Ўзбекистон Республикаси Ҳукумати билан Озарбайжон Республикаси Ҳукумати, бундан кейин «Томонлар» деб аталувчилар,

1996 йил 27 майдаги Ўзбекистон Республикаси билан Озарбайжон Республикаси ўртасида дўстлик ва ҳамкорлик тўғрисидаги Шартномага, 1996 йил 27 майдаги Ўзбекистон Республикаси Ҳукумати билан Озарбайжон Республикаси Ҳукумати ўртасида эркин савдо тўғрисидаги Битимга, 1997 йил 18 июндаги Ўзбекистон Республикаси ва Озарбайжон Республикаси ўртасида ҳар томонлама ҳамкорлик ва шериклик муносабатларини янада ривожлантириш тўғрисида Декларацияга, шунингдек Томонлар иштирокчилари бўлган бошқа халқаро шартномаларга амал қилиб,

иккала давлатнинг иқтисодий ва илмий-техникавий салоҳиятидан самарали фойдаланиш ва улар халқларининг турмуш фаровонлигини юксалтириш мақсадида,

савдо-иқтисодий ва ишлаб чиқариш муносабатларини ўзаро манфаатли, узоқ муддатли ва барқарор асосда янада ривожлантириш ҳамда мустаҳкамлашга интилиб,

МДҲ доирасида умумий иқтисодий маконни босқичма-босқич шакллантириш ва ривожлантириш мақсадга мувофиқлигини тан олиб,

товарлар, хизматлар, капитал ва ишчи кучининг эркин кўчишига босқичма-босқич ўтишда шарт-шароитлар яратишга катта аҳамият бериб,

халқаро ҳуқуқнинг умумэътироф этилган меъёр ва тамойилларига амал қилиб,

қуйидагилар тўғрисида аҳдлашиб олдилар:

Томонлар ушбу Битимнинг таркибий қисми бўлиб ҳисобланадиган Ўзбекистон Республикаси Ҳукумати билан Озарбайжон Республикаси Ҳукумати ўртасида 2001—2010 йиллардаги мўлжалланган иқтисодий ҳамкорлик Дастурини (бундан кейин – Дастур) қабул қиладилар ҳамда уни амалга ошириш учун ҳар томонлама кўмаклашадилар.

Иқтисодий ҳамкорлик Томонларнинг стратегик манфаатларига тўғри келадиган узоқ муддатли шериклик, тенгҳуқуқлик, ўзаро манфаат тамойилларига асосланади ҳамда умум эътироф этилган халқаро ҳуқуқ меъёрлари ва икки давлат ҳудудида амал қилувчи миллий қонунларга риоя этган ҳолда мулк шаклидан ва бўйсунишдан қатъи назар, ташқи иқтисодий фаолият юритувчи субъектлар ҳамда регионлар ўртасида бевосита келишув ва тўғридан-тўғри алоқалар орқали амалга оширилади.

Томонлар ўз миллий қонунларига мувофиқ, Томонларнинг хўжалик юритиш субъектлари ташқи иқтисодий фаолиятни олиб бориши, давлатлараро лойиҳа ва дастурларни тузиш, кооперацияни ривожлантириш, умумий ишлаб чиқариш тузилмаларини ташкил қилиш, хусусийлаштириш ва инвестиция лойиҳаларида биргаликда иштирок этиш учун қулай шарт-шароитлар яратадилар.

Томонлар бир-бирларининг ўзаро иқтисодий манфаатларига зиён етказадиган хатти-ҳаракатлардан ўзларини тиядилар.

Томонлар қуйидагиларга кўмаклашадилар:

ҳамкорликнинг ҳамма соҳаларини қамраб оладиган меъёрий-ҳуқуқий базани ташкил қилиш;

савдо-иқтисодий, илмий-техникавий ва маданий алоқаларни изчил ривожлантириш ҳамда кенгайтириши;

нефть, газ, нефтекимё, автомобиль, авиация, тикиш, текстиль, қурилиш, қишлоқ хўжалиги ва бошқа соҳаларда ҳамкорликни янада ривожлантириш;

Ўзбекистон ва Озарбайжоннинг машинасозлик, кимё ва бошқа корхоналарининг ишлаб чиқариш кооперацияси ва ихтисослаштирилишини ривожлантириш, қишлоқ хўжалиги маҳсулотларини қайта ишлаш бўйича қўшма корхоналарни ташкил қилиш бўйича ишларни давом эттириш;

Томонларнинг миллий манфаатлари ҳамда амал қилувчи қонунларига мувофиқ Озарбайжон Республикасининг маъмурий-ҳудудий бўлинмалари Республикасининг Тошкент, Бухоро, Андижон, Фарғона ва Навоий вилоятлари билан регионлараро ҳамкорлигини мустаҳкамлаш ва ривожлантириш;

Томонларнинг хўжалик юритиш субъектлари ўртасида ўзаро манфаатли ҳамкорликни мустаҳкамлашга;

ўзаро манфаатли миллий ва халқаро лойиҳа ва дастурларни молиявий таъминлаш учун инвестиция, молиявий ҳамда суғурта компанияларини жалб этиш.

