Ўзбекистон Республикаси Президентининг «Мустақил телерадио каналларини ислоҳ қилиш ва ривожлантириш чора-тадбирлари тўғрисида» 2005 йил 8 ноябрдаги ПФ-3678-сон Фармонига, Ўзбекистон Республикаси Президентининг «Ўзбекистон Миллий телерадиокомпанияси фаолиятини ташкил этиш чора-тадбирлари тўғрисида» 2005 йил 27 декабрдаги ПҚ-245-сон қарорига мувофиқ ҳамда Ўзбекистон Миллий телерадиокомпаниясига ажратиладиган бюджет маблағларидан самарали ва оқилона фойдаланиш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ўзбекистон Республикасининг 2006 йилги асосий макроиқтисодий кўрсаткичлари прогнози ва давлат бюджети параметрлари тўғрисида» 2005 йил 27 декабрдаги ПҚ-244-сон қарори билан тасдиқланган 2006 йилги Давлат бюджети параметрларида Ўзбекистон МТРКга 14,759 млрд сўм миқдорида бюджет маблағлари ажратилиши назарда тутилганлиги маълумот учун қабул қилинсин.

2. Қуйидагилар:

Ўзбекистон МТРК ташкилотлари ва марказий аппаратининг 2006 йилги консолидациялашган даромадлари ва харажатлари прогнози 1-иловага* мувофиқ;

Ўзбекистон МТРК ташкилотлари ва марказий аппаратини бюджетдан маблағ билан таъминлашнинг тасдиқланган харажатлар сметаларига мувофиқ уларни алоҳида-алоҳида маблағ билан таъминлашни назарда тутувчи схемаси 2-иловага* мувофиқ тасдиқлансин.

3. Ўзбекистон Миллий телерадиокомпанияси (А. Хаджаев) белгиланган тартибда тасдиқласин ва Ўзбекистон Республикаси Молия вазирлигида рўйхатдан ўтказилсин:

Ўзбекистон Миллий телерадиокомпаниясининг барча ташкилотлари бўйича штат жадваллари;

«O`zbekiston» телерадиоканали», «Sport» телерадиоканали,» «Toshkent» телерадиоканали», «Respublika Teleradiomarkazi», «O`zbektelefilm», давлат унитар корхоналари, «Yoshlar» телерадиоканали» ёпиқ акциядорлик жамияти, шунингдек Қорақалпоғистон Республикаси ва вилоятлар телерадиокомпаниялари учун бюджет ва бюджетдан ташқари маблағлар ҳисобидан харажатлар сметаси, шу жумладан жамланма харажатлар сметаси.

4. Ўзбекистон Республикаси Молия вазирлиги (Р. Азимов):

Ўзбекистон МТРК билан биргаликда «Respublika Teleradiomarkazi» ДУК ва Ўзбекистон алоқа ва ахборотлаштириш агентлигининг алоқа корхоналари томонидан кўрсатилаётган хизматлар учун тарифлар даражаси, динамикаси ва тузилмасини доимий таҳлил қилишни таъминласин, бунда тарифларнинг асоссиз ўсишига йўл қўймасликка алоҳида эътибор қаратсин;

Ўзбекистон Миллий телерадиокомпаниясининг бюджет ва бюджетдан ташқари маблағларидан мақсадли фойдаланилиши устидан мунтазам назорат ўрнатсин.

5. «O`zbekiston» телерадиоканали», «Sport» телерадиоканали,» «Toshkent» телерадиоканали» давлат унитар корхоналари ва «Yoshlar» телерадиоканали» ёпиқ акциядорлик жамияти:

йўл қўйиладиган вақт меъёрлари доирасида, шу жумладан, «Yoshlar» телерадиоканали» ЁАЖнинг тўлиқ ўзини ўзи молиялаштиришга босқичма-босқич ўтишини ҳисобга олган ҳолда, пулли хизматлар кўрсатиш, бошқа ташкилотлар учун шартномалар бўйича ишларни бажариш, шунингдек, реклама фаолияти ҳисобига бюджетдан ташқари даромадларни кўпайтириш бўйича комплекс чора-тадбирларни ишлаб чиқсин ва амалга оширсин;

бюджет ва бюджетдан ташқари маблағлардан қатъий мақсадли, оқилона ва самарали фойдаланиш, шунингдек уларни ҳар томонлама тежаш асосида телерадиоканалларнинг молиявий барқарорлигини таъминласин;

телерадиоканалларнинг молия-иқтисод ва бухгалтерия хизматларини малакали кадрлар билан таъминласин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари В.А. Голишев ва А.Н. Арипов зиммасига юклансин.