилган ва Конвенцияга Илова этиб белгиланган тегишли қоидаларга биноан иш кўрадилар; улар асосий фаолият жойи ёки доимий турар жойи ўз ҳудудларида жойлашган ҳаво кемаларининг ва ўз ҳудудларида жойлашган аэропортларнинг фойдаланувчиларидан авиация хавфсизлигининг юқоридаги қоидаларига мувофиқ иш кўришларини талаб қиладилар.

4. Томонларнинг ҳар бири ҳаво кемасидан фойдаланувчиларга нисбатан бошқа Томоннинг ҳаво кемаси ўз ҳудуди чегараларига кириб келаётганида, ундан чиқиб кетаётганида ва унда бўлиб турган вақтида авиация хавфсизлиги қоидаларига риоя этилишини талаб қилиши мумкин ва ҳар бир Томон ҳаво кемаларини ҳимоя қилиш ва йўловчиларни, экипаж аъзоларини, уларнинг оғир ва енгил юкларини ҳамда юкларни ва ҳаво кемасидаги захираларни ҳаво кемаси саҳнига олиш ёки ортиш вақтидан олдин ёки вақтида текшириш учун ўз ҳудуди доирасида самарали чора-тадбирлар кўрилишини таъминлайди. Ҳар бир Томон айрим таҳдидга жавобан хавфсизликни таъминлаш юзасидан махсус чора-тадбирлар кўришга доир бошқа Томоннинг илтимосларини ҳам хайрихоҳлик билан кўриб чиқади.

5. Башарти, ҳаво кемаси ноқонуний тутқун қилиб олинса ёки уни ноқонуний тутқун қилиш таҳдиди мавжуд бўлса ёки ҳаво кемаси, ундаги йўловчилар ва экипаж аъзоларига аэропортлар ёки ҳаво қатновини таъминлаш воситалари хавфсизлигига бошқа ғайриқонуний хатти-ҳаракатлар билан таҳдид қилинса, Томонлар алоқани енгиллатиш орқали бир- бирларига турлича кўмак берадилар ва бундай кўнгилсизлик ёки таҳдидга жадал, ҳамда бешикаст барҳам беришнинг барча зарур чора-тадбирларини кўрадилар.

6. Башарти, Томонлардан бири бошқа Томоннинг ушбу моддадаги авиация хавфсизлиги қоидаларига риоя қилмаётганлиги тўғрисида етарли асосга эга бўлса, шу Томоннинг авиация маъмурлари бошқа Томоннинг авиация маъмурларидан кечиктириб бўлмайдиган маслаҳатлашишлар ўтказишни талаб қилишлари мумкин. Бундай талаб тушган кундан эътиборан 15 кун ичида қониқарли келишувга эриша олинмаган тақдирда мажбуриятларни бажармаётган Томоннинг авиакорхонасига ёки авиакорхоналарига берилган парвозга доир рухсатномалардан ва техник ваколатлардан фойдаланишни бекор қилиш, тўхтатиб қўйиш, чеклаш ёки улардан фойдаланишда бажарилиши зарур деб топилган шартларнинг бажарилишини талаб қилиш асоси юзага келади. Махсус талаб бўлган ҳолда бу Томон 15 кунлик муддат тугамасдан вақтинча чораларни кўриши мумкин.

1. Ҳар бир Томоннинг авиакорхоналари ҳаво ташишларини реклама қилиш ва уларни сотиш мақсадида бошқа Томоннинг ҳудудида ўзларининг ваколатхоналарини бошқа Томоннинг қонунлари ва қоидаларига мувофиқ очиш ҳуқуқига эга бўлади.

2. Ҳар бир Томоннинг тайинланган авиакорхоналари бошқа Томоннинг мамлакатга кириш, яшаш ва иш билан таъминлашга доир бўлган қонун ва қоидаларига мувофиқ шу бошқа Томоннинг ҳудудига ўзининг маъмурий, тижорий, техник, ишчи ва ҳаво ташишларини амалга ошириш учун зарур бўлган бошқа мутахассисларни олиб келиш ва ушлаб туриш ҳуқуқига эга бўлади.

3. Хар бир тайинланган авиакорхона бошқа Томоннинг ҳудудида ерда хизмат кўрсатиш ишларини ўз кучи билан амалга ошириш ҳуқуқига эга бўлади («мустақил хизмат кўрсатиш») ёки, ўз ихтиёрига кўра, бундай хизматларни тўла ёки қисман бажариш учун рақиблар орасидан агентларни тайинлаши ҳам мумкин. Бу ҳуқуқлар аэропортнинг хавфсизлигини таъминловчи техник имкониятлардан келиб чиқиши лозим. Аэропорт хавфсизлигини таъминловчи талаблар мустақил хизмат кўрсатишга йўл қўймаса, ерда хизмат кўрсатиш имкониятлари барча авиакорхоналар учун тенг бўлиши лозим; тўловлар кўрсатилган хизматларга сарфланган харажатлар асосида ундирилади; ва бундай хизматлар мустақил хизмат кўрсатишни тақозо этган ҳолларда унинг тури ва сифатига таққосланиши лозим.

