Туманда аҳолини иш билан таъминлаш ва янги иш ўринлари яратиш борасида ишлаб чиқилган аниқ ва манзилли дастурлар асосида 2012 йилнинг ўтган даврида туман ҳокимлиги, тегишли идоралар, корхона ва ташкилотлар томонидан янги иш жойлари ташкил этиш ва аҳоли бандлигини таъминлаш, тадбиркорлик, кичик бизнес, касаначиликни ва бандликнинг бошқа самарали шаклларини ривожлантириш бўйича муайян ишлар амалга оширилди. Жорий йилнинг 6 ойида иқтисодиёт тармоқларида турли молиявий манбалар ҳисобидан жами 2869 та янги иш ўринлари яратилди (дастурга нисбатан 102,6 фоиз).

Таҳлиллар янги иш ўринлари яратиш юзасидан йиллик дастурнинг барча параметрлари ортиғи билан бажарилишини кўрсатмоқда.

Асосий вазифалардан бири 2013 йилда аҳоли бандлигини таъминлаш ва янги иш ўринлари яратиш бўйича барча имкониятларни инобатга олган ҳолда аниқ ва манзилли дастур ишлаб чиқилишини таъминлашдан иборатдир.

Ўзбекистон Республикаси Президенти ва Ҳукумати томонидан аҳолини иш билан таъминлашни яхшилаш ва унинг турмуш фаровонлигини ошириш, мамлакатни ижтимоий-иқтисодий ривожлантиришнинг энг муҳим устувор йўналишларидан бири қилиб белгилаб берилган.

Иш ўринлари ташкил этиш ва аҳоли бандлигини таъминлаш 2013 йилда ҳам энг устувор масалалардан бири бўлишини чуқур ҳис қилган ҳолда ҳокимлик, корхона ва ташкилотлар, фуқароларни ўзини ўзи бошқариш органлари билан ҳамкорликда туманда 2013 йилда иш ўринлари ташкил этиш ва аҳоли бандлигини таъминлаш дастурининг лойиҳасини тайёрлаш бўйича қизғин ишлар олиб борилмоқда.

Дастур лойиҳасини ишлаб чиқиш бўйича туман ҳокимининг иқтисодиёт ва ижтимоий ривожлантириш масалалари бўйича ўринбосари бошчилигида ишчи гуруҳ иш олиб бормоқда.

Ишчи гуруҳ томонидан ҳар бир фуқароларни ўзини ўзи бошқариш органлари ва аҳоли пунктларидаги мавжуд имкониятлар, бундан ташқари жойларда ижтимоий-иқтисодий ривожлантириш дастурларига киритилган объектлар ҳамда тадбиркорлик субъектларининг режаларини инобатга олиб фуқароларнинг ўзини ўзи бошқариш органлари кесимида аниқ ва манзилли дастурлар тайёрланмоқда.

Дастурда молиявий маблағ миқдори ва манбалари аниқ ҳисоб-китоб қилинмоқда.

Ижтимоий объектларни фойдаланишга топшириш, «Тармоқ» дастури ва бошқа янги иш ўринлари яратиш кўзда тутилган дастурлардаги кўрсаткичлар аниқланиб, иш ўринлари яратиш дастурига киритилмоқда.

Шунингдек, тумандаги тижорат банкларининг кредит портфелидан келиб чиқиб, аҳолига ва тадбиркорлик субъектларига бериладиган имтиёзли кредитлар ҳисобига яратиладиган иш ўринлари ҳам инобатга олинмоқда.

Туманда 2013 йилга мўлжалланган дастурнинг бажарилишини таъминлаш борасида амалга оширилаётган ишларнинг самарадорлигига эришиш, аҳолини иш билан таъминлаш ва янги иш ўринлари яратишни таъминлаш мақсадида Ўзбекистон Республикаси «Аҳолини иш билан таъминлаш тўғрисида»ги Қонунининг 15-моддаси, ҳамда Ўзбекистон Республикаси «Маҳаллий давлат ҳокимияти тўғрисида»ги Қонунининг 6-моддасига амал қилган ҳолда қарор қиламан:

1. Деҳқонобод туманининг 2013 йилда иш ўринлари ташкил этиш ва аҳоли бандлигини таъминлаш дастури Ишчи гуруҳи 1-иловага, ташкил этиладиган янги иш ўринларининг дастур кўрсаткичлари параметрлари 2-иловага мувофиқ тасдиқлансин.

