Ўзбекистон Республикасининг «Автомобиль йўллари тўғрисида»ги Қонуни (Ўзбекистон Республикаси қонун ҳужжатлари тўплами, 2007 йил, 40-сон, 410-модда), Ўзбекистон Республикаси Президентининг 2006 йил 20 декабрдаги ПҚ-535-сонли «2007-2010 йилларда умумий фойдаланиладиган автомобиль йўллари қурилишини ривожлантириш чора-тадбирлари тўғрисида»ги қарорига (Ўзбекистон Республикаси қонун ҳужжатлари тўплами, 2006 йил, 51-52-сон, 508-модда) мувофиқ буюраман:

1. Илова қилинаётган Шаҳар ва бошқа аҳоли пунктлари кўчаларини, шунингдек хўжаликлараро қишлоқ автомобиль йўлларини таъмирлаш манзилли рўйхатларини шакллантириш ҳамда харажатларини маҳаллий бюджет маблағлари ҳисобидан молиялаштириш (тўловларни амалга ошириш) тартиби бўйича Низом тасдиқлансин.

2. Ушбу Низом Ўзбекистон Республикаси Адлия вазирлигида рўйхатга олинган кундан ўн кун ўтгандан кейин кучга киради.

Ушбу Низом Ўзбекистон Республикасининг «Автомобиль йўллари тўғрисида»ги Қонуни (Ўзбекистон Республикаси қонун ҳужжатлари тўплами, 2007 йил, 40-сон, 410-модда), Ўзбекистон Республикаси Президентининг 2007 йил 12 декабрдаги ПҚ-744-сонли «Ўзбекистон Республикасининг 2008 йилги асосий макроиқтисодий кўрсаткичлари ва давлат бюджети параметрлари тўғрисида»ги қарори (Ўзбекистон Республикаси қонун ҳужжатлари тўплами, 2007 йил, 52-сон, 534-модда), 2006 йил 20 декабрдаги ПҚ-535-сонли «2007—2010 йилларда умумий фойдаланиладиган автомобиль йўллари қурилишини ривожлантириш чора-тадбирлари тўғрисида»ги қарорига (Ўзбекистон Республикаси қонун ҳужжатлари тўплами, 2006 йил, 51-52-сон, 508-модда) ва Ўзбекистон Республикаси Вазирлар Маҳкамасининг 2006 йил 1 ноябрдаги 226-сонли «Умумий фойдаланиладиган автомобиль йўлларини қуриш ва улардан фойдаланишни ташкил этишни ҳамда сифатини назорат қилишни такомиллаштириш тўғрисида»ги қарорига (Ўзбекистон Республикаси қонун ҳужжатлари тўплами, 2006 йил, 45-сон, 442-модда) мувофиқ тегишли шаҳар ва туман ҳокимликлари тасарруфида бўлган шаҳар ва бошқа аҳоли пунктлари кўчаларини, шунингдек хўжаликлараро қишлоқ автомобиль йўлларини таъмирлаш манзилли рўйхатларини шакллантириш ҳамда харажатларини маҳаллий бюджет маблағлари ҳисобидан молиялаштириш (тўловларни амалга ошириш) тартибини белгилайди.

1. Шаҳар ва бошқа аҳоли пунктлари кўчаларини, шунингдек хўжаликлараро қишлоқ автомобиль йўлларини (бундан кейин матнда — автойўллар) сақлаш ва таъмирлаш тегишли шаҳар ва туман ободонлаштириш бошқармалари ёки автойўллар балансида бўлган бошқа ташкилотлар (бундан кейин матнда — Буюртмачи ёки Бюджет маблағларини олувчи) томонидан амалга оширилади.

2. Автойўлларни таъмирлаш қуйидаги турга бўлинади:

мукаммал таъмирлаш;

жорий таъмирлаш.

3. Муайян автойўл (автойўл участкаси) бўйича амалга ошириладиган таъмирлаш ишлари тури ва ҳажмини аниқлаш Ўзбекистон Республикаси Вазирлар Маҳкамасининг 2006 йил 1 ноябрдаги 226-сонли «Умумий фойдаланиладиган автомобиль йўлларини қуриш ва улардан фойдаланишни ташкил этишни ҳамда сифатини назорат қилишни такомиллаштириш тўғрисида»ги қарори билан тасдиқланган Умумий фойдаланиладиган автомобиль йўлларини таъмирлаш ва сақлаш ишлари таснифига асосан амалга оширилади.

