«Ўзбекистон Республикасининг Вазирлар Маҳкамаси тўғрисида»ги Қонунга мувофиқ ҳамда Вазирлар Маҳкамасининг ижро этувчи аппарати таркибий бўлинмаларига раҳбарлик ва улар фаолиятини мувофиқлаштириш даражасини ошириш, таҳлилий материаллар ва ҳукумат қарорларининг лойиҳалари ҳар томонлама, чуқур ҳамда сифатли тайёрланишини таъминлаш, ижрочилик интизомини мустаҳкамлаш, Ўзбекистон Республикаси Президенти ва Ҳукумати қабул қилган қарорлар, Ўзбекистон Республикасининг имзоланган халқаро шартномалари, хорижий мамлакатлар ва халқаро ташкилотлар билан инвестициявий ва ташқи иқтисодий шартномалар ҳамда битимларнинг амалга оширилиши устидан назоратни кучайтириш мақсадида:

1. Ўзбекистон Республикаси Вазирлар Маҳкамасининг ижро этувчи аппарати тузилмасига Ижро этувчи аппарат бошқарувчиси лавозими киритилсин, Вазирлар Маҳкамаси Аппарати раҳбари лавозими тугатилсин.

Белгилансинки, Ўзбекистон Республикаси Вазирлар Маҳкамасининг Ижро этувчи аппарати бошқарувчиси ўз мавқеи, моддий таъминоти; ижтимоий-маиший, транспорт ва тиббий хизмат кўрсатиш шароитлари бўйича вазирга тенглаштирилади, Ўзбекистон Республикаси Президенти Фармони билан лавозимга тайинланади ва озод этилади.

2. Ўзбекистон Республикаси Вазирлар Маҳкамасининг Ижро этувчи аппарати бошқарувчиси зиммасига қуйидаги асосий ваколат ва вазифалар юклатилсин:

Вазирлар Маҳкамасининг ижро этувчи аппарати фаолиятини ташкил этади ва ижро этувчи аппаратга юклатилган вазифаларнинг бажарилиши учун масъул ҳисобланади;

Ўзбекистон Республикаси Президенти Фармон ва қарорлари, Ҳукумат қарорлари лойиҳалари экспертизаси ҳамда сифатли тайёрланишини ташкил этиш бўйича Ўзбекистон Республикаси Бош вазирининг ўринбосарлари билан яқин ҳамкорликда бўлади;

Вазирлар Маҳкамасига киритиладиган норматив-ҳуқуқий ҳужжатларнинг лойиҳаларини, таҳлилий материалларни чуқур ва сифатли тайёрлаш, Ўзбекистон Республикаси Президенти Фармон ва қарорлари, Ўзбекистон Республикаси Ҳукумати қарорлари лойиҳаларини ҳар томонлама экспертизадан ўтказиш мақсадида Вазирлар Маҳкамасининг ахборот-таҳлил департаментлари фаолияти мувофиқлаштирилишини таъминлайди;

Қонунлар, Ўзбекистон Республикаси Президентининг Фармон ва қарорлари, Ўзбекистон Республикаси Вазирлар Маҳкамасининг қарорлари ва фармойишлари, Ўзбекистон Республикасининг халқаро шартномалари ва Ҳукуматда кўриб чиқилиши зарур бўлган бошқа ҳужжатларнинг лойиҳалари Вазирлар Маҳкамасига киритилишида ижро этувчи органлар томонидан белгиланган регламент талабларига риоя этилиши устидан назоратни амалга оширади;

ижро этувчи ҳокимият органлари томонидан ижрочилик интизомини мустаҳкамлаш ҳамда Ўзбекистон Республикаси Президентининг Фармон, қарор ва топшириқлари, Ҳукумат қарорларининг бажарилишини назорат қилиш чора-тадбирларини амалга оширади;

Ўзбекистон Республикаси Ҳукумати ижро этувчи аппаратининг унга бевосита бўйсунувчи таркибий бўлинмалари фаолиятига раҳбарлик қилади, Бош вазир Котибияти ва Бош вазирнинг ўринбосарлари котибиятлари ишини мувофиқлаштиради;

Ҳукумат қарорларига мувофиқ бошқа ваколатларни амалга оширади.

3. Белгилансинки, Вазирлар Маҳкамасининг энг муҳим комплекслар, мамлакат иқтисодиёти тармоқлари ва соҳалари бўйича Ахборот-таҳлил департаментлари ўз фаолиятида тегишли равишда Ўзбекистон Республикаси Бош вазири ва унинг ўринбосарларига бўйсунади ва айни вақтда уларнинг фаолияти Вазирлар Маҳкамаси Ижро этувчи аппарати бошқарувчиси томонидан мувофиқлаштириб борилади.

4. Ўзбекистон Республикаси Вазирлар Маҳкамасининг Юридик бўлими Ҳуқуқий экспертиза ва халқаро шартномалар бошқармаси этиб қайта ташкил қилинсин.

