Ўзбекистон Республикаси «Бюджет тизими тўғрисида»ги Қонунининг 30-моддасига, Ўзбекистон Республикаси Олий Мажлиси Қонунчилик палатасининг 2012 йил 16 ноябрдаги 576-И-сонли Олий Мажлис Сенатининг 2012 йил 6 декабрдаги СҚ-343-И-сонли «Ўзбекистон Республикасининг 2013 йилги Давлат бюджети тўғрисида»ги ва Ўзбекистон Республикаси Президентининг 2012 йил 25 декабрдаги ПҚ-1887 сонли «Ўзбекистон Республикасининг 2013 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги қарорлари ҳамда Ўзбекистон Республикасининг «Маҳаллий давлат ҳокимияти тўғрисида»ги Қонунининг 6, 25-моддаларига асосан қарор қиламан:

1. Ўзбекистон Республикаси Президентининг 2012 йил 25 декабрдаги «Ўзбекистон Республикасининг 2013 йилги асосий макроиқтисодий кўрсаткичлари ҳамда Давлат бюджети параметрлари тўғрисида»ги ПҚ-1887-сонли қарори раҳбарлик ва ижро учун қабул қилинсин.

2. Туманнинг 2013 йилга мўлжалланган маҳаллий бюджетининг даромадлар қисми солиқ тушумлари бўйича 8610814 минг сўм, вилоят бюджетидан олинадиган субвенция 12299999 минг сўм, ҳамма даромадлар 20910813 минг сўм миқдорида 1-иловага, харажатлар қисми соҳалар бўйича 20910813 минг сўм миқдорида ҳамда 2013 йил учун айланма касса маблағи меъёри 125476 минг сўм миқдорида 2-иловага асосан тасдиқлансин.

3. Туман молия бўлими (Д. Райимжонов) бюджет қонунчилигида белгиланган муддатларда 2013 йилги бюджет параметрларини тумандаги бюджет ташкилотларига, шунингдек умумдавлат солиқларидан маҳаллий бюджетларга 2013 йил учун ажратмалар миқдорларини тумандаги ихтисослашган банк муассасаларига етказиш вазифаси юклатилсин.

4. Туман молия бўлими (Д. Райимжонов) ва ғазначилик бўлими (Б. Олимов) тумандаги бюджет муассасалари ҳамда А.Т. Агро банк «Оқ олтин» бўлими (А. Ўринбоев) билан биргаликда 2013 йилнинг январь ойида 2013 йилги бюджет ижроси тўғрисидаги ҳисоботда акс эттирган ҳолда 2012 йил учун Давлат бюджетининг ижроси бўйича қонун ҳужжатларида белгиланган тартибда якуний операцияларни ўтказсинлар.

5. Туман давлат солиқ инспекцияси (З. Ахмедов) туман маҳаллий бюджетида белгиланган солиқ ва тушумларни йил давомида мунтазам равишда туширилишини таъминлаш, мавжуд боқиманда қарзларни кескин камайтириш борасида муайян тадбирлар ишлаб чиқсин ва уларни амалга оширсин.

6. А.Т. Агро банк «Оқ олтин» бўлими (А. Ўринбоев) давлат даромадларидан маҳаллий бюджетларга ажратмаларни ўз вақтида амалга оширилишини таъминласин.

7. Туман ҳокимининг биринчи ўринбосари Ф. Эгамов, туман давлат солиқ инспекцияси (З. Ахмедов), туман молия бўлими (Д.Райимжонов), ғазначилик бўлими (Б. Олимов) ҳамда А.Т. Агро банк «Оқ олтин» бўлими (А. Ўринбоев)ларга туманда барча имкониятларни бюджетнинг даромадлар қисми тахмин режаларининг тўлиқ бажарилишини таъминлашга сафарбар қилиш, маҳаллий бюджетнинг харажатлар қисмини сифатли ижро этилишини таъминлаш, бюджет маблағларининг мақсадли сарфланишини қаттиқ назорат қилиш, бунда Ўзбекистон Республикасининг «Бюджет тизими тўғрисида»ги Қонунига ҳамда Ўзбекистон Республикаси Ҳукуматининг бюджет ижросига оид қарорлари ва фармойишлари талабларига қатъий риоя этилишини таъминлаш вазифалари юклатилсин.

8. Туман молия бўлими (Д. Райимжонов) ҳамда А.Т. Агробанк «Оқ олтин» бўлими (А. Ўринбоев)лар мазкур қарорнинг бажарилиши тўғрисида туман ҳокимлигига 2013 йилнинг январь ойида 2012 йил якуни бўйича ахборот берсинлар.

9. Мазкур қарор Халқ депутатлари туман Кенгашининг навбатдаги сессияси тасдиғига киритилсин.

10. «Улуғнор» газетаси (М. Қодирова)га туман ҳокимининг мазкур қарори матнини газета саҳифасида ёритиш тавсия этилсин.

11. Мазкур қарор қабул қилиниши муносабати билан туман ҳокимининг 2012 йил 12 январь кунги 20-қ сонли қарори ўз кучини йўқотган деб ҳисоблансин.

12. Ушбу қарорнинг бажарилишини назорат қилишни ўз зиммамда қолдираман.