Ўзбекистон Республикасининг «Ўзбектуризм» Миллий компанияси ва Қирғиз Республикасининг саноат, савдо ва туризм вазирлиги (қуйида «Томонлар» деб аталувчилар),

икки мамлакат ўртасида дўстлик ришталарини янада ривожлантириш мақсадида, ҳамда 1996 йил 24 декабрда Тошкент шаҳрида имзоланган Ўзбекистон Республикаси ва Қирғиз Республикаси ўртасида абадий дўстлик тўғрисидаги Шартнома бандларига асосланган ҳолда,

Буюк Ипак йўлида жойлашган иккала мамлакат ижтимоий-иқтисодий ривожланишида ҳамда Марказий Осиёда ягона иқтисодий ва туристик ҳудуд яратишда туризмнинг муҳим аҳамиятга эга эканлигини инобатга олган ҳолда,

Ўзбекистон ва Қирғизистон халқлари ўртасидаги анъанавий алоқаларнинг, кўп асрлик маданий меросларининг яқин эканлигини инобатга олган ҳолда, ҳамда туризм соҳасидаги ҳамкорликни янада кучайтириш мақсадида,

халқаро ҳуқуқнинг умумэътироф этилган тамойилларига асосланган ҳолда,

қуйидагилар тўғрисида келишиб олдилар:

Томонлар халқаро туристик ҳамжамиятда ўз мамлакатларини танитиш мақсадида, ҳамда ўз фуқароларининг икки мамлакат ва хорижий мамлакатлар иқтисодий, ижтимоий ва маданий ютуқлари, табиати ва ёдгорликлари, тарихий обидалари ва Марказий Осиё халқларининг урф-одатлари билан танишуви йўлида туризм соҳасидаги ўзаро ҳамкорликни ривожлантирадилар.

Томонлар, ўз мамлакатларининг миллий қонунчилигига амал қилган ҳолда, халқаро туризмни ривожлантириш соҳасида фаолият олиб борадиган ўзбек ва қирғиз ташкилотлари, бирлашмалар ва компаниялари ўртасида ўзаро ҳамкорликни кучайтириш ва ривожлантириш учун имконият яратиб берадилар.

Томонлар ўртасидаги ҳамкорлик алоқалари қуйидаги жараёнлар орқали амалга оширилади:

1. Сайёҳларга хизмат кўрсатишга қаратилган ўзаро ҳамкорликдаги тадбирлар;

2. Қўшма инвестицион лойиҳаларнинг татбиқ этилиши;

3. Ўзаро мутахассислар алмашинуви;

4. Туристик ярмарка ва кўргазмалар ташкил этилиши;

5. Икки мамлакатнинг бирида (Томонлар келишувига кўра) қўшма мажлислар ва музокаралар ўтказилиши.

Томонлар тенглик ва ўзаро манфаатдорлик асосида, икки мамлакат сайёҳлик тартибларига асосланган ҳолда ўзаро сайёҳлар алмашинуви жараёнини яхшилаш учун туризм соҳасидаги ҳамкорликни ривожлантирадилар.

Томонлар Ўзбекистон ва Қирғизистонга ташриф буюрадиган сайёҳлар оқимини кўпайтириш мақсадида реклама материалларини нашр қиладилар, Томонлар ўртасида туристик маълумотлар, бошқа мамлакатлар билан туризм соҳасидаги ҳамкорликни бошқариб турадиган ҳуқуқий ҳужжатлар, фильмлар алмашинувини ўзаро рағбатлантирадилар.

Томонлар икки мамлакатнинг туризм соҳасидаги кадрларини ўқитиш ва тайёрлашда бир-бирларига кўмак кўрсатадилар, туризм ташкилотларининг мутахассислари билан ўзаро алмашадилар. Туризм соҳасига оид инвестицион дастурларнинг бажарилиши борасида ўзаро ҳамкорлик ишларини амалга оширадилар.

Томонлар туризмга сармоялар жалб қилиш соҳасида ҳамкорлик қиладилар, шу мақсадда мутахассислар алмашадилар, қўшма музокаралар ўтказадилар, туризм соҳасига оид бўлган идоралар ва бошқа манфаатдор ташкилотлар ўртасида қўшма корхоналар ташкил қилиш ва бошқа лойиҳаларни амалга оширишга қаратилган ҳамкорлик алоқаларини рағбатлантирадилар. Бундан ташқари, Томонлар ушбу Битимни амалга оширишда юзага келадиган масалаларни муҳокама қилиш мақсадида қўшма ишчи гуруҳлар тузадилар.

Томонлар ўзаро туристик алоқаларнинг ҳолатини аниқлаш ва ҳамкорлик йўналишларини белгилаб олиш мақсадида туристик ташкилотлар ва бирлашмалар вакилларидан иборат бўлган қўшма ишчи гуруҳ тузишга келишиб олдилар.

Ушбу Битимга Томонларнинг ўзаро розилиги билан ўзгартириш ва қўшимчалар киритилиши мумкин. Ушбу ўзгартириш ва қўшимчалар мазкур Битимнинг ажралмас қисми ҳисобланадиган алоҳида баённомалар билан расмийлаштирилади ва Битимнинг 10-моддасида кўрсатилган тартибга асосан кучга киради.

Ушбу Битим имзоланган санадан бошлаб кучга киради ва уч (3) йил давомида амал қилади. Агар Томонларнинг бири Битим муддати тугашидан уч (3) ой олдин унинг фаолиятини тўхтатиш тўғрисидаги ҳужжатни тақдим этмаса, ушбу Битимнинг муддати ўз-ўзидан кейинги уч (3) йиллик муддатларга узайтирилади.

Битим Тошкент шаҳрида 2006 йил 3 октябрда икки асл нусхада, ҳар бири ўзбек, қирғиз ва рус тилларида тузилди, бунда барча матнлар бир хил кучга эга. Талқин этишда келишмовчиликлар юзага келган ҳолда, Томонлар рус тилидаги матнга мурожаат қиладилар.