Ўзбекистон Республикасининг «Йўл ҳаракати хавфсизлиги тўғрисида»ги Қонунининг 13-моддаси, Ўзбекистон Республикаси Вазирлари Маҳкамасининг 2003 йил 31 январдаги 54-сонли қарори билан тасдиқланган «Транспорт воситаларини мажбурий техник кўрикдан ўтказиш тартиби тўғрисида»ги Низомга мувофиқ транспорт воситаларининг 2012 йилда мажбурий техник кўригини ташкил қилиш мақсадида Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 25-моддаларига асосан қарор қиламан.

1. Тумандаги юридик шахсларга тегишли бўлган автомототранспорт воситаларининг техник кўриги 1 йилда 1 маротаба (1 мартдан 10 июнгача), тижорат асосида йўловчилар ташиш учун фойдаланиладиган енгил автомобиль, автобуслар ва ўтириладиган жойлар сони 8та ва ундан ортиқ бўлган (ҳайдовчининг ўрнидан ташқари),одамларни мунтазам ташиш учун жиҳозланган юк автомобиллари, йирик габаритли, оғир вазнли ва хавфли юкларни ташиш учун махсус транспорт воситалари ва уларга тиркамалар 1 йилда 2 маротаба (1 мартдан 10 июнгача ва 12 сентябрдан 31 октябргача), жисмоний шахсларга қарашли бўлган транспорт воситаларининг техник кўриги 1 мартдан 31 августгача ўтказилсин.

Ишлаб чиқарилганлигига беш йилдан кўп бўлмаган транспорт воситалари икки йилда бир марта техник кўрикдан ўтказилсин, ушбу банднинг биринчи хатбошида қайд этилган, 1 йилда 2 марта техник кўрикдан ўтказилиши лозим бўлган транспорт воситалари бундан мустасно.

2. Туманда техник кўрикни ўтказиш учун тузилган комиссия таркиби 1-иловага* мувофиқ, юридик шахсларга қарашли автомотранспорт воситалари, тиркамалар ва ярим тиркамаларнинг 2012 йилги мажбурий техник кўригини ўтказиш графиги 2-иловага* мувофиқ тасдиқлансин.

3. Тумандаги суғурта ташкилотларига Ўзбекистон Республикасининг «Транспорт воситалари эгаларининг фуқаролик жавобгарлигини мажбурий суғурта қилиш тўғрисида»ги Қонуни ижросини таъминлаш борасидаги ишларни ташкиллаштирсин.

4. Туман тиббиёт бирлашмаси (Б.Файзуллаев) техник кўрик даврида ҳайдовчиларнинг тиббий ҳолатини текшириш, Табиатни муҳофаза қилиш қўмитаси туман инспектори (Ғ. Ишчанов) транспорт воситаларининг атмосферага чиқараётган заҳарли газларни ўлчашда комиссия аъзоларига амалий ёрдам кўрсатсинлар.

5. Ушбу қарор туман ҳокимлигининг расмий нашри бўлган «Урганч ҳақиқати» газетаси орқали эълон қилинсин.

6. Транспорт воситаларини техник кўрикка жалб қилишда Йўл ҳаракати хавфсизлиги гуруҳига туман мудофаага кўмаклашувчи «Ватанпарвар» ташкилоти, қишлоқ фуқаролар йиғини раислари, туман ички ишлар бўлими ходимлари ва жамоатчилик асосида амалий ёрдам кўрсатсин.

7. Мазкур қарор қабул қилиниши муносабати билан туман ҳокимининг 2012 йил 15 февралдаги 120-к-сонли қарори ўз кучини йўқотган деб ҳисоблансин.

8. Туман Ички ишлар бўлими Йўл ҳаракати хавфсизлиги гуруҳига автомототранспорт воситаларининг техник кўриги натижалари бўйича туман ҳокимлигига ахборот бериш вазифаси топширилсин.

9. Ушбу қарорнинг бажарилишини назорат қилиш туман ҳокимининг биринчи ўринбосари Р. Холмуратов зиммасига юклатилсин.