Ўзбекистон Республикаси Ҳукумати билан Қозоғистон Республикаси Ҳукумати, бундан кейин Томонлар деб аталувчилар,

алоқа соҳасида ҳамкорликни ривожлантириш истагида,

радиоалоқа, телевидение ва радиоэшиттириш хизматларига талаб даражасини ҳисобга олиб,

Томонлар давлатлари радиохизматларининг ўзаро зарарли халақитларни олдини олиш мақсадида 30.0 — 1000.0 МГц радиочастоталар полосасидаги радиочастота ўзлаштирувларини мувофиқлаштириш зарур деб ҳисоблаб,

Халқаро Электралоқа Иттифоқи (ХЭИ)нинг Радиоалоқа регламентига мувофиқ фаолият юритиб,

Ушбу Битим мақсадларида қуйидаги атамалар:

«чегараолди ҳудуд» — бир Томоннинг давлат радиоэлектрон воситалари бошқа Томон давлат ҳудудида, телевидение ва радиоэшиттиришдан ташқари, ушбу Битимда кўрсатилган халақитларни келтириб чиқариши мумкин бўлган Ўзбекистон Республикаси билан Қозоғистон Республикаси ўртасидаги чегаранинг ҳар икки томонида кенглиги 50 км бўлган Томонлар давлатларининг ҳудудини;

«махфий ахборот» — радиочастота ўзлаштирувларини мувофиқлаштириш жараёнида иштирок этаётган ваколатли давлат органлари билан рухсати чегараланган, Томонларнинг давлат сирига тааллуқли бўлмаган маълумотларни;

«радиочастота ўзлаштирувларини мувофиқлаштириш» — радиоэлектрон воситаларни ишга тушириш ва фойдаланиш учун ушбу радиоэлектрон воситаларнинг радиочастота ўзлаштирувлари хусусиятларига мувофиқ Томонлар розилигини олиш жараёнини англатади.

Томонларнинг ҳамкорлиги халқаро ҳуқуқнинг умум эътироф этилган меъёрлари, Томонлар давлатларининг миллий қонун ҳужжатлари ва ушбу битим қоидалари билан тартибга солинади.

Ушбу Битимни бажариш бўйича назорат қилиш ва ҳаракатларни мувофиқлаштиришни амалга ошириш бўйича Томонларнинг ваколатли органлари қуйидагилар ҳисобланади:

Ўзбекистон томонидан — Ўзбекистон алоқа ва ахборотлаштириш агентлиги;

Қозоғистон томонидан — Ахборотлаштириш ва алоқа бўйича Қозоғистон Республикаси агентлиги.

Томонлар ваколатли органларининг қайта ташкил этилишида расмий номи ўзгарган ҳолда улар бу ҳақда бир-бирларини дипломатик каналлар орқали кечиктирмасдан хабардор этадилар.

Томонларнинг ваколатли органлари:

ушбу Битим доирасида зарур ахборот алмашувини амалга оширадилар;

халақитлар пайдо бўлган ҳолда, уларни аниқлайдилар ва чора кўрадилар;

ушбу Битимни қўллаш доирасида жараён механизмларини белгилайдилар ва қабул қиладилар, мувофиқлаштириш ҳудудини ўрнатадилар;

ушбу Битим доирасида техник асосда радиохизматларнинг радиочастота ўзлаштирувларини мувофиқлаштириш ёки алоҳида радиочастота полосаларидан фойдаланиш бўйича битимларни тузишга оид таклифларни Томонлар давлатларининг миллий қонун ҳужжатларида кўрсатилган тартибда киритадилар.

Томонлар чегараолди ҳудудларда радиохизматларнинг турли хил станцияларининг 30.0 — 1000.0 МГц радиочастота полосасида радиочастоталардан фойдаланишни мувофиқлаштириш масалалари бўйича ушбу Битим қоидаларига мувофиқ ҳамкорлик қиладилар.

1. Ушбу Битимга мувофиқ қуруқликдаги ҳаракатчан, қайд қилинган, радиоэшиттириш ва бошқа радиохизматлар станцияларининг радиочастота ўзлаштирувларини мувофиқлаштириш амалга оширилади.

