Ўзбекистон Республикаси Ҳукумати ва Литва Республикаси Ҳукумати, бундан кейин Томонлар деб аталувчилар,

ўзаро ҳурмат ва тенг ҳуқуқлилик тамойилларига асосланиб,

темир йўл транспортига эгалик ҳуқуқининг дахлсизлигини тасдиқлаб,

Томонлар ўртасида ҳамда учинчи давлатлар орасида юк ва йўловчиларни ташиш ўта муҳимлигини ҳисобга олиб,

иккала давлат темир йўл транспортининг биргаликдаги фаолияти ва координациясига аҳамият бериб,

қуйидагилар тўғрисида келишдилар:

Икки давлат темир йўлларининг фаолияти, ҳамда ҳаракатдаги состав, техникавий воситаларни тайёрлаш ва сақлаш, ҳаракат хавфсизлигини ва меҳнат шароитлари билан таъминлаш, ташиш ишларини ташкил қилиш, юкларни сақлаш, темир йўл транспортининг унинг хизматидан фойдаланувчилар ва бошқа транспорт турлари билан ўзаро алоқаси Томонларнинг амалдаги ҳуқуқий актлари бўйича амалга оширилади.

Йўловчи ва юкларни темир йўл транспорти билан ташиш Томонлар тарафидан, ўзлари иштирокчилари бўлиб ҳисобланган, темир йўл транспорти соҳасидаги халқаро конвенциялар ва битимларга биноан амалга оширилади.

Томонлар, иккинчи Томоннинг асосий манфаатларига дахл қилмай, учинчи давлат билан темир йўл транспорти соҳасида битим тузиш ҳуқуқига эга.

Биринчи Томон йўловчилари иккинчи Томон ҳудудига тегишли битимлар асосида белгиланган амалдаги халқаро давлатлар чегараларининг кесишув жойлари орқали кирадилар ва чиқадилар.

Бир Томон йўловчилари иккинчи Томон ҳудудида бўлган пайтда, шу давлат қонун ва меъёрларини, ҳамда чет эл давлатлари фуқаролари учун белгиланган транзит ҳолда бориш-келиш қоидаларига риоя қилишлари керак.

Томонлар тариф сиёсатини мувофиқлаштиришни зарур деб тан оладилар. Халқаро темир йўл алоқаларидаги тарифлар ва ҳисоб-китоб тартиби Томонлар темир йўллари ўртасидаги махсус битимлар билан белгиланади.

Томонларнинг ҳар бири миллий қонунчилиги ва амалдаги халқаро қоидалар доирасида йўловчиларни, юкларни ташишга, ҳаракатдаги составнинг иккала давлат ўртасида, шунингдек улар ҳудудлари орқали учинчи давлатларга ўтишига зарур шароитлар билан таъминлайдилар. Транзит ташишлар масалаларини тезкор ҳал қилиш учун Томонлар бир-бирларининг ҳудудларида ўз ваколатхоналарини очишлари мумкин.

Томонлар темир йўлларининг корхона ва ташкилотлари, моддий-техникавий таъминот органлари темир йўл транспорти эҳтиёжлари учун келишилган ҳажмда моддий ресурслар ва эҳтиёт қисмлар, асбоб-ускуна, техникани ўзаро етказиб беришни таъминлайдилар.

Томонлар бир-бирларига темир йўл транспорти ходимларининг ижтимоий масалаларини ҳал этиш соҳасида ахборот бериб турадилар.

Томонлар темир йўл транспорти илмий-техникавий тараққиётига ёрдам берадилар ва ўзаро фойдали асосда ўз фаолиятларини мувофиқлаштирадилар.

Томонлар муҳандислар, техниклар, шунингдек бошқа темир йўл касблари ходимларини ўқитиш на уларни тайёрлаш даражасига зарур бўлган талабларни ишлаб чиқиш соҳасида ҳамкорлик қилишади. Бу мақсадларда мутахассислар, зарур ахборот ва материаллар билан мунтазам алмашиб турилади.

Ушбу Битимни талқин қилиш ва қўллаш натижасида пайдо бўладиган ҳамма мунозарали масалалар Томонларнинг Қўшма комиссияси маслаҳатлашувлари ва музокаралари йўли билан ҳал этилади. Агар Томонлар музокараларда бир фикрга эриша олмасалар, мунозара дипломатик йўллар бўйича ҳал этилади.

Ушбу Битимга қўшимча ва ўзгартиришлар киритиш тўғрисидаги масалалар Томонларнинг Қўшма комиссияси музокаралари йўли билан ҳал этилади. Ушбу Битимнинг ўзгартириш ва қўшимчалари Битимнинг ажралмас қисми ҳисобланган протоколлар билан расмийлаштирилади.

Ушбу Битим, Томонлар дипломатик каналлар бўйича Битим кучга кириши учун уларнинг ҳамма давлат ички талаблари бажарилганлиги тўғрисида бир-бирларини хабардор қилган охирги ёзма билдиришнома юборилган кундан бошлаб кучга киради.

Битим 5 (беш) йилга тузилган. Агар Томонларнинг ҳеч бири ушбу беш йиллик муддат тугашидан 6 (олти) ой олдин бошқа Томонни ушбу Битим фаолиятини узатиш нияти тўғрисида хабардор қилмаса, у номаълум муддатга узайтирилган ҳисобланади ва Томонларнинг бири иккинчисини уни бекор қилишдан 6 (олти) ой аввал бу ҳақда хабардор қилмагунча фаолиятини давом эттираверади.

Тошкент шаҳрида 1997 йил 20 февралда икки нусхада, ҳар бири ўзбек, литва ва рус тилларида тузилди, бунда ҳамма матнлар бир хил кучга эга. Ушбу Битим матнини талқин қилишда келишмовчиликлар юзага келган ҳолларда рус тилидаги матн асос қилиб олинади.