Ўзбекистон Республикаси Солиқ кодекси ҳамда 1997 йил 29 августдаги «Давлат солиқ хизмати тўғрисида»ги Қонуни ижроси юзасидан шаҳар ҳудудидаги жисмоний шахслар тасарруфида бўлган мол-мулк, ер солиғи объектлари ва субъектлари, шунингдек якка тартибда тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқларни ҳисоблаш, тегишли имтиёзларни тўғри қўллаш ҳамда белгиланган муддатларда маҳаллий бюджетга тушумлар тушишини таъминлаш мақсадида қарор қиламан:

1. 2013 йилда мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, солиқ ҳисоблаш, тегишли имтиёзларни тўғри қўллашни тўлиқ ва сифатли ўтказиш, уларга тегишли бўлган маълумотларни ваколатли идоралар томонидан шаҳар давлат солиқ инспекцияларига тўлиқ тақдим этилишини таъминлаш мақсадида 2012 йил 15 декабрдан 2013 йил 1 январга қадар «Солиқ тўловчи жисмоний шахсларни ҳисобга олиш» даври этиб белгилансин.

2. Термиз шаҳар Давлат солиқ инспекцияси бошлиғи Д. Даминовга:

солиқ тўловчиларни ҳисобга олиш даврида шаҳар ҳудудидаги мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ рўйхатга олиш, уларга солиқ ҳисоблаш ва солиқ қонунчилигида белгиланган имтиёзларни қўллаш;

барча маҳаллаларда солиқларнинг аҳамияти, айрим тоифадаги жисмоний шахсларга солиқлардан бериладиган имтиёзлар тўғрисида, 2013 йил учун тўланиши керак бўлган солиқларнинг муддатидан олдин тўланиши ҳақида кенг тушунтириш ишларини олиб бориш;

аҳоли ўртасида Ўзбекистон Республикаси солиқ қонунчилиги бўйича амалдаги меъёрий-ҳуқуқий ҳужжатларнинг моҳияти юзасидан маҳалла фуқаролар йиғини раиси ва фаоллари иштирокида мунтазам равишда семинар йиғилишлар ўтказиш юклатилсин.

3. Шаҳар ҳудудида фаолият юритаётган маҳалла фуқаролар йиғини раислари, жамоат ташкилотлари, коммунал хўжалик бўлимлари, уй-жой мулкдорлар ширкатлари, корхона ва ташкилотларнинг раҳбарлари жисмоний шахсларни рўйхатга олиш, ҳисобланган солиқларни белгиланган муддатларда маҳаллий бюджетга ундирилиши юзасидан шаҳар давлат солиқ инспекцияси участка солиқ инспекторларига доимий равишда яқиндан амалий ёрдам бериш вазифаси юклатилсин.

4. «Солиқ тўловчи жисмоний шахсларни ҳисобга олиш» даврини кенг қамровли ва сифатли ўтказилиши юзасидан Ўзбекистон Республикаси Солиқ кодекси ва «Давлат солиқ хизмати тўғрисида»ги Қонунига асосан, давлат солиқ инспекцияси томонидан мол-мулк, ер солиғи объектлари ва субъектлари ҳамда якка тартибдаги тадбиркорлик фаолияти билан шуғулланувчи жисмоний шахсларни тўлиқ ҳисобга олиш, солиқ ҳисоблаш ҳамда тегишли имтиёзларни тўғри қўлланилишини таъминлаш мақсадида:

Шаҳар «Ер тузиш ва кўчмас мулк кадастри» бўлими бошлиғи Ш. Рахмонқуловга 2013 йил 1 февралга қадар 1-иловага* мувофиқ шаҳар ҳудудида жисмоний шахсларнинг эгалигида бўлган мол-мулк объектлари, ер майдони миқдори ва уларнинг 2013 йил 1 январь ҳолатига инвентаризация қийматлари тўғрисидаги маълумотларни;

Шаҳар бош архитектори бошлиғи Э. Холмирзаевга 2013 йил 1 февралга қадар 2-иловага* мувофиқ 2012 йилда фуқароларга шаҳар ҳудудида (тадбиркорлик, якка тартибда уй-жой қурилиши учун деҳқон хўжалиги ва бошқалар) 2013 йил 1 январь ҳолатига ажратилган ер майдонлари ва уларнинг эгалари тўғрисидаги маълумотларни;