2. Туман ҳокимининг ўринбосарлари мавжуд табиий ресурслар ва халқ хўжалигида алоҳида аҳамиятга эга бўлган соҳаларда ишлаб чиқарилаётган хом ашё ҳамда ярим тайёр маҳсулотларни қайта ишлаб тайёр маҳсулот чиқаришга ихтисослашган корхоналар барпо этиш ва фаолият кўрсатаётган корхоналар қувватидан тўлиқ фойдаланиш бўйича чора-тадбирларни ишлаб чиқиш ва амалга оширишни таъминласин.

3. Туман иқтисодиёт бўлими (Н. Соқиев)га ушбу дастур кўрсаткичлари параметрлари бўйича икки кун муддатда корхоналар билан келишган ҳолда 2013 йилда ҳар бир ҳудуд (маҳаллалар)да ташкил этиладиган иш ўринлари параметрлари бўйича манзилли дастурни ишлаб чиқиб туман ҳокимлигига тақдим этиш ҳамда, 2013 йилда янги иш жойлари яратиш ва аҳоли бандлигини таъминлаш дастурининг ижроси мониторингини юритишда инвестиция, локализация, тармоқлар, ҳудудларни, ишлаб чиқариш ва ижтимоий инфратузилмани ривожлантириш ва бошқа мақсадли дастурлар ижросига алоҳида эътибор қаратсин.

4. Туман тижорат банклари (Б. Розиқов, Д. Шарипов, М. Алиқуловлар)га:

вилоят банкларидан 2013 йилда янги иш ўринлари яратишга йўналтирилган кредит ресурсларидан Деҳқонобод туманига ажратилиши режа-жадвалини тасдиқлатиб олиш, кредит йўналишларини янги кичик бизнес субъектларини ташкил этиш, хизмат кўрсатиш ва сервис соҳасини ривожлантириш, биринчи навбатда меҳнат бозорида танглик кузатилаётган ҳудудларда кичик ҳажмдаги корхоналар ташкил этишга кредитлар, шу жумладан имтиёзли кредитлар ажратишни 2-иловага мувофиқ тасдиқланган дастур кўрсаткичлари параметрларидан келиб чиққан ҳолда ишлаб чиқиш тавсия этилсин.

5. Тасдиқланган режа-графигига мувофиқ тижорат банклари томонидан 2013 йилда янги иш жойлари яратиш учун кредитларнинг белгиланган муддатларда ажратилишини қатъий назоратга олиш, маблағлар ажратилишини ҳокимлик, тадбиркорлар иштирокида муҳокама этиб, зарур чораларини кўриш тавсия этилсин;

6. Туман Давлат солиқ инспекцияси (И. Кенжаев):

норасмий тарзда тадбиркорлик фаолияти билан шуғулланаётган фуқароларни аниқлаб, уларни расмийлаштирсин ва янгидан ташкил этиш иштиёқида бўлган фуқароларни ҳар томонлама қўллаб-қувватлаши сўралсин.

7. Янги иш ўринлари яратиш бўйича ишчи комиссияга:

янги ишлаб чиқариш объектларини ишга тушириш, мавжуд корхоналарни кенгайтириш ва қувватларни янгилаш йўналиши бўйича иш жойлари туманнинг 2013 йилга мўлжалланган инвестиция ва тармоқ дастурларига мувофиқ;

8. Бандликка кўмаклашиш ва аҳолини ижтимоий муҳофаза қилиш маркази (А. Холов) иқтисодиёт бўлими (Н. Соқиев) билан биргаликда 2013 йилда янги иш ўринлари яратиш ва аҳоли бандлигини таъминлаш дастури ижросининг ҳар ойлик тизимли мониторингини ҳудудлар ва тармоқлар кесимида амалга оширсин, дастур ижроси ҳақида таҳлилий маълумотларни ҳамда ҳисоботларни Ишчи комиссияга тақдим этиб бориш топширилсин.

9. Давлат статистика бўлими (Б. Омонов) Бандликка кўмаклашиш ва аҳолини ижтимоий муҳофаза қилиш маркази (А. Холов) билан биргаликда барча чора-тадбирлар ҳисобига яратилаётган янги иш жойлари ҳисобининг юритилишини таъминласин.

10. Мазкур қарорнинг ижросини назорат қилиш туман ҳокимининг ўринбосарлари Н. Бобоев, К. Холиқов, Д. Ҳасановалар зиммасига юклатилсин.