Ўзбекистон Республикаси Президенти И.А. Каримовнинг 2011 йил 17 майдан 19 майгача бўлган даврда Ҳиндистон Республикасига Давлат ташрифи давомида эришилган Ўзбекистон Республикаси билан Ҳиндистон Республикаси ўртасида савдо-иқтисодий, инвестициявий ва маданий-гуманитар ҳамкорликни ривожлантириш бўйича икки томонлама аҳдлашувларнинг ўз вақтида амалга оширилишини таъминлаш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президенти И.А. Каримовнинг 2011 йил 17 — 19 май кунлари Ҳиндистон Республикасига Давлат ташрифи давомида эришилган келишувларни амалга ошириш бўйича тадбирлар режаси 1-иловага* мувофиқ;

Ҳиндистон корпорациялари, компаниялари ва банклари иштирокида амалга ошириладиган лойиҳалар рўйхати 2-иловага* мувофиқ тасдиқлансин.

2. Вазирлар Маҳкамаси комплекслари, вазирликлар, идоралар ва хўжалик юритувчи субъектлар — масъул ижрочилар раҳбарлари ушбу қарор билан тасдиқланган тадбирларнинг ўз вақтида ва сифатли бажарилишини таъминласинлар ҳамда уларнинг амалга оширилиши тўғрисида ҳар чоракда Вазирлар Маҳкамасига ахборот тақдим этсинлар.

3. Ўзбекистон Республикаси Вазирлар Маҳкамаси ўн кун муддатда ушбу қарорга 2-иловага киритилган инвестиция лойиҳаларини амалга оширишнинг вазирликлар ва идоралар, хўжалик юритувчи субъектлар — масъул ижрочилар томонидан ишлаб чиқилган ҳамда Ўзбекистон Республикаси Иқтисодиёт вазирлиги ва Ташқи иқтисодий алоқалар, инвестициялар ва савдо вазирлиги билан келишилган тармоқ жадвалларини тасдиқласин.

4. Ўзбекистон Республикаси Ташқи ишлар вазирлиги, Ташқи иқтисодий алоқалар, инвестициялар ва савдо вазирлиги, Молия вазирлиги, Иқтисодиёт вазирлиги ташриф давомида имзоланган битимлар ва аҳдлашувларнинг бажарилиши, масъул ижрочилар томонидан ушбу қарор билан тасдиқланган тадбирларни бажариш бўйича аниқ чора-тадбирларнинг ўз вақтида ишлаб чиқилиши ва амалга оширилиши, шунингдек, Ҳиндистон корпорациялари ва компаниялари иштирокидаги инвестиция лойиҳаларини амалга ошириш тармоқ жадвалларига қатъий риоя этилиши устидан тизимли назорат ўрнатсинлар.

5. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов ва Ўзбекистон Республикаси Бош вазирининг ўринбосари Э.М. Ғаниев зиммасига юклансин.