LexUZ шарҳи
Мазкур Шартнома Ўзбекистон Республикаси Олий Мажлисининг 1997 йил 30 августдаги 490–I-сонли «Ўзбекистон Республикаси билан Греция Республикаси ўртасида дўстлик ва ҳамкорлик тўғрисида шартномани ратификация қилиш ҳақида»ги қарори билан ратификация қилинган.
Бундан кейин Юқори Аҳдлашувчи Томонлар деб аталаётган Ўзбекистон Республикаси ва Греция Республикаси,
Ўзбекистон Республикаси билан Греция Республикаси ўртасида кўп томонлама ва ўзаро манфаатли ҳамкорликни ривожлантириш истагини билдириб,
давлатлараро муносабатларни қонуннинг устуворлиги, бирдамлик ва инсон ҳуқуқларини ва асосий эркинликларини ҳурмат қилиш принциплари асосида ривожлантириш зарурлигига ишонч ҳосил қилиб,
Юқори Аҳдлашувчи Томонлар ўзларининг Бирлашган Миллатлар Ташкилоти Низомининг мақсад ва принциплари, Хельсинки Якунловчи актининг, Янги Европа учун Париж хартиясининг ва шунингдек Европада хавфсизлик ва ҳамкорлик ташкилотининг бошқа ҳужжатларининг принцип ва қоидаларига содиқ эканликларини тасдиқлайдилар.
Юқори Аҳдлашувчи Томонлар суверен, тенг ҳуқуқли ва дўстона давлатлар сифатида ўз муносабатларини давлат суверенитетини ва мустақиллигини ўзаро ҳурмат қилиш, тенг ҳуқуқлилик ва бир-бирининг ички ишларига аралашмаслик, куч ишлатмаслик ёки куч билан қўрқитмаслик, мавжуд давлат чегараларининг бузилмаслиги, ҳудуд яхлитлиги, низоларни тинчлик йўли билан ҳал қилиш, инсоннинг ҳуқуқ ва асосий эркинликларини ҳурмат этиш, ўзаро ҳамкорлик қилиш ва халқаро мажбуриятларни виждонан бажариш принципларига амал қилган ҳолда ривожлантирадилар.
Юқори Аҳдлашувчи Томонлар халқаро муносабатларда куч ишлатиш ёки куч билан қўрқитишга йўл қўйиб бўлмаслик ва шунингдек барча халқаро низоларни БМТнинг Низомига мувофиқ тинчлик усуллари билан ҳал қилиш зарурлигини тасдиқлайдилар.
Юқори Аҳдлашувчи Томонлардан ҳар бири бошқа Юқори Аҳдлашувчи Томонга қарши қаратилган бирорта ҳаракат ва тадбирда иштирок этиш ёки қўллаб-қувватлашдан ўзини тутади.
Юқори Аҳдлашувчи Томонлар бор кучларини минтақа ва дунё миқёсида тинчлик, барқарорлик ва хавфсизликни мустаҳкамлашга берадилар.
Юқори Аҳдлашувчи Томонлар дунё ҳамжамиятининг ядро қуроли соҳасида ва оммавий қириб ташлаш қуролининг бошқа турлари соҳасида қуролсизланиш жараёнини ривожлантиришга қаратилган ҳаракатлари доирасида ҳамкорлик қиладилар.
Юқори Аҳдлашувчи Томонлар ўзлари иштирок этадиган халқаро ташкилот ва анжуманлар доирасида ўзаро қизиқиш уйғотадиган масалалар бўйича маслаҳатлашишлар ўтказадилар ва ҳамкорликни кенгайтирадилар.
Юқори Аҳдлашувчи Томонлар ушбу Шартноманинг қоидаларини амалга ошириш мақсадида ўзаро қизиқиш уйғотадиган масалалар бўйича давлатлараро муносабатларнинг турли даражаларида доим алоқа қилиб турадилар.
Улар шунингдек иккала мамлакатнинг ижтимоий ташкилотлари ва фуқаролари ўртасида алоқалар ривожланишига кўмаклашадилар.
Юқори Аҳдлашувчи Томонлар иқтисод, фан ва техника соҳасида ва шунингдек инвестицияларни ўзаро ҳимоя қилиш ва рағбатлантириш соҳасида ҳамкорликни ривожлантирадилар.
Юқори Аҳдлашувчи Томонлар энергетика, саноат, қурилиш, транспорт ва коммуникациялар, қишлоқ хўжалиги, табиий бойликлардан фойдаланиш соҳасида ва шунингдек ўзаро қизиқиш уйғотадиган бошқа соҳаларда яқиндан ҳамкорлик қилишга кўмаклашадилар.
