Ўзбекистон Республикаси Ҳукумати ва Бразилия Федератив Республикаси Ҳукумати, бундан кейин «Томонлар» деб аталувчилар,

Икки мамлакат халқлари ўртасидаги мавжуд дўстлик алоқаларини мустаҳкамлашга интилган ҳолда,

Икки давлатнинг ижтимоий ва иқтисодий ривожланишига ҳисса қўшилишида ўзаро манфаатдорликни инобатга олган ҳолда,

Томонлар ўртасидаги барқарор ривожланиш ҳамкорлигини қўллаб-қувватлаш зарурлигига ишонган ҳолда,

Умумий манфаатдорлик соҳаларида техникавий ҳамкорликнинг ўзаро устуворлигини тан олган ҳолда, ва

Техникавий тараққиётни рағбатлантирувчи ҳамкорликнинг ривожланишини истаб,

қуйидагилар тўғрисида келишдилар:

Мазкур Битимнинг мақсади қуйидаги муҳим аҳамиятга эга соҳаларда техникавий ҳамкорликни рағбатлантиришдир:

а) таълим;

б) соғлиқни сақлаш;

в) табиатни муҳофаза қилиш;

г) коммунал хўжалиги;

д) сув ресурсларини бошқариш;

е) фан ва инновация технологиялари;

ж) қишлоқ хўжалиги;

з) энергетика;

и) телекоммуникациялар;

к) ва бошқа Томонлар тарафидан белгиланган соҳалар.

Мазкур Битимнинг мақсадларига эришиш учун Томонлар уч томонлама ҳамкорлик механизмларидан, уч томонлама ҳамкорлик орқали бошқа давлатлар, халқаро ташкилотлар ва минтақавий агентликлар билан ҳамкорлик қилишдан манфаат кўришлари мумкин.

1. Техникавий ҳамкорлик лойиҳалари Ижро дастурлари орқали амалга оширилади.

2. Юқорида қайд этилган лойиҳаларни амалга оширишда зарур бўлган ижроия ва мувофиқлаштирувчи муассасалар ҳамда бошқа омиллар ҳам Ижро дастурлари орқали ташкил этилади.

3. Давлат ва хусусий муассасалар, шунингдек нодавлат ташкилотлар ҳам ушбу Битимга кўра ишлаб чиқилган ва Ижро дастурларида келишилган лойиҳаларда иштирок этишлари мумкин.

4. Томонлар, мамлакатларининг тегишли қонун ва қоидаларига мувофиқ, амалга оширилиши зарур бўлган ва Томонлар тарафидан тасдиқланган лойиҳаларни биргаликда ёки алоҳида молиялаштиришлари мумкин, шунингдек улар халқаро ташкилотлар, траст фондлари, минтақавий ва халқаро дастурлар ва бошқа донорлар орқали ҳам манбаларни излашлари мумкин.

1. Томонлар вакиллари ўртасидаги йиғилишлар техникавий ҳамкорлик лойиҳаларига алоқадор қуйидаги масалалар юзасидан чоралар кўриш учун ўтказилиб борилади:

(а) техникавий ҳамкорликни амалга ошириш учун мос бўлган умумий устувор соҳаларни баҳолаш ва белгилаш;

(б) Томонлар ўртасида қабул қилинадиган механизмлар ва тартибларни ўрнатиш;

(в) иш режаларини кўриб чиқиш ва уларни тасдиқлаш;

(г) ҳамкорликнинг техникавий дастурларини, лойиҳаларини ва тадбирларини амалга оширилишини таҳлил қилиш, тасдиқлаш ва кузатиш;

(д) мазкур Битимга мувофиқ амалга ошириладиган тадбирлар, лойиҳалар ва дастурларни амалга ошириш натижаларини баҳолаш.

2. Томонлар йиғилишлар ўтказилиш жойи ва муддатини дипломатик каналлар орқали келишиб оладилар.

Томонлар ушбу Битимни амалга ошириш жараёнида олинган ҳужжатларни, ахборотларни ҳамда маълумотларни бошқа Томоннинг олдиндан ёзма равишда розилиги олинмагунга қадар чоп этилмаслигини ёки учинчи томонга тарқатилмаслигини кафолатлайдилар.

Мазкур Битимга кўра ҳар бир Томон бошқа Томон тарафидан юборилган персонални тураржой билан боғлиқ зарурий логистик таъминот билан, транспорт қулайликлари билан, Ижро дастурларида белгилаб қўйилган мажбуриятларни бажаришда ва тегишли Томонларнинг миллий қонун ва қоидаларига мувофиқ зарур бўладиган маълумотларга эга бўлишларини таъминлайди.

