Вилоятда ички истеъмол бозорларини асосий озиқ-овқат маҳсулотлари, шу жумладан қишлоқ хўжалик маҳсулотлари билан тўлдириш, нархларни асоссиз равишда ошиб кетишини олдини олиш борасида бир қатор ишлар амалга оширилди.

Хусусан, гўшт ва сут маҳсулотлари нархини барқарор ушлаб туриш мақсадида четдан 4 мингга яқин наслли қорамоллар олиб келинди ҳамда сунъий қочириш ишларини ташкил этиш бўйича қўшимча чора-тадбирлар белгиланди. Чорвачиликда маҳсулдорликни ошириш мақсадида ҳудудларда 21 та ихтисослашган махсус бирлашмалар ташкил этилиб, аҳоли пунктларида уларнинг 202 та шохобчалари очилди.

Мева-сабзавот маҳсулотлари ишлаб чиқариш ҳажмини ошириш мақсадида чет эл технологиясида юқори ҳосилли янги боғлар барпо этилди.

Қишлоқ хўжалиги маҳсулотларини ишлаб чиқарувчилар томонидан тўғридан-тўғри харидорларга етказиш ва харидорларга қулайлик яратиш мақсадида Тошкент шаҳрида жорий йилда 70 та қишлоқ хўжалиги маҳсулотлари билан савдо қилувчи замонавий типдаги савдо дўконлари қурилмоқда.

Бироқ, бугунги кунда чорвачилик, паррандачилик маҳсулотларини етиштириш ва бозорларга етказиб бериш ҳамда харидорларга сотиш тизимидаги ҳақиқий аҳвол ўрганилганда, жойларда бу борада тизимли иш ташкил этилмаганлиги, бу масалаларга шаҳар ва туман ҳокимликлари томонидан етарлича эътибор берилмаётганлиги, аксарият ҳокимлар фақат пахта ва ғалла агротехник тадбирларини бажариш билан шуғулланиш баҳонасида тумандаги чорвачилик, паррандачилик фермер ва деҳқон хўжаликлари ҳамда асаларичилик, балиқчилик хўжаликлари фаолияти билан етарлича шуғулланмаяптилар.

Натижада бугунги кунда қишлоқ хўжалиги маҳсулотлари шу жумладан, гўшт, сут, тухум, мева-сабзавот, полиз, картошка маҳсулотларининг бозорда нархини арзонлаштириш бўйича ишлар талабга жавоб бермайди.

Жойларда деҳқон бозорлари, солиқ ва ветеринария хизмати ходимлари томонидан етарлича назорат ҳамда ташкилий тадбирлар белгиланмаганлиги, нархларнинг ўсиб кетишига ва аҳолига сифатли озиқ-овқат маҳсулотлари етказилишига салбий таъсир кўрсатмоқда.

Вилоят ички истеъмол бозорларида сотилаётган қишлоқ хўжалик маҳсулотлари нархларини барқарорлаштириш ҳамда нархларнинг асоссиз равишда ошиб кетишини олдини олиш ва Республика Ҳукумати томонидан белгиланган вазифаларнинг ижросини таъминлаш мақсадида қарор қиламан:

1. Ўзбекистон Республикаси Вазирлар Маҳкамасида 2010 йил 1 июнь куни ўтказилган Республика сим орқали йиғилиши топшириқлари ижро учун қабул қилинсин.

2. Шаҳар ва туманлар ҳокимларининг жойларда қишлоқ хўжалиги маҳсулотлари нархининг асоссиз равишда ошиб кетишини олдини олиш, бунинг учун қишлоқ хўжалиги маҳсулотлари етиштирувчиларга зарур шароитлар яратиш бўйича олиб бораётган ишлари талаб даражасида эмаслиги кўрсатиб ўтилсин ва 1 ҳафта муддатда мавжуд муаммоларни бартараф этиш, Тошкент шаҳар ва вилоят аҳолисини узлуксиз равишда арзон қишлоқ хўжалиги маҳсулотлари билан таъминлаш юзасидан махсус комплекс чора-тадбирлар дастурини ишлаб чиқиб, тасдиқланган ҳолда Вазирлар Маҳкамасига тақдим этиш учун вилоят ҳокимлигига топширсинлар.

