Ўзбекистон Республикаси Ҳукумати ва Туркманистон Ҳукумати, бундан кейин Томонлар деб аталувчилар,

фуқароларнинг ҳаёти, ҳуқуқлари ва қонуний манфаатларини, жамият ва давлат манфаатларини жиноий тажовузлардан ишончли ҳимоя билан таъминлашга интилишдан келиб чиқиб,

жиноятчиликка қарши курашда халқаро ҳамкорликка муҳим аҳамият бериб,

жиноятчиликнинг олдини олиш ва жиноятнинг одил судловини амалга ошириш соҳасида халқаро конвенциялар ва Бирлашган Миллатлар Ташкилоти қарорларини ҳисобга олиб,

Ўзбекистон Республикаси ва Туркманистон ўртасида фуқаролик, оилавий ва жиноий ишлар бўйича ҳуқуқий ёрдам ҳамда ҳуқуқий муносабатлар тўғрисида 1996 йил 27 ноябрдаги Шартнома қоидаларига амал қилиб,

тенг ҳуқуқлилик ва ўзаро манфаатли ҳамкорлик принципларидан келиб чиқиб,

қуйидагилар тўғрисида келишиб олдилар:

1. Томонлар, ўз давлатлари қонунчилиги ва халқаро мажбуриятларига амал қилган ҳолда, ўз марказий ваколатли органлари орқали уларнинг ваколатлари доирасида ушбу Битим қоидаларига мувофиқ жиноятчиликка қарши курашда ҳамкорлик қиладилар.

2. Ушбу Битим жиноий ишлар бўйича ҳуқуқий ёрдам кўрсатиш ва топшириш масалаларига дахл қилмайди.

3. Ушбу Битим мақсадлари учун қуйидагилар марказий ваколатли органлар ҳисобланади:

Ички ишлар вазирлиги;

Миллий хавфсизлик хизмати;

Давлат божхона қўмитаси;

Давлат солиқ қўмитаси;

Бош прокуратура;

Ўзбекистон Республикаси Вазирлар Маҳкамаси ҳузуридаги Наркотик моддаларни назорат қилиш миллий маркази.

Ички ишлар вазирлиги;

Миллий хавфсизлик вазирлиги;

Давлат божхона хизмати;

Бош давлат солиқ хизмати;

Бош прокуратура;

Наркотиклар билан курашиш бўйича давлат хизмати.

4. Томонлардан ҳар бири ўзининг марказий ваколатли органлари рўйхатида ўзгаришлар ҳақида бошқа Томонни ўз вақтида хабардор қилади.

5. Марказий ваколатли органлар ушбу Битимни бажариш мақсадида бир-бирлари билан бевосита алоқа боғлайдилар.

1. Томонлар қуйидагиларга қарши курашда ҳамкорлик қиладилар:

1.1. Трансмиллий уюшган жиноятчилик;

1.2. Халқаро терроризм;

1.3. Наркотик воситалар ва психотроп моддаларнинг ноқонуний айланиши, ўқотар қурол, ўқ-дорилар, портлатиш қурилмалари, портловчи ва заҳарли моддалар, ва шунингдек, радиоактив материалларнинг ноқонуний айланиши;

1.4. Иқтисодиёт соҳасидаги жиноятлар;

1.5. Контрабанда ва божхона қонунчилигини бузиш;

1.6. Ноқонуний молиявий операциялар ва жиноий фаолият натижасида олинган даромадларни легаллаштириш;

1.7. Пул белгилари, қимматли қоғозлар, кредит карточкалари, расмий ҳужжатларни қалбакилаштириш, ва шунингдек, уларни ноқонуний тарқатиш ва фойдаланиш;

1.8. Маданий ва тарихий бойликларга жиноий тажовузлар, шу жумладан, уларни ноқонуний олиб кириш ва олиб чиқиш;

1.9. Автотранспорт воситалари билан ноқонуний операциялар;

1.10. Фоҳишабозликдан фойдаланиш ва одамлар савдоси;

1.11. Яширин миграция, шахсларнинг Томонлар давлатлари ҳудудида яширин равишда бўлиб, давлат чегарасидан ноқонуний тарзда ўтиши;

1.12. Агар мазкур ғайриҳуқуқий хатти-ҳаракатлар иккала Томон давлат манфаатларига дахлдор бўлса, экологик жиноятлар.

