Ўзбекистон Республикаси Ҳукумати билан Малайзия Ҳукумати ўртасида 1997 йил 6 октябрда имзоланган Савдо битими (Савдо битими)да назарда тутилган мақсадларга эришиш учун, Ўзбекистон Республикаси Ҳукумати ва Малайзия Ҳукумати Савдо битимининг 10-моддасига мувофиқ қуйидаги иловада қайд этилган ваколатларга эга бўлган Савдо бўйича қўшма қўмитани тузишга келишиб олдилар:

Путражайя шаҳрида 2005 йил 3 октябрда икки асл нусхада, ҳар бири ўзбек, малай ва инглиз тилида тузилди.

1. Савдо бўйича қўшма қўмита икки томонлама Савдо битимининг амалга оширилишига кўмаклашади. Савдо бўйича қўшма қўмита бошқа ваколатлардан ташқари:

(а) 1-Қўшимчадаги иш дастурида белгиланган ҳамкорлик соҳалари орқали икки томонлама савдо ва инвестиция алоқаларини яхшилашга оид чора-тадбирларни белгилайди ҳамда амалга оширади;

(b) икки давлатга таъсир қиладиган савдо ва инвестиция масалалари юзасидан чоралар кўради;

(с) савдо ва тадбиркорлик корхоналарини ташкил этишда икки давлатнинг хусусий тармоғига кўмаклашади;

(d) савдо ва бошқа тегишли соҳаларда маслаҳатлар беради ҳамда маълумотларни алмашади;

(е) тегишли ҳукуматга икки давлат ўртасидаги савдони кўпайтиришга ҳамда кенгайтиришга қаратилган чора-тадбирларни амалга ошириш бўйича тавсия беради;

(f) икки давлат ўртасидаги савдо ва инвестицияларни қўллаб-қувватлаш ҳамда кўмаклашиш мақсадида, ўз ваколатига кирувчи фаолиятларни амалга ошириш учун керак бўлганда ишчи гуруҳларини ташкил этади;

(g) Савдо битими доирасида амалга оширилган фаолиятларнинг ҳамда дастурларнинг мониторингини олиб боради;

(h) Савдо битимининг талқин қилиниши ёки қўлланилиши бўйича юзага келган масалалар бўйича музокаралар олиб боради;

(i) Савдо битимини амалга оширилиши билан боғлиқ бошқа масалаларни муҳокама қилади.

2. Савдо бўйича қўшма қўмита вазирлар даражасида ўтказилади. Икки вазир Савдо бўйича қўшма қўмитанинг ҳамраислари сифатида фаолият юритадилар. Ўзбекистон томонига Ташқи иқтисодий алоқалар, савдо ва инвестициялар вазири ва Малайзия томонига Халқаро савдо ва саноат вазири бошчилик қилади. Савдо бўйича қўшма қўмита таркиби тегишли ҳукуматлар томонидан тайинланган давлат ва хусусий тармоқ вакилларидан иборат бўлади.

3. Савдо бўйича қўшма қўмита йиғилишлари ўзаро келишилган муддатларда доимий асосда, навбатма-навбат ҳар бир давлатда ўтказилади.

4. Савдо бўйича қўшма қўмита йиғилишининг кун тартиби лойиҳаси ҳамраислар томонидан келишилади.

5. Икки давлат хусусий тармоғининг киритадиган ҳиссаси Савдо бўйича қўшма қўмита йиғилишида инобатга олинади.

6. Савдо бўйича қўшма қўмита йиғилиши давомида қабул қилинган қарорлар ва бошқа хулосалар келишилган йиғилиш баённомасида ўз аксини топади ҳамда икки томон қабул қилган қарорлар ва хулосаларни татбиқ этиш юзасидан тегишли тадбирларни амалга оширишлари лозим.

7. Савдо бўйича қўшма қўмитанинг ушбу ваколатларига қўшимча ва ўзгартиришлар ўзаро келишилган илова сифатида киритилиши лозим ҳамда у мазкур ҳужжатнинг ажралмас қисми ҳисобланади.

— ахборот ва коммуникация технологиялари;

— инвестицияни рағбатлантириш;

— туризм;

— қурилиш, айниқса инфратузилмани ривожлантириш;

— маҳсулот савдоси;

— кичик ва ўрта саноатни рағбатлантириш;

— нефть ва газ саноати;

— енгил саноат ва кийим-кечаклар;

— ҳалол озиқ-овқат ишлаб чиқариш;

— молиявий хизматлар;

— соғлиқни сақлаш;

— таълим;

— электротехника саноати;

— кимё саноати;

— қазиб чиқариш; ва

— ўзаро келишилган бошқа соҳалар.