4. Ҳар бир Томоннинг авиакорхонаси бошқа Томоннинг ҳудудида ҳаво ташишларини, ўз ихтиёрига кўра, тўғридан-тўғри ёки ўзининг агентлари орқали сотиш билан шуғулланиши мумкин, аммо чартер парвозларини ўз ҳудудидан амалга оширадиган Томоннинг чартер ташишларини тартибга солувчи қоидаларида алоҳида қайд этилган ҳоллар ҳамда йўловчиларнинг пул маблағларини, шунингдек йўловчиларнинг ташишлардан воз кечиш ва пул маблағларини қайтариб олиш ҳуқуқларини ҳимоя қилиш билан боғлиқ бўлган ҳоллар бундан мустаснодир. Ҳар бир авиакорхона бундай ташишларни ўша ҳудуднинг валютасида ёки эркин алмаштириладиган валюталарда сотиш ҳуқуқига ва ҳар бир шахс уларни эркин сотиб олиш имкониятига эга бўлади.

5. Ҳар бир авиакорхона маблағларнинг маҳаллий сарф- харажатларидан ортган даромад қисмини алмаштириш ва ўз мамлакатига ўтказиш ҳуқуқига эга бўлади. Алмаштириш ва ўтказиш уларни амалга ошириш тўғрисида ташувчидан дастлабки ариза тушган санада жорий муомала ва пул ўтказиш учун қўлланиладиган алмаштириш қийматига мувофиқ амалга оширилади ва бундай алмаштириш ва пул ўтказишларга нисбатан чеклашлар ёки солиқ солиш қўлланмайди.

6. Ҳар бир Томоннинг авиакорхоналарига бошқа Томоннинг ҳудудида барча маҳаллий сарф-харажатларга, жумладан ёқилғи сотиб олиш учун ўша ҳудуднинг миллий валютасини ишлатишга рухсат берилади. Ҳар бир Томоннинг авиакорхоналари бошқа Томоннинг ҳудудида бундай сарф-харажатларга ўз ихтиёрига кўра эркин алмаштириладиган валютани ўша ҳудуднинг миллий валюта қоидаларига мувофиқ ишлатиши мумкин.

7. Келишилган йўналишлар бўйича рухсат этилган қатновлардан фойдаланиш ёки уларни таклиф қилиш чоғида бир Томоннинг ҳар қандай тайинланган авиакорхонаси қуйидаги авиакорхоналар билан маркетинг соҳасида ҳамкорлик қилиш тўғрисида, мисол учун, жой банд қилиш, кодлардан умумий фойдаланиш ёки ижарага олиш борасида шартномалар тузиши мумкин:

a) ҳар бир Томоннинг авиакорхонаси ёки авиакорхоналари билан; ва

b) учинчи давлатнинг авиакорхонаси ёки авиакорхоналари билан, башарти ушбу учинчи давлат бошқа Томоннинг авиакорхоналари ва бошқа авиакорхоналар ўртасида мазкур учинчи давлатнинг ҳудудига, ҳудудидан ва ҳудуди орқали қатновларни амалга ошириш тўғрисида шартнома тузиш учун ваколат берса ёки рухсат берса;

башарти, барча авиакорхоналар бундай шартномалар тузишда 1) тегишли ваколатга эга бўлсалар ва 2) бундай шартномалар тузишда одатда қўлланиладиган талабларга жавоб берсалар.

8. Ушбу Битимнинг бирон-бир бошқа қоидаларидан қатъи назар, ҳар икки Томоннинг авиакорхоналарига ва билвосита юк ташувчиларига Томонларнинг ёки учинчи давлатларнинг ҳудудидаги манзилларга ёки манзиллардан халқаро ҳаво ташишларини амалга ошириш чоғида юк ташиш учун истаган ер устидаги ташишлардан фойдаланиш ҳуқуқи ҳеч қандай чеклашсиз берилади, шунингдек божхона хизматлари мавжуд бўлган барча аэропортларга ёки аэропортлардан ташишларни амалга ошириш ҳуқуқи ҳам берилади, бунга қўлланиши мумкин бўлган ҳолларда амалдаги қонунларга ва қоидаларга мувофиқ божларни тўлаб битириш манзилигача юкларни ташиш ҳуқуқи ҳам киради. Бундай юкларга нисбатан, улар ер устидаги транспорт воситалари ёки ҳаво транспорт воситалари орқали ташилишидан қатъи назар, аэропортларнинг божхона назорати ва тартиботлари қўлланиши лозим. Авиакорхоналар ўз ихтиёрларига кўра ер устидаги ташишларини мустақил ҳолда ёки ер устидаги ташишларни амалга оширадиган бирон-бир бошқа ташувчилар билан шартнома тузиш орқали амалга оширишлари мумкин, бунга бошқа авиакорхоналар ва билвосита юк ташувчилари амалга оширадиган ер устидаги ташишлар ҳам киради. Бундай қўшма юк ташиш хизматлари ҳаво ташишлари учун ҳам ер устидаги ташишлар учун ҳам умумий нархда таклиф қилиниши мумкин, башарти юк жўнатувчилар бундай ташишларнинг хусусиятлари борасида нотўғри маълумотларга эга бўлмасликлари лозим.