2. Томонлар шунингдек қуйидаги соҳаларда ҳамкорлик қиладилар:

2.1. Йўл ҳаракати хавфсизлиги ва ёнғин хавфсизлигини таъминлаш;

2.2. Ҳаво ва темир йўл транспорти хавфсизлигини таъминлаш;

2.3. Кадрлар тайёрлаш, илмий ва ахборот алоқаларини ривожлантириш;

2.4. Паспорт-виза ишлари, чет эл фуқаролари ва фуқаролиги йўқ шахсларнинг кириши-чиқиши, транзит олиб ўтилиши ва бўлишини назорат қилиш;

2.5. Қимматбаҳо ва махсус юкларни кузатиб бориш ва муҳофазалаш;

2.6. Айбланувчи, судланувчи, маҳкум этилган, гумон қилинувчи, бедарак йўқолган, қариндошлари билан алоқасини йўқотган, ўзлари ҳақида маълумот беришга қодир бўлмаган шахсларни қидириш, ва шунингдек, шахси аниқланмаган мурдаларнинг шахсини аниқлаш;

2.7. Рақами ва ўзига хос фарқлаш аломатларига эга ҳамда ўғирланган қимматбаҳо буюмлар ва нарсаларни қидириш;

2.8. Ахборот технологиялари соҳасида хавфсизликни таъминлаш.

3. Томонлар бир-бирини қизиқтирадиган бошқа йўналишлар бўйича ҳам ҳамкорлик қилишлари мумкин.

1. Томонлар қуйидаги шаклларда ҳамкорликни амалга оширадилар:

1.1. Жиноятлар олдини олиш, аниқлаш, фош этиш ва тергов қилишга, ва шунингдек, ушбу Битимнинг 2-моддасига мувофиқ бошқа масалаларни ҳал этишга ёрдам бериши мумкин бўлган ахборот билан алмашиниш;

1.2. Ушбу Битимнинг 2-моддасида кўзда тутилган жиноятлар фактларини шахслар, ташкилотлар, муассасалар ва корхоналар фаолиятини ўрганиш ҳамда тегишли учётлар бўйича шахслар, буюмлар ва ҳужжатларни текшириш йўли билан терговга кўмаклашиш;

1.3. Иш тажрибаси билан алмашиш, шу жумладан, малака ошириш, маслаҳатлашувлар ва семинарлар ўтказиш йўли билан;

1.4. Ушбу Битимнинг 2-моддасида кўзда тутилган жиноятларга барҳам бериш бўйича мувофиқлаштирилган тадбирларни амалга ошириш;

1.5. Жиноятчиликка қарши кураш масалалари бўйича қонунчилик ва бошқа норматив-ҳуқуқий ҳужжатлар билан алмашиниш;

1.6. Тезкор-қидирув тадбирлари тўғрисидаги сўровни бажарилиши;

1.7. Рақамлари ва ўзига хос фарқлаш аломатлари бор предметлар (буюмлар), шу жумладан автотранспорт ва ўқотар қурол ва шунингдек паспортлар ва қимматли қоғозларни қидириш.

2. Ҳамкорликнинг ҳажми ва аниқ шакллари марказий ваколатли органларнинг келишувига кўра эҳтиёжлар ва шароитларнинг ўзгаришини, ва шунингдек аҳамиятга эга вазиятларни ҳисобга олган ҳолда белгиланади.