1. Ўзаро манфаатдорлик асосида ҳар бир Томон ўз ҳудудида бошқа Томон тарафидан тайинланган персоналга, шунингдек уларнинг қонуний бўйсунувчиларига, агар улар Томонлар давлатлари ҳудудида доимий яшаш жойига эга бўлган хорижий фуқаролар ёки Томонларнинг давлатлари фуқаролари бўлмасалар ўз хизмат вазифаларини амалга оширишлари учун қуйидагиларни кафолатлайдилар:

а) Томонларнинг миллий қонунчилигига мувофиқ дипломатик каналлар орқали сўралган визаларни бериш;

б) персонал етиб келган кундан бошлаб дастлабки олти ой муддат ичида унинг мулкидан олинадиган бож тўловлари, солиқлар ва йиғимлардан озод этиш, дастлабки жойлашишни назарда тутувчи сақлаш, ташиш ва бошқа шунга ўхшаш хизматларга оид солиқлар бундан мустасно; қабул қилувчи давлатда қонуний туриш муддати бир йилдан ошганда, персоналнинг бундай мол-мулки дастлаб озод қилинган импорт солиқлари тўланмаса, хизмат миссиясининг охирида реэкспорт қилинади;

в) агар юқорида келтирилган мулклар реэкспорт қилинса, ушбу модданинг «б» бандида назарда тутилгани каби озод этиш ва чеклаш;

г) бошқа Томон муассасалари тарафидан юборилган персоналларни ўз хизмат вазифаларини бажариш пайтида персонал маошидан олинадиган солиқ ва даромад солиғидан озод қилиш; муассасалар томонидан мукофотлар ва кунлик тўловлар берилганда, Томонлар ўртасида имзоланиши мумкин бўлган икки томонлама солиққа тортиш тўғрисидаги битимларга мувофиқ. қабул қилувчи давлатнинг қонуни қўлланилади;

д) мазкур Битимга мувофиқ амалга ошириладиган ҳар қандай ҳаракатга нисбатан суд таркибидан иммунитетга эга бўлиш;

е) инқироз пайтида воситаларни репатриация қилиш;

2. Персоналнинг мол-мулки, шу жумладан автомобили реэкспорт қилинмаган тақдирда, унинг эгалари олиб киришдаги бож тўловлари, солиқ ва бошқа йиғимларни тўлашга мажбурдирлар.

3. Персонал танлови юборувчи Томон тарафидан ўтказилади ва қабул қилувчи Томондан маъқулланиши шарт.

Томонлардан бирининг ҳудудига юборилган персонал мазкур Битимга кўра ҳар бир лойиҳанинг муддати ва шартларига биноан иш олиб боради ва қабул қилувчи давлатнинг амалдаги қонун ва қоидаларига бўйсунади.

1. Томонлар мазкур Битимга ва Ижро дастурларида Томонлар ўртасидаги келишувига мувофиқ амалга ошириладиган лойиҳаларни бажариш учун олиб кирилган товарлар, транспорт воситалари ва ускуналарни бож тўловлари, солиқ ва бошқа йиғимлардан Томонларнинг тегишли миллий қонунчилигига асосан озод қиладилар, сақлаш, ташиш ва шу каби хизматларга оид тўловлар бундан мустасно.

2. Лойиҳалар якунида уларни амалга ошириш учун вақтинча олиб кирилган барча товарлар, транспорт воситалари ва ускуналар реэкспорт қилинади. Акс ҳолда, юборувчи Томон уларни олиб кирилиши билан боғлиқ бўлган тегишли бож тўловлари, солиқ ва бошқа йиғимларни тўлайди.

3. Ушбу Битим доирасидаги лойиҳаларни амалга ошириш учун ишлатиладиган товарлар, транспорт воситалари ҳамда ускуналар импорт ва экспорт қилинган тақдирда, бу лойиҳаларни амалга оширишга масъул бўлган давлат органлари товарлар, транспорт воситалари ва ускуналарнинг божхона расмийлаштирилишини амалга ошириш учун керакли чора-тадбирларни кўради.

Мазкур Битимга Томонларнинг ўзаро келишувига мувофиқ исталган вақтда ёзма ва дипломатик ноталар билан ўзгартиш ва қўшимчалар киритилиши мумкин.

Мазкур Битимни талқин қилиш ёки қўллаш билан боғлиқ ҳар қандай низолар дипломатик каналлар орқали Томонлар ўртасида тўғридан-тўғри музокаралар йўли билан дўстона ҳал этилади.

1. Ушбу Битим кучга кириши учун бажарилиши лозим бўлган давлат ички процедуралари Томонлар тарафидан амалга оширилганлиги ҳақида дипломатик каналлар бўйича охирги ёзма хабарномалар олинган кундан бошлаб кучга кирган ҳисобланади.

2. Мазкур Битимнинг амал қилиш муддати беш (5) йил. Ушбу муддат тугашидан олти (6) ой олдин Томонлардан бири бошқа Томонни ушбу Битимнинг амал қилишини тўхтатиш ҳақида ёзма равишда хабардор этмаса, ушбу Битимнинг амал қилиш муддати ўз-ўзидан беш (5) йиллик муддатга узаяверади.

3. Мазкур Битим исталган вақтда Томонлардан бирининг дипломатик каналлар орқали берган ёзма хабарномаси орқали тўхталиши мумкин. Учинчи давлатлар билан уч томонлама ҳамкорликни ҳисобга олган ҳолда, мазкур Битим фаолияти тўхтатилганда, Томонлар лойиҳаларни амалга оширишни узайтириш ёки узайтирмасликни ҳал қилиб оладилар.

Бразилия шаҳрида 2009 йил 28 май куни икки нусхада, ҳар бири ўзбек, португал ва инглиз тилларида тузилди, бунда барча матнлар бир хил кучга эга.

Мазкур Битим қоидаларини талқин қилишда келишмовчиликлар юзага келса, инглиз тилидаги матн устувор ҳисобланади.