Ўзбекистон Республикаси Ҳукумати ва Қувайт Давлати Ҳукумати, бундан кейин Томонлар деб аталувчилар,

барқарор ривожланиш учун атроф-муҳит муҳофазасини яхшилаш ва табиий ресурсларни сақлаш ҳамда халқаро ва минтақавий ташкилотлардаги барқарор ривожланиш ғоясини мустаҳкамлаш соҳасида ҳамкорлик қилиш истагида,

ҳамда Томонларнинг халқаро ва минтақавий конференция ва учрашувларда атроф-муҳит муҳофазаси масалалари бўйича ишларининг мувофиқлаштируви заруратини англаган ҳолда, шунингдек улар ўрталарида табиатни муҳофаза қилиш ҳамкорлигини ривожлантириш мақсадида,

иккала Томон барқарор ривожланиш мақсадида, атроф-муҳитни муҳофаза қилиш ва табиий ресурсларни сақлаш соҳасида ҳамкорлик қилиш истагини билдирган ҳолда,

Томонлар ўзаро манфаатдорлик асосида барқарор ривожланиш учун атроф-муҳитни муҳофаза қилиш ва табиий ресурсларни сақлаш соҳасида ҳамкорликни мустаҳкамлайди ва ривожлантирадилар.

Томонлар ўртасидаги ҳамкорлик қуйидаги соҳаларда амалга оширилади:

1. Атроф-муҳит ифлосланишини олдини олиш ва бартараф этиш ҳамда чиқиндиларни бошқариш;

2. Лойиҳаларни ишлаб чиқишда атроф-муҳитга таъсирни баҳолаш;

3. Атроф-муҳит муҳофазаси ва табиий ресурслардан оқилона фойдаланиш соҳасида маълумот ва тажриба алмашиш;

4. Табиат қўриқхоналарини бошқариш;

5. Экологик индикаторлар ва барқарор ривожланиш индикаторлари;

6. Аҳоли пунктларида атроф-муҳит ҳолатини яхшилаш;

7. Қурғоқчилик ҳамда ерлар таназзулига қарши кураш;

8. Экологик туризм;

9. Сув ресурсларини муҳофаза қилиш;

10. Атроф-муҳит муҳофазаси ҳамда табиий ресурсларни сақлаб қолиш соҳасидаги саноат ва технологияларни ривожлантириш.

Томонлар махфий бўлмаган экологик маълумотлар, ҳужжатлар ва даврий нашрлар билан алмашинадилар.

Томонлар мазкур Англашув меморандумида назарда тутилган ҳамкорликнинг муайян масалалари бўйича фаолиятни баҳолаш учун батафсил ишчи дастурларини биргаликда ишлаб чиқадилар.

Томонлар экспертлар ва мутахассислар алмашинувини делегациялар ва ўқув курслари шаклида мазкур Англашув меморандумининг 4-моддасида назарда тутилган ҳолда амалга оширадилар.

Томонлар мазкур Англашув меморандуми дастурини бажариш бўйича мувофиқлаштирувчиларни вақт-вақти билан ўтказиладиган ўзаро алмашинув учрашувлари орқали тайинлашлари лозим.

1. Мазкур Англашув меморандуми Томонлардан бирининг бошқа Томонни ушбу Англашув меморандумининг кучга кириши учун зарур бўлган давлат ички процедураларни бажарганлиги тўғрисида дипломатик каналлар орқали сўнгги ёзма хабарномани олган кундан бошлаб кучга киради.

2. Томонларнинг келишувига кўра, ушбу Англашув меморандумига унинг ажралмас қисми ҳисобланадиган алоҳида протоколлар билан расмийлаштириладиган ўзгартиш ҳамда қўшимчалар киритилиши мумкин ва мазкур протоколлар ушбу модданинг 1-бандида белгиланган тартибда кучга киради.

3. Мазкур Англашув меморандуми беш йил муддатга тузилади ва унинг амал қилиш муддати агар Томонлардан бири унинг амал қилиш муддатини тўхтатиш нияти ҳақида ушбу Англашув меморандумининг навбатдаги амал қилиш муддати тугашидан камида олти ой аввал ёзма равишда хабар қилмаса, ушбу Англашув меморандуми кейинги бир йиллик ёки беш йиллик муддатларга ўз-ўзидан узайтирилади.

Тошкент шаҳрида 2008 йил 21 июлда икки асл нусхада ҳар бири ўзбек, араб ва инглиз тилларида тузилди, бунда барча матнлар бир хил кучга эга.

Мазкур Англашув меморандуми қоидаларини талқин қилишда келишмовчиликлар юзага келган ҳолда, инглиз тилидаги матн асос сифатида қабул қилинади.