1. Ҳар бир Томон тайинлаган авиакорхона томонидан халқаро ҳаво йўлларида фойдаланилаётган ҳаво кемаси, шунингдек шу кемадаги рўйхатдаги мулк, ерда хизмат кўрсатиш ускуналари, ёқилғи захиралари ва мойлаш ашёлари, техник эҳтиёжлари захиралари, (двигателларни ўз ичига олгани ҳолда) эҳтиёт қисмлар, (парвоз мобайнида йўловчиларга чекланган миқдорда сотиш учун ёки улар томонидан истеъмол қилиш учун мўлжалланган озиқ-овқат маҳсулотлари, ичимликлар, тамаки ва бошқа маҳсулотларини ўз ичига олиб, лекин фақат шулар билан чекланиб қолмаган ҳолда) ҳаво кемасининг захиралари ва халқаро ҳаво ташиш йўлларида машғул бўлган ҳаво кемасидан фойдаланиш чоғида ишлатиладиган ва унга хизмат кўрсатиш учун мўлжалланган бошқа буюмлар ўзаро тенглик муносабатлари асосида бошқа Томон ҳудудига кириб келган вақтдан бошлаб (1) миллий маъмурлар томонидан ўрнатилган ва (2) кўрсатиладиган хизмат харажатларидан келиб чиқмаган барча импорт чекланишлари, мол-мулкка солиқлар ва капитал учун солиқлар, божхона божлари, акциз йиғимлари ва шунга ўхшаш йиғимлар ва тўловлардан озод қилинади, башарти бундай асбоб-ускуналар ва захиралар ҳаво кемасининг саҳнида сақланиб турса.

2. Кўрсатилган хизмат учун олинадиган йиғимлардан мустасно ҳолда ушбу модданинг 1-бандида қайд этилган солиқлардан, йиғимлардан, божлардан, бадаллардан ва тўловлардан ўзаро тенглик муносабатлари асосида қуйида келтирилганлар ҳам озод қилинади:

a. бир Томоннинг ҳудудига олиб кирилган ёки у ерда захира қилиб олинган ва оқилона белгиланган меъёрлар чегарасида ҳаво кемасининг саҳнига олинган халқаро ҳаво ташишларида машғул бўлган бошқа Томоннинг авиакорхонасига тегишли жўнаб кетиш йўналишидаги ҳаво кемасининг саҳнида фойдаланиш учун мўлжалланган ҳаво кемасининг захиралари, ҳаттоки бу захиралар Томонлардан бирининг ҳудудида ҳаво кемасининг саҳнига олинган бўлиб ўша ҳудуд доирасидаги парвознинг бир қисмида ишлатилган тақдирда ҳам;

b. бир Томоннинг ҳудудига халқаро ҳаво ташиш йўлларида машғул бўлган бошқа Томоннинг авиакорхонасига тегишли ҳаво кемасига хизмат кўрсатиш, уни техник ҳолатини таъминлаб туриш ва таъмирлаш учун олиб кирилган ерда хизмат кўрсатиш учун мўлжалланган ускуналар ва двигателларни ўз ичига олгани ҳолда эҳтиёт қисмлар;

c. бир Томоннинг ҳудудига халқаро ҳаво ташиш йўлларида машғул бўлган бошқа Томоннинг авиакорхонасига қарашли ҳаво кемасида ишлатиш учун олиб кирилган ва у ерда захира қилиб олинган авиаёқилғи, мойлаш ашёлари ва техник эҳтиёжлари захиралари, ҳаттоки бу захиралар Томонлардан бирининг ҳудудида ҳаво кемасининг саҳнига олинган бўлиб ўша ҳудуд доирасида амалга ошириладиган парвознинг бир қисмида ишлатилган тақдирда ҳам; ва

d. халқаро ҳаво ташишларида машғул бўлган бошқа Томоннинг авиакорхонасига қарашли жўнаб кетиш йўналишидаги ҳаво кемасида фойдаланиш учун бир Томоннинг ҳудудига олиб кирилган ёки у ерда захира қилиб олинган ва оқилона белгиланган меъёрлар чегарасида ҳаво кемасининг саҳнига олинган ёрдамчи ва реклама материаллари, ҳаттоки бу захиралар Томонлардан бирининг ҳудудида олинган бўлиб, ўша ҳудуд доирасида амалга ошириладиган парвознинг бир қисмида ишлатилган тақдирда ҳам.

3. Ушбу модданинг 1- ва 2-бандларида кўрсатилган асбоб-ускуналар ва захиралар талаб қилинган ҳолда тегишли маъмурларнинг назорати ёки кузатуви остида сақланиши мумкин.

4. Ушбу моддада баён этилган солиқлардан озод қилиш бир Томоннинг тайинланган авиакорхонаси бошқа Томон худди шундай солиқлардан озод қилган бирон-бир бошқа авиакорхона билан ушбу модданинг 1- ва 2-бандларида кўрсатилган буюмларни бошқа Томоннинг ҳудудида ижарага олиш ёки ўтказиш тўғрисида шартнома тузган тақдирда ҳам қўлланилади.

