Ўзбекистон Республикаси Ҳукумати ва Бразилия Федератив Республикаси Ҳукумати бундан кейин «Томонлар» деб аталувчилар,

Ўзбекистон Республикаси ва Бразилия Федератив Республикаси ўртасида иқтисодиёт ва савдо соҳасида ҳамкорликка катта аҳамият қаратиб,

халқаро ҳуқуқ принципларига асосланган ҳолда, икки давлат ўртасида иқтисодиёт ва савдо соҳасида ҳамкорликни ривожлантириш ва дўстона муносабатларни мустаҳкамлашни истаб,

қуйидагилар тўғрисида келишдилар:

Томонлар ўз миллий манфаатларидан келиб чиққан ҳолда, мазкур Битим қоидаларига ва Томонларнинг миллий қонунчилигига мувофиқ иқтисодиёт ва савдо соҳасида ҳамкорликни ривожлантириш ва мустаҳкамлаш чора-тадбирларини кўрадилар.

1. Томонлар ўзаро икки давлат ўртасидаги товарлар импорти ва экспортига нисбатан қўлланиладиган бож тўловлари ва худди шундай таъсирга эга бўлган солиқларга тааллуқли энг қулай режим яратадилар.

2. Мазкур модданинг 1-бандидаги қоидалар:

а) Томонлардан бири тарафидан чегарабўйи савдосини енгиллаштириш мақсадида қўшни давлатларга яратиладиган имтиёзларга;

б) ҳар бир томон тарафидан улар аъзо бўлган эркин савдо ва божхона иттифоқи тўғрисидаги битимлар доирасида яратиладиган имтиёзли режимга, ривожланаётган давлатлар билан имтиёзга оид битимларга ёки ривожланаётган давлатларга имтиёзларни бир томонлама беришга нисбатан қўлланилмайди.

Томонлар ўзларининг миллий қонунчиликларига мувофиқ бошқа Томоннинг ҳудудида хар қандай Томоннинг қўшма корхоналарини, хўжалик юритувчи субъектларнинг филиалларини, банкларини ва бошқа тузилмаларини ташкил этилишига ёрдам берадилар. Томонлар инвестицияларни ва технологияга боғлиқ ишлаб чиқаришларни ривожлантиришни ва мустаҳкамлашни муҳимлигини англаб етадилар.

1. Томонлар икки давлат ўртасидаги иқтисодий ҳамкорликни қўшма лойиҳалар ва дастурлар орқали қўллаб-қувватлайдилар.

2. Томонлар икки давлатнинг хўжалик юритувчи субъектлари ўртасида иқтисодиёт ва савдо соҳасида ҳамкорликни қўллаб-қувватлаш мақсадида зарур чора-тадбирларни кўрадилар.

Томонлар хўжалик юритувчи субъектларининг мазкур Битим асосида имзолаган шартномалари доирасидаги барча тўловлар, Томонларнинг миллий қонунчилигига мувофиқ халқаро тўловларда қабул қилинган талабларга асосан эркин муомаладаги валютада амалга оширилади.

Томонлар ҳудудларида ўтказиладиган халқаро ярмаркалар ва кўргазмаларда ва бошқа шунга ўхшаш анжуманларда икки давлат хўжалик юритувчи субъектларининг иштирок этишларига кўмаклашадилар.

1. Томонлар ўртасидаги иқтисодиёт ва савдо соҳасида ҳамкорлик икки давлат хўжалик юритувчи субъектлари ўртасида уларнинг мулкий ва ҳамкорлик шаклларидан қатъи назар, Томонларнинг миллий қонунчилиги ҳамда халқаро савдо тажрибасидан дунё товарлари ва хизматлари бозори нархлари асосида шартномалар орқали амалга оширилади.

2. Томонлар икки давлат хўжалик юритувчи субъектларининг тузган шартномалари бўйича мажбуриятларини бажармаганликлари юзасидан жавобгар бўлмайдилар.

