Ўзбекистон Республикаси Ҳукумати ва Қирғизистон Республикаси Ҳукумати, бундан кейин Томонлар деб аталувчилар,

наркотик воситалар, психотроп моддалар (бундан кейин наркотиклар деб аталади) ва прекурсорларнинг ноқонуний обороти миллий хавфсизликка, улар халқларининг саломатлиги ва фаровонлигига жиддий таҳдид қилишини ҳамда жамиятнинг сиёсий ва иқтисодий тузилмаларига, ижтимоий ва маданий соҳаларига дахлдор муаммо эканлигини англаб,

наркотик ва прекурсорларнинг ноқонуний оборотига қарши кураш соҳасида ҳамкорликни ривожлантиришни истаб,

1961 йилдаги Наркотик воситалар тўғрисидаги Ягона конвенциянинг, 1971 йилдаги Психотроп моддалар тўғрисидаги конвенциянинг ва 1988 йилдаги БМТнинг наркотик воситалар ва психотроп моддаларнинг ноқонуний оборотига қарши кураш тўғрисидаги конвенциясининг мақсадларидан келиб чиқиб,

1996 йил 24 декабрдаги Ўзбекистон Республикаси ва Қирғизистон Республикаси ўртасида абадий дўстлик тўғрисида шартнома қоидаларига амал қилиб,

наркотик ва прекурсорларнинг ноқонуний оборотига қарши кураш икки томонлама ҳамкорлик доирасида мувофиқлаштирилган ҳаракатни талаб қилишини тан олиб ҳамда бир-бирларига зарур кўмак беришга қатъий аҳд қилиб,

бундай ноқонуний оборотнинг, жумладан наркотик ва прекурсорларнинг транзити учун ўз давлатларининг ҳудуди, ҳаво бўшлиғи ва ҳудудий сувларидан фойдаланишга уринишларнинг олдини олиш мақсадида ҳамкорликни ривожлантиришга интилиб,

халқаро ҳуқуқнинг умум тан олинган принцип ва нормаларига амал қилиб,

қуйидагилар тўғрисида келишиб олдилар:

1. Ушбу Битим мақсадларини амалга ошириш учун қуйидагилар ваколатли органлар бўлиб ҳисобланади:

Ўзбекистон Республикаси учун — Ўзбекистон Республикаси Вазирлар Маҳкамаси ҳузуридаги Наркотик моддаларни назорат қилиш миллий маркази, Ўзбекистон Республикаси Прокуратураси, Ўзбекистон Республикаси Ички ишлар вазирлиги, Ўзбекистон Республикаси Миллий хавфсизлик хизмати, Ўзбекистон Республикаси Давлат божхона қўмитаси, Ўзбекистон Республикаси Адлия вазирлиги, Ўзбекистон Республикаси Молия вазирлиги, Ўзбекистон Республикаси Соғлиқни сақлаш вазирлиги, Ўзбекистон Республикаси Марказий банки, Ўзбекистон Республикаси Давлат чегараларини қўриқлаш бўйича қўмита;

Қирғизистон Республикаси учун — Қирғизистон Республикаси Ҳукумати ҳузуридаги Наркотиклар назорати бўйича давлат комиссияси, Қирғизистон Республикаси Бош прокуратураси, Қирғизистон Республикаси Миллий хавфсизлик вазирлиги, Қирғизистон Республикаси Ички ишлар вазирлиги, Қирғизистон Республикаси Адлия вазирлиги, Қирғизистон Республикаси Молия вазирлиги ҳузуридаги Давлат божхона инспекцияси, Қирғизистон Республикаси Соғлиқни сақлаш вазирлиги, Қирғизистон Республикаси Миллий банки, Қирғизистон Республикаси Мудофаа вазирлиги.

2. Томонлардан ҳар бири ўзининг ваколатли органлари рўйхатига ўзгартишлар киритилиши тўғрисида бошқа Томонни дарҳол хабардор қилади.

3. Ваколатли органлар ушбу Битимни бажариш мақсадида бир-бирлари билан бевосита алоқа қилишлари мумкин.

Томонлар ўз давлатларининг қонунларига мувофиқ наркотикларни суиистеъмол қилишни бартараф этиш, гиёҳванд беморларни даволаш ва реабилитация қилиш, наркотик ва прекурсорларнинг қонуний обороти устидан назорат, шунингдек уларнинг ноқонуний оборотига қарши кураш соҳаларида мувофиқлаштирилган дастурларни амалга оширадилар.

Томонлар ушбу Битимдан келиб чиқадиган мажбуриятларни БМТ Низомида ҳамда иккала давлат иштирокчилари бўлган бошқа асосий халқаро ҳужжатларда белгиланган халқаро ҳуқуқ принципларига мувофиқ бажарадилар.

Томонлар наркотик ва прекурсорларнинг ноқонуний оборотини бартараф этишда ҳамкорлик қиладилар ва зарур ҳолларда ишчи учрашувларини ўтказадилар.

Томонларнинг ҳамкорлиги уларнинг ваколатли органларининг қўшма битим ва дастурлари асосида амалга оширилади.

Томонларнинг наркотиклар устидан назорат соҳасидаги миллий дастурлари асосида ва уларни бажариш мақсадида тегишли ваколатли органлар зарур бўлганида муайян ўзаро ҳаракатнинг, наркотик ва прекурсорларнинг ноқонуний оборотига, уларни суиистеъмол қилишга қарши курашни ташкил этишдаги тадбирларнинг, шунингдек наркотикларнинг қонуний обороти устидан назоратнинг йўналишлари ва соҳалари тўғрисида қўшма ҳужжатлар қабул қиладилар.

