Ўзбекистон Республикаси Ҳукумати ва Бирлашган Араб Амирликлари Ҳукумати, кейинчалик «Томонлар» деб аталувчилар,

икки томонлама муносабатларни ривожлантириш, дўстлик алоқаларини мустаҳкамлаш ва самарали ҳамкорликни кенгайтириш йўлида,

кенг миқёсда атроф-муҳит муаммоларини ҳал этиш йўлларини излаб топишни англаган ҳолда атроф-муҳит бошқарувини таъминлаш, иккала давлатнинг ўзаро ҳамкорлиги орқали кўп қиррали ҳамкорликни талаб қилувчи икки Томоннинг турли ва умумий кўринишга эга бўлган экологик муаммоларини англаган ҳолда ва ушбу муаммоларни бартараф этишда Томонларнинг саъй-ҳаракатлари талаб қилинишидан келиб чиққан ҳолда,

шунингдек, атроф-муҳитни муҳофаза қилиш ҳамда унинг сифатини яхшилашга қаратилган фаолиятни юритишни ҳамда Ўзбекистон Республикаси Табиатни муҳофаза қилиш давлат қўмитаси ва Бирлашган Араб Амирликлари Атроф-муҳит ва сув хўжалиги вазирлиги ўртасида атроф-муҳит соҳасига йўналтирилган ўзаро манфаатли ҳамкорликни мустаҳкамлашни тан олиб, Томонларнинг атроф-муҳитни ўзаро муҳофаза қилиш соҳасида Англашув меморандумини қабул қилиш истагида,

Ушбу Меморандум Муқаддимаси унинг барча моддаларини ажралмас қисми сифатида қабул қилинади.

Томонлар атроф-муҳит муҳофазаси ва табиий ресурслардан оқилона фойдаланиш соҳаларидаги маҳаллий, минтақавий ва халқаро миқёсларда ўзаро ҳурмат, тенглик ва манфаатдорлик ҳамда иккала мамлакатнинг атроф-муҳитни муҳофаза қилиш ва иқтисодиёт соҳаларидаги сиёсатларининг фарқланишини инобатга олган ҳолда ҳамкорликни ривожлантиришда иштирок этадилар. Ушбу ҳамкорлик атроф-муҳит муҳофазаси ва табиий ресурслардан самарали фойдаланишнинг ўзаро манфаатли йўналишларини кучайтиришга қаратилган.

Ушбу Англашув меморандуми доирасида амалга ошириладиган ҳамкорлик қуйидаги йўналишларни қамраб олади.

1. Биологик ресурсларни муҳофаза қилиш ва бошқариш.

2. Йўрға тувалоқ, лочин ва шу каби бошқа ноёб ва йўқ бўлиб кетиш хавфи остида бўлган ҳайвонларнинг турларини муҳофаза қилиш.

3. Илмий изланиш ва атроф-муҳитни муҳофаза қилиш мақсадларида табиий парваришхоналар, буюртмахоналар ёки бошқа турдаги муҳофаза этиладиган ҳудудлар ташкил қилиш.

4. «Йўқ бўлиб кетиш хавфи остидаги ёввойи фауна ва флора турларининг халқаро савдоси тўғрисида»ги Конвенция (СIТЕS) қоидаларини қўллаш ва уларга амал қилиш.

5. Экологик тоза муқобил энергия манбааларидан фойдаланиш.

6. Экологик туризмни ривожлантириш.

7. Экологик таълим-тарбия ва ташвиқот тадбирлари.

8. Атроф-муҳитни яхшилаш ва муҳофаза қилишга қаратилган бошқа йўналишлардаги келишилган ҳамкорлик.

Ушбу Меморандумнинг 3-моддасидан келиб чиққан ҳолда ҳамкорлик қуйидаги шаклларда амалга оширилади:

1. Ушбу Меморандумнинг 3-моддасида кўрсатиб ўтилган йўналишлар бўйича қўшма дастурлар ва лойиҳаларни ривожлантириш.

2. Давлатларнинг махфий бўлмаган маълумотлари, материаллари ва изланишлар натижалари билан ўрнатилган тартибда ўзаро алмашиш.

3. Ўзаро маслаҳатлашувлар, экспертлар учрашувлари, маъруза ва мақолаларни нашр этиш, тадқиқот ишлар ҳамда делегациялар ва мутахассислар ташрифларини алмашиш орқали атроф-муҳитни муҳофаза қилиш соҳасида ўзаро тажриба алмашиш.

4. Малака ошириш ва ўқув курслари билан шуғулланувчи қўшма ишчи гуруҳлар ташкил қилиш.

5. Атроф-муҳитни муҳофаза қилиш соҳасидаги қонунчилик базасини такомиллаштириш.

Томонлар ушбу Меморандумнинг асосий йўналишларини белгилайдилар ва биргаликда мазкур Меморандум асосида фаолиятларини мувофиқлаштирадилар ҳамда натижаларни умумлаштирадилар.

Ушбу Меморандум кучга кирган кундан бошлаб, Томонларнинг масъул органлари мазкур Меморандум вазифаларини бажариш мақсадида, ҳамкорликнинг қўшма Дастурини ва уни бажариш юзасидан тадбирлар режасини ишлаб чиқадилар.

Мазкур Меморандумнинг ҳар бир моддасини талқин қилишда юзага келадиган келишмовчиликлар Томонлар ўртасида музокаралар ва учрашувлар орқали ҳал этилади ва бунда инглиз тилидаги матн асос сифатида қаралади.

Ушбу Англашув меморандуми мақсадларини бажаришда ҳар бир Томоннинг моддий ҳолатидан келиб чиққан ҳолда биргаликдаги фаолиятлари натижасига қараб, транспорт ва яшаш харажатларини ҳар бир Томон ўз зиммасига олади.

Мазкур Англашув меморандуми Томонларнинг бошқа давлатлар билан имзолаган халқаро шартномалари ва англашув меморандумларидан келиб чиқадиган ҳуқуқ ва мажбуриятларига дахл қилмайди.

Ушбу Англашув меморандуми Томонлар давлатларининг амалдаги барча қонунчилиги, меъёрий ҳужжатлари, қарорлари ва тизимларига мувофиқ тарзда амалга оширилади.

Мазкур Англашув меморандумига ҳар қандай ўзгартиш ва қўшимчалар Томонларнинг ёзма розилиги асосида киритилади ва ушбу Меморандумнинг ажралмас қисми ҳисобланади.

Ушбу Англашув меморандуми имзоланган кундан бошлаб кучга киради ва беш йил мобайнида амал қилади. Томонлардан бири амалдаги муддат тугашидан камида олти ой илгари бошқа Томонни мазкур Меморандумни амал қилиш муддатини тўхтатиш нияти тўғрисида ёзма равишда хабардор қилмаса, унинг амал қилиш муддати ўз-ўзидан узайтирилаверади.

Мазкур Меморандум амал қилиш муддатининг тўхтатилиши, агар Томонлар бошқача келишмаган бўлсалар, ушбу Меморандумнинг амал қилиш даврида бошланган қўшма дастурларга таъсир қилмайди.

Абу Даби шаҳрида 2008 йил 17 мартда икки асл нусхада, ҳар бири ўзбек, араб ва инглиз тилларида тузилди, бунда барча матнлар бир хил кучга эга. Ушбу Меморандум қоидаларини талқин этишда келишмовчиликлар юзага келган ҳолда, Томонлар учун инглиз тилидаги матн устувор ҳисобланади.