1. Томонлар бир-бири билан ушбу Битимнинг 2-моддасида баён этилган жиноятларга барҳам бериш учун ҳуқуқни муҳофаза қилиш чора-тадбирларининг самарадорлигини ошириш мақсадида ўз ҳуқуқий ва маъмурий тизимларига мувофиқ ҳаракат қилиб, яқиндан ҳамкорлик қиладилар.

2. Томонлар жиноятчиликка қарши кураш ва махсус билимлар билан алмашиш манфаатларини кўзлаб илм-фан ва техника соҳасида тадқиқотлар дастурларини режалаштириш ҳамда амалга оширишда бир-бирларига кўмак берадилар ва бу мақсадларда тегишли ҳолларда ҳамкорликни ривожлантириш ва бир-бирини қизиқтирадиган муаммоларни муҳокама қилиш учун халқаро конференциялар ва семинарлардан ҳам фойдаланадилар.

3. Томонлар кадрлар тайёрлаш соҳасида ўзаро манфаатли асосда ҳамкорлик қилишга келишиб олдилар.

Ушбу Битимнинг 3-моддаси 1-қисми 1.1 -бандида кўзда тутилган ахборот билан алмашиш ушбу Битимнинг 2-моддаси 1-қисмида кўзда тутилган аниқ жиноятларга, шу жумладан, қуйидагиларга дахлдор бўлади:

1) Томонлардан бири давлати ҳудудида уюшган жиноий гуруҳлар томонидан, агар бундай гуруҳлар таркибига бошқа Томон давлати фуқаролари кирса ёки бундай жиноятлар бошқача тарзда ушбу давлат манфаатларига дахлдор бўлса, тайёрланаётган ёки содир этилган жиноятлар;

2) жиноий фаолият даромадларини легаллаштириш билан боғлиқ жиноятлар, бунда бир Томон давлати ҳудудидаги жисмоний ва/ёки юридик шахслардан бошқа Томон давлати фуқаролари шу мақсадларда фойдаланадилар.

Томонлар, шунингдек қуйидагилар ҳақида ахборот алмашинадилар:

1) уюшган жиноий гуруҳлар томонидан жиноятлар содир этилиши усуллари, уларнинг таркиби, тузилиши, фаолият соҳалари ва жиноий алоқалари;

2) агар кўрсатиб ўтилган фаолият бошқа Томон давлати манфаатларига дахлдор бўлса, террористик фаолият шакллари ва услублари, фош қилинган террористик гуруҳлар тузилиши ва таркиби, улар фойдаланган техник воситалар, тайёрланаётган ва содир этилган террористик актлар, уларга алоқадор шахслар;

3) жиноий фаолиятдан кўрилган даромадларни легаллаштириш усуллари, бундай фаолиятга алоқадорликда гумон қилинувчи ташкилотлар, муассасалар ва корхоналар;

4) Томонлар давлатларининг бошқа Томон давлати ҳудудида доимий яшовчи ёки вақтинча бўлган ҳамда ушбу Битимнинг 2-моддасида кўрсатилган жиноятларни содир этишда гумон қилинувчи фуқаролари;

5) бир Томон давлати жиноий қонунчилигининг бошқа Томон давлати фуқаролари томонидан бузилиши қайд этилган фактлар.

1. Ушбу Битим доирасидаги ҳамкорлик манфаатдор Томоннинг сўровлари ёки илтимослари асосида амалга оширилади.

2. Кўмаклашиш тўғрисидаги сўров ёки илтимос ёзма шаклда юборилади, кечиктириб бўлмайдиган ҳолларда, оғзаки берилиши мумкин, лекин кечи билан 24 соат ичида улар ёзма равишда, шу жумладан матнни техник воситалар ёрдамида узатиш йўли билан, тасдиқланиши керак. Сўров/илтимоснинг ҳақиқийлиги ёки мазмуни шубҳа туғдирганда қўшимча тасдиқ талаб қилиниши мумкин.