Юқори Аҳдлашувчи Томонлар, миллий қонунларига мувофиқ, икки мамлакатнинг хўжалик юргизаётган субъектлари ўртасида ҳамкорлик ва бевосита алоқа ўрнатишга ва шунингдек қўшма корхоналар тузишга ва ҳамкорликнинг бошқа самарали шаклларига кўмаклашадилар.
Юқори Аҳдлашувчи Томонлар, миллий қонунларига мувофиқ, иккала давлатнинг туристик фаолият билан шуғулланаётган ташкилот, муассаса, компания ва фирмалари ўртасидаги ҳамкорликка кўмаклашадилар.
Юқори Аҳдлашувчи Томонлар фан ва технологиялар соҳасида ҳамкорлик қилишга кўмаклашадилар ва шу мақсадларда қўшма программа ва лойиҳаларнинг амалга оширилишини, олимлар алмашинишини рағбатлантирадилар.
Юқори Аҳдлашувчи Томонлар, иккала мамлакат халқлари ўртасидаги мавжуд маданий алоқалардан келиб чиқиб, маданият, таълим, ахборот ва спорт соҳасида икки мамлакатнинг марказий ва маҳаллий муассасалари, ташкилотлари ва фуқаролари ўртасидаги алоқа ва мулоқотлар ривожини рағбатлантирадилар.
Юқори Аҳдлашувчи Томонлар, экология соҳасида ўзаро манфаатлардан келиб чиқиб, атроф муҳитни муҳофаза қилиш ва яхшилаш, табиий фалокатларни олдиндан айтиб бериш, уларнинг оқибатларининг олдини олиш ва камайтириш соҳасида ва шунингдек бу борада ўзаро қизиқиш уйғотадиган бошқа соҳаларда ҳамкорлик қилишга кўмаклашадилар.
Юқори Аҳдлашувчи Томонлар аҳолининг соғлиғини сақлаш, тиббиёт фанини ва амалиётини ривожлантириш, касалликларнинг олдини олиш соҳасидаги ҳамкорликни қўллаб-қувватлайдилар.
Юқори Аҳдлашувчи Томонлар халқаро жиноятчилик, барча шаклларидаги терроризм, фуқаролар авиацияси, кемачилик ва транспортнинг бошқа турлари хавфсизлигига қаратилган жиноятлар, гиёҳванд моддалар ва қуроллар, маданий ва тарихий бойликларнинг ноқонуний халқаро савдосига қарши курашишда ҳамкорлик қиладилар. Шу мақсадларда, миллий қонунларга мувофиқ, зарурат туғилганда, Томонлар, ўзаро келишиб, алоҳида битимлар тузиш тўғрисидаги масалани кўриб чиқадилар.
Ушбу Шартнома Юқори Аҳдлашувчи Томонларнинг ўзлари иштирок этаётган икки томонлама ва кўп томонлама шартномалардан келиб чиқадиган ҳуқуқ ва мажбуриятларига дахл қилмайди.
Ушбу Шартнома Томонларнинг учинчи давлатлар билан муносабатларига қарши қаратилмаган ва уларга таъсир қилмайди.
Юқори Аҳдлашувчи Томонлар, зарурат туғилганда, ушбу Шартнома қоидаларини амалга ошириш учун алоҳида битимлар тузадилар.
Юқори Аҳдлашувчи Томонлар ушбу Шартномани талқин қилиш ва татбиқ этиш билан боғлиқ масалаларни маслаҳатлашиш ва музокаралар йўли билан ҳал қиладилар.
Ушбу Шартнома ратификация қилиниши лозим ва ратификация ёрлиқлари билан алмашилган куни кучга киради.
Юқори Аҳдлашувчи Томонлар, ўзаро келишган ҳолда, ушбу Шартномага қўшимча ва ўзгартиришлар киритишлари мумкин, улар тегишли протоколлар билан расмийлаштирилади. Бу протоколлар 19-модданинг қоидаларига мувофиқ кучга киради ва ушбу Шартноманинг ажралмас қисми ҳисобланади.
Агар Юқори Аҳдлашувчи Томонлардан бирортаси ҳам тегишли муддатнинг тамом бўлишидан энг камида 6 ой илгари ёзма шаклда ушбу Шартномани бекор қилиш нияти тўғрисида бошқа Томонга хабар қилмаса, Шартноманинг амал қилиши кейинги беш йиллик даврларга ўз-ўзидан чўзилаверади.
Афина шаҳрида 1997 йил 1 апрелда икки нусхада, ҳар бири ўзбек, грек ва инглиз тилларида имзоланди, барча матнлар бир хил кучга эга. Келишмовчилик пайдо бўлганда инглиз тилидаги матн асос қилиб олинади.