Ўзбекистон Республикаси Ҳукумати ва Озарбайжон Республикаси Ҳукумати, бундан кейин Томонлар деб аталувчилар,

икки давлат ўртасида тарихан шаклланган муносабатларни эътиборга олиб,

илмий ва маданий ҳамкорлик ва айирбошлаш халқлар ўртасидаги яхши ўзаро тушунишига кўмаклашиши, шунингдек давлатлар ўртасидаги алоқаларнинг мустаҳкамланишига хизмат қилишига ишониб,

фан, адабиёт ва санъат асарларидан фойдаланиш йўли билан маданий қадриятларни ўзаро айирбошлаш соҳасидаги ҳамкорликни янада кенгайтиришга интилиб,

муаллифлик ҳуқуқи ва турдош ҳуқуқларнинг бугунги кунда миллий маданий салоҳиятни шакллантиришдаги, халқаро маданий айирбошлашдаги, шунингдек давлатлараро тенг ҳуқуқли савдо-иқтисодий ҳамда илмий-техник муносабатларни ривожлантиришдаги ролини ҳисобга олиб,

ушбу мақсадда турдош ҳуқуқлар муаллифлари ва эгаларининг ҳуқуқларини ҳимоя қилиш учун ўзаро қулай шароитлар яратиш заруриятини англаган ҳолда,

1952 йил 6 сентябрдаги Муаллифлик ҳуқуқи тўғрисидаги Бутунжаҳон конвенция ҳамда ҳар икки томон аъзо бўлган 1993 йил 24 сентябрда Москвада имзоланган Муаллифлик ҳуқуқи ва турдош ҳуқуқларни ҳимоя қилиш соҳасидаги ҳамкорлик тўғрисидаги Битимнинг қоидаларини ривожлантиришга хоҳиш-истакдан келиб чиқиб,

қуйидагилар тўғрисида келишиб олдилар:

Томонларнинг ҳар бири бошқа Томоннинг жисмоний ва юридик шахсларига тегишли бўлган асарлар ва турдош ҳуқуқлар объектларига муаллифлик ҳуқуқи ва уларнинг биринчи эълон қилинган жойидан қатъи назар, ва ҳуқуқий ворисларининг ҳуқуқларини эътироф этади, ўз жисмоний ва юридик шахслари учун ички қонунчилик яратган шароитларда ушбу ҳуқуқларни ҳимоя қилишни ҳамда шундай асосларда ва шундай ҳажмда ҳуқуқий ҳимоя воситаларидан фойдаланишни таъминлайди.

Томонлар фан, адабиёт ва санъат асарларига ҳуқуқларни ҳимоя қилиш ва улардан фойдаланиш соҳасида ҳамкорликни ўзаро фойдали ва тенгли асосида ушбу Битим ҳамда улар аъзолари бўлган ёки бўладиган бошқа халқаро шартномаларга мувофиқ амалга оширадилар ва ривожлантирадилар.

Томонлар бошқа Томоннинг фуқаролари ва юридик шахслари томонидан яратилган фан, адабиёт ва санъат асарларининг ўзларининг давлатлар ҳудудда фойдаланилишини рағбатлантирадилар.

Томонларнинг ҳамкорлиги:

муаллифлик ҳуқуқи ва турдош ҳуқуқлар объектларига ҳуқуқларнинг ҳимоя қилиниши ва улардан фойдаланиш билан боғлиқ масалаларни тартибга солиш;

муаллифлик ҳуқуқи ва турдош ҳуқуқлар соҳасидаги миллий ҳуқуқий ҳужжатларни уйғунлаштириш, муаллифлик ҳуқуқи ва турдош ҳуқуқларни ҳимоя қилиш соҳасидаги ахборотлар, норматив ва бошқа ҳужжатларни, шунингдек тажриба ва мутахассисларни айирбошлашга йўналтирилади.

Томонлар бошқа Томон фуқароларининг 1973 йил 27 майгача яратилган, бироқ ушбу санагача Томонларни давлатларининг ҳудудида ёки бошқа ҳудудда юзага чиқарилмаган асарларига муносабат ёки асарларига ҳуқуқини 1952 йил 6 сентябрдаги Муаллифлик ҳуқуқи тўғрисида Бутунжаҳон конвенцияси талаблари даражасида ҳимоя қилинишини таъминлайдилар. Бироқ бундай асарлар ушбу Битим кучга киргунига қадар бошқа Томонни давлат ҳудудида ҳимоя қилинмайдиган асар сифатида эълон қилинган бўлса улар кўрсатилган ҳудудда мазкур Битим кучга киритилганидан сўнг ҳам ҳимоя қилинмайдиган асар бўлиб ҳисобланади. Бунда «юзага чиқариш» тушунчаси 1952 йил 6 сентябрдаги Муаллифлик ҳуқуқи тўғрисидаги VI Бутунжаҳон конвенцияси моддаси маъносида талқин этилади.