3. Вилоят ички истеъмол бозорларида қишлоқ хўжалик маҳсулотлари нархларининг асоссиз равишда ошиб кетишини олдини олиш бўйича вилоят ишчи гуруҳи таркиби 1-иловага мувофиқ тасдиқлансин.

Шаҳар ва туманларда иловадаги таркибда ҳокимлар бошчилигида ҳудудий ишчи гуруҳлар тузилиб, фаолияти ташкил этилсин.

4. Вилоят шаҳар ва туманларида асосий турдаги озиқ-овқат маҳсулотлари нарх-навосини барқарор сақлаб туриш ҳамда етиштирилган қишлоқ хўжалиги маҳсулотларини аҳолига узлуксиз равишда етказиб берилишини таъминлаш мақсадида:

вилоятдаги йирик паррандачилик корхоналарининг шаҳарларга бириктирилиши 2-иловага;

туманларда чорвачилик йўналишида фаолият юритаётган фермер ва қишлоқ хўжалиги корхоналари томонидан Тошкент шаҳар ва вилоят шаҳарлари бозорларига гўшт (мол, қўй, чўчқа гўшти) маҳсулотларини олиб келиб сотиш топшириғи 3-иловага;

парранда гўшти ва тухум етказиб бериш бўйича туманларнинг Тошкент шаҳри бозорларига бириктирилиши 4-иловага;

мева-сабзавот, узум, полиз, картошка маҳсулотларини етказиб бериш бўйича туманларнинг Тошкент шаҳри туманларига ва вилоят шаҳарларига бириктирилиши 5-иловага;

мева-сабзавотчиликка ихтисослашган туманларда томчилатиб суғориш асосида боғлар ва токзорларни 2011 йилда барпо этиш топшириғи 6-иловага мувофиқ тасдиқлансин.

5. Вилоят ва ҳудудий Ишчи гуруҳларининг асосий вазифалари этиб қуйидагилар:

икки кун муддатда барча туман ва шаҳар бозорларидаги гўшт расталари ва қассобхона-дўконларни тўлиқ хатлов (инвентаризация)дан ўтказиб, уларни гўшт (мол, қўй, чўчқа) ва сут маҳсулотлари, парранда гўшти, балиқ ва тухум билан савдо қилувчи махсус «солиқ», «банк» ва «ҳоким» расталарини ташкил этиш;

бозордаги махсус гўшт расталарини — яъни махсус «солиқ» растасини туман (шаҳар) солиқ инспекцияси бошлиғи, махсус «банк» растасини тумандаги тижорат банклари бўлимлари раҳбарлари ва махсус «ҳоким» растасини шахсан туман (шаҳар) ҳокимининг ўзи ҳар куни етарли миқдорда ва арзон нархларда гўшт билан таъминлаб борилишини назорат қилиш;

бозорлардан ташқари аҳоли пунктларида жойлашган гўшт дўконларини ички ишлар ва прокуратура департаментлари хатлов (инвентаризация)дан ўтказиб, уларга етказиб берилаётган гўшт маҳсулотларини қассоблар ва дўконлар сотувчилари томонидан асоссиз ошириб юборилишини олдини олиш бўйича профилактик чораларни кўриш ҳамда гўшт дўконларида махсус гўшт расталаридаги нархлардан асоссиз равишда юқори нархларда сотилаётган бўлса, ички ишлар ва прокуратура департаментлари томонидан сотувчи-қассобларга нисбатан тегишли чоралар кўриш;

июнь ойидан бошлаб, ҳудудлар бўйича асосий турдаги озиқ-овқат маҳсулотлари (гўшт, парранда гўшти, тухум) нарх-наволарини туманлар (шаҳарлар) ва бозорлар кесимида кунлик мониторингини юритиш ва ҳар 15 кун якуни бўйича таҳлилий маълумотларни тайёрлаб, нарх-наво асоссиз ошиб кетишини олдини олиш тадбирлари белгилансин.