1. Ҳар бир Томоннинг соҳасидаги ваколатли маъмурлари ёки ташкилотлари томонидан бошқа Томоннинг авиакорхоналари учун ўрнатилиши мумкин бўлган аэропорт йиғимлари одил, мўътадил, камситмайдиган ва фойдаланувчиларнинг ўртасида ҳаққоний тақсимланган бўлиши лозим. Ҳар қандай ҳолда, бошқа Томон авиакорхоналарига нисбатан ўрнатиладиган бундай аэропорт йиғимларини белгилаш шартлари бирон-бир бошқа авиакорхоналарга нисбатан худди шундай йиғимларни белгилашда қўлланиладиган имтиёзлардан кам бўлмаслиги лозим.

2. Бошқа Томоннинг авиакорхоналари учун йиғимлар соҳасидаги ваколатли маъмурлар ёки ташкилотлар томонидан ўрнатилган аэропорт йиғимлари зарур бўлган аэропорт, аэропортдаги экология, аэронавигация ва авиация хавфсизлиги воситалари билан таъминлашга ва аэропортда ёки аэропорт тизими доирасида хизмат кўрсатишга сарфланган тўла харажатларни акс эттириши, лекин ундан ошмаслиги лозим. Бундай тўла харажатлар ўз ичига нархи туширилгандан сўнг моддий бойликда оқилона тушумни олиши мумкин. Тўлов асосида фойдаланиладиган мосламалар ва хизматлар билан таъминлаш амалий ва иқтисодий асосда амалга оширилиши лозим.

3. Ҳар бир Томон ўзининг ҳудудидаги йиғимлар соҳасидаги ваколатли маъмурлар ёки ташкилотлар ва аэропорт хизматидан ва воситаларидан фойдаланадиган авиакорхоналар ўртасида маслаҳатлашишлар ўтказишга кўмак беради, ва ушбу модданинг 1- ва 2-бандлари қоидаларига мувофиқ йиғимлар соҳасидаги ваколатли маъмурлар ёки ташкилотлар ва авиакорхоналар ўртасида йиғимлар оқилона белгиланганлигини синчиклаб текшириб чиқиш учун зарур бўлиши мумкин бўлган маълумотлар билан алмашув ўтказишни қўллаб-қувватлайди. Йиғимлар соҳасидаги ваколатли маъмурлар аэропорт йиғимларини ўзгартириш борасидаги ҳар қандай таклифлари тўғрисида фойдаланувчиларни олдиндан огохлантиришларини ҳар бир Томон таъминлайди, чунки бу ўзгартиришлар амалга оширилгунга қадар фойдаланувчилар ўз фикрларини изҳор этиш имкониятига эга бўлишлари лозим.

4. Ҳеч қайси бир Томон ушбу модданинг қоидаларига зид келадиган 14-моддага мувофиқ баҳслашувларни ҳал қилиш тартиботларида иштирок этмаслиги лозим, қуйидаги ҳоллардан ташқари: (1) у оқилона берилган вақт ичида бошқа Томондан тушган арзномага кўра ёки тартиботларни қайта кўриб чиқмаса; ёки (2) қуйидаги масала кўриб чиқилгандан сўнг у ушбу модданинг қоидаларига мувофиқ келмайдиган ёки тартиботларни ўзининг ваколат ҳуқуқи доирасида ўзгартириш учун барча зарур ҳаракатларни амалга оширмаса.

1. Ҳар бир Томон ҳар икки Томоннинг тайинланган авиакорхоналарига ушбу Битимда кўзда тутилган халқаро ҳаво ташишларини амалга оширишда рақобат қилиш учун ҳаққоний ва тенг имкониятлар беради.

2. Ҳар бир Томон бозордаги тижорий шароитларга асосланган ҳолда таклиф қилинадиган халқаро ҳаво ташишларининг ҳажмини ва парвозлар такрорийлигини белгилашни ҳар бир тайинланган авиакорхонанинг ўзига ҳавола қилади. Мазкур ҳуқуқдан келиб чиққан ҳолда ҳеч қайси бир Томон ташишлар миқдорига, парвозларнинг такрорийлиги ёки мунтазамлигига ёки бошқа Томоннинг тайинланган авиакорхонаси фойдаланаётган ҳаво кемасининг тури ёки турларига нисбатан бир томонлама чеклашлар қўлламайди, бироқ Конвенциянинг 15-моддасига мувофиқ келадиган умумий шартларга кўра божхона, техник, фойдаланиш ёки экологик сабабларга кўра киритиладиган чеклашлар бундан мустаснодир.

3. Ҳеч қайси бир Томон бошқа Томоннинг тайинланган авиакорхоналаридан биринчи бўлиб рад қилиш ҳуқуқидан келиб чиқадиган мажбуриятларни бажаришни, иш юклашнинг муайян бир даражасига амал қилишни, эътироз бўлмаган сабабли бирон-бир тўлов тўлашни талаб қилмаслиги ҳамда ташишларнинг ҳажми, такрорийлиги ёки нисбатан ушбу Битимнинг мақсадларига зид келадиган бошқа талабларни қўймаслиги лозим.

