Ўзбекистон Республикаси Ҳукумати ва Тожикистон Республикаси Ҳукумати, бундан кейин Томонлар деб аталувчилар,

ер юзида терроризм ҳодисасининг турли шакл ва кўринишларда кенг ёйилиши давлатлар ва халқлар ўртасидаги дўстона муносабатларга таҳдид солиши, инсон ҳуқуқларини поймол этиши, жамиятнинг асосий эркинликлари ҳамда демократик негизларига путур етказишидан ташвишланиб,

ўз давлатлари фуқароларининг ҳаёти, ҳуқуқи ва қонуний манфаатларини жиноий тажовузлардан ишончли муҳофаза этишга интилиб,

давлатлар хавфсизлигини издан чиқаришга, миллатлар орасида можаро келтириб чиқаришга, конституцион ва ижтимоий тузумни куч ишлатиб ўзгартириш мақсадида сиёсий, диний ва бошқа хилдаги экстремизмдан фойдаланишга уринишлар йўлини тўсиш ниятида,

гиёҳвандлик воситалари ва психотроп моддаларнинг ноқонуний юргизилиши улар халқларининг соғлиғи ҳамда турмуш фаровонлигига жиддий хавф соладиган, жамиятнинг сиёсий, иқтисодий, ижтимоий ва маданий негизларига дахл қиладиган муаммо эканлигини эътироф этиб,

Бирлашган Миллатлар Ташкилотининг халқаро тинчлик ва хавфсизликни қўллаб-қувватлаш, давлатлар ўртасида яхши қўшничилик, дўстона муносабатлар ҳамда ҳамкорликни ривожлантириш борасидаги мақсад ва принципларига содиқ эканликларини таъкидлаб,

қуйидагилар тўғрисида аҳдлашиб олдилар:

1. Томонлар ушбу Битим қоидалари ҳамда ўз давлатларининг қонунлари ва халқаро мажбуриятларига амал қилган ҳолда терроризмга, сиёсий, диний ва бошқа хилдаги экстремизмга, гиёҳвандлик воситалари ва психотроп моддалар (бундан кейин — гиёҳвандлик моддалари)нинг ноқонуний юргизилишига қарши курашда ўз ваколатли органлари орқали ҳамкорлик қиладилар.

2. Ушбу Битимга биноан қуйидагилар ваколатли органлар деб ҳисобланади:

Ўзбекистон Республикаси учун — Ички ишлар вазирлиги, Миллий хавфсизлик хизмати, Давлат божхона қўмитаси, Ташқи ишлар вазирлиги;

Тожикистон Республикаси учун — Ички ишлар вазирлиги, Хавфсизлик вазирлиги, Давлат божхона қўмитаси, Ташқи ишлар вазирлиги.

3. Томонлар ўз ваколатли органлари рўйхатига киритилган ўзгартишлар тўғрисида бир-бирларига зудлик билан хабар берадилар.

4. Ушбу Битимни бажаришда ваколатли органлар бир-бирлари билан бевосита ҳамкорлик қиладилар.

Томонлар конституциявий ва ижтимоий тузумни куч ишлатиб ўзгартиришга, ўз давлатлари ҳудудий яхлитлигининг бузилишига, терроризмга, сиёсий, диний ва бошқа хилдаги экстремизмга, гиёҳвандлик моддаларини ноқонуний юргизишга уринишларига қарши келишилган ҳаракатларни амалга оширадилар.

Томонлар, ушбу Битимнинг 2-моддаси қоидасини эътиборга олиб ҳамда ўз давлатларининг қонунларидан келиб чиқиб, қуйидаги жиноий қилмишларнинг олдини олиш, аниқлаш, бартараф этиш ҳамда очиб ташлашда ҳамкорлик қиладилар:

терроризм ва қўпорувчилик ҳолатлари, сиёсий, диний ва бошқа хилдаги экстремизм;

сиёсий, диний ва бошқа хилдаги экстремистларни тайёрлаш бўйича яширин марказларнинг ташкил этилиши ҳамда фаолият юритиши;

миллатлар ўртасида можаро келтириб чиқариш;

гиёҳвандлик моддаларининг ноқонуний юргизилиши.