Томонлар инвестицияларни рағбатлантириш ва ўзаро ҳимоя қилиш, тадбиркорликни қўллаб-қувватлаш, товар ва фонд бозорларига, шунингдек меҳнат бозорига йўл очиш учун қулай шароитларни барпо этишга кўмаклашадилар.

Томонлар ўзаро манфаатли асосда умумий илмий-техникавий муҳит барпо этишга интиладилар, ва шу мақсадда халқаро лойиҳалар, фундаментал ва амалий илмий тадқиқотлар ўтказиш доирасидаги ҳамкорликда биргаликдаги ҳаракатни таъминлайдилар.

Томонлар улар иштирокчилари бўлган мавжуд шартномалар ва келишувларга асосан транспорт ва алоқа соҳасида ҳамкорликни фаоллаштирадилар. Ўз ҳудудлари орқали транспорт алоқасининг барча турларида йўловчи ва юкларнинг транзити учун қулай шароитларни, жумладан Томонларнинг миллий қонунларини мукаммаллаштириш йўли билан, яратадилар. Томонларнинг миллий қонунларига мувофиқ уларнинг ҳудудлари орқали транзити тақиқланган юклар бундан истисно.

Томонлар Транс-Осиё-Европа тола-оптик магистрали(ТАЕ ВОЛС) қурилишини тугатиш ва унинг самарали ишлаши учун зарур чораларни кўрадилар.

Томонлар ҳудудий бошқарув органлари, хўжалик юритувчи субъектлар томонидан маҳсулот етказиб бериш бўйича шартномалар тузилганида чеклашлар киритмайдилар. Томонларнинг миллий қонунлари кўзда тутадиган ҳоллар бундан истисно.

Томонлар Дастурни бажаришни мувофиқлаштиришни, уни амалга ошириш ва, зарурият бўлганда, унга ўзгартишлар киритиш учун таклифларни ишлаб чиқиш жараёни устидан назоратни (1997 йил 18 июндаги икки томонлама Баённома асосида тузилган) Ўзбекистон Республикаси ва Озарбайжон Республикаси ўртасида ҳамкорлик бўйича ҳукуматлараро Қўшма комиссияга топширадилар.

Дастурни бажариш жараёни Қўшма комиссия йиғилишларида ҳар йили камида бир марта кўриб чиқилади.

Ушбу Битимнинг қоидаларини талқин қилиш ва қўллаш юзасидан баҳслар маслаҳатлашув ва музокаралар орқали ҳал қилиниши керак.

Томонларнинг ўзаро розилигига кўра ушбу Битимга алоҳида баённомалар билан расмийлаштирилган ўзгартиш ва тўлдиришлар киритилиши. Бу баённомалар ушбу Битимнинг таркибий қисми бўлиб ҳисобланади ва ушбу Битимнинг 11-моддасида кўрсатилган процедурага мувофиқ кучга киради.

Ушбу Битим Томонларнинг улар иштирокчилар бўлган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.

Ушбу Битим Томонлар унинг кучга кириши учун зарур бўлган давлат ички процедураларини бажарганликлари тўғрисида охирги хабарномани олинган санадан бошлаб кучга киради ва 2010 йилнинг 31 декабрига қадар амал қилади.

Томонлардан ҳар бири бошқа Томонга ёзма равишда хабар бериш орқали ушбу Битимнинг амал қилишини тўхтатиши мумкин. Бу ҳолда Битим шундай хабарнома олинган санадан бошлаб олти ой ўтгач амал қилишини тўхтатади.

Агар Томонлар бошқача аҳдлашиб олмасалар, ушбу Битим амал қилишининг тўхтатилиши бу Битим амал қилиниши даврида кучга кирган дастур лойиҳаларнинг амалга оширилишига дахл қилмайди.

Тошкент шаҳрида, 2001 йил 18 апрелда икки нусхада, ҳар бири ўзбек, озарбайжон ва рус тилларида тузилди, бунда барча матнлар бир хил кучга эга. Ушбу Битим қоидаларини талқин қилиш учун рус тилидаги матн ишлатилади.