4. Ҳеч қайси бир Томон тасдиқлаш учун учиш жадваллари, чартер парвозлари учун дастурлар ёки фойдаланиш режалари тўғрисида маълумотлар билан таъминлашни бошқа Томоннинг авиакорхонасидан талаб қилмайди, бироқ ушбу модданинг юқоридаги 2-бандининг шартларини умумийлаштириш мақсадида тенг ҳуқуқлик асосида талаб қилиниши мумкин бўлган ёки ушбу Битимнинг Иловасида алоҳида қайд этилган маълумотлар бунга кирмайди. Агарда бир Томон ҳужжатларни ахборот олиш мақсадида талаб қилса, у ҳаво ташувларини амалга оширувчи воситачилар ва бошқа Томоннинг тайинланган авиакорхоналари ахборот бериши учун қўлланиладиган қоидаларда ва тартиботларда мавжуд бўлган маъмурий тўсиқларни иложи борича камайтириши лозим.

1. Ҳар бир Томонга бозор тижорий шароитларини инобатга олган ҳолда ҳар бир тайинланган авиакорхона ўрнатган ҳаво ташишлари учун нархлар тақдим этилади. Томонларнинг аралашуви қуйидагилар орқали чекланади:

a. номаъқул дискриминацион нархларнинг ёки амалиётнинг олдини олиш;

b. асоссиз кўтариб юборилган ёки устунлик вазиятидан фойдаланиш натижасида қўлланиши чекланган нархлардан харидорларни ҳимоя қилиш; ва

c. ҳукуматнинг бевосита ёки билвосита берган субсидиялари ёки ёрдами натижасида сунъий равишда тушган нархлардан авиакорхоналарни ҳимоя қилиш.

2. Ҳар бир Томон унинг ҳудудига ёки ҳудудидан бошқа Томоннинг авиакорхоналари амалга оширадиган ташишлари учун белгиланган нархлар борасида унинг авиация маъмурларига хабарнома юборишларини ёки маълумотлар билан таъминлашларини талаб қилиши мумкин. Ҳар икки Томоннинг авиакорхоналаридан нархлар борасида хабарнома юборишни ёки маълумотлар билан таъминлашни улар кучга кириши тахмин қилинган вақтга қадар 30 кундан кўп бўлмаган давр ичида талаб қилиши мумкин. Айрим ҳолларда хабарнома ёки маълумотлар одатда талаб қилинадигандан ҳам қисқароқ вақт ичида тақдим этилиши мумкин. Бир-бирини камситмаслик асосида маълумотга эга бўлиш истагида талаб қилинган маълумотларни истисно қилган ҳолда, ҳеч қайси бир Томон бошқа Томоннинг авиакорхонасидан умумий чартер ташишлари учун ўрнатилган нархлар тўғрисида хабарнома беришини ёки ҳужжатларни тақдим этишни талаб қилмаслиги лозим.

3. Ҳеч қайси бир Томон (1) Томонларнинг ҳудудлари ўртасида халқаро ҳаво ташишларини амалга ошириш учун Томонлардан бирининг авиакорхонаси ёки (2) бир Томоннинг авиакорхонаси бошқа Томоннинг ҳудуди ва бирон бир бошқа давлатнинг ўртасида халқаро ҳаво ташишларини амалга ошириш учун, шунингдек ҳар икки ҳолда интерлайн ва прорейт келишувлари асосида амалга ошириладиган ташишлар учун ҳам таклиф қилаётган ёки қўллаётган нархлари кучга киришига ёки уларнинг амал қилиш муддатини узайтиришга қарши бир томонлама ҳаракат қилмаслиги лозим. Агар Томонлардан бири исталган бундай нарх ушбу модданинг юқоридаги 1-бандида қайд этилган қоидаларга тўғри келмайди деган фикрга келса, у бошқа Томондан маслаҳатлашишлар ўтказишни сўрайди ва иложи борича қисқа вақт ичида ўзининг норозилиги сабаблари тўғрисида хабарнома юборади. Бундай маслаҳатлашишлар уларни ўтказиш тўғрисида илтимос тушган кундан эътиборан 30 кундан кечиктирмасдан ўтказилиши лозим ва Томонлар бу масала бўйича тегишли қарор чиқариш учун зарур бўлган маълумотлар билан таъминлашда бир-бирларига кўмак берадилар. Агарда норозилик фикри билдирилган нархлар борасида Томонлар келишиб олсалар, ҳар бир Томон мазкур келишув кучга кириши учун астойдил ҳаракат қилиши лозим. Бундай ўзаро келишувсиз нархлар кучга киради ёки нархларнинг амалда қўлланиши давом этади.

Ҳар бир Томон истаган вақтида ушбу Битим борасида маслаҳатлашишлар ўтказишни сўраши мумкин. Бундай маслаҳатлашишлар иложи борича қисқа вақт ичида, аммо маслаҳатлашишларни ўтказиш тўғрисида бошқа Томондан илтимос тушган кундан эътиборан олтмиш (60) кундан кечиктирмасдан ўтказилиши лозим, башарти бошқа келишувга эришилмаган бўлса.