4. Автойўлларни мукаммал таъмирлаш ишлаб чиқилган, давлат экспертизасидан ўтказилган ва ўрнатилган тартибда тасдиқланган лойиҳа-смета ҳужжатларига асосан амалга оширилади ҳамда таъмирланаётган автойўл участкасининг тўла узунлигида автойўлнинг барча қурилмалари ва таркибий қисмлари бўйича кенг қамровли бажарилиши шарт.

Автойўлни транспорт-фойдаланиш ҳолатини техник текшириш натижаси бўйича аниқланган қуйидаги ҳолатлар мукаммал таъмирлаш учун мезон ҳисобланади:

йўл қопламасининг мустаҳкамлилик даражаси йўл қўйилиши мумкин бўлган даражагача камайиб кетиши;

автойўл ва йўл қурилмаларининг бошқа таркибий қисм параметрлари ҳамда тавсифлари ортиб бораётган йўл ҳаракати талабларини қониқтирмай қолиши ва ушбу ҳолатларни автойўлларни оддий сақлаш ишлари ёрдами билан талаб даражасига келтиришнинг имконияти бўлмаса ёки иқтисодий жиҳатдан мақсадга мувофиқ эмас деб топилса.

6. Автомобиль йўллари жорий таъмирлаш техник текширишлар ва техник кўриклар (баҳорги, кузги ва даврий) натижалари ёки нуқсонлар ведомостлари асосида тузилган бажариладиган ишларга қараб ўрнатилган тартибда тасдиқланган лойиҳа-смета ҳужжатлари ёки харажатлар сметалари доирасида амалга оширилади.

7. Буюртмачи томонидан ҳар йили автойўлларнинг ҳолатини техник кўрикдан ўтказиш ва баҳолаш амалга оширилади. Бунинг натижасида нуқсон далолатномалари ва мукаммал ҳамда жорий таъмирлаш (бундан кейин матнда — автойўлларни таъмирлаш) манзилли рўйхатлари тузилади.

8. Автойўлларни таъмирлаш манзилли рўйхатларини шакллантиришда Ўзбекистон Республикаси Молия вазирлигининг 2001 йил 19 сентябрда 107-сонли буйруғи билан тасдиқланган Давлат бюджети маблағлари ҳисобига амалга оширилаётган бинолар ва иншоотларни мукаммал таъмирлашни маблағ билан таъминлаш ва манзилли рўйхатларни шакллантириш тартиби тўғрисидаги Низомга (қайд этилган сана ва рақами 2001 йил 3 октябр, 1073-сон, Ўзбекистон Республикаси вазирликлари, давлат қўмиталари ва идораларининг меъёрий ҳужжатлари бюллетени, 2001 йил, 19-сон, Ўзбекистон Республикаси қонун ҳужжатлари тўплами, 2004 йил, 1-2-сон, 23-модда) асосан амалга оширилади.

9. Маҳаллий бюджет маблағлари ҳисобидан молиялаштириладиган автойўлларни таъмирлаш манзилли рўйхатлари буюртмачи томонидан, молия идораларида рўйхатга олинган харажатлар сметасида кўзда тутилган маблағлар доирасида, ҳар йили шакллантирилади.

10. Автойўлларни таъмирлаш манзилли рўйхатларини тузишда қуйидагилар ҳисобга олинади:

молиялаштириш манбаи мавжудлиги;

ўрнатилган тартибда тасдиқланган лойиҳа ҳужжатлари, ресурс сметасини инобатга олган ҳолда, ёки нуқсон далолатномаларига асосан таъмирланадиган автойўллар бўйича бажариладиган ишлар рўйхати;

автойўлларни таъмирлаш ишларини асосан ҳисобот йили давомида амалга оширилиши.

Манзилли рўйхатга қуйидагилар ҳам киритилиши лозим:

ўтган йил манзилли рўйхатига киритилган ва таъмирланиши якунланмаган автойўл объектлари;

ўтган йил манзилли рўйхатига киритилган ҳамда бажарилган ишлар, хизматлар, етказиб берилган материал ва жиҳозлар учун кредитор қарздорлик мавжуд бўлган объектлар.