3. Ахборот тақдим қилиш ва ушбу Битимнинг 3-моддасида кўзда тутилган бошқа ҳаракатлар, Томонлар давлатларининг марказий ваколатли органлари томонидан илтимосномаларга мувофиқ амалга оширилади.

4. Ушбу модданинг 3-қисмида кўзда тутилган илтимос қуйидагиларни ўз ичига олиши керак:

4.1. Кўмак сўраётган органнинг ва сўралаётган органнинг номлари;

4.2. Сўров ёки илтимоснинг мақсадини кўрсатиш ва уларни асослаш;

4.3. Юборилаётган илтимосномадаги ишнинг моҳияти, шу иш бўйича ўтаётган ёки унга алоқаси бор шахс ёки шахслар, ахборот талаб қиладиган фактлар, ашёлар ва ҳужжатлар тўғрисида мумкин қадар тўлиқ маълумот;

4.4. Бажарилиши талаб қилинаётган аниқ процедурани қўллаш сабаблари ва унинг батафсил таърифи;

4.5. Зарурат бўлганда, илтимос қайси муддатларда бажарилиши кутилаётганини кўрсатиш.

5. Зарурият туғилганда ҳужжатларнинг тегишлича тасдиқланган нусхалари ёки улардан кўчирмалар илтимосномага илова қилинади, улар илтимос бажарилишини осонлаштиради.

6. Илтимоснома ва унга илова этиладиган ҳужжатлар ушбу Битимнинг 11-моддаси талабларига мувофиқ расмийлаштирилади ҳамда тегишли мансабдор шахс томонидан имзоланиб, гербли муҳр билан тасдиқланади.

7. Ушбу Битимнинг 3-моддаси 1-қисми 1.1-бандида кўзда тутилган ахборот Томонлар давлатлари марказий ваколатли органлари томонидан бир-бирларига, агар бу бошқа Томонни қизиқтиради деб ўйлашга асос бўлса, ўз ташаббусига кўра юборилиши мумкин.

8. Илтимосноманинг бажарилиши мумкин қадар қисқа муддатда амалга оширилиши зарур. Зарур ҳолатларда Томонлар давлатларининг марказий ваколатли органлари илтимоснома бажарилишини осонлаштирувчи қўшимча маълумотларни сўраб олишга ҳақлидир.

1. Агар илтимоснома бажарилиши инсон ҳуқуқлари ва эркинликлари бузилишига олиб келса, давлат суверенитети ёки хавфсизлигига зарар етказса, сўралаётган Томоннинг қонунчилигига ёки халқаро мажбуриятларига зид бўлса, унинг бажарилиши тўлиқ ёки қисман рад этилиши мумкин.

2. Илтимосномани қондиришни рад этиш ҳақида қарор қабул қилинган тақдирда Томонлар давлатларининг марказий органлари бир-бирига рад жавоби сабабларини кўрсатиб, бу ҳақда ёзма хабар беради.

1. Томонларнинг марказий ваколатли органлари, агар ушбу ахборот махфий ҳисобланса ёки маълумот бераётган Томон унинг ошкор этилишини хоҳламаса, бир-бирларидан олинадиган ахборот махфийлигини таъминлашлари зарур. Бу қоида техник воситалар, асбоб-ускуналар ва материалларга ҳам дахлдор ҳисобланади. Ахборотнинг махфийлик даражасини уни юборган Томон белгилайди.

2. Зарур ҳолатларда ушбу Битим доирасида олинган ахборот, техник воситалар, асбоб-ускуналар ва материалларнинг учинчи томонга берилишида бу ахборотни тақдим этган марказий ваколатли органларнинг ёзма розилиги талаб қилинади.

