LexUZ шарҳи
Мазкур қарор Ўзбекистон Республикаси Вазирлар Маҳкамасининг 2004 йил 22 мартдаги 134-сонли «Ўзбекистон Республикасининг Европа Иттифоқи ва унга аъзо давлатлар билан ҳамкорлигини такомиллаштириш чора-тадбирлари тўғрисида»ги қарорига мувофиқ ўз кучини йўқотган.
Ўзбекистон Республикаси билан Европа ҳамжамиятлари ва уларга аъзо давлатлар ўртасидаги Шериклик ва ҳамкорлик тўғрисидаги битимнинг кучга кириши учун зарур бўлган барча тартиботлар якунланганлиги муносабати билан, Европа Иттифоқи Кенгаши Бош котибининг нотасига мувофиқ Шериклик ва ҳамкорлик тўғрисидаги битим 1999 йил 1 июлдан бошлаб кучга киради.
Шериклик ва ҳамкорлик тўғрисидаги битим моддаларини амалга ошириш ва унинг қоидалари Ўзбекистон Республикаси вазирликлари ва идоралари томонидан бажарилишини мувофиқлаштириш мақсадида Вазирлар Маҳкамаси қарор қилади:
1. Ўзбекистон Республикаси вазирликлари ва идораларининг Шериклик ва ҳамкорлик тўғрисидаги битимнинг моддалари ва қоидаларини амалда рўёбга чиқариш бўйича чора-тадбирлари режаларини ўз ичига олувчи Ҳукуматнинг асосий ташкилий чора-тадбирларини ишлаб чиқувчи идоралараро комиссия таркиби иловага* мувофиқ тасдиқлансин.
* Илова рус тилидаги матнида берилган.
Белгилансинки, Ўзбекистон Республикаси қонун ҳужжатларини Европа Иттифоқи қонун ҳужжатларига яқинлаштириш, парламентлараро ва сиёсий мулоқотни кенгайтириш, ижтимоий, илмий, технология ва маданий ҳамкорлик асосларини таъминлаш, молия бозори, савдо ва инвестициялар ривожланишига кўмаклашиш бўйича комплекс чора-тадбирларни ишлаб чиқиш идоралараро комиссиянинг асосий вазифаси ҳисобланади.
Идоралараро комиссия Ҳукуматнинг асосий ташкилий чора-тадбирлари комплекс дастурини 1999 йил 5 августгача тасдиқлаш учун Вазирлар Маҳкамасига киритсин.
LexUZ шарҳи
1-банд Ўзбекистон Республикаси Вазирлар Маҳкамасининг 2000 йил 19 сентябрдаги «Ҳукумат комиссияларини тузиш масалалари бўйича Ўзбекистон Республикаси Вазирлар Маҳкамасининг айрим қарорларига ўзгартиришлар, қўшимчалар киритиш ва ўз кучини йўқотган деб топиш тўғрисида»ги қарорига мувофиқ янги таҳрирда баён этилган. Ҳужжатнинг рус тилидаги матнига қаранг.
2. Ўзбекистон Республикаси Ташқи ишлар вазирлиги Ўзбекистон Республикаси делегацияси таркиби, Ўзбекистон — Европа Иттифоқи Ҳамкорлик кенгашининг Брюссел шаҳрида (Бельгия) бўлиб ўтадиган биринчи мажлиси кун тартиби лойиҳаси ва қарорлари лойиҳалари бўйича таклифларни 1999 йил 16 августгача ишлаб чиқсин ва киритсин.
3. Ўзбекистон Республикаси Ташқи ишлар вазирлиги манфаатдор вазирликлар ва идоралар билан биргаликда Ҳамкорлик кенгашининг биринчи мажлиси якунлангач Ўзбекистон — Европа Иттифоқи Ҳамкорлик қўмитасининг Ўзбекистонга оид қисми ва Ҳамкорлик кенгаши томонидан ташкил этиладиган бошқа органлар таркиби бўйича таклифлар киритсин.
4. Ўзбекистон Республикаси Ташқи ишлар вазирлиги ва Ташқи иқтисодий алоқалар вазирлигининг вазирликларда ходимларнинг белгиланган сони доирасида Европа Иттифоқи билан ҳамкорлик бўйича таркибий бўлинмалар ташкил этиш тўғрисидаги таклифлари қабул қилинсин.
5. Ўзбекистон Республикаси Ташқи ишлар вазирлиги ҳузуридаги «Жаҳон» ахборот агентлиги вазирликлар ва идораларга, Ўзбекистон Республикасининг чет элдаги дипломатик ваколатхоналарига, шунингдек республика олий ўқув юртларига тарқатиш учун Шериклик ва ҳамкорлик тўғрисидаги битим матни босилган рисолаларни ўзбек, рус ва инглиз тилларида зарур миқдорда чиқарсин.
Рисолаларни чиқариш бўйича харажатлар Ўзбекистон Республикаси Вазирлар Маҳкамасининг захира жамғармаси маблағлари ҳисобига амалга оширилсин.
6. Вазирлар Маҳкамасининг 1996 йил 5 декабрдаги 494-ф-сон фармойиши ўз кучини йўқотган деб ҳисоблансин.