Ушбу Битим 5-моддада кўрсатилган, ҳали уларга нисбатан муаллифлик ҳуқуқини ҳимоя қилиш муддати тутамаган асарлардан фойдаланишда қўлланилади.

Томонлар муаллифлик ҳуқуқини ҳимоя этишни 1993 йил 24 сентябрда Москвада имзоланган Муаллифлик ҳуқуқи ва турдош ҳуқуқларни ҳимоя қилиш соҳасида ҳамкорлик қилиш тўғрисидаги Битимга мувофиқ Адабиёт ва бадиий асарларни ҳимоя қилиш тўғрисидаги Берн конвенцияси, Фонограмма ишлаб чиқарувчиларни уларнинг фонограммаларини рухсатсиз такрор ишлаб чиқаришдан ҳимоя қилиш тўғрисидаги Женева конвенцияси, Артист-ижрочилар, фонограмма ишлаб чиқарувчилар ҳуқуқларини ҳимоя қилиш тўғрисидаги Рим конвенцияси талаблари даражасида таъминловчи қонун лойиҳаларининг қабул қилинишини заруриятини тасдиқлайдилар, шунингдек кўрсатилган конвенцияларда иштирок этиш учун чора-тадбирларни кўрадилар.

Ушбу Битимнинг 5-моддасини қўллашдан келиб чиқадиган барча тўловлар ва ҳисоб-китоблар ҳар бир Томоннинг амалдаги валюта қонунчилигига мувофиқ эркин алмаштириладиган валютада амалга оширилади, бироқ тегишли ҳуқуқ эгасининг хоҳишига кўра тўлов ва ҳисоб-китоблар тўловни амалга оширувчи Томоннинг миллий валютасида амалга оширилиши ҳам мумкин.

Томонлар бир-бирларини ўз давлатларининг ушбу Битимни амалда қўллаш учун аҳамият касб этувчи қонунлари ва бошқа норматив-ҳуқуқий ҳужжатлари тўғрисида хабардор этадилар

Муаллифлик ҳуқуқларининг пайдо бўлиши, мазмуни ва бекор қилиниши давлат ҳудудида улардан фойдаланиш ёки унинг бузилиши ҳолати юз берган Томон қонунчилигига кўра белгиланиши лозим.

Томонларнинг бир-бирларига ушбу Битимни амалга ошириш жараёнида жўнатадиган барча ҳужжатлар Томонларнинг давлат тилида, албатта рус тилидаги таржимаси билан тақдим этилади, бунда фойдаланилувчи тил рус тили ҳисобланади.

Ушбу Битимни амалга ошириш учун қуйидагилар жавобгар ҳисобланади:

Ўзбекистон Республикасида — Ўзбекистон Республикаси муаллифлик ҳуқуқини ҳимоя қилиш давлат агентлиги (ЎзРААД);

Озарбайжон Республикасида — Озарбайжон Республикаси муаллифлик ҳуқуқини ҳимоя қилиш агентлиги (ААПАзР).

Тегишли органларнинг ҳамкорлик қилиш тартиби ва шартлари улар ўртасидаги алоҳида битимлар билан белгиланади.

Ушбу Битимдан келиб чиқадиган ёки уни бажариш билан боғлиқ масалалар бўйича англашилмовчиликлар юзага келган тақдирда Томонларнинг вакиллари тегишли Маслаҳатлашувларни ўтказадилар ҳамда ушбу англашилмовчиликларни бартараф этишга эришишга зарур куч-ғайратларини сарфлайдилар.

Ушбу Битим Томонларнинг бошқа давлатлар билан муаллифлик ҳуқуқини муҳофаза қилиш соҳасидаги икки томонлама ва кўп томонлама ҳамкорлигига дахл қилмайди.

Ушбу Битим Томонларнинг уни кучга киритиш учун зарур бўлган ички давлат тартибларини бажарганлиги тўғрисидаги охирги ёзма билдириши кунидан кучга киради ва Томонлардан бири бошқа Томоннинг ушбу Битим ҳаракатларини тўхтатиш истаги тўғрисида ёзма билдиришини олган кундан олти ой ўтгунга қадар амалда бўлади.

Тошкент шаҳрида 1997 йил 18 июнда икки нусхада, ҳар бири ўзбек, озарбайжон ва рус тилларида тузилди, бунда барча матнлар бир хил кучга эгадир. Ушбу Битим қоидаларини талқин қилиш мақсадида рус тилидаги матндан фойдаланилади.