Ўзбекистон Республикаси Вазирлар Маҳкамасининг 2010 йил 5 апрелдаги «Автотранспорт воситаларини вақтинча сақлаш бўйича пулли хизматлар кўрсатувчи юридик шахслар фаолиятини тартибга солиш чора-тадбирлари тўғрисида»ги 63-сонли қарори билан тасдиқланган низомнинг 12-банди ижросини таъминлаш мақсадида ҳамда «Тошбозортайёрловсавдо» уюшмасининг 2010 йил 28 июлдаги «Бозорлар балансидаги автотўхташ жойларида «кўрсатилаётган хизмат учун» ундириладиган тўловларнинг янги миқдорларини жорий этиш тўғрисида»ги 654-сонли таклифини инобатга олиб қарор қиламан:

1. 2010 йил 15 августдан бошлаб, Тошкент шаҳри бўйича мулкчилик шаклидан қатъи назар, юридик шахслар томонидан автотранспорт воситаларини вақтинча сақлаш бўйича пулли хизматлар кўрсатиш учун тўловларнинг чекланган миқдори иловага мувофиқ тасдиқлансин.

2. Тошкент шаҳар Давлат солиқ бошқармаси (Ш. Раҳимов):

тасдиқланган автотранспорт воситаларини вақтинча сақлаш бўйича пулли хизматлар кўрсатиш учун тўловларнинг чекланган миқдори мулкчилик шаклидан қатъи назар, ушбу фаолият билан шуғулланувчи барча юридик шахслар эътиборига етказилиши таъминлансин;

автотранспорт воситаларини вақтинча сақлаш бўйича пулли хизмат кўрсатувчи мулкчилик шаклидан қатъий назар барча юридик шахслар томонидан ушбу хизмат учун белгиланадиган тарифлар тасдиқланган чекланган миқдордан ошмаслиги назоратга олинсин.

3. Савдо, хизмат кўрсатиш соҳаси ва халқ истеъмол моллари ишлаб чиқариш департаменти (Р. Абдумажитов), «Тошбозортайёрловсавдо» уюшмаси (Э. Иноғомов): Бозорлар маъмурияти билан биргаликда автотўхташ жойларида кўрсатиладиган хизматлар учун ундириладиган тўловларнинг янги миқдорларини жорий этиш бўйича белгиланган тартибда зарур ташкилий тадбирлар ўтказилиши таъминлансин.

4. Мазкур қарор Халқ депутатлари Тошкент шаҳар Кенгашининг навбатдаги сессияси тасдиғига киритилсин.

5. Ушбу қарорнинг бажарилишини назорат қилиш Тошкент шаҳар ҳокимининг ўринбосари Ф.Т. Зияев ва Савдо, хизмат кўрсатиш соҳаси ва халқ истеъмол моллари ишлаб чиқариш департаменти бошлиғи Р.А. Абдумажитов зиммаларига юклатилсин.