Ўзбекистон Республикаси Вазирлар Маҳкамасининг 2008 йил 16 майдаги «Давлат даромадига ўтказиладиган мол-мулкни олиб қўйиш, сотиш ёки йўқ қилиб ташлаш тартиби тўғрисидаги низомга ўзгартириш ва қўшимчалар киритиш ҳақида»ги 97-сонли қарорининг ижросини таъминлаш мақсадида қарор қиламан:

1. Ўзбекистон Республикаси Вазирлар Маҳкамасининг 2008 йил 16 майдаги «Давлат даромадига ўтказиладиган мол-мулкни олиб қўйиш, сотиш ёки йўқ қилиб ташлаш тартиби тўғрисидаги низомга ўзгартириш ва қўшимчалар киритиш ҳақида»ги 97-сонли қарори ижро учун қабул қилинсин.

2. Мазкур қарорга асосан қуйидагилар:

Мол-мулкни сотиш бўйича хизматлар кўрсатиш юзасидан шартномалар белгиланган савдо ташкилотлари билан Суд қарорларини ижро этиш, судлар фаолияти моддий-техника жиҳатидан ва молиявий таъминлаш департаментининг ҳудудий бошқармалари томонидан тузилиши;

Мол-мулкни сотиш хизматлари кўрсатиш юзасидан шартноманинг амал қилиш муддатини узайтиришда мазкур шартнома шартларига риоя этиш ва мол-мулкни сотиш тартиби бузилишига йўл қўйилмаганлиги ҳам ҳисобга олиниши белгилаб қўйилганлиги инобатга олинсин.

3. Давлат даромадига ўтказиладиган мол-мулкларни сотиш иловадаги* рўйхатга мувофиқ танлаб олинган савдо ташкилотлари томонидан амалга оширилиши белгилаб қўйилсин.

4. Захираларни шакллантириш учун зарур бўлган озиқ-овқат товарлари пулли асосда «Тошкент озиқ-овқат захираси» давлат унитар корхонасига берилсин ва унинг ихтисослаштирилган омборхоналарида сақлансин.

5. Савдо, хизмат кўрсатиш соҳаси ва халқ истеъмол моллари ишлаб чиқариш департаменти (Р.А. Абдумажитов). «Тошкент озиқ-овқат захираси» давлат унитар корхонаси (Р.А. Расулов): Сақлашга олинган озиқ-овқат товарларини Тошкент шаҳар ҳокимининг қарорига кўра, товарларнинг сақланиш муддатларидан ва бозордаги эҳтиёждан келиб чиққан ҳолда сотилиши таъминлансин.

6. Иқтисодиёт бош бошқармаси (З.Н. Тўйчиев), Молия бош бошқармаси (М.М. Мирмахмудов), «Тошкент озиқ-овқат захираси» давлат унитар корхонаси (Р.А. Расулов): Пулли асосда олинадиган захираларни шакллантириш учун зарур бўлган ва давлат даромадига ўтказиладиган озиқ-овқат товарлари учун тўлов «Тошкент озиқ-овқат захираси» давлат унитар корхонаси маблағлари ҳисобидан, зарур ҳолларда қайтариш шарти билан Тошкент шаҳар ҳокимиятининг бюджетдан ташқари маблағлари ҳисобидан амалга оширилиши кўзда тутилсин.

7. Захираларни шакллантириш учун зарур бўлган озиқ-овқат товарларини сотиш ва сақлаш Ўзбекистон Республикаси Адлия вазирлиги томонидан 2008 йил 28 май куни 1816-сон билан рўйхатдан ўтказилган «Захираларни шакллантириш учун зарур бўлган озиқ-овқат товарларини сотиш тартиби тўғрисидаги Низомини тасдиқлаш ҳақида»ги Ўзбекистон Республикаси Адлия вазирлиги, Давлат божхона қўмитаси ҳамда Иқтисодиёт вазирлигининг қарори асосида амалга оширилиши белгилаб қўйилсин.

8. Мазкур қарорнинг ижросини назорат қилиш Тошкент шаҳар ҳокимининг ўринбосари Б.И. Тохиров зиммасига юклатилсин.