1. 12-модданинг (Нархларни белгилаш) 3-бандини қўллаш орқали келиб чиқиши мумкин бўлган баҳслардан ташқари, ушбу Битим қоидалари юзасидан келиб чиққан ҳар қандай низо расмий маслаҳатлашишларнинг биринчи босқичида ҳал қила олинмаган тақдирда Томонларнинг ўзаро келишувига асосан бу баҳсни бир шахс ёки ташкилотнинг ҳукмига оширишлари мумкин. Агар улар бундай тарзда келиша олмасалар, бу баҳс Томонлардан исталган бирининг талабига биноан ҳакамлар ҳайъатининг ихтиёрига қуйида келтирилган тартиботларга мувофиқ топширилади.

2. Уч ҳакамдан иборат бўлиши лозим бўлган ҳакамлар ҳайъати қуйидаги тарзда тузилиши лозим:

a. ҳакамлар ҳайъатига баҳслашувни топшириш сўров тушган кундан бошлаб 30 кун ичида ҳар бир Томон биттадан ҳакам тайинлайди. Шу икки ҳакам тайинлангандан сўнг 60 кун ичида улар ўзаро келишув асосида учинчи ҳакамни тайинлашлари лозим ва у ҳакамлар ҳайъатининг раиси сифатида иш кўриши лозим;

b. башарти, Томонлардан бири ҳакамни тайинлай олмаса ёки ушбу банднинг а-кичик бандига мувофиқ учинчи ҳакам тайинланмаса, Томонлардан исталган бири Фуқаро авиацияси халқаро ташкилоти Кенгашининг Президентидан 30 кунлик муддат ичида вазиятга қараб ҳакамни ёки ҳакамларни тайинлашни илтимос қилиши мумкин. Агарда Кенгашнинг Президенти Томонлардан бирининг фуқароси бўлса, Президентнинг биринчи муовини айнан шу асосда ишдан четлаштирилмаганлиги сабабли зарур бўлган тайинлашни амалга ошириши лозим.

3. Алоҳида келишиб олинган ҳоллардан ташқари, ҳакамлар ҳайъати ушбу Битимга мувофиқ ўзининг вазифа доирасини белгилаб олиши ва ўзининг тартиботларини ўрнатиши лозим. Ташкил қилиниб бўлган ҳакамлар ҳайъати вақтинчалик ёрдамчи чораларни кўришни таклиф қилиш билан бирга ўзининг сўнгги қарорини чиқариши ҳам мумкин. Ҳакамлар ҳайъатининг кўрсатмасига биноан ёки Томонлардан бирининг илтимосига биноан ҳакамлар ҳайъати орқали кўриб чиқиладиган масалаларни хамда бу борада амалга ошириладиган тартиботларни аниқлаб олиш мақсадида ҳакамлар ҳайъати тўла-тўкис тузилган кундан эътиборан 15 кундан кечиктирмасдан учрашув ўтказилиши лозим.

4. Алоҳида келишиб олинган ҳоллардан ташқари ёки ҳакамлар ҳайъатининг кўрсатмасига биноан ҳар бир Томон ҳакамлар ҳайъати батамом ташкил қилингандан сўнг 45 кун ичида баённома тақдим этиши лозим. Жавоблар 60 кундан сўнг берилади. Ҳакамлар ҳайъати ишни кўриб чиқишни Томонлардан бирининг талабига биноан ёки ўзининг ихтиёрига кўра жавобларни тақдим этиш учун белгиланган муддат тугагач 15 куннинг ичида ўтказиши лозим.

5. Ҳакамлар ҳайъати ишни кўриб чиқиш тугаган кундан сўнг 30 кун ичида қарорни ёзма равишда чиқариши лозим ёки ишни кўриб чиқиш ўтказилмаган тақдирда ҳар икки жавоб тақдим этилган кундан кейин чиқариши лозим. Қарор ҳакамлар ҳайъатининг кўпчилик овози билан чиқарилади.

6. Томонлар қарор чиққандан сўнг 15 кун ичида қарорга изоҳ беришни талаб қилишлари мумкин ва ҳар қандай изоҳ бундай талаб тушгандан сўнг 15 кун ичида берилиши лозим.

7. Ҳар бир Томон ҳакамлар ҳайъати чиқарган ҳар бир қарор ёки ҳукмни ўзининг миллий қонунларига мувофиқ равишда бажариш мажбуриятини ўз зиммасига олиши лозим.

8. Ҳакамларнинг маошини ва чиқимларини ўз ичига олгани ҳолда, ҳакамлар ҳайъатининг барча харажатлари Томонлар ўртасида тенг бўлинади. Халқаро фуқаро авиацияси ташкилоти Кенгашининг президенти томонидан ушбу модданинг 2b-бандининг тартиботларининг бажарилиши билан боғлиқ бўлган харажатлар ҳакамлар ҳайъатнинг чиқимларининг бир қисмини ташкил қилади.

Ҳар бир Томон истаган вақтида бошқа Томонни ушбу Битимнинг амал қилишини тўхтатиш нияти тўғрисида ёзма равишда хабардор қилиши мумкин. Шундай мазмундаги хабарнома дарҳол Фуқаро авиацияси халқаро ташкилотига ҳам юборилиши лозим. Ушбу Битим амал қилишини (бошқа Томонга юборилган хабарнома олинган жойда) бошқа Томон хабарномани олган кундан бошлаб бир йиллик муддат ўтиши билан кечиктирмасдан қоқ ярим кечада тўхтатади, агарда мазкур хабарнома Томонларнинг келишуви асосида орқага қайтариб олинмаган бўлса.