1. Томонлар давлатларининг ваколатли органлари ушбу Битим қоидаларини амалга оширишда қуйидаги шаклларда ҳамкорлик қиладилар:

жиноятларга алоқадор жисмоний ҳамда юридик шахсларни, ташкилотларни аниқлаш, жиноятларнинг олдини олиш ва очиб ташлашга ёрдам берадиган маълумотларни алмашиш;

ошиғич қидирув тадбирларини ўтказиш тўғрисидаги сўровларни бажариш;

жиноий таъқибдан ёки жазони ўташдан қочиб юрган, шунингдек бедарак йўқолган шахсларни қидириш;

шахслар, воқеалар, нарсалар ва ҳужжатлар, гиёҳвандлик моддаларини контрабанда қилишнинг йўналиш ва усуллари, янги гиёҳвандлик моддалари ва уларни тайёрлаш технологияси, шунингдек унга қарши курашнинг методлари ва воситалари тўғрисидаги ахборотни алмашиш;

иш юзасидан тажриба алмашиш, жумладан стажировкалар, консультациялар, семинарлар ва ўқув курсларини ўтказиш;

қонунлар ва бошқа хил меъёрий-ҳуқуқий ҳужжатларни алмашиш, ўқув ва методик асарларни алмашишга кўмаклашиш.

2. Ҳамкорликнинг кўлами ҳамда конкрет шакллари манфаатдор ваколатли органлар тарафидан, эҳтиёж ва шароитнинг ўзгаришига қараб, шунингдек аҳамиятли бўлган бошқа ҳолатларни ҳисобга олган ҳолда белгиланади.

1. Ушбу Битим доирасида ҳамкорлик Томонлар давлатларининг ваколатли органлари ёрдам сўраб берган сўровлар асосида амалга оширилади.

2. Ёрдам сўраб бериладиган сўровлар ёзма шаклда юборилади. Ёрдам тўғрисидаги сўровнинг ҳақиқийлиги ёки унинг мазмуни борасида шубҳа туғилса, уни тасдиқлаб бериш сўралиши мумкин.

3. Ёрдам сўраб бериладиган сўровда:

а) ёрдам беришни сўраётган ваколатли органнинг ва сўров йўлланаётган ваколатли органнинг номи;

б) иш моҳиятининг баёни;

в) сўровдан мақсад ва унинг асосланиши;

г) сўралаётган ёрдамнинг мазмуни кўрсатилиши керак.

4. Шу жумладан, зарурат ва имкониятга қараб, сўровда қуйидагилар ҳам бўлиши лозим:

а) ишга алоқадор шахсларнинг исми ва фамилияси, лақаби, уларнинг туғилган вақти ва жойи, фуқаролиги, касб-кори, доимий ёки вақтинчалик яшаш жойи;

б) ишга алоқаси бўлган юридик шахслар, муассаса ва ташкилотларнинг номланиши ва жойлашган ўрни ҳақида маълумот;

в) қилмиш ёки воқеанинг баёни, жиноий ишлар бўйича эса — сўраётган Томон давлатининг қонунларига мувофиқ қилмишнинг тоифаси ҳамда қўлланадиган қонун тегишли моддасининг матни;

г) жавоб олиниши керак бўлган саволлар рўйхати;

д) сўровни бажариш чоғида амал қилиш керак бўлган алоҳида тартиб баёни ҳамда бу заруратнинг асосланиши;

е) сўровни бажаришда фойдаси тегиши мумкин бўлган бошқа ҳар қандай маълумотни.

5. Ушбу Битим доирасида маълумотларни ваколатли органлар бир-бирига ўз ташаббусларига кўра сўровсиз юборишлари мумкин.

1. Агар сўровни бажариш сўралаётган Томон давлатининг миллий хавфсизлиги ёки бўлак манфаатларига зиён етказиши мумкин бўлса, ёхуд унинг миллий қонунлари ёинки халқаро мажбуриятларига зид келса, ушбу Битим доирасида ёрдам кўрсатишдан тўла ёки қисман воз кечилиши мумкин.

2. Агар сўровда кўрсатилган қилмиш сўралаётган Томон давлатининг қонунларига кўра жиноят деб ҳисобланмаса, сўровни бажариш рад этилиши мумкин.

3. Сўровни бажаришни рад этишга қарор қилинган тақдирда сўраётган Томон давлатининг ваколатли органи рад этиш сабабини кўрсатган ҳолда ёзма равишда хабардор қилинади.

1. Сўралаётган Томон давлатининг ваколатли органи сўровни бажариш учун зарурати бор деб топган қўшимча маълумотларни сўраб олишга ҳақли.

2. Сўралаётган Томон давлатининг ваколатли органи сўровни тезда, тўлалигича ҳамда сифатли қилиб бажариш учун барча чораларни кўради. Сўровни бажаришга тўсқинлик қиладиган ёки уни секинлаштирадиган сабаблар мавжуд бўлса, бу тўғрида сўраётган ваколатли орган дарҳол хабардор қилинади.

3. Сўровни бажаришда сўралаётган Томон давлатининг қонунлари қўлланади.