Ҳуқуқий экспертиза ва халқаро шартномалар бошқармасининг асосий вазифалари этиб қуйидагилар белгилансин:

давлат ва хўжалик бошқаруви органлари томонидан Ўзбекистон Республикаси Вазирлар Маҳкамасига киритиладиган қонун ҳужжатлари ҳамда бошқа норматив-ҳуқуқий ҳужжатлар лойиҳаларини ҳар томонлама ҳуқуқий экспертизадан ўтказишни ташкил этиш, қонун ҳужжатлари, Ўзбекистон Республикаси Президентининг Фармон, қарор ва фармойишлари, Ўзбекистон Республикаси Вазирлар Маҳкамаси қарорлари лойиҳаларини тайёрлашда қатнашиш;

Ўзбекистон Республикаси Ҳукумати қонун лойиҳасига оид иш режаларини ишлаб чиқиш ва амалга оширишни ташкил этиш, Ўзбекистон Республикаси Ҳукумати томонидан киритилган қонун лойиҳалари ҳамда бошқа масалалар бўйича Ўзбекистон Республикаси Олий Мажлиси палаталари ва уларнинг қўмиталари билан ўзаро ҳамкорликни таъминлаш;

халқаро шартномалар лойиҳаларини ва халқаро шартномаларни имзолаш, уларга қўшилиш, ратификация қилиш ва тасдиқлашнинг мақсадга мувофиқлиги тўғрисидаги таклифларни экспертизадан ўтказишни ташкил этиш, Ўзбекистон Республикасининг халқаро шартномалари лойиҳаларини тайёрлашда қатнашиш;

стратегик муҳим инвестиция ва ташқи савдо шартномалари (контрактлари)ни тайёрлашда Ўзбекистон Республикаси иқтисодий манфаатлари ҳамда ташқи иқтисодий хавфсизлигига риоя этилишини таъминлаш;

тизимлаштирилган маълумотлар банкини шакллантириш ва олиб бориш ҳамда Ўзбекистон Республикасининг халқаро шартномалари ҳамда Ўзбекистон Республикаси Президентининг хорижий давлатларга қилган ташрифлари, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланган шартномаларнинг амалга оширилиши мониторингини юритиш.

Вазирлар Маҳкамасининг Иқтисодиёт ва ташқи иқтисодий алоқалар масалалари йиғма ахборот-таҳлил департаментининг халқаро шартномаларни экспертизадан ўтказиш бўйича етакчи мутахассис (юрист) лавозими қисқартирилсин.

6. Ўзбекистон Республикаси Бош вазири Ш.М. Мирзиёев зиммасига:

Ўзбекистон Республикаси Вазирлар Маҳкамаси ижро этувчи аппаратининг штат жадвалига мазкур Қарорга мувофиқ ўзгартишлар киритиш;

икки ҳафта муддатда Ўзбекистон Республикаси Вазирлар Маҳкамаси Ижро этувчи аппарати тўғрисида Низом ҳамда Ҳуқуқий экспертиза ва халқаро шартномалар бошқармаси тўғрисидаги Низомни тасдиқлаш;

бир ой муддатда Бошқармани чуқур билим ва амалий иш тажрибасига эга юқори малакали кадрлар билан тўлдириш вазифаси юклансин, бунда шуни назарда тутиш керакки, халқаро шартномаларни экспертизадан ўтказиш ва уларнинг амалга оширилиши мониторинги бўлими мудири лавозимига олий иқтисодий маълумотга эга шахс тайинланади, ушбу бўлимнинг бош мутахассислари эса Ўзбекистон Республикаси Ташқи ишлар вазирлиги тизимида — сиёсий соҳада ҳамкорлик қилиш масалалари бўйича ҳамда Миллий хавфсизлик хизмати тизимида — иқтисодий хавфсизлик соҳасида ҳамкорлик масалалари бўйича иш тажрибасига эга мутахассислардан тайинланадилар.

7. Ўзбекистон Республикаси Ташқи ишлар вазирлиги, Ташқи иқтисодий алоқалар, инвестициялар ва савдо вазирлиги, Адлия вазирлиги, бошқа вазирликлар, идоралар ва ташкилотлар қуйидагиларни:

икки ой муддатда Ҳуқуқий экспертиза ва халқаро шартномалар бошқармасига Ўзбекистон Республикасининг амалдаги халқаро шартномалари матнлари, Ўзбекистон Республикаси Президентининг ташрифлари давомида ҳамда Ўзбекистон Республикаси Ҳукумати номидан имзоланган, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига қилган ташрифлари давомида имзоланган инвестиция ҳамда ташқи савдо шартномаларининг матнлари тақдим этилишини;

халқаро шартномалар тузилишига қараб уларнинг матнларини, шунингдек Ўзбекистон Республикаси Президентининг расмий ташрифлари давомида ҳамда Ўзбекистон Республикаси Ҳукумати номидан имзоланадиган, шунингдек хорижий давлатлар ва ҳукуматлар, халқаро ташкилотлар раҳбарларининг Ўзбекистон Республикасига ташрифлари давомида имзоланадиган инвестиция ҳамда ташқи савдо шартномаларининг матнлари Бошқармага юборилишини;

Бошқарма сўровларига мувофиқ Ўзбекистон Республикасининг халқаро шартномалари, инвестиция ва ташқи савдо шартномаларини бажариш масалалари бўйича зарур материаллар ва ҳужжатлар тақдим этилишини таъминласин.

8. Ўзбекистон Республикаси Вазирлар Маҳкамаси Ижро этувчи аппарати бошқарувчиси Адлия вазирлиги билан биргаликда бир ой муддатда қонун ҳужжатларига ушбу Қарордан келиб чиқадиган ўзгартишлар тўғрисида Вазирлар Маҳкамасига таклифлар киритсин;

9. Мазкур Қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.