6. Вилоят Қишлоқ ва сув хўжалиги бошқармаси (У. Атемов) ҳудудий ишчи гуруҳлари билан биргаликда:

бир ой муддатда чорвачиликка ихтисослашган фермер хўжаликларининг мавжуд чорва моллари бош сонидан келиб чиққан ҳолда талаб этиладиган озуқа ер майдонларининг ажратилиши масаласини қайта ўрганиб чиқиб, белгиланган тартибда қўшимча ер майдонлари ажратиш бўйича таклифлар тайёрлаш;

чорвачилик фермер хўжаликларига ажратилган ер майдонлари ва аҳоли томорқасидан самарали фойдаланиш ҳамда юқори ҳосил олишни таъминлаш мақсадида озуқабоп экинларнинг серҳосил навлари уруғликларини етиштириш бўйича алоҳида дастур ишлаб чиқиб, вилоят ҳокимлигига киритиш;

вилоят Ветеринария бошқармаси (М.Саттарова), «Насл-хизмат» МЧЖ (Ў.Саидов), «Чорва-насл уруғчилиги» МЧЖ (Қ.Пирвалиев) билан биргаликда жойларда чорва молларини сунъий уруғлантириш ишларини белгиланган топшириқ асосида кенг кўламда жорий этиш вазифалари юклатилсин.

7. Вилоят Ветеринария бошқармаси (М.Саттарова), Давлат санитария-эпидемиология назорат маркази (Б.Алматов) 3 кун муддатда вилоятнинг барча ҳудудларида ташкил этилган қушхоналарни тўлиқ хатлаб (инвентаризация)дан ўтказиб, уларнинг фаолиятини тартибга солиш бўйича кескин чоралар кўрсин.

8. «Тошкент ёғ-мой» комбинати қўшма корхонаси (Б. Нуритдинов), «Янгийўл ёғ-мой» (Х. Тўлаганов) ОАЖ корхоналари раҳбарлари:

маҳсулот сотиш учун бириктирилган ҳудудларидаги чорвачилик хўжаликларига бир ойда икки марта шахсан бориб, фермерлар билан учрашиб, маҳсулотнинг сифати бўйича уларнинг фикрини билиб, тегишли чоралар кўрсин ва етказиб берилиши лозим бўлган шрот, шелуха маҳсулотларини сифатли қилиб биржа савдолари орқали вилоят Чорва-озуқа бош бирлашмаси ва ҳудудий бўлимлари орқали белгиланган тартибда узлуксиз равишда истеъмолчиларга етказиб берилишини;

белгиланган ҳажмлар миқдорида шрот ва шелуха маҳсулотларини биржа савдоларига қўйилишини;

ҳар бир килограмм чигитдан чиқадиган шрот ва шелухани ҳисоботини юритиб, унинг сифати ва миқдори бўйича масъуллар бириктирилишини таъминласинлар.

9. Шаҳар ва туман ҳокимликларига:

бир ҳафта муддатда ҳудудий солиқ, прокуратура департаменти ва ички ишлар бўлимлари билан биргаликда бугунги кунда ноқонуний равишда шрот ва шелуха маҳсулотларини сотиш билан шуғулланаётган дўконларни аниқлаб чиқиб, уларнинг фаолиятига чек қўйиш ва ушбу фуқароларга нисбатан қонуний чоралар кўриш топширилсин.