1. Томонлар мазкур Битим қоидаларини амалга ошириш мақсадида, Ўзбекистон Республикаси ва Бразилия Федератив Республикаси ўртасида Томонларнинг тегишли давлат органлари ва ишбилармон доиралар вакилларидан иборат савдо-иқтисодий ҳамкорлик бўйича Ҳукуматлараро комиссия (бундан кейин — Ҳукуматлараро комиссия) ташкил этадилар.

2. Ҳукуматлараро комиссия йиғилишлари бир йилда бир марта ёки ҳар икки Томон ўзаро келишуви бўйича зарур деб ҳисоблаган вақтларда Ўзбекистон Республикаси ва Бразилия Федератив Республикасида навбатма-навбат ўтказилади. Ҳукуматлараро комиссия ўз Регламентини ўзи мувофиқлаштиради.

3. Ҳукуматлараро комиссиянинг асосий вазифалари қуйидагилардир:

а) ўзаро манфаатли бўлган соҳаларда иқтисодиёт ва савдо бўйича ҳамкорлик дастурларини муҳокама қилиш;

б) кредитлар беришнинг маъқул шартларини, иқтисодиёт ва савдо соҳасида ҳамкорликни молиявий таъминлашни аниқлаш;

в) ўрта ва кичик бизнесни қўллаб-қувватловчи дастурларни тайёрлаш ва амалга ошириш;

г) икки давлат хўжалик юритувчи субъектлари ўртасида иқтисодиёт ва савдо соҳасида ҳамкорликнинг шарт-шароитлари яхшилаш учун таклифлар тайёрлаш;

д) ушбу Битимнинг татбиқ қилиниши юзасидан таклифлар киритиш;

е) Томонлар ҳамда улар давлатларининг хўжалик юритувчи субъектлари ўртасида иқтисодиёт ва савдо соҳасида ҳамкорликни амалга ошириш жараёнида юзага келадиган масалаларни кўриб чиқиш.

4. Томонларнинг ўзаро ички келишувига асосан мазкур моддани амалга ошириш билан боғлиқ харажатлар ҳар бир Томон тарафидан ўзига тегишли қисми бўйича қопланади.

Томонларнинг ўзаро келишувига мувофиқ, ушбу Битимга унинг ажралмас қисми ҳисобланадиган баённомалар билан расмийлаштириладиган ўзгартиш ва қўшимчалар киритилиши мумкин ва ушбу баённомалар мазкур Битимнинг 11-моддасига мувофиқ кучга киради.

Ушбу Битим Ўзбекистон Республикаси ёки Бразилия Федератив Республикаси томонидан тузилган мавжуд халқаро шартномалардан келиб чиқувчи Томонларнинг ҳар қандай ҳуқуқ ва мажбуриятларига таъсир этмайди.

1. Мазкур Битим Томонлардан бирининг бошқа Томоннинг ушбу Битимнинг кучга кириши учун зарур бўлган ички давлат процедураларини бажарганлиги тўғрисида сўнгги ёзма хабарномани олган санадан бошлаб кучга киради ва Томонлардан бирининг мазкур Битим амал қилишини тўхтатиш тўғрисидаги ёзма хабарномасини олгунга қадар амалда бўлади.

2. Мазкур Битимнинг амал қилиш муддати шундай ёзма хабарнома олингандан сўнг олти ойдан кейин тўхтатилади.

3. Мазкур Битимнинг амал қилиш муддатининг тўхтатилиши, ушбу Битимнинг амал қилиши давомида юзага келган Томонларнинг молиявий мажбуриятларини бажаришига таъсир қилмайди.

Бразилия шаҳрида 2009 йил 28 май куни икки нусхада, ҳар бири ўзбек, португал ва инглиз тилларида тузилди, бунда барча матнлар бир хил кучга эга.

Мазкур Битимни талқин қилиш мақсадида инглиз тилидаги матн устувор ҳисобланади.