11. Мукаммал таъмирланадиган автойўллар бўйича лойиҳа ҳужжатлари, ресурс сметасини инобатга олган ҳолда, ўрнатилган тартибда тасдиқланади.

Жорий таъмирланадиган автойўллар бўйича бажариладиган ишлар рўйхати нуқсон далолатномалари асосида тузилади.

Жорий таъмирлаш бўйича иш ҳажмлари техник ҳисоб-китоб ва муҳандислик изланишлар олиб боришни талаб этадиган алоҳида қийин ишларни бажаришда автойўлларни жорий таъмирлаш техник текшириш, техник кўрикдан ўтказиш натижаси асосида ишлаб чиқилган, соҳа ва давлат экспертизасидан ўтказилган ва ўрнатилган тартибда тасдиқланган лойиҳа-смета ҳужжатларига мувофиқ амалга оширилади.

12. Автойўлни таъмирлаш учун лойиҳа ҳужжатларини ишлаб чиқиш ва уларни таркиби қонун ҳужжатларида ўрнатилган тартибда, Ўзбекистон Республикаси Давлат архитектура ва қурилиш қўмитасининг 2003 йил 29 декабрдаги 89-сонли буйруғи билан тасдиқланган Шаҳарсозлик нормалари ва қоидалари «Корхона, бино ва иншоатларни капитал қуришда лойиҳа ҳужжатларининг таркиби ҳамда ишлаб чиқиш, келишиш ва тасдиқлаш тартиби»га (ШНҚ 1.03.01-03) мувофиқ аниқланади.

Лойиҳа-смета ҳужжати ва лойиҳада қабул қилинган ечимнинг деталлаштирилганлик даражаси қабул қилинаётган техник ечимларни, лойиҳанинг ҳажми ва қийматини асослаш учун етарли бўлиши ҳамда йўл-таъмир ишларини лозим даражадаги сифатда, ҳаракат хавфсизлигини таъминлаган ҳолда бажаришни таъминлаши лозим.

13. Автойўлларни таъмирлаш бўйича лойиҳа ҳужжатларини, ресурс сметасини ҳисобга олган ҳолда, ёки бажариладиган ишлар рўйхатини ўрнатилган тартибда ишлаб чиқиш ва тасдиқлатиш Буюртмачи томонидан жорий йилнинг 1 мартигача амалга оширилади.

14. Бюджет маблағларини олувчилар (Буюртмачилар) томонидан туман ва шаҳар ҳокимликлари молия бўлимлари билан келишилган ҳолда шакллантирилган, маҳаллий бюджет маблағлари ҳисобидан молиялаштириладиган автойўлларни таъмирлаш манзилли рўйхатлари жорий йил 15 мартгача туман ва шаҳар ҳокимликларига кўриб чиқиш учун киритилади ҳамда уларнинг қарорлари билан тасдиқланади.

15. Автойўлларни таъмирлашнинг тасдиқланган манзилли рўйхатлари ўн кун муддатда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига тақдим этилади. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Молия вазирлиги билан келишган ҳолда ҳудуд бўйича (туман ва шаҳарлар кесимида) умумлаштирилган манзилли рўйхатни тузади. Коммунал хизмат кўрсатиш соҳасини ривожлантириш ишларига масъул ҳоким ўринбосари котибиятлари ушбу манзилли рўйхат ижросини мониторинг қилиб боради.

16. Таъмирлаш манзилли рўйхатини шакллантиришда бюджет маблағларига бўлган эҳтиёж ўтган йилда ишлатилмаган аванс бўйича дебитор қарздорлик ва буюртмачи томонидан сотиб олинган материал-техник ресурслар қийматини айириб ташлаган ҳолда кўрсатилади.

17. Автойўлларни мукаммал таъмирлашни, шунингдек автойўлларни жорий таъмирлаш, иш ҳажмлари лойиҳа-смета ҳужжатлари асосида аниқланган бажарувчи пудратчи ташкилотни танлаш Буюртмачи томонидан тендер савдоси асосида, жорий таъмирлашни амалга оширишда эса мустақил равишда пудратчиларнинг таклифларини танлов асосида танлаш орқали амалга оширилади.

18. Тендер савдосини ташкил этиш ва ўтказиш Буюртмачининг маблағлари ҳисобидан амалга оширилади ҳамда бу харажатлар савдо предмети қийматига олиб борилади.