10. «Вилоятбозорсавдо» ҳиссадорлик уюшмаси (А. Мирсалимов), вилоят Давлат солиқ (Н. Эрбеков), Марказий банкнинг (Н. Хусанов), Архитектура ва қурилиш (Р. Шомуродов) ва бошқа мутасадди бошқармалар ҳамда шаҳар ва туман ҳокимликлари билан биргаликда:

бозорлар ва савдо мажмуалари ҳудудига ва уларга туташ ҳудудларда жойлашган мулкчилик шаклидан қатъи назар, барча автотранспорт воситаларини вақтинча тўхташ жойларини хатлов (инвентаризация)дан ўтказиб, белгиланган тартибда бозорлар ҳамда савдо мажмуаларига топширилишини ва уларни назорат касса машиналари, тўлов терминаллари билан таъминлаш;

300 ва ундан ортиқ турғун савдо нуқталари ва савдо ўринларига эга бўлган бозорлар ва савдо мажмуаларида автомашиналарнинг кириш ва чиқиш вақтини қайд этиб турадиган электрон ҳисоблагичларни ўрнатиш чораларини кўрсинлар.

11. Вилоят Монополиядан чиқариш ва рақобатни ривожлантириш ҳудудий бошқармаси (Т. Муратов) жорий йилнинг июнь ойидан бошлаб:

шрот, шелуха ва омихта ем маҳсулотларининг сотувчи шохобчаларда сотилаётган нарх-наволари ҳамда шохобчаларни қонуний ташкил этилганлигини назорат қилиб, ҳар ҳафтада бир маротаба вилоят ишчи гуруҳига ахборот киритиб борсин;

Истеъмолчилар ҳуқуқларини ҳимоя қилиш вилоят бирлашмаси (Г. Аббосова,) билан биргаликда фаолият кўрсатаётган гўшт расталарида маҳсулот сотилиши, унга ўрнатилган нарх-наво устидан қатъий назорат ўрнатсинлар.

12. «Кучлук» (Қ. Артиқов), «Пахта» (К. Собиров) нефть базаси унитар корхоналари туманлар ҳокимлари билан биргаликда чорвачилик маҳсулотлари ишлаб чиқарувчи фермер хўжаликлари ва паррандачилик корхоналарига талаб этиладиган ёқилғи мойлаш материалларини биринчи навбатда етказиб берилишини таъминласинлар.

13. Жорий йилнинг июнь ойидан бошлаб вилоят ҳокими Халқ депутатлари вилоят Кенгаши депутатлари олдида;

шаҳар ва туманлар ҳокимлари, солиқ инспекцияси бошлиғи бир ойда бир марта ўз ҳудудида халқ билан учрашувлар ташкил қилиб, бозорлардаги озиқ-овқат маҳсулотларининг нарх-навоси бўйича ҳисобот бериб боришлари белгилаб қўйилсин.

14. «Маҳалла» хайрия жамғармаси вилоят бўлими (С. Қурбонкулов) ва Касаба уюшмалари ташкилотлари бирлашмаси вилоят Кенгаши (М. Тўлаганова) бир ҳафта муддатда, чорвачилик фермерлари ва чорва етиштирувчи аҳоли ўртасида гўшт, тухум маҳсулотлари нархларини асоссиз ошириб юборишнинг салбий оқибатлари ва аҳоли ўртасида норозигарчиликка олиб келиши тўғрисида кенг тарғибот-ташвиқот ишларини олиб борсинлар.

15. Халқ депутатлари вилоят Кенгаши депутатларига жойларда ички истеъмол бозорларидаги озиқ-овқат маҳсулотлари нарх-навосини асоссиз равишда ошиб кетмаслигини олдини олиш бўйича маҳаллий ҳокимликлар ҳамда мутасадди ташкилотлар томонидан олиб борилаётган ишларни доимий равишда ўрганиб бориш, сайланган ҳудудлари бўйича бу борадаги мавжуд муаммолар юзасидан вилоят ишчи гуруҳига мурожаат этиш, мазкур қарор мазмун-моҳиятини тарғибот-ташвиқот ишларини олиб боришда фаол иштирок этишлари тавсия этилсин.

16. Мазкур қарор ижросини назорат қилиш вилоят ҳокимининг биринчи ўринбосари Б. Ибрагимов ва вилоят ҳокимининг ўринбосари С. Абдуллаев зиммаларига юклатилсин.