Ушбу Битим ва унга киритилган барча тузатишлар Фуқаро авиацияси халқаро ташкилотида рўйхатга олиниши лозим.

Ушбу Битим имзоланган санадан бошлаб кучга киради. Ушбу Битим кучга кирар экан у Томонлар ўртасидаги муносабатларда 1990 йил 1 июндаги Америка Қўшма Штатлари Ҳукумати ва Совет Социалистик Республикалари Иттифоқи Ҳукумати ўртасида Фуқаро ҳаво транспорти тўғрисидаги Битим ва унинг тузатишларининг ўрнини босади.

Тегишли тартибда ўз ҳукуматларидан ваколат олган қуйида имзо чекувчилар шунга гувоҳлик бериб ушбу Битимни имзоладилар.

Вашингтон шаҳрида 1998 йил йигирма еттинчи февралда икки нусхада инглиз тилида тузилди, ҳар бири бир хил кучга эга. Ушбу Битимнинг ўзбек тилидаги таржимаси тайёрланади ва уни инглиз тилидаги матн билан мувофиқ эканлигини тасдиқловчи дипломатик ноталар алмашиш йўли орқали келишилгандан сўнг у бир хил кучга эга бўлади.

Ушбу Илова бўйича тайинланган ҳар бир Томоннинг авиакорхоналарига уларни тайинлаш шартларига мувофиқ қуйидаги йўналишлардаги манзиллар ўртасида мунтазам халқаро ҳаво ташишларини амалга ошириш ҳуқуқи берилади:

A. Америка Қўшма Штатларининг Ҳукумати тайинлаган авиакорхона ёки авиакорхоналари учун белгиланган йўналишлар:

1. Қўшма Штатларининг ташқарисидаги манзиллардан Қўшма Штатларидаги манзиллар ва оралиқ манзиллар орқали Ўзбекистондаги манзил ёки манзилларга ва ташқаридаги манзилларга.

2. Фақат юк ташиши ёки ташишлари учун Ўзбекистон ва истаган манзил ёки манзиллар ўртасида.

B. Ўзбекистон Республикасининг Ҳукумати тайинлаган авиакорхона ёки авиакорхоналари учун белгиланган йўналишлар:

1. Ўзбекистоннинг ташқарисидаги манзиллардан Ўзбекистондаги манзиллар ва оралиқ манзиллар орқали Қўшма Штатларидаги манзилларга ва унинг ташқарисидаги манзилларга.

2. Фақат юк ташиши ёки ташишлари учун Қўшма Штатларининг ҳудуди ва исталган манзил ёки манзиллар ўртасида.

Ҳар бир тайинланган авиакорхона ҳар бир ёки барча парвозлар чоғида ва ўз ихтиёрига кўра қуйидагиларни бажариши мумкин:

1. Бир томонлама ёки икки томонлама қатновларни амалга ошириш;

2. Бир қатновни амалга ошириш чоғида бошқа-бошқа қатновларни қўшиб бажариш;

3. Йўналишлар ташқарисидаги, оралиқ ва Томонларга тегишли ҳудудларнинг ташқарисида ва доирасидаги манзилларда истаган тартибда ва истаган тарзда қўниш;

4. Истаган манзилни ёки манзилларни тушириб қолдириш;

5. Йўналишлардаги бирон-бир манзилда ташилувчиларни ўзининг ҳаво кемаларининг биридан иккинчисига ўтказиш;

6. Ўзининг ҳудудидаги манзилдан кейинги манзилда тўхташ чоғида ҳаво кемасини ёки қатнов сонини ўзгартириши ёки ўзгартирмаслик, ва бундай ташишларни тўғри қатновлар сифатида таклиф қилиш ва жамоатчиликка реклама қилиш мумкин;

бунда қатновларнинг йўналиши ёки географиясига нисбатан чеклашлар қўлланмайди ва ушбу Битимга биноан қандай бўлмасин бажарилиши рухсат этилган ташишларни амалга ошириш ҳуқуқига зиён етмаслиги лозим, башарти, юк ташиш қатновларини истисно этган ҳолда, қатновнинг тўхташ манзили авиакорхонани тайинлаган Томоннинг ҳудудида жойлашган бўлса.

Ҳар бир тайинланган авиакорхона йўналишдаги истаган манзилда фойдаланаётган ҳаво кемасининг сонини ёки турини истаганча алмаштирган ҳолда юқорида кўрсатилган йўналишларнинг бир ёки бир неча қисмида халқаро ҳаво ташишларини бажариши мумкин, башарти, юк ташишларини истисно этган ҳолда, жўнаб кетиш йўналишида бу манзилдан ташқарига мўлжалланган ташиш авиакорхонани тайинлаган Томоннинг ҳудудида бошланган ташишнинг давоми бўлса ва учиб келиш йўналишида эса авиакорхонани тайинлаган Томоннинг ҳудудига мўлжалланган ҳаво ташиши ўша манзилдан ташқарида бошланган ташишнинг давоми бўлса.

