Қишлоқ ва сув хўжалиги вазирлигининг 2004 йил 15 ноябрдаги 248-сонли буйруғи билан тасдиқланган «Тракторлар, ўзиюрар шассилар, мелиоратив йўл-қурилиш машиналари ва трактор тиркамаларини мажбурий техник кўрикдан ўтказиш тартиби тўғрисида»ги Низом (рўйхат рақами 1432, 2004 йил 17 ноябрь)га асосан 2012 йилда юридик ва жисмоний шахсларга тегишли бўлган барча тракторлар, ўзиюрар шассилар, мелиоратив йўл-қурилиш машиналари ва трактор тиркамаларини (кейинги ўринларда «Машиналар» деб юритилади) мажбурий техник кўрикдан ўтказишни ташкил қилиш мақсадида қарор қиламан:

1. Барча юридик ва жисмоний шахсларга тегишли бўлган ва белгиланган тартибда туман «Ўздавтехназорат» инспекциясида рўйхатдан ўтказилган барча машиналарнинг 2012 йилда мажбурий техник кўрикдан ўтказилиши таъминлансин.

2. Тумандаги барча машиналарни техник кўрикдан ўтказиш туман «Ўздавтехназорат» инспекцияси бўлими (С. Қувондиқов) зиммасига юклатилсин.

3. Машиналар техник кўрикдан ўтказилганлиги учун қуйидаги йиғимлар ундирилсин:

тракторлар, ўзиюрар шассилар, мелиоратив йўл-қурилиш машиналарига — энг кам ойлик иш ҳақининг 0,08 фоизи;

трактор тиркамаларига — энг кам ойлик иш ҳақининг 0,04 фоизи;

биринчи техник кўрикдан носоз деб топилган машиналар такрорий техник кўрикдан ўтказилганлиги учун белгиланган миқдорда йиғим қайта ундирилиши белгилаб қўйилсин.

4. Техник кўрикни ўтказишда:

барча машиналарнинг техник ҳолати ва жиҳозлари стандарт талабларига, ҳаракати ва техника хавфсизлиги қоидалари ҳамда нормаларига мос келиши;

техник кўрик бошлангунга қадар барча диагностика аппаратлари текширилиши, махсус машиналар, ҳаракатланувчи таъмирлаш ва тузатиш устахоналарининг жиҳозланганлигига алоҳида эътибор қаратилсин.

5. 2012 йилда техник кўрикни уюшқоқлик билан сифатли ўтказиш машиналарнинг техник ҳолати, улардан фойдаланиш қоидаларига риоя этилиши устидан самарали назоратни ташкил этиш мақсадида, туман ҳокимлигининг ҳаракат хавфсизлигини таъминлаш комиссияси тузилсин. Комиссия аъзоларининг таркиби 1-иловага* мувофиқ тасдиқлансин.

6. Туман «Ўздавтехназорат» инспекцияси (С. Қувондиқов)га ҳар бир корхона, ташкилот ва муассасаларда транспорт воситаларини техник кўрикдан ўтказилиши бўйича 2-иловага асосан тасдиқланган режа жадвални ташкилотлар раҳбарларига етказиш ҳамда ўз вақтида бажарилишини таъминлаш юклатилсин.

7. Тумандаги хар бир машина эгалари зиммасига техник кўрик бўйича туман «Ўздавтехназорат» инспекцияси керакли ҳужжатларни ўз вақтида ва тўлиқ тақдим қилиш юклатилсин.

8. Тумандаги барча тракторлар, ўзиюрар шассилар, мелиоратив йўл-қурилиш машиналари ва тракторлар тиркамаларидан тушадиган мажбурий суғурта бадалини ундириш суғурта ташкилотлари раҳбарлари зиммасига юклатилсин.

9. Ушбу қарор расмий нашрда эълон қилинганидан бошлаб кучга кириши белгилаб қўйилсин.

10. Туман ҳокимининг 2012 йил 18 январдаги 9-ф-сонли фармойиши ўз кучини йўқотган деб ҳисоблансин.

11. Ушбу қарорнинг ижросини назорат қилиш туман ҳокимининг биринчи ўринбосари Н. Бекназаров зиммасига юклатилсин.