Ўзбекистон Республикасининг «Алоқа тўғрисида»ги Қонуни алоқа тармоқларини ташкил қилишнинг умумий ҳуқуқий, иқтисодий асосларини, алоқа шохобчаларини барпо этиш ва улардан фойдаланишда, алоқа хизмати кўрсатишда мулкчилик шаклидан қатъи назар корхоналар, муассасалар, ташкилотларнинг ва фуқароларнинг алоқа воситаларига эгалик қилиш, улардан фойдаланиш, уларни тасарруф этиш ва бошқариш соҳасидаги ҳуқуқлари ва вазифаларини, шунингдек берилган ҳуқуқларни бузганлик ва вазифаларини бажармаганлик учун жавобгарлик чораларини белгилайди.

Алоқа Ўзбекистон Республикаси хўжалик ва ижтимоий инфраструктурасининг таркибий қисми бўлиб, аҳолининг, хўжалик субъектларининг, давлат идораларининг почта, телефон, телеграф, радио ва ахборотнинг ўзга турларини узатиш ва қабул қилиш ҳамда алоқа тармоғи орқали жўнатилаётган ашёларни етказиб беришга бўлган эҳтиёжлари қондирилишини таъминлайди.

Почта ва электр алоқа тармоқлари — алоқа соҳасидаги муносабатларнинг объектлари бўлиб, улар почта жўнатмаларини қабул қилиб олиш, ташиш ва кўрсатилган жойга етказиб бериш, шунингдек ахборотларни электр қуввати ва электромагнит нурланишдан фойдаланиб тайёрлаш, узатиш ва қабул қилиш воситаларининг йиғиндиси ҳисобланади.

Ўзбекистон Республикасининг юридик ва жисмоний шахслари, ажнабий юридик шахслар ва фуқаролар алоқа соҳасидаги муносабатларнинг субъектларидир.

Алоқа соҳасидаги муносабатлар ушбу Қонун, Ўзбекистон Республикасининг бошқа қонун ҳужжатлари билан тартибга солиб борилади.

Алоқа соҳасида Ўзбекистон Республикаси Олий Кенгаши ихтиёрига:

алоқа соҳасидаги қонунлар;

алоқа соҳасидаги давлат сиёсатининг асосий қоидаларини белгилаш;

халқаро шартномаларни ратификациялаш;

Ўзбекистон Республикаси Конституциясидан келиб чиқадиган бошқа ваколатларни амалга ошириш киради.

Алоқа соҳасидаги давлат бошқаруви Ўзбекистон Республикаси Президенти ҳузуридаги Вазирлар Маҳкамаси томонидан, шунингдек у ваколат берган идора (Ўзбекистон Республикаси Алоқа вазирлиги) томонидан амалга оширилади.

Ўзбекистон Республикаси Алоқа вазирлиги ўзига бўйсунадиган алоқа воситаларига раҳбарлик қилади, корхоналар, муассасалар, ташкилотлар ва жисмоний шахсларга тегишли бўлган алоқа воситалари фаолиятини мувофиқлаштириб боради, алоқа воситалари устидан давлат техникавий назоратини амалга оширади, мулкчилик шаклидан, кимнинг тасарруфида эканлигидан қатъи назар алоқа корхоналари, ташкилотлари ва муассасалари кўрсатаётган хизмат сифатини текшириб боради.

Почта тўлови белгиларини нашр этиш мутлақ ҳуқуқи Ўзбекистон Республикаси Алоқа вазирлигига тегишлидир.

Ўзбекистон Республикаси ҳудудида мулкчиликнинг якка тартибдаги, жамоа, давлат ва аралаш шаклларига асосланган, шунингдек хорижий юридик шахслар ва фуқаролар эгалигида бўлган аҳолига алоқа хизмати кўрсатувчи корхоналар фаолият кўрсатиши мумкин.

Идоравий, жамоа алоқа тармоқлари ва воситалари, алоҳида шахсларга қарашли алоқа тармоқлари ва воситалари ишлаб турган умумдавлат алоқа тармоғига шартнома асосида, алоқа корхоналарининг белгилаб қўйилган техникавий ва технологик талабларига риоя қилган ҳолда киритилиши мумкин.

Идоравий тармоқлар белгиланган тартибда Ўзбекистон Республикаси Алоқа вазирлиги корхоналарининг балансига ва улар томонидан фойдаланиш ва хизмат кўрсатишга топширилиши мумкин.

Давлат алоқа воситаларини ривожлантириш ва қайта қуриш давлат идораларининг маблағлари, ўз маблағлари, банкларнинг кредитлари, жалб қилинган маблағлар ва Ўзбекистон Республикаси қонунларида ман этилмаган бошқа манбалар ҳисобига амалга оширилади.

Бошқа алоқа воситаларини ривожлантириш, қайта қуриш уларнинг эгалари томонидан ўз маблағлари ва Ўзбекистон Республикаси қонунларида ман этилмаган бошқа манбалар ҳисобига амалга оширилади.

