Ўзбекистон Республикаси Ҳукумати билан Таиланд Қироллиги Ҳукумати, бундан кейин «Томонлар» деб аталувчилар,

ўзаро ҳамкорлик асосида гиёҳвандлик воситалари устидан назорат улар билан қонунга хилоф равишда муомала қилинишига қарши курашда самарали восита эканлигини тушуниб,

1961 йилдаги Гиёҳвандлик воситалар тўғрисида Ягона конвенция, унга 1972 йилдаги Қўшимча протокол, 1971 йилдаги Психотроп моддалар тўғрисида Конвенция ва 1988 йилдаги БМТнинг Гиёҳвандлик воситалар ва психотроп моддалари билан қонунга хилоф равишда муомала қилинишига қарши кураш тўғрисидаги Конвенциялари принципларидан келиб чиққан ҳолда,

икки мамлакат ўртасидаги мавжуд дўстона муносабатларни мустаҳкамлашни истаб,

қуйидагилар тўғрисида аҳдлашиб олдилар:

Ушбу Англашув Меморандуми қоидаларини амалга ошириш мақсадида Ўзбекистон Республикаси Ҳукумати Наркотик моддаларни назорат қилиш Давлат комиссиясини марказий орган сифатида тайинлайди ва ўз навбатида Таиланд Қироллиги Ҳукумати Наркотиклар устидан назорат кенгаши офисини марказий орган сифатида тайинлайди.

Томонларнинг марказий органлари, ўзаро келишган ҳолда, ушбу Англашув Меморандумида белгиланган ҳамкорлик самарадорлигини мувофиқлаштириш ва ошириш мақсадида маслаҳатлашувлар олиб борадилар.

Томонлар ўзларининг қонун ҳужжатларига мувофиқ қуйидаги масалаларда ҳамкорлик олиб борадилар:

1. Гиёҳвандлик воситалар ва психотроп моддаларини истеъмол қилинишини олдини олиш чора-тадбирлари;

2. Ҳуқуқ-тартибот чора-тадбирлари;

3. Гиёҳвандлик воситалари экилиши устидан назорат чоралари;

4. Психотроп воситалар ва уларнинг прекурсорлари устидан назорат чора-тадбирлари;

5. Даволаш ва тиббий-ижтимоий тиклаш чора-тадбирлари;

6. Қўшма техник кўмак дастурларини амалга ошириш;

7. Гиёҳвандлик воситалар, психотроп моддалар ва уларнинг прекурсорларига оид техникавий ва умумий, шу жумладан амалдаги қонун ҳужжатлари тўғрисидаги маълумотлар билан алмашиш.

Томонлар ўртасида ахборот алмашуви гиёҳвандлик воситалар, психотроп моддалар ва уларнинг прекурсорлари билан қонунга хилоф равишда муомала қилинишини ташкил этадиган муайян жиноятларни олдини олиш учун зарур бўлган ҳажмда, мазкур Англашув Меморандумининг 2-моддасида қайд этилган ҳамкорлик йўналишларидан келиб чиққан ҳолда амалга оширилади.

Ушбу Англашув Меморандумига мувофиқ ҳамкорлик Томонлар марказий органларининг ёрдам кўрсатиш тўғрисидаги сўровлари асосида мавжуд алоқа воситалари орқали амалга оширилади.

Ушбу Англашув Меморандуми доирасида ҳамкорлик фаолиятини амалга ошириш билан боғлиқ молиявий масалалар Томонлар ўртасида маслаҳатлашув йўли билан ҳал этилади.

Ушбу Англашув Меморандуми доирасидаги дастур ва лойиҳаларда иштирок этаётган техник ходимлар ва уларнинг оила аъзоларини, шунингдек фойдаланилаётган асбоб-ускуналарни ҳар бир Томон ўз ҳудудига кириш ва ундан чиқишни ўз қонун ҳужжатларига мувофиқ енгиллаштиради.

Ҳар бир Томон ушбу Англашув Меморандумининг амал қилишини тўла равишда ёки қисман вақтинча муддатга тўхтатиб қўйиш ҳуқуқига эгадир, бундай тўхтатиш бошқа Томонни дипломатик каналлар орқали хабардор қилинганидан сўнг дарҳол амал қила бошлайди.

Томонларнинг ёзма розилиги асосида ушбу Англашув Меморандумига қўшимча ва ўзгартириш киритиш дипломатик каналлар орқали амалга оширилади.

Ушбу Англашув Меморандуми қоидаларини талқин қилиш ва/ёки қўллашдан келиб чиқадиган ҳар қандай низо ёки келишмовчиликлар Томонлар ўртасида музокаралар олиб бориш йўли билан ҳал этилади.

Англашув Меморандуми имзоланган кундан бошлаб кучга киради ва Томонлардан бири бошқа Томонни дипломатик каналлар орқали ёзма равишда Англашув Меморандуми амал қилишини тугатиш нияти борлиги тўғрисида тугатиш санасидан камида олти (6) ой илгари хабардор қилмагунча ўз кучида қолаверади.

Юқоридагиларни тасдиқлаб, ўз Ҳукуматлари томонидан тегишли ваколат олган қуйида имзо чекувчилар ушбу Англашув Меморандумини имзоладилар.

Бангкок шаҳрида 2010 йил 29 октябрда икки нусхада, ҳар бири ўзбек, тай ва инглиз тилларида тузилди, бунда барча матнлар бир хил кучга эга. Келишмовчиликлар юзага келган холларда, инглиз тилидаги матн устувор ҳисобланади.