Томонлар ваколатли органларининг масъулиятига кирмайдиган радиохизматлар станцияларининг радиочастота ўзлаштирувларини мувофиқлаштириш ушбу Битимнинг ажралмас қисми бўлган тегишли баённомалар тузилмагунга қадар ушбу Битим қоидалари билан тартибга солинмайди.

2. 5-моддада кўрсатилган радиочастоталар полосасида, давлатларнинг чегараолди ҳудудларида жойлашган станциялар, шунингдек Томонларнинг ваколатли органлари томонидан тузиладиган мувофиқлаштирувнинг техник асослари бўйича қўшимча битимда тегишли хизматларга белгиланган даражадан юқори бўлган халақитларни чегараолди ҳудудда ҳосил қилган тақдирда чегараолди ҳудудлар ташқарисидаги алоҳида станцияларнинг радиочастота ўзлаштирувлари мувофиқлаштирилади.

3. Чегараолди ҳудудлардаги қабул қилувчи станцияларнинг радиочастота ўзлаштирувларини мувофиқлаштириш уларни халақитлардан муҳофаза этиш зарурияти юзага келган ҳолда амалга оширилиши мумкин.

1. Томонлар қуйидаги радиочастота тоифаларини белгилайдилар:

алоқа тармоқлари (уяли алоқа, радиоэшиттириш тармоқлари, радиореле линиялари ва бошқалар)ни ривожлантириш учун Томонлар давлатларининг ваколатли органлари мувофиқлаштириши лозим бўлган режалаштирилган алоқа тармоқлари радиочастота. Бундай тармоқлар катта маблағларни талаб қилиши, уларни ишга туширишда узоқ муддатлар сарфланиши мумкин ва фақат мувофиқлаштирилган ва тасдиқланган частота-ҳудудий режалар натижасида яратилиши мумкин;

Томонлар мувофиқлаштирган ва фойдаланиш учун келишилган мувофиқлаштирилган радиочастота.

Мувофиқлаштирилган радиочастотани тайинлаш (ўзлаштириш) бошқа Томон билан олдиндан мувофиқлаштирилган шартлар асосида амалга оширилади.

2. Мувофиқлаштирилганлар тоифасидаги радиочастота рўйхатига кирган радиочастота ўзлаштирувлари Томонлар ўзаро келишув асосида амалга оширган деб ҳисобланади.

Ҳар бир Томоннинг барча радиочастота ўзлаштирувлари мувофиқлаштирилган деб қуйидагилар ҳисобланади:

1991 йилгача марказлаштирилган собиқ Совет Иттифоқи алоқа маъмурияти томонидан белгиланган бўлса;

ушбу Битим кучга кириш давригача иккала Томон алоқа маъмуриятлари томонидан мувофиқлаштирилган бўлса;

Халқаро Электралоқа Иттифоқининг Бутунжаҳон ва Минтақавий радиоалоқа конференцияларида қабул қилинган Режаларга киритилган Томонларнинг радиочастота ўзлаштирувлари бўлса.

Битим имзоланиши даврида ХЭИ Ҳафталик циркулярининг биринчи қисмида чоп этилган Томонларнинг радиочастота ўзлаштирувларига берилган талабномалар ушбу Битим қоидаларига кўра мувофиқлаштирилиши лозим.

3. Томонларнинг ҳар бири юқорида кўрсатилган тоифадаги радиочастоталар рўйхатига эга бўлиши ва уларни ўтказилган мувофиқлаштириш асосида тўлдириб бориши лозим.

Томонлар мувофиқлаштирилган радиочастоталар (станциялар) рўйхатлари билан келишилган шаклда алмашадилар. Рўйхатларга фақат чегараолди ҳудудларда жойлашган ёки бу ҳудудларда халақитларни юзага келтираётган станцияларнинг тавсифи киритилади.

Томонлар радиочастоталарининг рўйхатлари, қоидага кўра, ҳар йили Томонлар экспертларининг йиғилишларида аниқлаштирилади.

4. Ушбу Битимнинг 5-моддасида кўрсатилган радиочастоталар полосасидаги Томонларнинг амалдаги станциялари орасида юзага келиши мумкин бўлган халақит вазиятларини Томонлар кўриб чиқадилар ва уларни бартараф этиш чораларини кўрадилар.

