Ўзбекистон Республикаси Ташқи иқтисодий алоқалар, инвестициялар ва савдо вазирлиги ва Словакия Республикаси Иқтисодиёт вазирлиги, бундан буён «Томонлар» деб аталувчилар,

1996 йил 21 июнда имзоланган Ўзбекистон Республикаси, бир томондан, Европа Ҳамжамиятлари ҳамда уларга аъзо давлатлар, иккинчи томондан, ўртасида шерикчилик таъсис этувчи Шерикчилик ва Ҳамкорлик тўғрисидаги Битимнинг ва кейинги барча ўзгартириш ва қўшимчаларининг қоидаларига асосланиб,

узоқ йиллик анъанавий иқтисодий муносабатларни инобатга олиб,

тенглик ва ўзаро манфаат асосида ҳамкорликни мустаҳкамлашга ва қўллаб-қувватлашга интилиб,

иқтисодий муносабатлар соҳасида, жумладан ўзаро товар айирбошлашни ва тақдим этилаётган хизматлар кўламини кўтариш учун йўналтирилган ўзаро манфаатли ҳамкорликни эътироф этиб,

халқаро ҳуқуқнинг умумэътироф этган нормалари ва принципларига амал қилиб,

Томонлар икки мамлакат манфаатлари йўлида иқтисодий ҳамкорликни ривожлантириш ва мустаҳкамлашга интиладилар.

Узоқ йиллик икки томонлама муносабатлар ва эришилган иқтисодий муносабатлар даражасини эътиборга олиб, Томонлар узоқ муддатлик асосида хусусан қуйидаги соҳаларда ҳамкорлик қилишга келишиб олдилар:

енгил саноат;

энергетика, шу жумладан учинчи мамлакатлар бозорида ҳамкорлик;

транспорт, шу жумладан транспорт воситалари;

соғлиқни сақлаш ва фармацевтика саноати;

химия ва нефть химияси саноати;

газ саноати;

электротехника саноати;

қишлоқ хўжалик машинасозлиги;

озиқ-овқат саноати учун асбоб-ускуналар, шу жумладан қайта ишлаш саноати учун асбоб-ускуналар;

тоғ-кон саноати;

қурилиш материаллари ишлаб чиқариш;

электростанцияларни замонавийлаштириш ва реконструкция қилиш, шу жумладан электр ўтказиш сетларини;

саноатда қурилиш ишлари соҳасида ҳамкорлик;

туризм, инвестиция, инновация ва иқтисодий лойиҳаларни молиялаштириш;

ярмаркалар, кўргазмалар ва семинарларда тақдимотлар қилиш ва савдо миссиялари ва тадбиркорлар бизнес форумларини ташкил этиш.

Мазкур Меморандумнинг 2-моддасида белгиланган соҳаларда ҳамкорликни таъминлаш мақсадида Томонлар давлатларининг тегишли вазирликлари, ташкилотлари ва ишбилармон вакилларидан ташкил топадиган Ўзбекистон Республикаси Ташқи иқтисодий алоқалар, инвестициялар ва савдо вазирлиги ва Словакия Республикаси Иқтисодиёт вазирлиги ўртасида иқтисодий ҳамкорлик бўйича Идоралараро Комиссия (келгусида — «Комиссия») тузилади.

Комиссия йиғилишлари лозим бўлганда, навбатма-навбат Ўзбекистон Республикаси ва Словакия Республикасида ўтказилади. Комиссия ўзининг иш регламентини белгилайди.

Комиссия фаолияти билан боғлиқ масалалар Томонлар томонидан тайинланган раҳбарлар ёхуд уларни топшириғи билан тайинланган ваколатли ўринбосарлари томонидан иш давомида кўриб чиқилади.

Комиссия фаолияти билан боғлиқ харажатлар Томонларнинг ўзлари томонидан қопланади.

1. Комиссия фаолиятининг асосий вазифалари қуйидагилар ҳисобланади:

ўзаро манфаатларни акс эттирувчи соҳаларда Томонларнинг иқтисодий ҳамкорлик дастурларини муҳокама қилиш;

кредит бериш ҳамда иқтисодий ҳамкорликни молиялаштиришни таъминлаш учун қулай шароитлар яратиш;

кичик ва ўрта тадбиркорликни қўллаб-қувватлаш бўйича қабул қилинган дастурларни тайёрлаш ва амалга ошириш;

икки мамлакат субъектларининг Томонлар ҳудудларида ўтказиладиган халқаро кўргазмалар ва ярмаркаларда иштирок этиши учун, шунингдек икки Томон мамлакатларининг Савдо-саноат палаталари ҳамкорлик қилиши учун тегишли шароитларни яратиш;

Томонлар ўртасида иқтисодий ҳамкорликни кенгайтириш ва чуқурлаштиришга ва икки мамлакатлар илмий-техникавий соҳадаги ютуқлари тўғрисида тегишли маълумотлар алмашинувига йўналтирилган таклифларни ишлаб чиқиш.

2. Комиссия кооперация муносабатлари ва ишлаб чиқариш ҳамкорлигининг бошқа шаклларини ривожланишига кўмаклашади.

Томонлар давлатлари хўжалик субъектлари мажбуриятлари юзасидан, агар ушбу мажбуриятлар кафолатланмаган бўлса, жавобгар бўлмайдилар.

Мазкур Меморандум қоидалари Ўзбекистон Республикаси ёки Словакия Республикаси иштирокчилар бўлган халқаро шартномалардан ҳамда халқаро ташкилотларга аъзолигидан келиб чиқувчи Томонларнинг ҳуқуқ ва мажбуриятларига таъсир этмайди.

Томонларнинг ўзаро келишувларига асосан, мазкур Меморандумга унинг ажралмас қисми ҳисобланадиган, алоҳида баённомалар билан расмийлаштириладиган қўшимча ва ўзгартиришлар киритилиши мумкин.

Мазкур Меморандумнинг қоидаларини қўллаш ва талқин қилиш билан боғлиқ барча масалалар, Томонлар ўртасида Комиссия доирасида дўстона музокаралар ва консультациялар йўли билан ҳал этилади.

Мазкур Меморандум уни имзолаган кундан бошлаб кучга киради ва беш йил давомида амал қилади.

Томонларнинг бири мазкур Меморандумни муддати тугашидан олти ой олдин, бекор қилиш нияти борлиги ҳақида иккинчи Томонга ёзма равишда хабар бермаса, ушбу Меморандум ҳар сафар бир йиллик муддатларга узайтирилади.

Мазкур Меморандум Братислава шаҳрида 2009 йил 3 июль куни икки асл нусхада, ҳар бири ўзбек, словак ва рус тилларида тузилди, бунда барча матнлар бир хил кучга эга.

Мазкур Меморандум қоидаларини талқин қилишда келишмовчиликлар юзага келган тақдирда, Томонлар рус тилидаги матнга амал қиладилар.