Меҳнат ва аҳолини ижтимоий муҳофаза қилиш бўлими бошлиғи О. Мамадалиев 2013 йил 1 февралга қадар 3-иловага* мувофиқ туманда истиқомат қилувчи, I-II-гуруҳ ногиронлари, пенсионерлар, ёлғиз пенсионерлар ва бошқа нафақа олувчи сифатида рўйхатга олинган фуқаролар тўғрисидаги маълумотларни;

Шаҳар мудофаа ишлари бўлими бошлиғи Н. Ниёзовга 2013 йил 1 февралга қадар 4-иловага* мувофиқ 1941 — 1945 йиллардаги уруш ногиронлари ва қатнашчилари, Афғонистонда ҳарбий хизматни ўтаган фуқаролар ва бошқа мавжуд маълумотларни;

Фуқаролик ҳолатларига далолатномалар ёзиш (ФҲДЁ) бўлими бошлиғи Н. Эшбўриева 2013 йил 1 февралга қадар 5-иловага* мувофиқ шаҳар ҳудудида 2011-2012 йилларда вафот этган фуқаролар тўғрисидаги маълумотларни;

Шаҳар нотариал идоралари раҳбарлари 6-иловага* мувофиқ 2012 йил давомида жисмоний шахслар томонидан кўчмас мулк ижара шартномаси тасдиқланганлиги ва ижара ҳақи миқдори, шунингдек мерос қилиб олиш ёки ҳадя тарзида фуқароларнинг мулкига ўтаётган мол-мулк қиймати тўғрисидаги маълумотларни;

Шаҳар санитария-эпидемиология назорати маркази бошлиғи Х. Пирматов, «Ветеринария хизмати» бўлими бошлиғи Ш. Улашевга 7-иловага* мувофиқ белгиланган тартибда санитария рухсатномасини олган жисмоний шахслар тўғрисидаги маълумотларни;

Шаҳар «Газтаъминот» корхонаси бошлиғи Ш. Бердиевга 8-иловага* мувофиқ ҳудудда тадбиркорлик фаолиятини амалга оширувчи жисмоний шахслар билан газ истеъмоли учун тузилган шартномалар тўғрисидаги маълумотларни;

Шаҳар «Электртармоқлари» корхонаси бошлиғи Х. Хакимовга 9-иловага* мувофиқ ҳудудда тадбиркорлик фаолиятини амалга оширувчи жисмоний шахслар билан электр истеъмоли учун тузилган шартномалар тўғрисидаги маълумотларни;

Вилоят йўл ҳаракати хавфсизлиги бошқармаси бошлиғи М. Олтибоев ва шаҳар Ички ишлар бўлими бошлиғи С. Эшонқуловларга 10-иловага* мувофиқ ҳудуддаги шахсий юк автотранспорт воситалари эгалари тўғрисидаги тўлиқ маълумотларни шаҳар Давлат солиқ инспекциясига маҳалла фуқаролар йиғинлари кесимида 2013 йил 1 февралига қадар 2013 йил 1 январь ҳолати бўйича тақдим этиш вазифалари юклатилсин.

5. Шаҳар ҳокимлиги Маҳалла оқсоқоллар кенгаши Раиси, маҳалла фуқаролар йиғинлари раислари «Солиқ тўловчи жисмоний шахсларни ҳисобга олиш» ойлиги тадбирини ўтказишда фаол қатнашишлари ва жойларда Участка солиқ инспекторлари билан жисмоний шахсларни солиқ органларида рўйхатга олиш тадбирларини ҳамкорликда амалга оширилиши белгилаб қўйилсин.

6. Маҳалла фуқаролар йиғини раислари, Участка давлат солиқ инспектори ва «Ер тузиш ва кўчмас мулк кадастри» бўлими ходимлари билан биргаликда ҳисобга олинган солиқ тўловчи жисмоний шахслар тўғрисидаги маълумотни 11-иловага* мувофиқ далолатнома асосида расмийлаштириш топширилсин.

7. Ушбу қарор расмий нашрда эълон қилинган кундан бошлаб кучга кирган ҳисобланади.

8. Мазкур қарорнинг бажарилишини назорат қилиш шаҳар ҳокимининг иқтисодиёт ва ижтимоий ривожлантириш масалалари бўйича ўринбосари П. Тошпулатов зиммасига юклатилсин.