Ўзбекистон Республикаси Ташқи ишлар вазирлиги билан Италия Республикаси Ташқи ишлар вазирлиги, бундан кейин Томонлар деб аталувчилар,

Бирлашган Миллатлар Ташкилоти Низоми, Янги Европа учун Париж Хартияси, Европада Хавфсизлик ва Ҳамкорлик Кенгаши Хельсинки Якуний акти ва Европада Хавфсизлик ва Ҳамкорлик Ташкилоти бошқа ҳужжатларининг руҳига мувофиқ, икки давлат ва халқлари ўртасидаги дўстона муносабатлар ҳамда ҳамкорликни ривожлантириш мақсадида,

шерикчилик ва ўзаро манфаат принциплари, жумладан терроризмга қарши халқаро коалиция билан ҳамкорлик асосида уларнинг муносабатларини кенгайтириш мақсадида ҳамкорликнинг янги шаклларига кўмаклашиш ва ривожлантириш истагида,

халқаро ташкилотлар ва учрашувлар доирасида ҳамкорликни фаоллаштиришнинг муҳимлигини таъкидлаб,

қуйидагилар тўғрисида аҳдлашиб олдилар:

Икки томонлама муносабатлар ва иккала Томон давлатлари учун қизиқиш уйғотадиган халқаро масалаларни муҳокама қилиш учун Томонлар маслаҳатлашувлар олиб борадилар.

Томонлар ушбу Протоколнинг 1-моддасида кўрсатилган маслаҳатлашувларни бир йилда камида бир марта олиб борадилар. Улар навбатма-навбат Тошкентда ва Римда ёки халқаро учрашувлар давомида ўтказилади. Делегациялар даражаси, кун тартиби ва маслаҳатлашувларнинг муддатлари дипломатик каналлар орқали келишилади.

Маслаҳатлашувлар қуйидагиларни қамраб олиши мумкин:

а) халқаро муносабатларнинг глобал масалалари ва умумий ривожланиши, айниқса, Бирлашган Миллатлар Ташкилоти, Европада Хавфсизлик ва Ҳамкорлик Ташкилоти ва бошқа халқаро ҳамда минтақавий ташкилотларнинг аҳамияти,

б) сиёсат, иқтисод, маданият, фан, техника, таълим ва тадқиқот, шунингдек соғлиқни сақлаш, атроф муҳитни муҳофаза қилиш соҳасида икки томонлама ҳамкорлик ва халқлар ўртасидаги алоқаларга кўмаклашиш масалалари,

с) Европа ва Марказий Осиё хавфсизлиги ва ушбу минтақаларда рўй бераётган интеграциялашув жараёни масалалари,

с) икки томонлама битимларнинг бажарилиши тўғрисида ахборот алмашиш, шунингдек Ўзбекистон-Италия муносабатларини ривожлантиришнинг янги шаклларини ишлаб чиқиш.

Томонлар ўз дипломатлари учун тўғридан-тўғри алоқаларни ўрнатиш ҳамда тажриба алмашиш мақсадида қулай шарт-шароитларни яратадилар.

Ҳар иккала Томон вакиллари халқаро анжуманлар на учрашувларда, шунингдек иккала давлатнинг учинчи давлатлардаги дипломатик миссиялари, Бирлашган Миллатлар Ташкилотида, Европада Хавфсизлик ва Ҳамкорлик Ташкилотида ва бошқа халқаро ташкилотларда иккала Томон учун қизиқиш уйғотадиган масалалар бўйича маслаҳатлашувлар олиб борадилар.

Ушбу Протокол имзоланган санадан бошлаб кучга киради ва Томонлардан биронтаси бошқа Томондан унинг амал қилишини тўхтатиш тўғрисида ёзма хабарнома олгандан кейин уч ой ўтгач, амал қилишини тўхтатади.

Тошкент шаҳрида, 2007 йил 21 майда икки нусхада, ўзбек, итальян ва инглиз тилларида тузилди, бунда барча матнлар бир хил кучга эга. Талқин қилишда келишмовчиликлар юзага келса инглиз тилидаги матн устувор ҳисобланади.