4. Сўраётган Томон давлатининг ваколатли органи илтимосига кўра, сўралаётган Томон давлатининг ваколатли органи сўров ва унинг мазмуни махфийлигини таъминлаш учун барча чораларни кўради. Сўров махфийлигини сақлаган ҳолда уни бажаришнинг иложи топилмаса, сўралаётган Томон давлати бу тўғрисида сўраётган Томон давлатининг ваколатли органини хабардор қилиб, бундай шароитда сўровни бажариш- бажармасликни аниқлайди.

5. Сўраётган Томон давлатининг ваколатли органи илтимос қилса, сўралаётган Томон давлатининг ваколатли органи сўровни бажаришнинг бориши тўғрисида маълумот беради.

6. Сўралаётган Томон давлатининг ваколатли органи сўраётган Томон давлатининг ваколатли органини сўровни бажариш натижаларидан зудлик билан хабардор қилади.

Томонлар ўз давлатлари қонунлари ва имкониятлари доирасида, жумладан ҳар қандай учинчи давлат билан ўзаро мақбул келишувлар асосида, обороти махсус қоидалар билан тартибга солинадиган нарса, восита ва моддаларни назорат қилинадиган етказиб бериш усулини бу нарса, восита ва моддаларнинг ноқонуний оборотида иштирок этувчи шахсларни аниқлаш ва уларни жиноий таъқиб этиш мақсадида тегишлича ишлатишни кўзда тутадиган зарур чораларни кўрадилар.

1. Томонлар ўз давлатларининг ваколатли органларига уларнинг ҳудудларида жиноятларнинг олдини олиш, очиш ва текшириш, жиноятни содир этишда гумон қилинаётган шахсларни ушлаш, жиноятчиларни қидириш бўйича қўшма ошиғич қидирув тадбирларини амалга ошириш имкониятини тақдим этишга рози бўлдилар.

2. Бир Томон давлати ваколатли органларининг вакиллари тегишли сўровлар асосида ва рухсат олинганидан кейин хизмат топшириқларини бажариш, ошиғич қидирув тадбирларни ва тергов ҳаракатларини ўтказишда кўмаклашиш учун бошқа Томон давлати ҳудудига хизмат сафарига юборилишлари мумкин. Хизмат сафарига юборилган ходимларга уларга юклатилган вазифаларни бажаришда, хизмат сафарида бўлиш билан боғлиқ бўлган бошқа масалаларни ҳал этишда зарур кўмак берилади.

1. Ушбу Битим 9-моддасининг 2-бандида кўзда тутилган ҳолларда кўмаклашиш тўғрисидаги сўровда қуйидагилар акс эттирилган бўлиши керак:

сўралаётган ва сўраётган ваколатли органларнинг номи;

хизмат сафарининг мақсади ва унинг муддатлари;

ўзаро ҳаракат миқёслари ва амалга оширилиши зарур бўлган тадбирлар рўйхати;

хизмат сафарига юборилаётган ходимлар тўғрисида маълумотлар;

автотранспорт тўғрисида маълумотлар (агар автотранспорт воситаларида бориш режалаштирилаётган бўлса);

бириктирилган шахсий қурол, унга ўқ-дорилар, махсус воситалар ва индивидуал ҳимоя воситалари (қурол ва мазкур воситалар билан хизмат сафари режалаштирилаётган бўлса);

бошқа зарур ахборот.

2. Бундай сўров бўйича қарор сўралаётган ваколатли орган томонидан сўров олинган дақиқадан бошлаб беш кунлик муддатдан кечиктирмай қабул қилинади ва у тўғрисида сўраётган ваколатли органга дарҳол маълум қилинади. Зарур ҳолда сўралаётган ваколатли орган сўраётган ваколатли органдан қарор қабул қилиш учун қўшимча маълумотлар олиш ҳуқуқига эга, сўровни қондиришга розилик эса маълум шартлар билан берилиши мумкин.

3. Хизмат сафарига юборилган ходимларнинг бириктирилган шахсий қуроли, унга ўқ-дорилар, махсус воситалар ва индивидуал ҳимоя воситалари билан бўлишига рухсатни сўралаётган Томон беради.

1. Томонлар давлатлари ваколатли органларининг ходимлари тезкор-қидирув тадбирларини ҳудудида бу тадбирлар ўтказилаётган давлатнинг ваколатли органлари иштироки ва назоратида ҳамда унинг қонунларига риоя қилган ҳолда ўтказадилар.

2. Ушбу модданинг 1-бандида кўрсатилган тадбирлар ҳудудида бу тадбирлар амалга оширилаётган давлатнинг тегишли ваколатли органи уларни тўхтатиш тўғрисида талаб қўйиши биланоқ тўхтатилади.

1. Томонлар ушбу Битим доирасида бир-бирларидан олинадиган ахборотнинг, агар бу ахборот ёпиқ характерга эга бўлса ёки берувчи Томон унинг тарқатилишини номақбул деб ҳисобласа, махфийлигини таъминлашга рози бўлдилар.