19. Йил давомида манзилли рўйхатга қўшимча объектларни киритишга авария ҳолатлари юзага келганда, ҳамда ушбу ишлар учун қўшимча молиялаштириш манбаи мавжудлиги тасдиқланганда йўл қўйилади.

Агар қўшимча молиялаштириш манбаи мавжуд бўлмаса, автойўлларни таъмирлаш манзилли рўйхатига, қўшимча киритилаётган объектни ҳисобга олган ҳолда, ушбу мақсадлар учун кўзда тутилган маблағлар доирасида аниқлик киритилади.

20. Мукаммал ва жорий таъмирлаш ишларини молиялаштириш (тўловларини амалга ошириш) тартиби Ўзбекистон Республикаси Вазирлар Маҳкамасининг 2003 йил 12 сентябрдаги 395-сонли «Капитал қурилишда хўжалик муносабатлари механизмини такомиллаштириш чора-тадбирлари тўғрисида»ги қарорига (Ўзбекистон Республикаси қонун ҳужжатлари тўплами, 2003 йил, 17-18-сон, 146-модда. Ўзбекистон Республикаси Ҳукумати қарорлари тўплами, 2003 йил, 9-сон, 83-модда) асосан амалга оширилади.

21. Автойўлларни таъмирлаш ишларини молиялаштириш (тўловларини амалга ошириш) манбалари маҳаллий бюджет маблағлари ва қонунчиликда таъқиқланмаган бошқа манбалар ҳисобланади.

22. Давлат бюджетининг ғазначилик ижроси шароитида Буюртмачилар ўрнатилган тартибда харажатлар учун тўловларни Ўзбекистон Республикаси Молия вазирлиги Ғазначилигининг (бундан кейин матнда — Ғазначилик) тегишли ҳудудий бўлинмалари орқали амалга оширади. Бунда Буюртмачилар таъмирлаш харажатларига тўловни амалга ошириш учун талаб этиладиган барча ҳужжатларни ўрнатилган тартибда Ғазначилик бўлинмасига тақдим этадилар.

23. Автойўлларни таъмирлаш харажатларини молиялаштириш (тўловларни амалга ошириш) қатъий равишда тасдиқланган бюджет маблағлари доирасида, Буюртмачи харажатлари сметасининг 4-гуруҳида шу мақсадлар учун кўзда тутилган харажатлар Давлат бюджети харажатлари функционал таснифига мувофиқ қуйидаги бўлим, кичик бўлим ва боблар орқали амалга оширилади:

7 045 201 110 — шаҳар ободонлаштириш бошқармасининг шаҳар автомобиль йўлларини таъмирлаш харажатлари;

7 045 202 110 — шаҳар ободонлаштириш бошқармасининг хўжаликлараро (қишлоқ) автомобиль йўлларини таъмирлаш харажатлари;

7 045 203 110 — туман ободонлаштириш бошқармасининг туман марказлари автомобиль йўлларини таъмирлаш харажатлари;

7 045 204 110 — туман ободонлаштириш бошқармасининг хўжаликлараро (қишлоқ) автомобиль йўлларини таъмирлаш харажатлари;

7 045 205 110 — туман ободонлаштириш бошқармасининг шаҳар посёлкалари автомобиль йўлларини таъмирлаш харажатлари.

24. Манзилли рўйхатга киритилган, лекин ўрнатилган тартибда лойиҳа ҳужжатларини, ресурс сметаларини инобатга олган ҳолда, ёки бажариладиган ишлар рўйхатини тасдиқланиши таъминланмаган автойўллар бўйича бажарилган ишларни молиялаштиришга (тўловларини амалга оширишга) йўл қўйилмайди.

25. Тасдиқланган ва келишилган автойўлларни таъмирлаш манзилли рўйхатлари, шунингдек, ойма-ой тақсимланган харажатлар сметалари Буюртмачилар томонидан Ғазначиликнинг тегишли ҳудудий бўлимларига ва хизмат кўрсатувчи банкларга тақдим қилинади.

26. Пудрат ташкилотлари томонидан бажарилган иш ҳажмлари лойиҳа-смета ҳужжатлари асосида аниқланган мукаммал таъмирлаш, шунингдек объектлар бўйича жорий таъмирлаш ишларини молиялаштириш (тўловлари) Буюртмачи томонидан амалга оширилади.