3. Томонлар олган жисмоний шахслар ҳақидаги маълумотлар ушбу Битимда белгиланган мақсадлардагина қўлланилиши мумкин, маълумот бераётган Томон бундай маълумотларнинг ишончлилигини, ва шунингдек, зарур бўлганда тегишли ўзгартиришлар ва қўшимчаларнинг ўз вақтида тақдим этилишини таъминлайди. Жисмоний шахслар ҳақидаги ахборотнинг қабул қилиниши, қайд этилиши, сақланиши, ишлатилиши ва йўқ қилиниши Томонлар давлатларининг қонунчилигига мувофиқ амалга оширилади.Ушбу Битим амали тугатилган тақдирда илгари олинган барча ахборот йўқ қилиниши лозим.

4. Томонлар давлатлари қонунчилигига мувофиқ манфаатдор шахсга унинг ёзма сўровига биноан унга нисбатан мавжуд маълумотлар ҳақида ахборот тақдим этилиши мумкин.

5. Барча ҳолатларда Томонлар бегона шахсларнинг маълумотлардан фойдаланишидан, уларни рухсатсиз ўзгартирилиши, йўқ қилиниши ёки ошкор этилишидан самарали ҳимояни таъминлайдилар.

1. Ушбу Битимни бажариш бўйича харажатларни Томонлар ўз мажбуриятларини бажаришлари учун зарур миқдорда мустақил равишда кўтарадилар.

2. Томонлар зарур ҳолатларда ушбу Битимдан келиб чиқадиган ҳаракатларни амалга ошириш учун, ҳар бир алоҳида ҳолатда ўзаро мақбул келишувлар билан расмийлаштириладиган, харажатларни биргаликда кўтарадилар. Томонларнинг биргаликдаги харажатлари бўйича мажбуриятлари ушбу келишувларга кўра тартибга солинади.

3. Зарур ҳолатларда Томонлар ушбу Битимнинг 2-моддасида зикр этилган жиноятларга барҳам бериш бўйича аниқ масалаларни ҳал этиш учун зарур асбоб-ускуналар ва материаллар билан бир-бирларига бепул ёрдам кўрсатишлари мумкин.

Томонлар ушбу Битим доирасида ҳамкорликни амалга оширишда рус тилига таржимаси илова қилинган ўз давлат тилларидан фойдаланадилар.

1. Зарурият туғилганда ушбу Битим қоидаларини ҳаётга татбиқ этиш мақсадида Томонлар ваколатли вакилларидан иборат Қўшма комиссия тузишлари мумкин.

2. Қўшма комиссия, заруратга қараб, бир-бирини қизиқтирадиган масалаларни кўриб чиқиш ва ўзаро мақбул қарорлар қабул қилиш учун навбати билан Тошкент ва Ашхободда мажлис ўтказади. Қўшма комиссия қарорларни тайёрлаш учун ва шунингдек бошқа фаолият учун Томонлар давлатларининг марказий ваколатли муассасалари вакилларидан иборат ишчи гуруҳлар ташкил этиши мумкин.

1. Ушбу Битим Томонларнинг ўзлари иштирок этган бошқа халқаро шартномалар бўйича мажбуриятларига дахл қилмайди.

2. Томонларнинг розилигига кўра ушбу Битимга ўзгартиш ва қўшимчалар киритилиши мумкин. Улар ушбу Битимнинг 14-моддасидаги қоидаларга мувофиқ кучга кирадиган ва унинг ажралмас қисми ҳисобланадиган алоҳида баённомалар билан расмийлаштирилади.

Ушбу Битим Томонлар унинг кучга кириши учун зарур бўлган давлат ички процедураларини бажарганликлари тўғрисида охирги ёзма хабарнома олинган санадан бошлаб кучга киради ва Томонлардан бири бошқа Томоннинг унинг ҳаракатини тўхтатиш тўғрисида хабарномасини олган кундан бошлаб олти ой ўтгандан сўнг ўз кучини тугатади.

2009 йил 25 февралда Тошкент шаҳрида икки нусхада, ҳар бири ўзбек, туркман ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин этишда келишмовчиликлар юзага келса, рус тилидаги матн асос қилиб олинади.