2. Ушбу Битим доирасида олинган ахборот, техник воситалар, қурилма ва материалларни учинчи томонга бериш зарурати бўлса, уларни тақдим этган Томоннинг ёзма розилигини олиш талаб қилинади.

3. Томонлар бир-бирларидан олган ахборот фақатгина ушбу Битимда белгиланган мақсадда ишлатилиши мумкин. Берувчи Томон ахборотнинг тўғрилигини, шунингдек зарур бўлганида, тегишли ўзгартиш ва қўшимчаларни беришни таъминлайди. Ахборотни қабул қилиш, рўйхатга олиш, сақлаш, ишлатиш ва йўқ қилиш миллий қонунларга мувофиқ амалга оширилади. Барча ҳолларда Томонлар бегона шахсларнинг ахборотдан фойдаланишларидан, унинг рухсатсиз ўзгартирилиши, йўқ қилиниши ёки тарқатилишидан самарали ҳимояни таъминлайдилар.

Бир Томон давлати ваколатли органлари ёки уларнинг ходимлари бошқа Томон давлати жисмоний ва юридик шахсларига етказган зиён шу Томон давлати қонунларига мувофиқ қопланади.

1. Ушбу Битимни бажариш бўйича харажатларни Томонлар мустақил равишда, улар ўз мажбуриятларини бажаришлари учун зарур бўлган чегараларда қоплайдилар.

2. Зарур бўлганида Томонлар ушбу Битимдан келиб чиқадиган ҳаракатларни амалга ошириш учун биргаликдаги харажатларни қоплайдилар, бу тегишли келишувлар орқали расмийлаштирилади.

3. Томонлар бир-бирларига бепул, жумладан ушбу Битим доирасида жиноятларнинг олдини олиш бўйича аниқ масалаларни ҳал этиш учун зарур бўлган қурилма ва материаллар билан ёрдам беришлари мумкин.

Томонлар ушбу Битим доирасида ҳамкорликни ҳуқуқий тартибга солишни мукаммаллаштиришга, терроризм учун, сиёсий, диний ва бошқа экстремизм учун, гиёҳвандлик моддаларининг ноқонуний юргизилиши учун жавобгарликни кўзда тутувчи миллий қонунларни яқинлаштиришга ҳаракат қиладилар.

Ушбу Битим қоидалари Томонлар ўртасида иккала давлат ваколатли органлари ўзаро ҳаракатининг шартлари ва тартиби янада батафсил белгиланадиган бошқа битимларнинг имзоланишига тўсқинлик қилмайди.

1. Ушбу Битим доирасида ҳамкорликни мустаҳкамлаш ва самарадорлигини ошириш масалаларини кўриб чиқиш мақсадида Томонлар ўз давлатлари ваколатли органларининг тенг сонли вакилларидан Идоралараро қўшма комиссия тузишга қарор қилдилар. Бу комиссия ўз ваколати доирасида қарорлар чиқаради ва уларнинг бажарилишини назорат қилади. Комиссия ўз ишининг регламент ва процедурасини мустақил равишда белгилайди.

2. Идоралараро қўшма комиссия, заруратга қараб, Томонлар давлатларининг ҳудудларида навбатма-навбат йиғилади.

3. Ушбу Битим қоидаларини қўллаш ёки талқин қилиш бўйича ҳар қандай баҳсларни Томонлар маслаҳатлашиш ва музокаралар орқали ҳал этадилар.

Ушбу Битимни бажаришда Томонлар рус тилидан фойдаланадилар.

Ушбу Битим қоидалари Томонларнинг улар иштирокчилари бўлган бошқа халқаро шартномалар бўйича ҳуқуқ ва мажбуриятларига дахл қилмайди.

Томонларнинг розилиги билан ушбу Битимга алоҳида протоколларда расмийлаштириладиган ўзгартиш ва қўшимчалар киритилиши мумкин, улар ушбу Битимнинг ажралмас қисми бўлиб ҳисобланади.

Ушбу Битим имзоланган кундан бошлаб кучга киради ва беш йил давомида амал қилади. Агар Томонлар бошқа қарор қабул қилмасалар, Битим кейинги беш йиллик даврларга ўз-ўзидан узайтирилади. Томонлардан ҳар бири бошқа Томонни ёзма равишда хабардор қилиш йўли билан ушбу Битимни бекор қилиши мумкин. Бошқа Томон бундай хабарномани олган кундан бошлаб олти ой ўтгач, Битим ўз кучини йўқотади.

Хўжанд шаҳрида 1999 йил 26 майда икки нусхада, ҳар бири ўзбек, тожик ва рус тилларида тузилди, барча матнлар бир хил кучга эга. Ушбу Битим қоидаларини талқин қилишда рус тилидаги матндан фойдаланилади.