Халақит сифатида радиоалоқа хизматининг сифатини жиддий ёмонлашувига олиб келувчи ёки бир неча бор узувчи ёхуд мувофиқлаштирувнинг техник асослари бўйича қўшимча битимда белгиланган халақитнинг максимал йўл қўйилган кучланишлар майдони даражасининг ошиши сабабли унинг фаолиятини тугатувчи ҳар қандай нурланишлар деб ҳисобланиши керак.

1. Томонлар ўртасида ахборот алмашиш тартиби, ахборотнинг махфийлик даражаси ва унинг муҳофазаси, шунингдек ҳар бир муайян ҳолатда ахборотни беришда махфийликни бузганлиги учун масъулият ушбу Битим ва Томонлар давлатларининг миллий қонун ҳужжатлари асосида аниқланади.

2. Томонлар давлатларининг миллий қонун ҳужжатларида ўрнатилган тартибда чегараолди ҳудудларда жойлашган фуқаролик мақсадида ишлаётган радиоэлектрон воситалар бўйича Томонлар фаолияти учун зарур бўлган ҳужжатларни Томонлар бир-бирига топшириш мажбуриятини оладилар.

3. Томонлар ўз фаолиятларида фойдаланиш учун олган махфий ахборотга эга бўлган зарур маълумотларни қатъиян мақсадли ҳолда ишлатишлари шарт. Махфий ахборотдан фойдаланиш ҳуқуқига эга бўлган мутахассислар доираси Томонлар давлатларининг миллий қонун ҳужжатларига мувофиқ, аниқланади. Бунда Томонлар частота ўзлаштирувларининг халқаро мувофиқлаштирувига масъул шахслардан зарур минимал сони махфий ахборотдан фойдаланиш ҳуқуқига эга бўлиш заруриятидан келиб чиқадилар.

4. Махфий ахборотдан фойдаланиш ҳуқуқига эга бўлган шахслар махфий ахборот билан ишлашда Томонлар давлатларида ўрнатилган талабларга риоя қилишга мажбурлар.

5. Томонлар сир сақлаш ва олинган ахборотни ошкора қилмаслик бўйича барча чораларни кўриш мажбуриятини оладилар.

6. Берилаётган ахборот махфийлигининг даражасини ахборотни бераётган Томон белгилайди.

1. Томонларнинг ваколатли органлари алоқа техникасининг тез ривожланиши ва кўрсатилган процедураларини ўз вақтида ўзгартиришлар киритиш зарурияти юзага келгани сабабли техник воситалар ва бошқа масалаларда қўлланиладиган мувофиқлаштиришни ўтказиш процедураларини ишлаб чиқиш ва тасдиқлашга масъул экспертларни тайинлайдилар.

2. Алоқа техникаси тараққиётини ҳисобга олиб, Томонлар мувофиқлаштирувнинг техник асосларини аниқлаш ва келгусида ривожлантириш мақсадида экспертлар йиғилишларини ўтказадилар.

1. Бир Томон унинг учун радиочастоталар рўйхатларида белгиланмаган янги радиочастота ўзлаштирувидан фойдаланишдан олдин ёки мувофиқлаштирилганлар тоифасига кирувчи радиочастоталар рўйхатига ўзгартиш киритишни хоҳласа, у ХЭИ Радиоалоқа регламенти талабларига асосан мувофиқлаштиришни ўтказиши керак.

2. Мувофиқлаштириш учун сўровнома юборилган Томон уни кўриб чиқиши ва 60 кун ичида асосланган ёзма жавоб юбориши лозим. Агар у сўралаётган радиочастота ўзлаштирувидан фойдаланишга рози бўлмаса, муаммони қониқарли тарзда ҳал этиш учун ўз таклифларини бериши керак.

3. Агар мувофиқлаштириш учун ёзма сўров хатини юборган Томон 90 кун ичида ёзма тарзда жавоб олмаса, у бошқа Томоннинг сўралаётган радиочастота ўзлаштирувидан фойдаланишга эътирози йўқ деб ҳисоблайди, уни мувофиқлаштирилган радиочастоталар рўйхатига киритади ва бу ҳақда бошқа Томонни ёзма равишда хабардор этади.