Муайян эгаликдаги ер ҳудудлари, кўприклар, тоннеллар орқали, кўчалардан, иншоотлардан, коллекторлардан, ман этилган ҳудудлардан, ўрмонлардан алоқа коммуникациялари ўтказишда бундай коммуникацияларни ўтказиш шартлари ер эгалари ва ердан фойдаланувчилар ҳамда юқорида қайд этилган объектларнинг эгалари билан келишилади.

Иншоотлар, йўллар, кўприклар ва бошқа объектлар барпо этилаётганда ёки қайта қурилаётганда алоқа тармоқларини қайта жойлаштириш ва кўчириш ишлари қурилиш буюртмачилари томонидан ўз маблағи ҳисобидан ва алоқа коммуникацияларининг эгалари тақдим этган техник шартларга мувофиқ бажарилади.

Даҳа ичкарисидаги алоқа коммуникациялари қурилиш буюртмачилари томонидан лойиҳаланади ва барпо этилади.

Алоқа линиялари бўйлаб, радиотелевизион узатиш станцияларига, радиореле линияларига, бошқа алоқа объектларига туташ ерлардан ажратиб берилган ерлар алоқа воситалари ва тармоқларининг муҳофаза минтақасини ташкил қилади.

Электр алоқа воситалари ва тармоқларининг сақланишини таъминлаш тартиби Ўзбекистон Республикаси қонунлари билан тартибга солиб турилади.

Ўзбекистон Республикаси Конституциясига мувофиқ ёзишма, телефон сўзлашувлари, телеграф хабарларининг сир сақланиши қонун билан муҳофаза этилади.

Ёзишмаларни очиб ўқишга ва ушбу модданинг биринчи қисмида қайд этилган қоидалар бошқача тарзда бузилишига йўл қўйган алоқа ходимлари маъмурий ва жиноий жавобгарликка тортиладилар, Ўзбекистон Республикаси қонунларида кўзда тутилган ҳоллар бундан мустасно.

Ўзбекистон Республикасининг давлат алоқа корхоналари кўрсатадиган хизматларга Ўзбекистон Республикаси норматив ҳужжатларида белгиланган нархлар ва тарифларга мувофиқ ҳақ тўланади.

Алоқа воситаларига мулкчилик ҳуқуқи асосида эгалик қилувчи давлатга қарашли бўлмаган корхоналар ва ташкилотлар, шунингдек жисмоний шахслар ўзлари кўрсатган хизматларга нархлар ва тарифларни мустақил равишда белгилашлари мумкин.

Радиочастоталарни корхоналар, муассасалар, ташкилотлар ва фуқаролар ўртасида тақсимлаш Ўзбекистон почта ва телекоммуникациялар агентлиги томонидан халқаро битимлар асосида амалга оширилади ва электромагнит тўлқинларини тарқатувчи иншоотлар ва воситаларни сотиб олиш, қуриш ва фойдаланиш учун рухсатномалар берилади, шунингдек ушбу иншоотлар ва воситалар иши назорат қилинади.

Ўзбекистон Республикаси ҳудудида тезкор бошқарув ва диспетчерлик алоқа тизимида хизматга оид муомала, шунингдек почта ва телеграф ёзишмаларини йўллаш «Ўзбекистон Республикасининг давлат тили ҳақида»ги Қонуннинг қоидаларига мувофиқ амалга оширилади.

Халқаро ахборот ва жўнатмалар почта ва электр алоқа орқали икки томонлама битимларда, шунингдек халқаро келишув ва битимларнинг қоидаларида белгиланган тилларда жўнатилади.

Маълумотларни узатишнинг технологик жараёнларида Ўзбекистон Республикаси ҳудудида ҳисобга олиш ва ҳисоботга оид ягона вақт — маҳаллий вақт белгиланади.

Маълумотларни узатишнинг халқаро технологик жараёнларида ахборотлар узатиш ва почта жўнатмаларини юборишда ҳисобга олиш ва ҳисоботга оид вақт халқаро келишув ва битимларга мувофиқ белгиланади.

Алоқа корхоналари Ўзбекистон Республикасининг алоқа Уставида, халқаро конвенциялар ва битимларда кўзда тутилган ҳолларда кўрсатилаётган хизмат сифати учун мижозлар олдида моддий жавобгар бўладилар.

Ушбу Қонуннинг талабларини бузишда айбдор бўлган шахслар Ўзбекистон Республикаси қонунларига мувофиқ маъмурий ёки жиноий жавобгар бўладилар.

Ўзбекистон Республикаси алоқа жабҳасида фаолият кўрсатаётган давлатлараро ва халқаро ташкилотлар билан халқаро шартномалар ва битимларга мувофиқ ҳуқуқий, технологик ҳамда молиявий муносабатлар ўрнатади.