Ўзбекистон алоқа ва ахборотлаштириш агентлиги билан Озарбайжон Республикаси Алоқа ва ахборот технологиялари вазирлиги, бундан кейин «Томонлар» деб аталувчилар,

1996 йил 27 майда Боку шаҳрида имзоланган Ўзбекистон Республикаси билан Озарбайжон Республикаси ўртасида дўстлик ва ҳамкорлик тўғрисидаги шартнома қоидаларига асосланиб,

икки мамлакатнинг ижтимоий ва иқтисодий ривожланиши доирасида ахборот ва коммуникация технологиялари (бундан кейин «АКТ») соҳасида ўзаро манфаатли ҳамкорликни ривожлантириш ва мустаҳкамлашга интилиб,

тегишли мамлакатлар жамоатчилигига самарали ва барқарор хизмат кўрсатишнинг умумий мақсад ва манфаатларига амал қилиб,

Томонлар учун ахборот ва коммуникация технологиялари соҳасида умумий аҳамиятга эга фикрлар, ахборот, билим ва тажриба алмашишни ўта самарали деб ҳисоблаб,

Томонлар ўртасида АКТ соҳасида иқтисодий муносабатларни мустаҳкамлашда мавжуд салоҳият ва имкониятлардан тўла фойдаланиш зарурлигини англаб,

АКТ соҳасида Томонлар ўртасида сармояларнинг ўсишида кўмаклашиш, қўшма корхоналарни ривожлантириш, умумий манфаатларни кенгайтириш, технологик тараққиёт ва иқтисодий муносабатларни ривожлантиришга интилишни инобатга олиб,

Томонлар, ўз ваколатлари доирасида муносабатларини ўзаро манфаатдорлик асосида қурадилар, Томонлар давлатларининг миллий қонунчилиги, халқаро ҳуқуқ нормалари ва принциплари ҳамда ушбу Битим қоидаларига мувофиқ АКТ соҳасида иқтисодий, саноат, техник, илмий ва таълим йўналишларида ҳамкорликни келгусида ҳам ривожлантириш ва мукаммаллаштириш мажбуриятини оладилар.

Томонлар ўртасидаги ҳамкорлик йўналишлари АКТга оид қуйидаги соҳаларни ўз ичига олади:

1) Томонлар мутахассислари ўртасида телекоммуникацияни тартибга солиш бўйича тажриба алмашиш;

2) «электрон ҳукумат»ни шакллантириш ва электрон рақамли имзо технологияларини татбиқ этишда ҳамкорлик қилиш;

3) АКТ соҳасида инвестиция жалб этишга кўмаклашиш;

4) ўзаро манфаатли шартлар асосида АКТ соҳасида қўшма корхоналар ташкил этишга кўмаклашиш;

5) Ўзбекистоннинг таълим муассасаларида Озарбайжон мутахассислари учун ўқув курслари ташкил этиш;

6) АКТ соҳасида қўшма семинар, конференция, форум ва кўргазмалар ўтказиш;

7) икки мамлакат миллий манфаатлари бир хил бўлганда халқаро ташкилотларда (Бутунжаҳон почта иттифоқи, Халқаро электрон алоқа иттифоқи ва Алоқа соҳасида минтақавий ҳамдўстлик кабилар) бир-бирини қўллаш;

8) икки мамлакатнинг мавжуд транзит телефон трафиги алмашинуви имкониятларидан самарали фойдаланиш масалаларини мутахассислар даражасида муҳокама қилиш;

9) тажриба алмашиш мақсадида Томонлардан ҳар бири мутахассисларининг сафарларини ташкил қилиш;

10) ўзаро келишув бўйича АКТ соҳасидаги ҳамкорликнинг бошқа йўналишлари ва шакллари.

Томонлар мамлакатларининг тегишли органлари, ташкилотлари ва корхоналарига АКТ соҳасида ахборот алмашувини кенгайтириш, мустаҳкам алоқалар шакллантириш ва шунингдек бажарилган ишларни такомиллаштириш, ишбилармонлар алоқаларини кенгайтириш, янги технологияларни қўллаш мақсадида махсус дастурлар ва лойиҳалар бажариш соҳасида ҳамкорликда кўмаклашишга ёрдам берадилар.

Томонлар қишлоқ жойларда телекоммуникацияни ривожлантириш соҳасида умумий амалиётдан фойдаланиш учун, маҳаллий тармоқларни рақамлаштириш ва тартибга солишда иккала Томон мутахассисларининг ишларини мувофиқлаштирилишини таъминлайдилар.

Ушбу Битим қоидалари Томонларнинг бошқа халқаро шартномаларидан келиб чиқадиган ҳуқуқлари ва мажбуриятларига дахл қилмайди.

Томонлар биргаликдаги фаолият доирасида бошқа Томонга бериладиган махфий ахборотни ҳимоя қилиш ва шунингдек ҳеч қандай учинчи томонга тарқатмаслик мақсадида Томонлар давлатларининг миллий қонунчилигига мувофиқ зарур чора-тадбирларни ўтказишга жавобгардирлар, бошқа Томоннинг ёзма равишдаги рухсати олинган ҳолатлар бундан мустасно. Ушбу Битимнинг амал қилиши тўхтатилган тақдирда мазкур модда қоидалари амал қилишни давом этади.

Ушбу Битим қоидаларини талқин қилишда ёки қўллашда юзага келадиган Томонлар ўртасидаги ҳар қандай баҳслар музокаралар ёки маслаҳатлашувлар йўли билан ҳал қилинади.

Ушбу Битим қоидаларини амалга ошириш масалалари бўйича Томонлар ўртасидаги ёзишмалар рус тилида олиб борилади.

Икки Томоннинг ўзаро розилигига кўра мазкур Битимга унинг ажралмас қисми бўлиб ҳисобланадиган, алоҳида протоколлар билан расмийлаштириладиган ва 9-моддада кўрсатилган тартибда кучга кирадиган ўзгартиш ва қўшимчалар киритилиши мумкин.

Ушбу Битим дипломатик каналлар орқали Томонларнинг унинг кучга кириши учун зарур бўлган ички давлат процедураларини бажарганлиги тўғрисидаги сўнгги ёзма хабарномани олган кундан бошлаб кучга киради.

Ушбу Битим 5 (беш) йил муддатга тузилади ва Томонлардан ҳеч бири унинг амалдаги муддатининг якунидан камида олти ой аввал бошқа Томонни Битимнинг амал қилишини тўхтатиш тўғрисида ёзма равишда хабардор қилмаса, унинг амал қилиш муддати кейинги бир йиллик муддатга ўз-ўзидан узайтирилади.

Боку шаҳрида 2008 йил 11 сентябрда икки нусхада, ҳар бири ўзбек, озарбайжон ва рус тилларида тузилди, бунда барча матнлар бир хил кучга эга. Ушбу Битим қоидаларини талқин қилишда келишмовчиликлар юзага келса, рус тилидаги матн асос қилиб олинади.