4. Қуйидаги ҳолларда радиочастота ўзлаштирувларини мувофиқлаштириш талаб қилинмайди:

1) агар мувофиқлаштирилган радиочастота ўзлаштирувидан фойдаланувчи станцияда бошқа Томон давлати ҳудудида халақит пайдо бўлишига олиб келмайдиган тавсифларгина ўзгарган бўлса;

2) агар илгари мувофиқлаштирилган радиочастотада ишлайдиган қўшимча станциянинг ишга туширилиши бошқа Томон давлати ҳудудида халақит пайдо бўлишига олиб келмаса.

5. Мувофиқлаштирилган радиочастота ўзлаштирувидан фойдаланувчи асосий станциянинг иши тўхтатилса, бошқа Томонга унинг ўрнига ишга туширилган станциянинг техникавий тавсифи хабар қилинади.

6. Барча ҳолларда, Томонлардан бири мувофиқлаштирилган радиочастота ўзлаштирувлари рўйхатига мувофиқлаштиришни талаб қилмайдиган ўзгартиришлар киритса, жумладан мувофиқлаштирилган станциядан фойдаланишни тўхтатган ҳолда ҳам, у бундай ўзгартиришлар тўғрисида бошқа Томонга хабар беради.

Халақитларни сезаётган қабул қилувчи станциясига эга бўлган Томон ҳудудида халақитларни юзага келтирувчи узатгич станциялар жойлашган бошқа Томонни бу ҳақда хабардор қилади. Томонлар халақитларга тегишли масалаларни ўзаро ҳамжиҳатлик ва ҳамкорлик асосида ҳал этиш учун барча керакли чораларни кўрадилар.

1. Ушбу Битимда кўзда тутилмаган барча масалалар бўйича Томонлар Радиоалоқа Бутунжаҳон конференциялари қоидалари, Радиоалоқа халқаро регламенти ва Халқаро Электралоқа Иттифоқининг тавсияларига амал қиладилар.

2. Ушбу Битим Томонлар иштирок этган халқаро битимларни ва Томонларнинг ҳар бирида радиочастоталардан фойдаланишни тартибга соладиган миллий қонун ҳужжатларининг Томонлар бажаришига тўсқинлик қилмайди.

Ушбу Битим қоидаларини талқин қилиш ёки қўллашда низо ва келишмовчиликлар юзага келган ҳолда Томонлар уларни маслаҳатлашув ва музокаралар йўли билан ҳал этадилар.

Томонлар экспертлар учрашувлари хусусида олдиндан келишиб оладилар, ташкилий масалалар учрашув ўтказиладиган давлат ҳудудидаги Томон ҳал қилади, молиявий масалалар ҳар бир Томон зиммасига юклатилади.

Ушбу Битимга мувофиқ Томонларнинг ўзаро ҳамкорлигида рус тилидан фойдаланилади.

Ушбу Битимга Томонларнинг ўзаро келишувига кўра ушбу Битимнинг ажралмас қисмлари ҳисобланган алоҳида баённомалар билан расмийлаштириладиган ўзгартиш ва қўшимчалар киритилиши мумкин.

Томонларнинг алоқа маъмуриятлари ХЭИ Бош котибини ушбу Битим тузилганлиги ва унинг мазмуни тўғрисида хабардор этадилар.

Ушбу Битим унинг кучга кириши учун зарур бўлган давлат ички процедураларини Томонлар бажарганлиги тўғрисида охирги ёзма хабарнома олинган санадан бошлаб кучга киради.

Битим ноаниқ муддатга тузилади ва Томонлардан бири унинг амал қилишини тўхтатиш нияти тўғрисида бошқа Томонга ёзма хабарномани юборган санадан олти ой ўтгунга қадар ўз кучини сақлаб қолади.

Тошкент шаҳрида 2006 йил 20 мартда икки асл нусхада, ўзбек, қозоқ ва рус тилларида тузилди, бунда барча матнлар бир хил кучга эга.

Ушбу Битимни талқин қилишда келишмовчиликлар юзага келган ҳолда Томонлар рус тилидаги матнга мурожаат қиладилар.