Ўзбекистон Республикаси Президентининг 2008 йил 28 ноябрдаги «Иқтисодиётнинг реал сектори корхоналарини кўллаб-қувватлаш, уларнинг барқарор ишлашини таъминлаш ва экспорт салоҳиятини ошириш чора-тадбирлари тўғрисида»ги ПФ-4058-сонли Фармони талабларини бажариш ва Тошкент шаҳрида коммунал хизмат кўрсатувчи корхона ва ташкилотлар ишлаб чиқараётган маҳсулотлар, кўрсатаётган хизматлар таннархини камайтириш бўйича тасдиқланган режа-топшириқларнинг бажарилишини таъминлаш мақсадида қарор қиламан:

1. «Тошиссиққуввати» ишлаб чиқариш бирлашмаси (Р. А. Абдулин), «Сувсоз трести» давлат унитар корхонаси (Т. Ш. Мирхидоятов), «Тошкент сув таъминоти» шўъба корхонаси (И. К. Толипов), «Тошкент электр тармоқлари корхонаси» акциядорлик жамияти (Г. И. Смаль), «Тошкентшаҳаргаз» филиали (А. Н. Саидвалиев), «Махсустранс» давлат унитар корхонаси (С. Н. Нигматов), Юнусобод туман санитар тозалаш ва назорат қилиш бўйича ягона буюртмачи дирекцияси (Б. В. Заиров), «Улуғбек» шаҳарчасидаги қурилиш-таъмирлаш хизмат кўрсатиш бошқармаси (А. Ф. Саидахмедов), аҳолидан ва хўжалик юритувчи субъектлардан коммунал хизматлар учун пул йиғими билан шуғулланувчи барча мустақил оператор раҳбарлари:

1.1. 2009 йилнинг 25 ноябригача Тошкент шаҳар Ҳудудий коммунал фойдаланиш бирлашмасига 2009 йилнинг 1 октябрь ҳолатига хизмат кўрсатувчи абонентлар (аҳоли ва юридик истеъмолчилар) бўйича маълумотларни 1 ва 2-иловаларга асосан электрон кўринишда тақдим этилиши;

1.2. Ҳар чоракнинг якуни бўйича кейинги ойнинг 25-санасигача қўшимча ўзгаришларни ҳисобга олган ҳолда абонентлар тўғрисидаги янгиланган тўлиқ маълумотларни юқорида қайд этилган иловадаги жадваллар асосида топшириб борилиши таъминлансин.

2. Белгилаб қўйилсинки, маълумотларнинг ўз вақтида ва сифатли топширилишига, уларнинг тўлиқ ҳамда ҳаққонийлигига корхона ва ташкилотларнинг раҳбарлари ва бош ҳисобчилари масъулдирлар.

3. Ички ишлар бош бошқармаси (Қ. У. Накибов), «Маҳалла» жамғармаси (Ж. Х. Шохакимов), Хусусий уй-жой мулкдорлари ширкатлари уюшмаси (А. Х. Набиев), Статистика бошқармаси (Б. П. Магай) ва туман ҳокимликлари ҳузуридаги тадбиркорлик субъектларини рўйхатдан ўтказиш инспекциялари раҳбарларига:

Хорижга чиқиш-келиш ва фуқаролик бошқармаси ҳамда унинг туман бўлимлари, хусусий уй-жой мулкдорлари ширкатлари, ўзини ўзи бошқариш ва статистика органлари томонидан берилган маълумотлар асосида ҳар чоракдан кейинги ойнинг 25-санасигача Ҳудудий коммунал фойдаланиш бирлашмасига беғараз равишда мавжуд бўлган ва ўзгараётган аҳоли сони тўғрисидаги маълумотларни 3, 4, 5, 6 ва 7-иловалардаги шакл кўринишида (электрон) топширилиши таъминлансин.

4. Ҳудудий коммунал фойдаланиш бирлашмаси (И. Н. Холматов), Молия бош бошқармаси (М. М. Мирмахмудов) ва Иқтисодиёт бош бошқармаси (С. С. Насретдинов):

10 кун муддатда мазкур қарорнинг 1-банди талабларини бажариш мақсадида коммунал хизматларидан фойдаланувчи абонентларни ҳисобга олувчи ягона электрон базани яратиш бўйича таклиф киритилсин.

5. Ҳудудий коммунал фойдаланиш бирлашмаси (И. Н. Холматов):

5.1. Тақдим этилган маълумотлар асосида ахборот базасини шакллантириш ва базани доимий янгилаб бориш таъминлансин.

5.2. Мазкур қарорнинг 1 ва 2-бандлари бўйича тақдим этилган маълумот ва ахборотларни:

а) доимий равишда таҳлил қилиб борилиши;

б) ҳисобот чорагидан кейинги ойнинг охиригача коммунал хизмат кўрсатувчи корхоналар ва ташкилотлардан истеъмолчилар сонидаги ўзгаришлар ҳақидаги тақдим қилинган маълумотларни жамлаб, таҳлил қилиб, улар ҳақидаги аниқланган маълумотларни беғараз равишда коммунал хизмат кўрсатувчи корхоналарга ҳамда Молия бош бошқармаси ва Иқтисодиёт бош бошқармасига тақдим қилиниши таъминлансин.

6. Ҳудудий коммунал фойдаланиш бирлашмасига коммунал хизмат кўрсатувчи корхоналар ва ташкилотлар, мулкчилик шаклидан қатъи назар, коммунал хизматлар учун пул йиғими билан шуғулланувчи операторлар томонидан берилган маълумотлар асосида истеъмолчиларни тўлиқ қамраб олиш бўйича мониторинг ўтказиш, зарур ҳолларда тақдим қилинган маълумотларнинг асл нусхаларини талаб қилиб олиш, уларни текшириш ва таҳлил қилиш ҳуқуқи берилсин.

7. Мазкур қарорнинг ижросини назорат қилиш Тошкент шаҳар ҳокимининг биринчи ўринбосари Р. Ж. Усмонов зиммасига юклатилсин.