Ўзбекистон Республикаси Вазирлар Маҳкамасининг 2010 йил 2 июндаги 105-сонли қарори 2-иловасидаги «Рақобатни ҳимоя қилиш ва товар бозорларида монополистик фаолиятни чеклаш, истеъмолчиларнинг ҳуқуқларини ҳимоя қилиш ва реклама фаолиятига доир қонун ҳужжатларини янада такомиллаштириш ҳамда ишлар самарадорлигини ошириш чора-тадбирлари режаси»нинг 13-банди ижросини таъминлаш мақсадида қарор қиламан:

1. «Тошшаҳартрансхизмат» уюшмаси (Муҳамеджонов), Тошкент шаҳар ҳокимлиги йўловчи транспортининг барча турлари ҳаракатини лицензиялаш ва мувофиқлаштириш департаменти (Файзуллаев), Тошкент шаҳар халқаро бизнес маркази (Юлдашев) томонидан таклиф этилган шаҳар йўловчи ташиш транспорти, шу жумладан йўналишли такси тўхтаб ўтадиган барча оралиқ бекатлар:

сони, тури ва туманлар кесимида тақсимланиш жадвали мазкур қарорнинг 1-иловасига;

уларга ўрнатиладиган йўловчи транспорти ҳаракат жадваллари акс эттириладиган ахборот кўрсаткичлари намуналари мазкур қарорнинг 2- ва 3-иловаларига асосан тасдиқлансин.

2. «Тошшаҳартрансхизмат» уюшмаси (Муҳамеджонов) 2010 йил 1 октябргача бўлган муддатда шаҳар йўловчи ташиш транспортини, шу жумладан йўналишли таксининг кутиш жойларини йўловчи транспорти ҳаракати жадваллари акс эттирилган ахборот кўрсаткичларини:

хорижий инвестициялар ҳисобига реконструкция қилинган 146 та бекатларга Тошкент шаҳар халқаро бизнес маркази (Юлдашев) билан биргаликда ушбу марказ маблағлари ҳисобига мазкур қарорнинг 2-иловасида келтирилган намунага асосан;

тадбиркорлик субъектларига тегишли 715 та бекатларга туман ҳокимлари билан биргаликда бекатларда фаолият юритаётган тадбиркорлар маблағлари ҳисобига мазкур қарорнинг 3-иловасида келтирилган намунага асосан;

қолган 1114 та бекатларни «Тошшаҳартрансхизмат» уюшмаси маблағлари мазкур қарорнинг 3-иловасида келтирилган намунага асосан жойлаштириш таъминлансин.

3. «Тошшаҳартрансхизмат» уюшмаси (Муҳамеджонов), Тошкент шаҳар ҳокимлиги йўловчи транспортининг барча турлари ҳаракатини лицензиялаш ва мувофиқлаштириш департаменти (Файзуллаев) ва Тошкент шаҳар монополиядан чиқариш ва рақобатни ривожлантириш ҳудудий бошқармаси (Н.Холмуродов) 3 кунлик муддатда шаҳар йўловчи ташиш транспортини, шу жумладан йўналишли таксини кутиш жойларини йўловчи транспорти ҳаракат жадваллари билан таъминлашни белгиланган муддатда амалга ошириш мақсадида ҳафталик назорат режаси ишлаб чиқилсин ва бажарилиши юзасидан шаҳар ҳокимлигига маълумот бериб борилсин.

4. Мазкур қарорнинг бажарилишини назорат қилиш Тошкент шаҳар ҳокимининг ўринбосари, «Тошшаҳартрансхизмат» уюшмаси раиси Ш. Мухамеджоновга юклатилсин.