бўнак тўловлар — биринчи икки ой давомида жорий йилда бажариладиган ишлар қийматининг 30 фоиз миқдорини тенг улушларга бўлган ҳолда;

жорий молиялаштириш (тўловларни амалга ошириш) — ажратилган бўнак тўловларини ойма-ой мутаносиб равишда чегириб қолишни ҳисобга олган ҳолда, ҳақиқатда бажарилган иш ҳажмининг 95 фоизидан кам бўлмаган қисми. Қолган 5 фоиз миқдордаги қисми, шартномада кўрсатилган, кафолат муддати тугаганидан сўнг амалга оширилади.

27. Автойўлларни жорий таъмирлашни молиялаштириш (тўловларни амалга ошириш) (мазкур Низомнинг 26-бандида назарда тутилган объектлардан ташқари) жорий йил иш ҳажмининг 15 фоиз миқдорида бўнак бериш йўли билан, кейинчалик ажратилган бўнак тўловларини мутаносиб равишда ушлаб қолишни ҳисобга олган ҳолда ойма-ой молиялаштириш орқали амалга оширилади.

28. Автойўлларни таъмирлаш бўйича бажарилган иш учун Буюртмачининг пудрат ташкилотлари билан ҳисоб-китоблари, ўрнатилган тартибда расмийлаштирилган бир ойда бажарилган ишларни қабул қилиш далолатномалари асосида, бажарилган иш миқдори (қилинган харажатлар) тўғрисидаги ўрнатилган тартибда расмийлаштирилган ҳисобварақ-фактуралар (маълумотномалар) бўйича амалга оширилиши лозим.

29. Буюртмачилар ҳар чоракда автойўлларни таъмирлаш манзилли рўйхатларини келишган тегишли ҳудудий молия идораларига шартномавий нархларда маблағларни ўзлаштиришнинг бориши, шунингдек манзилли рўйхатга мувофиқ объектлар кесимида молиялаштириш тўғрисида ҳисобот топширади.

30. Манзилли рўйхатга киритилган автойўллар бўйича лойиҳа ҳужжатларини, ишлар рўйхатини тасдиқланиши ҳамда тендер савдоларини ўтказилиши тўғрилигини, бюджет маблағларини мақсадли сарфланганлиги, тасдиқланган лойиҳа ҳужжатлари асосида олиб борилаётган таъмирлаш ишлари ҳажми ва сифати устидан назорат қилиш давлат бошқаруви маҳаллий органлари ва Буюртмачилар томонидан амалга оширилади.

31. Автойўлларини таъмирлашга ажратилаётган бюджет маблағларини мақсадли сарфланишини назорат қилиш Ўзбекистон Республикаси Молия вазирлиги Назорат-тафтиш бош бошқармасининг ҳудудий бўлимлари томонидан амалга оширилади.

32. Автойўлларни мукаммал таъмирлашда, шунингдек автойўлларни жорий таъмирлаш, иш ҳажмлари лойиҳа-смета ҳужжатлари асосида аниқланган бажарилган иш сифати, қурилиш меъёри ва қоидаларига риоя қилиниши устидан назорат Буюртмачилар, лойиҳа ташкилотлари ва Давархқурилишназоратнинг ҳудудий инспекциялари томонидан, жорий таъмирлаш ишлари бажарилганда эса давлат бошқаруви маҳаллий органлари ва Буюртмачилар томонидан амалга оширилади.

33. Назорат ўлчови ва ҳисоб-китоб ҳужжатларини текшириш натижасида бажарилган ишлар ҳажми ва қийматини қўшиб ёзиш ҳолати аниқланганда, шу ҳолат ортиқча маблағ олинишига олиб келган бўлса, ортиқча олинган маблағ пудрат ташкилотидан ўрнатилган кетма-кетлик тартибида ундириб олинади. Фош қилинган қўшиб ёзиш ҳолати учун жавобгарлик қонун ҳужжатларида ўрнатилган тартибда аниқланади.

34. Мазкур Низом талабларига риоя қилинмаганлиги учун объектларни балансда сақловчи корхона раҳбарлари жавобгар ҳисобланади.

35. Ушбу Низом Ўзбекистон Республикаси Давлат архитектура ва қурилиш қўмитаси ва «Ўзавтойўл» ДАК билан келишилган.