Ўзбекистон Республикаси Ҳукумати ва Россия Федерацияси Ҳукумати, бундан кейин «Томонлар» деб аталувчилар,

қуйидагилар тўғрисида келишиб олдилар:

Томонлар эълон қилишга очиқ бўлган, давлатлараро айирбошланиши лозим бўлган норматив ҳуқуқий актларнинг тематик рўйхатида (илова қилинади) санаб ўтилган масалалар бўйича ҳуқуқий актлар билан икки томонлама ахборот айирбошлашни амалга оширадилар. Юқорида кўрсатилган рўйхат Томонларнинг ўзаро келишуви бўйича ўзгартирилиши ёки тўлдирилиши мумкин.

Томонлардан ҳар бири бошқа Томонга ҳуқуқий актлар тўғрисидаги сўралаётган ахборотни тақдим этадилар.

Ҳамкорлик давомида бир Томон оладиган ахборот учинчи томонга фақатгина бу ахборотни тақдим этган Томоннинг розилиги билан берилиши мумкин.

Томонлар ҳуқуқий ахборот айирбошлаш учун миллий ахборот ресурсларидан фойдаланган ҳолда шахсий эталон маълумотлар базасини яратадилар. Ушбу Битимнинг амалда бажарилишини амалга оширадиган органлар бўлиб Ўзбекистон Республикаси учун — Ўзбекистон Республикасининг Адлия вазирлиги, Россия Федерацияси учун — Россия Федерациясининг Адлия вазирлиги ҳисобланади.

Томонлар ҳуқуқий ахборот айирбошлаш тизимини яратиш бўйича келишилган чораларни амалга ошира бориб, мустақил равишда қуйидагиларни аниқлайдилар:

субъектлар — ахборотдан фойдаланувчилар рўйхати;

ахборотнинг ҳуқуқий режими — ахборотнинг очиқлик даражаси, ҳужжатлаштириш тартиби, ишлатилиш имконияти, сақланиши, тарқатилиши ва ҳимоясини аниқлайдиган норматив белгиланган қоидалар.

Томонлар биргаликда ишлатиш учун аниқланган ҳуқуқий ахборотнинг миллий ресурсларидан (эталон маълумотлар базасидан) фойдаланиш имкониятини таъминлайдилар, уларни актуал ҳолатда сақлайдилар ва ахборот маълумотларининг тўлиқлиги, ишончлилиги ва ўз вақтида тақдим этилиши учун масъул бўладилар.

Томонлар, ўзаро келишув бўйича, халқаро стандартлар билан белгиланган очиқ тизимлар учун хабарлар ва пакетлар коммутациясининг усулларига риоя этган ҳолда ҳужжатларни электрон юбориш йўли билан ёки субъектга–ҳуқуқий актлардан фойдаланувчига қоғозли ташувчиларда рус тилида тақдим этиш йўли билан ҳуқуқий ахборот билан алмашадилар.

Томонлар тизимларнинг амал қилувчи ахборот-коммуникация ресурсларидан, шунингдек қайта яратиладиган махфий алоқа тизимларидан фойдаланган ҳолда ҳуқуқий ахборот билан алмашадилар.

Ҳуқуқий ахборот айирбошлаш Томонларнинг миллий қонунларига мувофиқ амалга оширилади.

Ушбу Битим Томонларнинг улар қатнашчилари бўлган бошқа халқаро шартномалар бўйича ҳуқуқ ва мажбуриятларига дахл қилмайди.

Ушбу Битим у имзоланган вақтдан бошлаб кучга киради.

Томонлардан бири ушбу Битимнинг амал қилишини тўхтатиш нияти тўғрисида бошқа Томонни ёзма равишда хабардор қилган санадан бошлаб олти ой ўтгунига қадар Битим ўз кучини сақлайди.

Битим ўзаро келишув бўйича ўзгартирилиши ёки тўлдирилиши мумкин. Барча ўзгартиш ва қўшимчалар ушбу Битимнинг ажралмас қисми бўлиб ҳисобланадиган Протокол билан расмийлаштирилади.

Москва шаҳрида 1998 йил 6 майда икки нусхада, ҳар бири ўзбек ва рус тилларида тузилди. Битимнинг иккала матни бир хил юридик кучга эга.