Ушбу Иловага биноан тайинланган ҳар бир Томоннинг авиакорхоналари уларни тайинлаш шартларига мувофиқ йўловчиларни (ва уларнинг енгил юкларини) ва (ёки) юкларни халқаро чартер қатновлари орқали (юкларни жўнатишни, тақсимлашни ва (йўловчи(юк)) чартер ташишларини бирга бажаришни ўз ичига олгани ҳолда, аммо шуларнинг ўзи билан чекланиб қолмаган ҳолда,) ташиш ҳуқуқига қуйидаги манзиллар ўртасида эга бўлади:

авиакорхонани тайинлаган Томоннинг ҳудудидаги бирон-бир манзил ёки манзилларнинг ва бошқа Томоннинг ҳудудидаги бирон-бир манзил ёки манзилларнинг ўртасида; ва

бошқа Томоннинг ҳудудидаги бирон-бир манзил ёки манзилларнинг ва учинчи давлатдаги бирон-бир манзил ёки манзилларнинг ўртасида, башарти, юк ташувчи чартерларни истисно этган холда, бундай қатнов ҳаво кемасини алмаштирган ёки алмаштирмаган ҳолда давом этаётган қатновнинг қисмини ташкил қилса, ва у ўзининг ҳудуди ва бошқа Томоннинг ҳудуди ўртасида маҳаллий ташишларни амалга ошириш мақсадида ўзининг ҳудудига амалга ошириладиган қатновни ўз ичига олади.

Ушбу Иловада назарда тутилган қатновларни амалга оширишда ҳар бир Томоннинг ушбу Иловага мувофиқ тайинланган авиакорхоналари: (1) ҳар бир Томоннинг ҳудудида ёки ҳудудидан ташқарида бўлишидан қатъи назар, истаган манзилларда тўхташ; (2) бошқа Томоннинг ҳудуди орқали транзит ташувларни амалга ошириш; (3) бир Томоннинг ҳудудида бошланган, бошқа Томоннинг ҳудудида бошланган ва учинчи давлатнинг ҳудудида бошланган ташишларни битта ҳаво кемасининг ўзида бирга амалга ошириш; (4) фойдаланилаётган ҳаво кемасининг турини ёки сонини йўналишнинг истаган манзилида алмаштиришга нисбатан чеклашларсиз халқаро ҳаво ташишларини амалга ошириш ҳуқуқларига эга бўлади, башарти, юк ташувчи чартерларни истисно этган холда, жўнаб кетиш йўналишида бу манзилдан ташқарига мўлжалланган ташиш авиакорхонани тайинлаган Томоннинг ҳудудида бошланган ташишнинг давоми бўлса ва учиб келиш йўналишида эса авиакорхонани тайинлаган Томоннинг ҳудудига мўлжалланган ҳаво ташиши ўша манзилдан ташқарида бошланган ташишнинг давоми бўлса.

Ҳар бир Томон бошқа Томоннинг авиакорхоналаридан тушган ушбу Иловада кўрсатилмаган ташишларни амалга ошириш илтимосларини хайрихоҳлик билан ўзаро ҳамжиҳатлик ва хушмуомалалик асосида кўриб чиқиши лозим.

Ҳар бир Томоннинг тайинланган авиакорхонаси Томонларга тегишли ҳудудларнинг бирида бошланадиган халқаро чартер ҳаво ташишларини бир томонлама ёки ҳар икки томонга амалга ошириш чоғида ўз ихтиёрига кўра чартер қатновларига оид ўзининг миллий ёки бошқа Томоннинг қонунларига, қоидаларига ёки кўрсатмаларига амал қилади. Агарда бир Томон ўзининг авиакорхоналаридан бир ёки бир нечтасига нисбатан ёки бошқа давлатларнинг авиакорхоналарига нисбатан бошқа-бошқа қоидалар, кўрсатмалар, муддатлар, шартлар ёки чеклашлар қўлласа, ҳар бир тайинланган авиакорхона бу мезонларнинг энг кам даражасига амал қилади.

Бироқ, юқоридаги бандда қайд этилган қоидалардан ҳеч қайси бири ҳар бир Томон ушбу Илова бўйича Томонлардан ҳар бири тайинлаган авиакорхонасидан йўловчиларнинг пул маблағларини ҳимоя қилиш ва йўловчиларнинг ташиш хизматидан воз кечиш ва пулни қайтариб олиш масалалари билан боғлиқ бўлган талабларга жавоб беришни талаб қилиш ҳуқуқларини чекламайди.

Юқоридаги бандда кўрсатилган харидорларнинг манфаатларини кўзловчи қоидаларни истисно этган ҳолда, ҳеч қайси бир Томон бошқа Томон ушбу Иловага мувофиқ тайинлаган авиакорхонасидан ўша бошқа Томоннинг ҳудудидан ёки учинчи бир давлатнинг ҳудудидан бир томонлама ёки ҳар икки томонга амалга оширадиган ташишларига нисбатан ушбу Илованинг 2-бўлимида келтирилган қонун ва қоидаларни қўллаш мақсадга мувофиқлиги ёки мазкур қонунлар, қоидалар ёки кўрсатмалар тегишли авиация маъмурлари томонидан эътироф этилмаганлиги тўғрисидаги декларациядан ташқари бошқа ҳужжатларни талаб қилмаслиги лозим.