Ўзбекистон Республикаси Вазирлар Маҳкамасининг 2003 йил 31 январдаги 54-сонли қарори билан тасдиқланган «Транспорт воситаларини мажбурий техник кўрикдан ўтказиш тўғрисида»ги Низом ҳамда 2012 йил 10 февралдаги № 03-05/004-сонли йиғилиш баёни талабларидан келиб чиққан ҳолда 2012 йилда туман ҳудудидаги юридик ва жисмоний шахсларга тегишли бўлган автомототранспорт воситаларини мажбурий техник кўрикдан ўтказишни ташкил этиш мақсадида қарор қиламан:

1. Тумандаги барча юридик ва жисмоний шахсларга, шу жумладан хорижий юридик ва жисмоний шахсларга тегишли бўлган ва белгиланган тартибда йўл ҳаракати хавфсизлиги хизмати органларидан рўйхатдан ўтказилган транспорт воситаларини мажбурий техник кўрикдан ўтказиши таъминлансин.

2. Тумандаги автобуслар, микроавтобуслар, автомобиллар, мотоцикллар ва тиркама уламаларни давлат техник кўригидан ўтказиш туман Ички ишлар бўлими (О. Менглиев) ва туман Мудофаа ишлари бўлими (Б. Суюнов)лар зиммасига юклатилсин.

3. Мазкур техник кўрикдан ўтказишда:

мулкчилар шакли ва сиғимидан қатъи назар, йўловчи ташиш билан шуғулланувчи транспорт воситаларининг мажбурий техник кўриги:

биринчи марта 1 мартдан 31 июнгача, иккинчи марта 1 сентябрдан октябргача ўтказилиши ташкиллаштирилсин.

корхоналар, муассасалар, хусусий корхоналардаги мавжуд автобуслар, микроавтобуслар, автомашиналар, мотоцикллар ва тегишли улов воситалари 1 мартдан 30 июнгача техник кўрикдан ўтказилсин;

туман фуқароларига тегишли бўлган барча турдаги, шахсий транспорт воситалари 1 январдан 31 августга қадар техник кўрикдан ўтказилсин:

юридик ва жисмоний шахсларга тегишли бўлган транспорт воситалари техник кўрик учун муддатидан белгиланган тартибга риоя қилинган ҳолда тақдим қилиниши мумкин.

4. Техник кўрикдан ўтказишда:

барча транспорт воситаларининг техник ҳолатини текширишда уларни тайёрлаган завод кўрсатмаларига асосан ишлатиш қоида қўлланмаларига ҳар бир ҳаракатланиш қисмини талабга жавоб берилиши;

корхона ва ташкилотлар раҳбарларидан йўл ҳаракати қоидаларида кўрсатилганидек, транспорт воситаларидан фойдаланишни тақиқловчи шартларга асосан техник соз ҳолда таъминланишини;

махсус машиналар, ҳаракатланувчи таъмирлаш ва тузатиш устахоналарининг жиҳозланганлигига алоҳида эътибор қаратиш топширилсин.

5. 2012 йилда техник кўрикни уюшқоқлик билан сифатли ўтказиш мақсадида, туман ҳокимлигининг комиссияси тузилсин. Комиссия аъзоларининг таркиби 1-иловага* мувофиқ тасдиқлансин.

6. Туман Ички ишлар бўлими (О. Менглиев)га ҳар бир корхона, ташкилот ва муассасаларда транспорт воситаларини техник кўрикдан ўтказилиши бўйича 2-иловага асосан тасдиқланган режа жадвалини ташкилотлар раҳбарларига етказиш ҳамда ўз вақтида бажарилишини таъминлаш юклатилсин.

7. Туман «Автомотоҳаваскор» жамияти (К. Абдуллаев), Мудофаага кўмаклашувчи «Ватанпарвар» ташкилоти (Ж. Имомов), туман Ички ишлар бўлимининг йўл ҳаракати хавфсизлиги хизмати (И. Сангилов) Ўзбекистон Республикаси Вазирлар Маҳкамасининг 2006 йил 2 августдаги 156-сонли «Ўзбекистон Республикаси автомототранспорт воситаларини ва шаҳар электр транспорт воситаларини бошқариш ҳуқуқини бериш, ҳайдовчиларни тайёрлаш ва қайта тайёрлаш тартибини такомиллаштириш чоралари тўғрисида»ги қарорига асосан йўловчилар ташиш билан шуғулланувчи транспорт воситалари ҳайдовчиларини бир йилда бир маротаба йўл ҳаракати қоидалари ва йўл ҳаракати хавфсизлиги фанидан 30 соатлик дастур асосида машғулот ўтишлари учун шарт-шароитлар яратган ҳолда тўлиқ жалб этилишини таъминласинлар.

8. Тумандаги ҳар бир ташкилот, корхона ва муассаса раҳбарлари ҳамда шахсий автомашина эгалари зиммасига:

автоуловларни техник паспорти билан биргаликда техник кўрикдан ўтказилишини, уларнинг техник жиҳатдан созлиги ва ўз вақтида режа жадвал асосида кўрикдан ўтказиш;

корхона, ташкилот ва муассасалар раҳбарларига алоҳида тартиб ўрнатиш ва халқ хўжалиги ҳисобидан бўлган ишга яроқсиз, тикланмайдиган ва ишлатилмайдиган машиналарни ҳисобидан чиқариш чораларини техник кўрикка қадар кўриб чиқиш вазифалари юклатилсин.

9. Ўзбекистон Республикаси Вазирлар Маҳкамасининг 2003 йил 31 январдаги 54-сонли «Транспорт воситаларини мажбурий техник кўрикдан ўтказиш тартиби тўғрисидаги Низомни тасдиқлаш ҳақида»ги қарорининг 3-банди талабларидан келиб чиқиб, туман Мудофаа ишлари бўлими, Ички ишлар бўлими транспорт воситаларини мажбурий техник кўрикдан ўз юқори ташкилотларининг қарори ва иш режа асосида амалга ошириш назарда тутилсин.

10. Туман Ички ишлар бўлими (О. Менглиев)га техник кўрикни ўтказиш шартлари бўйича тегишли тартибда туман ҳокимлиги йиғилиши муҳокамасига киритиш топширилсин.

11. Туманда мотоцикллар, тиркама-уламалар ҳамда шахсий транспорт воситаларидан тушадиган мажбурий суғурта бадалини ундириш суғурта ташкилотлари раҳбарлари зиммасига юклатилсин.

12. Туман ҳокимининг 2011 йил 2 февралдаги 60-сонли қарори ўз кучини йўқотган деб ҳисоблансин.

13. Ушбу қарор ижросини назорат қилиш туман ҳокимининг биринчи ўринбосари в.б А. Исмаилов зиммасига юклатилсин.