Вилоятда Ўзбекистон Республикаси Мудофаа вазирлигининг ҳарбий таълим муассасаларига номзодлар танлаш ишлари Ўзбекистон Республикасининг 2002 йил 12 декабрдаги «Умумий ҳарбий мажбурият ва ҳарбий хизмат тўғрисида»ги Қонуни, Ўзбекистон Республикаси Президентининг 2005 йил 19 апрелдаги 2193-сонли Фармойиши ҳамда Тошкент вилояти ҳокимининг 2008 йил 19 ноябрдаги 257-сонли қарори талаблари асосида ҳарбий таълим муассасаларига номзодлар танлаш Мудофаа вазирлигининг режа-топшириғи бўйича 210 нафар ўрнига, 318 нафар номзод танлаб олинди ва шулардан 126 нафар номзод саралаб олиниб, Ҳарбий таълим муассасаларига тавсиялар берилди.

Тест синовларидан самарали ўтган ёшлардан 24 нафари курсантлар сафига қабул қилинди.

Бу борада вилоятдаги Олмалиқ, Бекобод, Чирчиқ, Янгийўл шаҳарларида, Оҳангарон, Зангиота, Тошкент, Чиноз ҳамда Янгийўл туманларида бу муҳим тадбир етарли даражада ташкил этилмасдан ҳарбий таълим муассасаларига номзодлар танлаш режаси бажарилмади.

2010 йилда Ўзбекистон Республикаси Мудофаа вазирлигининг ҳарбий таълим муассасаларига кириш учун номзодлар танлаш ишларини юқори савияда ташкил этиш ва ўтказиш мақсадида қарор қиламан:

1. Ўзбекистон Республикаси Мудофаа вазирлигининг ҳарбий таълим муассасаларига номзодлар танлаш ишлари жорий йилнинг 25 февралигача бўлган муддатда амалга оширилсин.

2. Белгилансинки, билим юртига ўқишга кириш истагини билдирган шахслар ўқишга кириш йилнинг 1 февралига қадар яшаш жойидаги шаҳар (туман) мудофаа ишлари бошлиқлари номига ариза берадилар, 25 февралгача шаҳар (туман) ҳайъати томонидан номзодларни танлаш тадбирлари олиб борилади, шаҳар (туман) Мудофаа бўлимлари танлаган номзодларнинг шахсий ҳужжатларини 2010 йилнинг 1 мартига қадар вилоят Мудофаа ишлари бошқармасига тақдим этсинлар.

3. Ўзбекистон Республикаси Мудофаа вазирлигининг ҳарбий таълим муассасаларига номзодлар танлаш бўйича вилоят танлов комиссияси таркиби 1-иловага*, Ўзбекистон Республикаси Мудофаа вазирлигининг ҳарбий таълим муассасаларига номзодлар танлаш бўйича чора-тадбирлар режаси 2-иловага* мувофиқ тасдиқлансин.

4. Вилоят Соғлиқни сақлаш бошқармаси (А.Ахмедов)га:

вилоят, шаҳар ва туман тиббий комиссияларини зарур тиббий асбоб-ускуна ва жиҳозлар билан таъминлаш;

тиббий кўрикдан ўтказувчи шифокор мутахассислар билан услубий машғулотлар ўтказиш;

вилоят Мудофаа ишлари бошқармаси (Ф.Акрамов) билан ҳамкорликда 2010 йил 1 апрелигача танланган номзодларни Ўзбекистон Республикаси Вазирлар Маҳкамасининг 2003 йил 21 февралдаги «Ўзбекистон Республикаси Қуролли Кучларга танлаб олинган номзодларни тиббий кўрикдан ўтказиш тўғрисида»ги 95-сон фармойиши талаблари асосида тиббий кўрикдан ўтказиш;

2010 йил 25 январга қадар ҳарбий таълим кириш истагини билдирган барча номзодларнинг шаҳар ва туман Мудофаа ишлари бўлимларига Ф-25У ва Ф-025-1У шакллардаги тиббий хулосаларни тақдим этиш вазифалари юклатилсин.

5. Вилоят ўрта махсус, касб-ҳунар таълими (Х. Ибрагимов), Халқ таълими (А. Қаюмов) бошқармалари:

ҳарбий таълим муассасаларига ўқишга кириш истагини билдирган ёшларга тегишли ҳужжатларнинг берилишини;

ҳарбий ўқув юртларига кирувчи номзодлар билан синовларга киритилган аниқ фанлар бўйича қўшимча равишда машғулотлар ўтказишни ташкил этсинлар.

6. Вилоят Мудофаа ишлари бошқармаси (Ф. Акрамов):

вилоят Маданият ва спорт ишлари бошқармаси (Б.Ахмедов), шаҳар ва туман ҳокимликлари, Мудофаа ишлари бўлимлари билан ҳамкорликда 2010 йилнинг январь-февраль ойларида вилоятнинг барча шаҳар ва туманларида ҳарбий таълим муассасаларига ўқишга кириш учун танлаб олинган номзодларнинг жисмоний тайёргарлигини меъёрий талаблар асосида кўрикдан ўтказилишини:

«Камолот» ёшлар ижтимоий ҳаракати вилоят Кенгаши билан ҳамкорликда жойларда «Шунқорлар» ҳарбий спорт мусобақаларини ташкил этиш бўйича чора-тадбирлар ишлаб чиқсин ва тасдиқласин.

7. Вилоят ҳокимининг ёрдамчиси (С. Қурбонқулов)

ўқув йили давомида таълим муассасаларида ҳарбий-ватанпарварлик мавзуларида кино ва видеофилмлар намойишини ташкил этсин.

Вилоят ҳамда маҳаллий оммавий ахборот воситалари орқали ҳарбий таълим муассасаларига номзодларни танлаш даврида ёшларни ҳарбий касбга йўналтириш, ёшлар орасида тарғибот ишларини ташкил этиш масалаларига бағишланган тадбирларни матбуот саҳифаларида ёритиб бориш чораларини кўрсин.

8. Мазкур қарор ижросини назорат қилиш вилоят ҳокимининг ўринбосари (С. Абдуллаев) зиммасига юклатилсин.