Ўзбекистон Республикаси Вазирлар Маҳкамасининг 2009 йил 8 апрелдаги «Давлат мулкини ижарага бериш тартибини такомиллаштириш чора-тадбирлари тўғрисида»ги 102-сонли қарорининг 3-бандига мувофиқ хамда Ўзбекистон Республикаси Давлат мулкини бошқариш давлат қўмитаси томонидан тақдим этилган 2009 йил учун ижаранинг энг кам ставкаларини (Молия вазирлиги ва Иқтисодиёт вазирлиги билан келишилган) кўриб чиқиб, шунингдек Давлат мулки қўмитасининг 2009 йил 30 июндаги 01/16-598-сонли мурожаатини инобатга олиб ҳамда Тошкент шаҳрида ижара муносабатларини тартибга солиш мақсадида қарор қиламан:

1. Тошкент шаҳридаги давлат кўчмас мулкини ижарага беришда 2009 йилда қўлланиладиган ижара тўловининг энг кам ставкалари 1-иловага, ижара ҳақини ҳисоблаш тартиби 2-иловага, ижара ҳақини ҳисоблашда қўшимча коэффициент қўлланиладиган Тошкент шаҳрининг марказий қатнов кўчалари рўйхати 3-иловага ҳамда ижара ҳақидан вақтинча озод этилган корхона ва ташкилотлар рўйхати 4-иловага мувофиқ тасдиқлансин.

2. Давлат мулки қўмитасининг Тошкент шаҳар ҳудудий бошқармаси (Д. Э. Атаев), Тошкент шаҳар давлат мулкини ижарага бериш маркази (А. А. Акромов):

2.1. Давлат кўчмас мулкини ижарага беришда Ўзбекистон Республикаси Вазирлар Маҳкамасининг 2009 йил 8 апрелдаги 102-сонли қарори билан тасдиқланган «Давлат мулкини ижарага бериш тартиби тўғрисида»ги низомга қатъий равишда риоя қилиниши таъминлансин.

2.2. Ижара ҳақи қийматини белгилашда 1-иловада кўрсатилган давлат кўчмас мулки учун 2009 йилда қўлланиладиган энг кам ставкаларидан таянч сифатида фойдаланилсин.

2.3. Давлат кўчмас мулкини ижарага беришдан тушадиган ижара тўловларининг шартномада белгиланган муддатларда тўланиши ҳамда маҳаллий бюджет ва балансда сақловчиларга ўрнатилган тартибда тақсимланиши таъминлансин.

2.4. Ижарага берилган давлат мулки тўғрисидаги маълумотлар ҳар чоракда Тошкент шаҳар ҳокимлигига бериб борилсин.

3. Белгилаб қўйилсинки, давлат мулкини балансда сақловчиларнинг мансабдор шахслари уларнинг тасарруфида бўлган фойдаланилмаётган давлат мулки тўғрисидаги маълумотларни Тошкент шаҳар давлат мулкини ижарага бериш марказига ўз вақтида, тўлиқ ва ишончли берилиши учун шахсан жавоб берадилар.

4. Мазкур қарор Халқ депутатлари Тошкент шаҳар Кенгашининг навбатдаги сессиясига тасдиқлаш учун киритилсин.

5. Ушбу қарорнинг бажарилишини назорат қилиш Тошкент шаҳар ҳокимининг биринчи ўринбосари Р. Ж. Усмонов зиммасига юклатилсин.

Ижара ҳақи ставкаларига қўлланиладиган оширувчи коэффициентлар:

1. Ҳудудий зоналар коэффициенти — Кз. (Тошкент шаҳар қоқимининг 1996 йил 13 июндаги 170-сонли қарорида белгиланган чегараларга асосан)

2. Бинонинг жойлашуви ва қурилши турига кўра қўлланиладиган коэффициентлар:

2.1. Бинонинг қурилиш тури бўйича (Кк):

алоҳида турган бино — 1.0

бинонинг ички қисмида жойлашган ва тақаб қурилган — 0.8

ярим ертўла, ертўла — 0.6

чердак, божхона — 0.5

2.2. Туташган ҳудудидан фойдаланиш коэффициенти (Кҳ):

ер майдони мавжуд бўлганда — 0.3

2.3. Тижорат мақсадида фойдаланишда қулайлиги (Кт):

метро станциясидан 200 метр радиус атрофида — 0.7

асосий қатнов кўчаларида жойлашгани — 0.6 (3-иловага мувофиқ)

иккинчи даражали қатнов кўчаларида жойлашгани — 0.5

Бинолар ва иншоотлар бўйича ижара тўловини (ижара тўловининг таянч ставкаси) ҳисоблаб чиқиш қуйидаги тарзда аниқланади:

бунда: Тс - бир йилга 1 кв.м учун ижара тўловининг таянч ставкаси;

Эс — 1-иловага мувофиқ корхонанинг фаолият турига кўра бир йилга 1 кв.м. учун энг кам ставка.

Тошкент шаҳар ҳокимлиги Бинолардан фойдаланиш департаменти тасарруфидаги объектлар бўйича коммунал-хизмат кўрсатиш шартномаларида, маъмурий бинолар фондини таъмирлаш учун, ижара тўловидан қўшимча 30 фоиз миқдорида тўловлар киритилади.