Жаҳон соғлиқни сақлаш ташкилоти тарқатаётган маълумотларга кўра, янги А(Н₁N₁) гриппи Шимолий ва Жанубий Америка, Европа, Австралия ҳамда Осиёдаги 150 дан ортиқ мамлакатларда қайд этилган. Мазкур касалликка чалинган беморлар сони қарийб 200 минг нафарга яқинлашиб, улар орасида ўлим ҳолатлари қайд этилмоқда.

Янги грипп бўйича вужудга келган вазият Жаҳон соғлиқни сақлаш ташкилоти томонидан пандемия, деб эълон қилинди.

Жаҳонда эпидемик вазиятнинг мураккаблашганлиги, янги А(Н₁N₁) гриппининг четдан вилоят худудига кириб келиши хавфи мавжудлигини, хусусан, Саудия Арабистонида 595 нафар кишида мазкур вирус аниқланганлигини инобатга олган ҳолда вилоят аҳолиси, Ҳаж мавсумига зиёратчилар соғлиғини муҳофаза қилиш ҳамда мазкур касаллик тарқалишининг олдини олиш ҳамда Ўзбекистон Республикаси Вазирлар Маҳкамасининг 2009 йил 6 август «Ҳаж мавсумида янги А(Н₁N₁) гриппининг республика ҳудудига кириб келиши ва тарқалишининг олдини олишга қаратилган чора-тадбирлар тўғрисида»ги қарори ижросини таъминлаш мақсадида қарор қиламан:

1. Ҳаж мавсумини янги А(Н₁N₁) гриппининг вилоят ҳудудига кириб келиши ва тарқалишининг олдини олиш бўйича комиссия таркиби 1-иловага, тадбирлар режаси 2-иловага мувофиқ тасдиқлансин.

Шаҳар ва туман ҳокимлари раислигида, тегишли бошқарма ва корхоналарнинг бўлинмалари раҳбарларидан иборат ҳудудий комиссиялар тузилиши белгилаб қўйилсин.

2. Комиссияга:

тегишли бошқарма ва ташкилотлар билан биргалиқда турли юқумли касалликлар, хусусан янги А(Н₁N₁) гриппининг четдан кириб келиши ва тарқалишининг олдини олиш бўйича Ҳаж мавсумида амалга ошириладиган тадбирларни мувофиқлаштириш ҳамда уларнинг ўз вақтида, тўлақонли бажарилишини таъминлаш;

ҳаж мавсумида янги А(Н₁N₁) гриппининг вилоят ҳудудига кириб келиши ва тарқалишининг олдини олишга қаратилган чора-тадбирларни белгилаш вазифаси топширилсин.

3. Вилоят Соғлиқни сақлаш бошқармаси (А. Ахмедов)га:

зиёратчиларни сафарга кетишдан олдин, Ҳаж мавсумида ва вилоятга келган вақтида тиббий кўрикдан ўтказиш, тиббий хизмат кўрсатиш, турли юқумли касалликлар, жумладан янги А(Н₁N₁) гриппи касаллигига қарши зарур профилактик чораларни кўриш;

Ҳаж мавсумида янги А(Н₁N₁) гриппининг вилоят ҳудудига кириб келиши ва тарқалишининг олдини олиш бўйича тегишли тарғибот-ташвиқот материалларини тайёрлаш ва мазкур йўналишдаги ишларни юқори савияда ташкил этиш вазифаси юклатилсин.

4. Ўзбекистон мусулмонлар идорасининг зиёратчилар учун зарур бўлган янги А(Н₁N₁) гриппининг олдини олувчи дори-дармонлар, дезинфекцияловчи ва профилактик воситаларни харид қилишга сарфланадиган харажатларнинг идора томонидан қопланиши маълумот учун қабул қилинсин.

5. Вилоят Имом хатиби (Қ. Турсунов), шаҳар ва туман ҳокимликлари билан биргаликда Ҳаж мавсумида гуруҳ раҳбарлари ва зиёратчилар билан ўтказиладиган машғулотларда янги А(Н₁N₁) гриппи вирусидан сақланиш бўйича тушунтириш ва тарғибот-ташвиқот ишларини амалга оширсинлар.

6. «Тошкент хақиқати» ва «Ташкентская правда» газеталари муҳарририяти (У. Абдушохидов)га юқумли касалликлар, жумладан янги А(Н₁N₁) гриппининг четдан кириб келиши ҳамда тарқалишининг олдини олиш бўйича вилоят рўзномаларида чоп этилиши тавсия этилсин.

7. Мазкур қарор ижросини назорат қилиш вилоят ҳокимининг ўринбосари С. Абдуллаев зиммасига юклатилсин.