1. Ваколатли органлар ўз давлатларининг қонунларига мувофиқ қуйидагилар тўғрисида ўзаро қизиқиш уйғотувчи ахборот билан алмашадилар:

а) наркотик ва прекурсорлар ноқонуний оборотга келиб тушишининг манбаларини аниқлаш шакллари ва усуллари ҳамда уларнинг тарқатилишини бартараф қилиш бўйича чоралар;

б) наркотик ва прекурсорларнинг ноқонуний оборотини ташкил этувчи жиноятларни аниқлаш, олдини олиш ва тергов қилиш усуллари;

в) Томонлардан бири давлатининг ҳудудига наркотик ва прекурсорларни ноқонуний ўтказиш ҳамда уларни яшириш;

г) наркотик ва прекурсорларнинг ноқонуний оборотига қарши кураш масалалари бўйича илмий тадқиқотлар;

д) Томонлар давлатларининг тегишли қонунлари ва уларни татбиқ этиш амалиёти;

е) наркотик ва прекурсорларнинг ноқонуний оборотидан олинган даромадларни қонунлаштириш усуллари;

ё) ноқонуний оборотдан чиқариб олинган наркотикларнинг янги ва номаълум турларининг намуналари;

ж) Томонлардан бири ҳудудига наркотик ва прекурсорларни контрабанда йўли билан ўтказишга уринишлар;

з) давлат чегарасини кесиб ўтишда қўлланиладиган ноқонуний наркотик ва прекурсорларнинг туркумини яшириш йўллари, шунингдек уларни аниқлаш усуллари;

и) наркотик ва прекурсорларни ноқонуний ташувчилар деб топилган шахслар, уларни ташишнинг аниқланган маршрутлари.

2. Томонлар наркотик ва прекурсорларнинг ноқонуний туркумларини аниқлаш технологияси ва усулиятини ўрганиш мақсадида мутахассислар билан алмашадилар.

Ваколатли органлар зарур бўлганда ушбу Битим доирасида бир-бирларидан олинадиган ахборотнинг махфийлигини таъминлайдилар.

Ушбу Битим доирасида олинган ахборот учинчи томонга берилиши зарур бўлган ҳолда уни тақдим қилган ваколатли органнинг ёзма розилиги талаб қилинади.

Томонлар ўзаро фойдали асосда ушбу Битим мақсадларига мувофиқ равишда кадрлар малакасини ошириш соҳасида ҳамкорлик қиладилар.

Томонлар ўз давлатларининг қонунларига мувофиқ «назорат қилинадиган етказиб бериш» усулини ўзаро қўллаш имкониятларини кўриб чиқадилар.

Ушбу Битимни бажариш бўйича ваколатли органларнинг фаолиятини мувофиқлаштириш мос равишда Ўзбекистон Республикаси ва Қирғизистон Республикаси наркотиклар устидан назорат бўйича давлат комиссиялари томонидан амалга оширилади.

Ўзаро келишув бўйича ушбу Битим кўзда тутган ваколатли органлар ўртасидаги ҳамкорликнинг самарадорлигини ошириш мақсадида Томонлар давлат комиссияларининг ва уларнинг ишчи органларининг раҳбарлари зарур бўлганида маслаҳатлашишлар ўтказадилар.

Томонлар ўз давлатлари қонунларига мувофиқ назорат остида бўлган наркотик ва прекурсорларнинг миллий рўйхатларини алмашадилар ҳамда уларга киритиладиган ўзгартишлар тўғрисида бир-бирларини хабардор қиладилар.

Ушбу Битим доирасидаги ҳамкорликни амалга оширишда Томонлар рус тилини ишлатадилар.

Ушбу Битим Томонларнинг улар иштирокчилари бўлган бошқа икки томонлама ва кўп томонлама шартномалар бўйича ҳуқуқ ва мажбуриятларига дахл қилмайди.

Ушбу Битимни қўллаш ва талқин қилиш бўйича баҳс ва келишмовчиликлар юзага келган ҳолда Томонлар уларни музокара ва маслаҳатлашишлар йўли билан ҳал этадилар.

Томонларнинг розилиги билан ушбу Битимга алоҳида протоколлар билан расмийлаштириладиган ўзгартиш ва қўшимчалар киритилиши мумкин. Бу протоколлар ушбу Битим 15-моддасининг қоидаларига мувофиқ кучга киради ва ушбу Битимнинг ажралмас қисми бўлиб ҳисобланади.

Ушбу Битим Томонлар унинг кучга кириши учун зарур бўлган давлат ички процедураларини бажарганликлари тўғрисида дипломатик каналлар орқали олинган охирги билдиришнома санасидан бошлаб кучга киради.

Ушбу Битим Томонлардан бири унинг амал қилишини тўхтатиш нияти тўғрисида бошқа Томонни дипломатик каналлар орқали ёзма равишда хабардор қилмагунича ўз кучида қолади. Бу ҳолда бошқа Томон бундай билдиришномани олганидан сўнг олти ой ўтгач, ушбу Битим амал қилишини тўхтатади.

Тошкент шаҳрида 1999 йил 9 июлда икки нусхада, ҳар бири ўзбек, қирғиз ва рус тилларида тузилди, барча матнлар бир хил кучга эга.

Ушбу Битимни талқин қилиш учун рус тилидаги матн ишлатилади.